|
|
 |
| (GMT+08:00)
2006-07-05 16:07:44
|
 |
|
ສຽງເພງທີ່ມາຈາກພູພຽງຫິມະ
cri
Author: mo
|
ສະບາຍດີທ່ານຜູ້ຟັງທີ່ເຄົາລົບ, ຂ້າພະເຈົ້າແມ່ນແສງແກ້ວ, ຊົມເຊີຍທ່ານຮັບຟັງລາຍການຢ່ອນອາລົມໃນວັນເສົາຂອງວິທະຍຸສາກົນແຫ່ງປະເທດຈີນ. ເຜົ່າຕິເບດແມ່ນໜຶ່ງໃນ 56 ຊົນເຜົ່າຂອງຈີນ, ມີປະຊາກອນປະມານ 4 ລ້ານກວ່າຄົນ, ຕົ້ນຕໍອາໃສຢູ່ພູພຽງຊິງຫາຍຕິເບດ ພາກຕາເວັນຕົກສຽງໃຕ້ຂອງຈີນ. ໃນວິວັດທະນາການປະຫວັດສາດອັນຍາວນານ, ສິ່ງແວດລ້ອມພູມສາດຂອງພູພຽງໄດ້ເຮັດໃຫ້ເຜົ່າຕິເບດຈໍ່ຕົວເປັນວັດທະນະທຳເຂດຫິມະທີ່ມີສີສັນພິເສດຂອງຕົນແລະເຮັດໃຫ້ຄົນຝັກໄຝ່ປາຖະໜາຫາ. ມື້ນີ້ ຄືວັນທີ 1 ກໍລະກົດແມ່ນມື້ທຳອິດທີ່ທາງລົດໄຟຊິງຫາຍຕິເບດທົດລອງແລ່ນລົດ. ໃນລາຍການມື້ນີ້, ຂໍໃຫ້ພວກເຮົາເຂົ້າສູ່ພູພຽງຊິງຫາຍຕິເບດໃນທ່າມກາງສຽງເພງທີ່ອອນຊອນ, ໄປສຳຜັດຊີວິດທີ່ມີຫຼາກຫຼາຍສີສັນຂອງປະຊາຊົນເຜົ່າຕິເບດ.
ເພງ"mu ge"ແປວ່າ ເພງລ້ຽງສັດ ທີ່ດັງຫອງແລະອອນຊອນຂອງເຜົ່າຕິເບດໄດ້ພາທ່ານໄປຮອດພູພຽງຊິງຫາຍຕິເບດທີ່ກວ້າງໃຫຍ່ສຸດສາຍຕາ. ຊາວລ້ຽງສັດຢູ່ເທິງພູພຽງໄດ້ຖືທ້ອງຟ້າເປັນມ່ານ, ເອົາທີ່ດິນເປັນຜ້າກັ້ງ. ເພງລ້ຽງສັດນີ້ ໄດ້ບັນທຶກຊີວິດທ່ຽວລ້ຽງສັດຂອງພວກເຂົາເຈົ້າ, ແລະກໍແມ່ນວິທີໜຶ່ງຂອງພວກເຂົາເຈົ້າທີ່ສະແດງຄວາມດີໃຈ ຄວາມຄຽດຊັງ ຄວາມໂສກເສົ້າແລະຄວາມມ່ວນຊື່ນ. ເພງທີ່ທ່ານພວມຟັງຢູ່ນີ້ກໍແມ່ນເພງທີ່ຊາວລ້ຽງສັດຂອງເຂດພາກເໜືອຕິເບດມັກຮ້ອງໃນເວລາປ່ອຍລ້ຽງສັດ.
ປະຊາຊົນເຜົ່າຕິເບດຕົ້ນຕໍດຳລົງຊີວິດຢູ່ເຂດພູພຽງທີ່ສິ່ງແວດລ້ອມທຳມະຊາດລຳບາກ, ນີ້ເຮັດໃຫ້ພວກເຂົາເຈົ້າມີມານະຈິດອັນໜຽວແໜ້ນໃນການດຳລົງຊີວິດ, ມີຮ່າງກາຍອັນແຂງແຮງ, ແລະຮູບການຜະລິດແລະແບບແຜນດຳລົງຊີວິດທີ່ມີເອກະລັກພິເສດ. ແຕ່ກ່ອນ, ເຂດເຜົ່າຕິເບດປຸກເຮືອນ, ສ້າງພື້ນເຮືອນນັ້ນ, ຕ້ອງໃຊ້ດິນອາກາທີ່ມີສະເພາະແຕ່ຢູ່ເຂດດັ່ງກ່າວ, ພື້ນເຮືອນທີ່ສ້າງດ້ວຍດິນຊະນິດນີ້ໝັ້ນຄົງທົນທານ, ຍາມໜາວອົບອຸ່ນ, ຍາມຮ້ອນເຢັນສະບາຍ. ໃນເວລາຕີອາການັ້ນ, ຄົນທັງຫຼາຍຢືນເປັນສອງແຖວຫຼືອ້ອມເປັນວົງມົນ, ມືຈັບໄມ້ຄ້ອນທີ່ມີດ້າມຫີນ, ທັງຕີທັງຟ້ອນລຳທຳເພງໄປນຳ, ສຽງເພງມ່ວນ, ຈັງຫວະຈະແຈ້ງ, ມີກິລິຍາເປັນເອກະພາບກັນ, ທັງມີທ່າທາງທີ່ສວຍງາມ, ຜູ້ຊົມຢູ່ທາງຂ້າງຍາກທີ່ຈະຈຳແນກໄດ້ວ່າພວກເຂົາເຈົ້າແມ່ນພວມອອກແຮງງານທີ່ໜັກໜ່ວງ, ຫຼືພວມສະແດງການຟ້ອນລຳທີ່ສວຍງາມ.
ຕໍ່ໄປ ພວກເຮົາມາຟັງເພງອອກແຮງງານ da qiang ge ສ້າງຝາເຮືອນ ຂັບຮ້ອງໂດຍທ້າວອາຕົ່ງ ນັກຮ້ອງເຜົ່າຕິເບດ. ເນື້ອເພງມີຄວາມໝາຍວ່າ: ຜູ້ສາວຜູ້ບ່າວມາຊ່ອຍເຫຼືອ, ພວກເຮົາມາສ້າງຝາເຮືອນນຳກັນ, ເຈົ້າຕີແລ້ວຂ້ອຍຕີ, ສ້າງເປັນເຮືອນຫຼັງໃໝ່, ເຮືອນໃໝ່ຄົນໃໝ່ເປັ່ງສີສັນ, ດຳລົງຊີວິດຢ່າງສຸກສັນມ່ວນຊື່ນ.
ເຜົ່າຕິເບດແມ່ນຊົນເຜົ່າທີ່ຊ່າງຟ້ອນລຳທຳເພງ, ບໍ່ວ່າໃນຊີວິດປະຈຳວັນ, ຫຼືໃນຍາມບຸນ, ຄົນທັງຫຼາຍມັກຖືການຟ້ອນລຳທຳເພງເປັນການເຄື່ອນໄຫວລື້ນເລິງທີ່ສຳຄັນ, ສະນັ້ນ, ໃນທ່າມກາງປະຊາຊົນເຜົ່າຕິເບດມີເພງພື້ນເມືອງທີ່ມີຫຼາຍສີຫຼາຍສັນສືບຕໍ່ກັນມາ.
ທ່ານຜູ້ຟັງ, ທີ່ທ່ານພວມຟັງຢູ່ນີ້ແມ່ນເພງ gui lai ແປວ່າກັບມາ, ເຊິ່ງເປັນເພງດອຍເຜົ່າຕິເບດ. ເພງດອຍເຜົ່າຕິເບດດັງຫອງອອນຊອນ, ມີຈັງຫວະເສລີ, ມີທຳນອງເພງກວ້າງ, ບຶດສູງບຶດຕ່ຳ, ເຕັມໄປດ້ວຍສີສັນພູພຽງ. ເພງນີ້ແມ່ນນາງຈົ່ງຢົງໂຈມາ ນັກຮ້ອງເຜົ່າຕິເບດຮ້ອງດ້ວຍພາສາຕິເບດ. ເນື້ອເພງໄດ້ວາດພາບອ້າຍບ່າວຜູ້ໜຶ່ງກັບມາຈາກທາງໄກ, ໄດ້ນຳເອົາຂອງຂວັນອັນລ້ຳຄ່າຫຼາຍໆຢ່າງມາໃຫ້ຜູ້ສາວທີ່ຕົນຮັກ, ເພື່ອສະແດງຄວາມຮັກຂອງຕົນ.
ການມອບຜ້າ"ຮາດາ"ແມ່ນປະເພນີຊະນິດໜຶ່ງຂອງປະຊາຊົນເຜົ່າຕິເບດ, ໃນງານດອງ, ງານສົ່ງສະການ, ການສະຫຼອງວັນບຸນ, ການໄປຢາມຜູ້ອາວຸດໂສ, ແລະຕ້ອນຮັບຂັບສູ້ເປັນຕົ້ນ, ລ້ວນແຕ່ຈະມີປະເພນີມອບຜ້າ"ຮາດາ". "ຮາດາ"ແມ່ນຜ້າແພຊະນິດໜຶ່ງ, ແຕ່ບູຮານນະການມານີ້, ຊາວເຜົ່າຕິເບດເຫັນວ່າ, ສີຂາວເປັນສັນຍະລັກໃຫ້ແກ່ຄວາມບໍລິສຸດແລະສິລິມຸງຄຸນ, ສະນັ້ນ, ທຳມະດາແລ້ວ, "ຮາດາ"ແມ່ນສີຂາວ. ໃນເວລາມອບຜ້າ"ຮາດາ", ຕ້ອງກົ້ມຫົວ, ເອົາສອງມືຍື່ນໃຫ້, ເພື່ອສະແດງຄວາມເຄົາລົບແລະຄວາມຈິງໃຈ. ຜູ້ຮັບຜ້າ"ຮາດາ"ກໍຕ້ອງກົ້ມຫົວ, ເອົາສອງມືຮັບເອົາ, ເພື່ອສະແດງຄວາມຂອບໃຈ.
ທ່ານຜູ້ຟັງ, ທີ່ທ່ານພວມຟັງຢູ່ນີ້ແມ່ນເພງ"yang guang ha da" ຂັບຮ້ອງໂດຍນາງໂກວາ ເຈ່ຍມາວຈີ ນັກຮ້ອງເຜົ່າຕິເບດ. ເນື້ອເພງມີຢູ່ວ່າ: ຂ້ອຍຮ້ອງເພງປິນຂຶ້ນພູຫິມະໄລ, ຖັກຜ້າ"ຮາດາ"ສີຄຳດ້ວຍແສງຕາເວັນທີ່ສິລິມຸງຄຸນ, ຊູຮາດາຂຶ້ນກໍແມ່ນຊູຄວາມຮັກແພງອັນເລິກເຊິ່ງເພື່ອມອບໃຫ້ປິຕຸພູມທີ່ແສນຮັກ, ແມ່ທີ່ແສນເຄົາລົບຮັກ.
ເຜົ່າຕິເບດມີວັນບຸນທີ່ມີເອກະລັກພິເສດຂອງຕົນຢ່າງຫຼວງຫຼາຍ, ເຊັ່ນປີຈັນທະຄະຕິຕິເບດ, ບຸນວ້າງໂກ, ແລະບຸນເສຕຸ້ນເປັນຕົ້ນ. ຢູ່ຕິເບດ, ນອກຈາກປີຈັນທະຄະຕິຕິເບດແລ້ວ, ມື້ຄຶກຄື້ນກວ່າໝູ່ກໍແມ່ນບຸນວ້າງໂກ. ໃນພາສາຕິເບດ, "ວ້າງ"ແປວ່າ"ໄຮ່ນາ", "ໂກ"ແປວ່າ"ຫັນປິ່ນ", ສະນັ້ນ, "ວ້າງໂກ"ກໍແມ່ນວັນບຸນທີ່ປະຊາຊົນເຜົ່າຕິເບດຂໍໃຫ້ໄດ້ຮັບຜົນເກັບກ່ຽວກະສິກຳຢ່າງອຸດົມສົມບູນ. ຕໍ່ໄປ, ເຊີນຟັງເພງ"wang guo jie" ບຸນວ້າງໂກ.
ເນື້ອເພງມີຄວາມໝາຍວ່າ: ແສງຕາເວັນຄ້ອຍຄ່ຳສາດສ່ອງໃສ່ໜອງຢາງໂຈ່ຢົ່ງ, ນິຄົມລ້ຽງສັດມີສຽງເພງມ່ວນຊື່ນດັງຂຶ້ນ, ໃນວັນບຸນວ້າງໂກທີ່ຈັດຂຶ້ນປີລະເທື່ອ, ພູພຽງໄດ້ປ່ຽນຊຸດທີ່ສວຍງາມ. ງົວຈາມມະລີໄດ້ສົ່ງຄວາມມ່ວນຊື່ນມາໃຫ້, ຜູ້ບ່າວຜູ້ສາວຟ້ອນລຳ"ໂກ່ຈ່ວງ", ຄົນທັງຫຼາຍທີ່ອອກແຮງງານພວມຮ້ອງເພງ, ຂີ່ມ້າອາຊາໄນແລ່ນໄປຫາຄວາມໄຝ່ຝັນ.
ເຜົ່າຕິເບດແມ່ນຊົນເຜົ່າທີ່ມັກແຂກມັກຄົນແລະເອື້ອເຟື້ອເພື່ອແຜ່. ເມື່ອຮອດຍາມບຸນແລະເຕົ້າໂຮມມ່ວນຊື່ນກັບພີ່ນ້ອງນັ້ນ, ລ້ວນແຕ່ມັກດຶ່ມເຫຼົ້າຢ່າງມ່ວນຊື່ນ, ເວລານັ້ນ, ຄົນທັງຫຼາຍມັກຮ້ອງເພງຊວນກິນເຫຼົ້າ. ທຳນອງເພງມ່ວນຊື່ນອອນຊອນ, ເນື້ອເພງສ່ວນຫຼາຍແມ່ນອວຍພອນແລະຍ້ອງຍໍເປັນຕົ້ນ. ມ້ວນທ້າຍລາຍການມື້ນີ້, ເຊີນຟັງເພງ"qing man jiu ge" ຄວາມຮັກເຕັມຈອກເຫຼົ້າ ຂັບຮ້ອງໂດຍທ້າວຢົງຈົ່ງເອີຈາ ນັກຮ້ອງເຜົ່າຕິເບດ.
ເນື້ອເພງມີຢູ່ວ່າ: ຝົນຕົກໃນລະດູບານໃໝ່ຕ້ອງຕົກໃຫ້ຫຼາຍ, ເພື່ອນມິດກິນເຫຼົ້າຕ້ອງກິນໃຫ້ພໍ, ເຫຼົ້າຫອມໄດ້ເຈືອປົນຄວາມຮັກແພງຂອງຂ້ອຍ, ສອງມືຍົກຈອກເຫຼົ້າສູງກວ່າຫົວ. ຮ້ອງເພງເຫຼົ້າຈົນເດືອນເຕັມດວງ, ນົກບິນມາແລ້ວບໍ່ຢາກໜີ, ຮາດາຕິດຕໍ່ໃຈທຸກດວງ, ຂໍໃຫ້ຄວາມຮັກແພງກັນຍືນຍົງຈົນຊົ່ວຟ້າດິນສະຫຼາຍ.
ທ່ານຜູ້ຟັງທີ່ເຄົາລົບ, ລາຍການຢ່ອນອາລົມໃນວັນເສົາມື້ນີ້ຂໍຈົບລົງທໍ່ນີ້, ຄິດວ່າທ່ານຄົງຈະຮູ້ຈັກຮີດຄອງປະເພນີຂອງພູພຽງຊິງຫາຍຕິເບດໃນລະດັບອັນແນ່ນອນໃນທ່າມກາງສຽງເພງແລ້ວຕິ? ຖ້າມີໂອກາດ, ຂໍໃຫ້ທ່ານຈົ່ງຂີ່ລົດໄຟໄປຕາມທາງລົດໄຟຊິງຫາຍຕິເບດ, ໄປສຳຜັດຕົວຈິງ, ເຊື່ອວ່າທ່ານຄົງຈະເບີກບານມ່ວນຊື່ນຕະຫຼອດທາງ. ຂອບໃຈທ່ານທີ່ຮັບຟັງ, ພົບກັນໃໝ່ໃນວັນເສົາໜ້າ.ສະບາຍດີ.
|
|
|
