|
ວັນທີ1ກໍລະກົດປີນີ້,ທາງລົດໄຟຊິງໄຫຕິເບດ ເຊິ່ງເປັນທາງລົດໄຟທີ່ສູງຈາກລະດັບທະເລຫຼາຍກວ່າໝູ່ໃນໂລກໄດ້ທົດລອງແລ່ນລົດແລ້ວ.ຍ້ອນວ່າມີບັນຫາຫຍຸ້ງຍາກລະດັບໂລກ ເຊັ່ນ"ດິນກ້າມຫຼາຍປີ""ໜາວຈັດແລະຂາດອັອກຊີແຊນ"ເປັນຕົ້ນ,ກ່ອນໜ້ານີ້,ມີຜູ້ຊ່ຽວຊານຕ່າງປະເທດຈົນກະທັ້ງວິນິດໄສວ່າ,ການກໍ່ສ້າງທາງລົດໄຟຢູ່ເທິງພູພຽງຊິງໄຫຕິເບດນັ້ນແມ່ນເລື່ອງເປັນໄປບໍ່ໄດ້.ແຕ່ວ່າ,ຜູ້ກໍ່ສ້າງທາງລົດໄຟຂອງຈີນໄດ້ຜ່ານຜ່າຄວາມຫຍຸ້ງຍາກຕ່າງໆ,ປູທາງລົດໄຟເສັ້ນນີ້ຢູ່ເທິງຫຼັງຄາໂລກ.ໃນລາຍການສວນວິທະຍາສາດແລະການສຶກສາພາກນີ້,ພວກເຮົາຈະພາທ່ານໄປເບິ່ງວ່າ ທາງລົດໄຟຊິງໄຫຕິເບດແມ່ນສ້າງສຳເລັດແນວໃດ.
(ປ່ອຍດົນຕີ)ທີ່ທ່ານພວມຟັງຢູ່ນີ້ແມ່ນເພງທ່ຽນລູ້ ແປວ່າ ທາງຟ້າ,ແມ່ນເພງທີ່ເຜີຍແຜ່ຢ່າງກວ້າງຂວາງຢູ່ພູພຽງຊິງໄຫຕິເບດຂອງຈີນ.ກໍຄືເນື້ອຮ້ອງຂອງເພງນີ້ທີ່ວ່າ:ນີ້ແມ່ນທາງຟ້າເສັ້ນໜຶ່ງທີ່ອັດສະຈັນ.ແມ່ນແທ້,ໃນຂະບວນການກໍ່ສ້າງທາງລົດໄຟຊິງໄຫຕິເບດ,ໄດ້ປະເຊີນກັບຫຼາຍບັນຫາຫຍຸ້ງຍາກລະດັບໂລກ.ຕອນແຕ່ເກີເອີມູ້ຫາລາຊາຂອງທາງລົດໄຟຊິງໄຫຕິເບດຍາວ1142ກິໂລແມັດ,ມີເກືອບເຄິ່ງໜຶ່ງຕ້ອງຜ່ານເຂດດິນກ້າມຫຼາຍປີ.ອັນທີ່ວ່າດິນກ້າມໝາຍເຖິງຫີນແລະດິນປະເພດຕ່າງໆທີ່ມີອູນຫະພູມຕ່ຳກວ່າ0ອົງສາແລະມີນ້ຳກ້າມ.ໃຕ້ສະພາບທີ່ຈັບເປັນນ້ຳກ້ອນ,ບໍລິມາດຂອງດິນກ້າມຈະໂພງຂຶ້ນ;ແຕ່ເມື່ອຮອດລະດູຮ້ອນ,ດິນກ້າມຈະລະລາຍ,ບໍລິມາດຈະຫົດເຂົ້າ.ທ່ານລິນລັນເຊິງ ນັກວິສາວະກອນຊັ້ນສູງຂອງບໍລິສັດໃຫຍ່ສ້າງທາງລົດໄຟຈີນ ເຊິ່ງເປັນໜຶ່ງໃນບັນດາໜ່ວຍງານທີ່ກໍ່ສ້າງທາງລົດໄຟຊິງໄຫຕິເບດບອກນັກຂ່າວວ່າ,ດິນກ້າມມີຜົນຮ້າຍຫຼາຍຕໍ່ການກໍ່ສ້າງທາງລົດໄຟ.
ທ່ານເວົ້າວ່າ:"ຕົວຢ່າງຄື,ຖ້າຕອກເສົາຂົວຫຼືພື້ນເຮືອນຢູ່ເທິງດິນກ້າມຊະນິດນີ້,ພໍຮອດລະດູໜາວ,ມັນໂພງຂຶ້ນ,ສິ່ງກໍ່ສ້າງຢູ່ເທິງດິນກ້າມກໍຈະຖືກຜົນສະທ້ອນ;ເມື່ອຮອດລະດູຮ້ອນ,ດິນກ້າມລະລາຍ,ພື້ນດິນແລະຂົວລ້ວນແຕ່ຈະຍຸບລົງ."
ດິນກ້າມແມ່ນບັນຫາລະດັບໂລກ.ເວົ້າທົ່ວໄປແລ້ວ,ໃນເວລາແລ່ນຜ່ານເຂດດິນກ້າມ,ລົດໄຟມີແຕ່ແລ່ນດ້ວຍຄວາມໄວ50ກິໂລແມັດຕໍ່ຊົ່ວໂມງໄດ້ທໍ່ນັ້ນ.ຢູ່ປະເທດຕ່າງໆ ເຊັ່ນຣັດເຊຍແລະການາດາເປັນຕົ້ນລ້ວນມີບັນຫາດິນກ້າມ,ແຕ່ດິນກ້າມຂອງປະເທດເຫຼົ່ານີ້ຢູ່ບ່ອນເສັ້ນຂະໜານສູງ,ຂ້ອນຂ້າງໝັ້ນທ່ຽງ.ແຕ່ເຂດດິນກ້າມທີ່ທາງລົດໄຟຊິງໄຫຕິເບດຂ້າມຜ່ານນັ້ນຢູ່ບ່ອນເສັ້ນຂະໜານຕ່ຳ,ສູງກວ່າລະດັບນ້ຳທະເລຫຼາຍ,ມີແສງແດດກ້າ,ບວກກັບພູພຽງຊິງໄຫຕິເບດມີການເຄື່ອນໄຫວດ້ານອົງປະກອບເລື່ອຍໆ,ດິນກ້າມແຫ່ງນີ້ຈະສັບສົນແລະພິເສດກວ່າບ່ອນໃດໝົດ.
ຄັນຊັ້ນ,ທາງລົດໄຟຊິງໄຫຕິເບດແມ່ນແກ້ໄຂບັນຫາດັ່ງກ່າວແນວໃດ?ຜູ້ກໍ່ສ້າງທາງລົດໄຟຂອງຈີນໄດ້ສະເໜີຄວາມຄິດຂອງຕົນ.ພວກເຂົາເຈົ້າໄດ້ຕື່ມຊັ້ນຫີນແຜ່ນທີ່ໜາ1ແມັດກວ່າໃສ່ຢູ່ລະຫວ່າງໜ້າດິນກັບດິນກ້າມ,ພວກວິສາວະກອນເອີ້ນຊັ້ນຫີນແຜ່ນຊັ້ນນີ້ເປັນ"ດິນປັບອາກາດ".ທ່ານລິນລັນເຊິງຂອງບໍລິສັດໃຫຍ່ສ້າງທາງລົດໄຟຈີນບອກນັກຂ່າວວ່າ,ທີ່ຈິງແລ້ວ,"ດິນປັບອາກາດ"ຊະນິດນີ້ແມ່ນພື້ນທາງອັນພິເສດ.
ທ່ານເວົ້າວ່າ:"ຊັ້ນຫີນແຜ່ນທີ່ໜາປານນີ້ມີລັກສະນະພິເສດຫຍັງແດ່?ຄວາມຮ້ອນມີຈຸດພິເສດຄືຂຶ້ນໄປຂ້າງເທິງ,ຖ້າອູນຫະພູມຢູ່ພາຍນອກສູງ,ອາຍຮ້ອນກໍຈະບໍ່ຜ່ານຊັ້ນນີ້ລົງລຸ່ມແລ້ວກະທົບກະເທືອນເຖິງດິນກ້າມ.ກົງກັນຂ້າມ,ເມື່ອຮອດລະດູໜາວແລ້ວ,ອູນຫະພູມຢູ່ເທິງໜ້າດິນຕ່ຳກວ່າອູນຫະພູມຢູ່ໃຕ້ດິນ,ອາຍເຢັນຢູ່ຂ້າງເທິງ,ອາຍຮ້ອນຢູ່ໃຕ້ດິນ,ເມື່ອເປັນແນວນີ້,ອາຍຮ້ອນກໍຈະຂຶ້ນໄປຂ້າງເທິງ,ອາຍເຢັນລົງໄປໃຕ້ດິນ,ແລ້ວເຮັດໃຫ້ພື້ນທາງແໜ້ນກວ່າເກົ່າ."
ຍ້ອນວ່າຕົ້ນທຶນຂອງພື້ນທາງທີ່ກໍ່ດ້ວຍຫີນແຜ່ນຖືກສົມຄວນ,ສະນັ້ນ,ປະຈຸບັນນີ້,ທາງຂອງທາງລົດໄຟຊິງໄຫຕິເບດມີພື້ນທາງ110ກວ່າກິໂລແມັດໄດ້ໃຊ້ອົງປະກອບໃໝ່ດັ່ງກ່າວ.
ວິທີທີ່ດີອີກວິທີໜຶ່ງທີ່ແກ້ໄຂບັນຫາດິນກ້າມແມ່ນໃຊ້ຂົວເຂົ້າແທນທາງ.ຢູ່ຕາມທາງລົດໄຟຊິງໄຫຕິເບດ,ສິ່ງທີ່ໄວ້ຄວາມປະທັບໃຈເລິກເຊິ່ງທີ່ສຸດແມ່ນມີຂົວຫຼາຍ.ທາງລົດໄຟຊິງໄຫຕິເບດມີຂົວຍາວ150ກວ່າກິໂລແມັດ.ການໃຊ້ຂົວມາເຂົ້າແທນທາງຢ່າງຂະໜາດໃຫຍ່ປານນີ້ແມ່ນຄັ້ງປະຖົມມະເລີກໃນໂລກ.ທ່ານລິນລັນເຊິງຂອງບໍລິສັດໃຫຍ່ສ້າງທາງລົດໄຟຈີນເວົ້າວ່າ:"ເສົາຂົວໃນທາງລົດໄຟຊິງໄຫຕິເບດຝັງຢູ່ໃຕ້ດິນ20ຫາ30ກວ່າແມັດ,ຝັງຢູ່ໃຕ້ຊັ້ນດິນກ້າມຖາວອນ.ເມື່ອເປັນແນວນີ້,ດິນກ້າມລະລາຍແລະໂພງຂຶ້ນຈະບໍ່ມີຜົນສະທ້ອນຫຍັງເລີຍຕໍ່ພື້ນທາງ."
ນອກຈາກບັນຫາດິນກ້າມ,ການກໍ່ສ້າງທາງລົດໄຟຊິງໄຫຕິເບດຍັງຕ້ອງປະເຊີນກັບສິ່ງແວດລ້ອມທຳມະຊາດອັນໂຫດຫ້າຍ.ການເຮັດແນວໃດຮັກສາສຸຂະພາບແລະຄວາມປອດໄພຂອງຜູ້ກໍ່ສ້າງໄດ້ກາຍເປັນບັນຫາຍາກທີ່ຕ້ອງການແກ້ໄຂດ່ວນ.ຢູ່ບ່ອນກໍ່ສ້າງທາງລົດໄຟຊິງໄຫຕິເບດ,ອູນຫະພູມຕ່ຳສຸດລົບ45ອົງສາ,ແຕ່ລະປີມີ100ມື້ຫາ160ມື້ລົມແຮງຫຼາຍ.ນອກນີ້,ຢູ່ອຸໂມງພູເຟີ່ງຫົວຂອງທາງລົດໄຟຊິງໄຫຕິເບດ ເຊິ່ງເປັນອຸໂມງທີ່ສູງຈາກລະດັບນ້ຳທະເລຫຼາຍກວ່າໝູ່ໃນໂລກ,ປະລິມານອັອກຊີແຊນຢູ່ຫັ້ນມີແຕ່50%ຂອງບ່ອນຕ່ຳ.ບັນຫາຂາດອັອກຊີແຊນໄດ້ກາຍເປັນອຸປະສັກໃຫຍ່ກວ່າໝູ່ທີ່ກີດຂວາງຂະບວນການກໍ່ສ້າງ,ທັງແມ່ນເລື່ອງທີ່ຜູ້ກໍ່ສ້າງວິຕົກກັງວົນທີ່ສຸດ.
ເພື່ອແກ້ໄຂບັນຫາດັ່ງກ່າວ,ທຳອິດ,ຜູ້ກໍ່ສ້າງໝົດທຸກຄົນລ້ວນແຕ່ຖືບັ້ງອັອກຊີແຊນບັ້ງໜຶ່ງໄປກໍ່ສ້າງຢູ່ອຸໂມງ,ແຕ່ວ່າບັ້ງອັອກຊີແຊນໜັກຫຼາຍ,ເຮັດໃຫ້ຜູ້ກໍສ້າງຕ້ອງເປືອງແຮງຫຼາຍ.ສະນັ້ນ,ໜ່ວຍງານກໍ່ສ້າງໄດ້ໃຊ້ວິທີໃໝ່.ທ່ານຕີ່ງໂສຊວນທີ່ຮັບຜິດຊອບບັນຊາການກໍ່ສ້າງອຸໂມງພູເຟີ່ງຫົວແນະນຳວ່າ:"ພວກເຮົາໄດ້ສ້າງ2ສະຖານີຜະລິດອັອກຊີແຊນຂະໜາດໃຫຍ່ຢູ່ສອງສົ້ນອຸໂມງ,ເພື່ອສະໜອງອັອກຊີແຊນເຂົ້າໄປອຸໂມງຕະຫຼອດ24ຊົ່ວໂມງ,ເຊິ່ງໄດ້ຕາບຈູນບ່ອນຫວ່າງຂອງເຕັກນິກຜະລິດອັອກຊີແຊນຢູ່ບ່ອນຈາກລະດັບທະເລຫຼາຍໃນໂລກ."
ທ່ານຕີ່ງໂສຊວນບອກນັກຂ່າວວ່າ,ຍ້ອນໄດ້ໃຊ້ວິທີໃໝ່ສະໜອງອັອກຊີແຊນ,ອັດຕາເປັນພະຍາດພູພຽງໄດ້ຫຼຸດລົງ94%.ເຕັກນິກຜະລິດອັອກຊີແຊນທີ່ໄດ້ໃຊ້ຢູ່ອຸໂມງພູເຟີ່ງຫົວນັ້ນໄດ້ເຜີຍແຜ່ຢູ່ທາງລົດໄຟຊິງໄຫຕິເບດໝົດສາຍ,ຄືໄດ້ສ້າງສະຖານີຜະລິດອັອກຊີແຊນ10ກວ່າແຫ່ງຢູ່ທາງລົດໄຟໝົດສາຍ,ອັນໄດ້ສ້າງພື້ນຖານອັນໝັ້ນແກ່ນໃຫ້ແກ່ການກໍ່ສ້າງທາງລົດໄຟຊິງໄຫຕິເບດຢ່າງສະດວກ.ຍ້ອນວ່າໄດ້ແກ້ໄຂບັນຫາກົກຮາກ ຄື ຂາດອັອກຊີແຊນຢູ່ເທິງພູພຽງ,ສະນັ້ນ,ໃນການກໍ່ສ້າງທາງລົດໄຟຊິງໄຫຕິເບດ,ຈຶ່ງບໍ່ມີຜູ້ໃດຕາຍຍ້ອນຂາດອັອກຊີແຊນຢູ່ເທິງພູພຽງ.
|
