ຕາມຂ່າວສານຊິນຮວາ: ວັນທີ 7 ກໍລະກົດ ຢູ່ທີ່ປັກກິ່ງ, ທ່ານຕູ້ຊິງລິນ ລັດຖະມົນຕີ​ກະຊວງ​ກະ​ສິ​ກຳ​ຈີນ​ເຜີຍ​​ໃຫ້​ຮູ້​ວ່າ, ​ຄາດ​ຄະ​ເນ​ວ່າ ທັນ​ຍາ​ຫານ​ທີ່​ຈີນເກັບ​ກ່ຽວ​ໃນ​ລະດູ​ຮ້ອນ​ປີ​ນີ້​ເພີ່ມ​ຂຶ້ນ​ຫຼາຍ​ກວ່າ​ປີ​ກາຍ 5 ລ້ານ​ກວ່າ​​ໂຕນ, ​ອັດຕາເພີ່ມຂ້ອນ​ຂ້າງສູງ.

ຢູ່​ຈີນ, ທັນ​ຍາ​ຫານ​ທີ່​ເກັບ​ກ່ຽວ​ໃນ​ລະດູ​ຮ້ອນ​ຕົ້ນຕໍ​ແມ່ນ​ເຂົ້າ​ເບຼ​ແລະ​ໝາກ​ຖົ່ວ​ບາງ​ຊະ​ນິດ. ​ໃນ​ກອງ​ປະຊຸມ​ເທື່ອ​ໜຶ່ງ, ທ່ານ​ຕູ້​ຊິງ​ລິນ​ກ່າວ​ວ່າ, ເນື້ອ​ທີ່​ປູກທັນ​ຍາຫານ​ທີ່​ເກັບ​ກ່ຽວ​ໃນ​ລະ​ດູ​ຮ້ອນ​ຂອງ​ຈີນ​​ໃນປີ​ນີ້ ​ໄດ້​ເພີ່ມ​ຂຶ້ນຫຼາຍກວ່າ​ປີ​ກາຍ, ​ເຂົ້າ​ເບຼຄຸນ​ນະ​ພາບ​ດີ​ເພີ່ມ​ຂຶ້ນ​ຂ້ອນ​ຂ້າງ​ຫຼາຍ. ​ແຕ່​ຜົນ​ຜະລິດ​ທັນ​ຍາຫານ​ຕົ້ນຕໍ​ແມ່ນ​ເຂົ້າ​ເປືອກຂອງ​ຈີນ​ສ່ວນ​ຫຼາຍ​ແມ່ນ​​ເກັບ​ກ່ຽວ​ໃນ​ລະ​ດູ​ໃບ​​ໄມ້ຫຼົ່ນ. ປັດຈຸບັນ ການຜະ​ລິດ​ເຂົ້າດໍ​ມີ​ທ່ວງທ່າ​ດີ, ທ່ວງ​ທ່າ​​ເຕີບ​​ໃຫຍ່​ສັງ​ລວມ​ຂອງ​ທັນ​ຍາ​ຫານ​ທີ່​ເກັບ​ກ່ຽວ​ໃນ​ລະດູ​ໃບ​ໄມ້ຫຼົ່ນ​​ເປັນ​ປົກກະຕິ.

​ແຕ່​ປີ 2000 ​ເຖິງ​ປີ 2003, ຜົນ​ຜະລິດ​ທັນ​ຍາ​ຫານຂອງ​ຈີນ​ໄດ້ຫຼຸດລົງ 4 ປີລຽນຕິດ. ​ໃນ 2 ປີ​ມາ​ນີ້, ຜົນ​ຜະລິດ​ທັນ​ຍາ​ຫານ​ຂອງ​ຈີນ​ໄດ້​ເພີ່ມ​ຂຶ້ນຄູ່​ປີ, ຍອດ​ປະລິມານຜົນ​ຜະ​ລິດ​ທັນ​ຍາ​ຫານ​ໃນ​ປີ 2005 ລື່ນ​ກາຍ 480 ລ້ານ​ໂຕນ, ການ​ສະໜອງ​ແລະ​ຄວາມ​ຕ້ອງການ​ດ້ານ​ທັນ​ຍາ​ຫານ​ແມ່ນ​ດຸນ​ດຽງ​ກັນ.