|
ອົງການນິຕິບັນຍັດຂອງແຂວງຟູຈ້ຽນຈີນພວມພິຈາລະນາກົດບັນຍັດທ້ອງຖິ່ນສະບັບໜຶ່ງ,ເພື່ອກຳນົດການໃຊ້ພາສາຈີນໃຫ້ຖືກຕ້ອງແລະເປັນແບບສະບັບຕື່ມອີກ.ຫົວຂໍ້ໜຶ່ງຂອງພວກເຂົາເຈົ້າກໍແມ່ນໃນກົດບັນຍັດຂອງທ້ອງຖິ່ນສະບັບນີ້ຈະກຳນົດຫ້າມໃຊ້ພາສາອິນເຕີເນັດຫຼືບໍ່.ນີ້ບໍ່ແມ່ນການຫາລືການວາງກົດໝາຍກ່ຽວກັບພາສາອິນເຕີເນັດເທື່ອທຳອິດຢູ່ຈີນ,ແຕ່ຂ່າວນີ້ຍັງດູດດຶງຄວາມສົນໃຈຂອງຄົນທັງຫຼາຍໂດຍທົ່ວໄປ,ເພາະວ່າ,ມັນເຮັດໃຫ້ຄົນຈີນຕ້ອງປະເຊີນກັບບັນຫາທີ່ວ່າ:ພາສາຈີນຍຸກປັດຈຸບັນຄວນສອດຄ່ອງກັບສິ່ງແວດລ້ອມພາສາໃໝ່ຂອງສະໄໝອິນເຕີເນັດແນວໃດ?ໃນລາຍການ"ຈີນປັດຈຸບັນ"ພາກນີ້,ພວກເຮົາຈະລົມເລື່ອງພາສາໃໝ່ຂອງຍຸກສະໄໝອິນເຕີເນັດ,ຫາລືວິທີຮັບມື.
ນາງຊືຈີນ ນັກສຶກສາມະຫາວິທະຍາໄລເຢິນມິນຂອງຈີນມັກລົມກັນກັບໝູ່ໃນອິນເຕີເນັດ.ໃຊ້ຄີບອດພິມດີດປັບໆ,ສັບພາສາຈີນທີ່ປະກົດອອກຢູ່ໜ້າຈໍພັດແມ່ນສັບທີ່ບໍ່ອາດຈະໃຊ້ທາງລາຍລັກອັກສອນ,ເຊັ່ນຕີ2ໂຕ"8ທີ່ມີສຽງອ່ານຄ້າຍກັບຄຳວ່າbyebye.ໃນພາສາອັງກິດ,ໝາຍຄວາມວ່າລາກ່ອນ,ນີ້ກໍ່ແມ່ນອັນທີ່ວ່າພາສາອິນເຕີເນັດ.
"ຂ້ອຍມັກພາສາອິນເຕີເນັດ,ເພາະວ່າມັນມ່ວນຖືກກັບນິດໄສຊາວໜຸ່ມພວກເຮົາ."
ຖ້າວ່ານາງຊືຈີນພຽງແຕ່ໃຊ້ພາສາອິນເຕີເນັດລົມກັບໝູ່ໃນອິນເຕີເນັດ,ຄົນທັງຫຼາຍກໍ່ຄົງຈະບໍ່ສົນໃຈປານໃດນຳພາສາອິນເຕີເນັດ.ບັນຫາຢູ່ບ່ອນວ່າ,ພາຍໃຕ້ການຊຸກຍູ້ຂອງຊາວໜຸ່ມ,ພາສາທີ່ແຕ່ເດີມພຽງແຕ່ນິຍົມກັນໃນອິນເຕີເນັດເຫຼົ່ານີ້ໄດ້ແຜ່ອິດທິພົນໄປຮອດນອກອິນເຕີເນັດແຕ່ດົນແລ້ວ,ບໍ່ພພຽງແຕ່ປະກົດຂຶ້ນໃນການສົນທະນາໃນຊີວິດປະຈຳວັນຂອງຊາວໜຸ່ມ,ຍັງປະກົດຕົວໃນສິ່ງພິມທາງການເລື້ອຍໆ,ຍິ່ງກວ່ານັ້ນ,ຍັງປະກົດຕົວໃນຫົວຂໍ້ທີ່ເປັນຕົວໜັງສືໃຫຍ່ໆ,ເຮັດໃຫ້ຄົນທັງຫຼາຍທີ່ບໍ່ຄຸ້ນເຄີຍກັບອັນທີ່ວ່າພາສາອິນເຕີເນັດນັ້ນບໍ່ເຂົ້າໃຈວ່າມັນໝາຍຄວາມວ່າຈັ່ງໃດ.
ນາງວາງໝີນ ພາລະກອນຜູ້ໜຶ່ງຂອງບໍລິສັດໜຶ່ງຢູ່ຊຽງໄຮ້ກໍ່ແມ່ນຜູ້ໜຶ່ງທີ່ບໍ່ເຂົ້າໃຈພາສາອິນເຕີເນັດ.
"ດຽວນີ້,ການໃຊ້ພາສາຈີນນັບມື້ນັບບໍ່ເປັນແບບສະບັບແລ້ວ,ມີແຕ່ຟັງບໍ່ເຂົ້າໃຈ,ຕົວຢ່າງຄື,ແຟຊີ,PKເປັນຕົ້ນ.ພາສາແມ່ນເພື່ອໃຫ້ຄົນຟັງເຂົ້າໃຈ,ຄຳສັບທີ່ຟັງບໍ່ເຂົ້າໃຈເຫຼົ່ານີ້ຮັບເອົາຍາກທີ່ສຸດ."
ການເຜີຍແຜ່ຂອງພາສາອິນເຕີເນັດບໍ່ຈຳກັດແຕ່ຢູ່ໃນໝູ່ຜູ້ໃຫຍ່,ໃນໝູ່ເດັກນ້ອຍກໍ່ມີຜູ້ເວົ້ານຳ.ນັກຮຽນປະຖົມບາງຄົນພາສາອິນເຕີເນັດແຕ່ງເລື່ອງຄູອ່ານບໍ່ເຂົ້າໃຈ.ນາງຕູ້ທີ່ເປັນຄູຢູ່ໂຮງຮຽນປະຖົມຫຼັງໜຶ່ງທີ່ປັກກິ່ງບອກນັກຂ່າວວ່າ, ນາງເຫັນວ່າ,ໃນໄລຍະທີ່ນັກຮຽນປະຖົມຮຽນພາສາຈີນແບບແຜນນັ້ນ,ການໃຊ້ພາສາອິນເຕີເນັດທີ່ບໍ່ສອດຄ່ອງກັບແບບສະບັບໄວຍາກອນ,ບໍ່ມີຜົນດີຕໍ່ການເຕີບໃຫຍ່ຂອງພວກເດັກນ້ອຍ.
"ນັກຮຽນປະຖົມຫຼາຍຄົນກໍ່ໃຊ້ພາສາອິນເຕີເນັດຈຳນວນໜຶ່ງໃນເວລາແຕ່ງເລື່ອງ,ຈັ່ງແມ່ນບໍ່ເປັນແບບສະບັບຈັກເມັດ.ຈັ່ງໃດ,ນັກຮຽນປະຖົມກໍຍັງຢູ່ໃນໄລຍະເຕີບໃຫຍ່,ຮຽນພາສາຄວນຮຽນໃຫ້ຖືກຫຼັກ.ສະນັ້ນ,ຂ້າພະເຈົ້າບໍ່ສົ່ງເສີມນັກຮຽນປະຖົມໃຊ້ພາສາຊະນິດນີ້ແຕ່ງເລື່ອງ."
ພໍ່ແມ່ສ່ວນຫຼາຍກໍ່ບໍ່ຢາກໃຫ້ພວກລູກໃຊ້ພາສາອິນເຕີເນັດຫຼາຍ.ດ້ານໜຶ່ງພວກເພິ່ນເປັນຫ່ວງຢ້ານລູກໃຊ້ພາສາອິນເຕີເນັດຢ່າງບໍ່ຈຳແນກກາລະເທສະ,ຈະເຮັດພວກລູກເຂົ້າໃຈແລະໃຊ້ພາສາຈີນບໍ່ຖືກຕ້ອງອີກ,ດ້ານໜຶ່ງກໍຢ້ານວ່າຕົນເອງບໍ່ເຂົ້າໃຈຄຳເວົ້າອິນເຕີເນັດທີ່ປ່ຽນແປງເລື້ອຍໆ,ແລະຈະເຂົ້າໃຈຜິດໃນເວລາລົມກັບລູກ.
ເພື່ອຕອບສະໜອງຄວາມເຫັນຄ້າຍຄືກັນນາງວາງແລະຄູຕູ້,ເດືອນແລ້ວນີ້ຈະຄອນຊຽງໄຮ້ ຕົວເມືອງອຸດສາຫະກຳການຄ້າແຄມທະເລທາງພາກຕາເວັນອອກຂອງຈີນໄດ້ເລີ່ມປະຕິບັດກົດບັນຍັດທ້ອງຖິ່ນສະບັບໜຶ່ງ,ຫ້າມໃຊ້ພາສາອິນເຕີເນັດທີ່ບໍ່ສອດຄ່ອງຕາມແບບສະບັບຂອງຄຳສັບແລະໄວຍາກອນພາສາຈີນປະຈຸບັນໃນເອກະສານຂອງລັດຖະບານ,ແບບຮຽນແລະໃນການແຈ້ງຂ່າວ,ນີ້ແມ່ນກົດບັນຍັດທ້ອງຖິ່ນສະບັບທຳອິດຂອງຈີນທີ່ມີການກຳນົດກ່ຽວກັບບັນຫາໃຊ້ພາສາອິນເຕີເນັດ.ນາງວາງໝິນທີ່ອາໄສຢູ່ຊຽງໄຮ້ເວົ້າວ່າ,ນາງສະໜັບສະໜູນຊຽງໄຮ້ປະກາດໃຊ້ກົດບັນຍັດສະບັບນີ້.
ຫຼັງຈາກຊຽງໄຮ້ປະກາດໃຊ້ກົດບັນຍັດສະບັບນີ້ແລ້ວ,ໃນເວລາແຂວງຟູຈ້ຽນວາງກົດໝາຍກ່ຽວກັບການໃຊ້ພາສາຈີນໃຫ້ເປັນແບບສະບັບນັ້ນ,ໄດ້ພົບກັບບັນຫາຈະເບິ່ງຕໍ່ພາສາອິນເຕີເນັດແນວໃດຄືກັນ.ພາໃຫ້ຄົນທັງຫຼາຍພິຈາລະນາບັນຫາທີ່ວ່າພາສາຈີນຍຸກປະຈຸບັນຄວນເຮັດແນວໃດຕໍ່ການປ່ຽນແປງໃຫມ່ໃນຍຸກອິນເຕີເນັດ.
ທ່ານຮຸ້ຍທ່ຽນກາງທີ່ເຮັດວຽກຄົ້ນຄວ້າພາສາແລະອັກສອນສາດຢູ່ມະຫາວິທະຍາໄລສື່ມວນຊົນຈີນເຫັນວ່າ,ພາສາໃດໜຶ່ງທະແນມແຕ່ມັນສາມາດຮັບໃຊ້ການຄົບຄ້າສະມາຄົມ,ກໍ່ມີຄຸນຄ່າຊົງຕົວຢູ່ຂອງມັນ,ພາສາອິນເຕີເນັດກໍບໍ່ຍົກເວັ້ນ.
"ທຳມະດາແລ້ວ,ຖ້າມີສັບດີໆ,ພວກເຮົາກໍຮັບເອົາໄດ້ເປັນຢ່າງດີດ້ວຍໃຈກວ້າງຂວາງ,ແລ້ວເປັນຫຍັງຕໍ່ພາສາອິນເຕີເນັດພວກເຮົາເຮັດບໍ່ໄດ້?ໃນອິນເຕີເນັດກໍ່ມີ ພາສາດີໆຄືກັນ,ທະແນມແຕ່ໃຊ້ມາຄົບຄ້າສະມາຄົມກັນໄດ້,ແລ້ວຜູ້ໃຊ້ກໍລ້ວນແຕ່ຮູ້ສຶກວ່າດີ,ຂ້າພະເຈົ້າເຫັນວ່າມັນກໍສົມເຫດສົມຜົນຢູ່ແລ້ວ.ຖ້າບີບຄັ້ນໃຫ້ມັນມຸດມ້ວຍໄປບາດດຽວ,ກໍ່ທໍ່ກັບຂັດຂວາງການພັດທະນາຂອງພາສາຢ່າງບໍ່ຮູ້ສຶກຕົວ."
ທີ່ຈິງແລ້ວ,ເມື່ອທຽບກັບຄວາມວິຕົກກັງວົນຂອງສາມັນຊົນຕໍ່ພາສາອິນເຕີເນັດ, ຜູ້ຊ່ຽວຊານນັກປາດທີ່ຄົ້ນຄວ້າພາສາຈີນໂດຍສະເພາະນັ້ນ,ພັດຄຶດກວ້າງກວ່າ,ພວກທ່ານມີເຈດຈຳນົງໃຫ້ປະຕິບັດຕໍ່ພາສາອິນເຕີເນັດດ້ວຍໃຈກວ້າງຂວາງ.ຍິ່ງກວ່ານັ້ນ,ທ່ານກົວລົງແຫ່ງຄະນະກຳມະການພາສາແລະອັກສອນສາດແຫ່ງລັດຈີນເຫັນວ່າ,ພາສາອິນເຕີເນັດຍັງບໍ່ເຖິງນັ້ນກະທົບທັ່ງພາສາຈີນເທື່ອ.
"ພວກເຮົາຄວນມີຄວາມໝັ້ນໃຈຢ່າງເຕັມປ່ຽມ,ເຊື່ອວ່າພາສາຈີນຂອງພວກເຮົາມີໃຈກວ້າງຂວາງ,ພ້ອມກັນນັ້ນກໍ່ມີກຳລັງຊີວິດອັນໝັ້ນໜຽວທົນທານ.ບໍ່ຫ່ອນຈະຖືກພາສາອິນເຕີເນັດກະທົບທັ່ງ."
ພາສາຈີນວິວັດພັດທະນາມາຈົນຮອດປັດຈຸບັນ,ແມ່ນຂະບວນການທີ່ປ່ຽນແປງຢ່າງບໍ່ຢຸດຢັ້ງເພື່ອໃຫ້ສອດຄ່ອງກັບສິ່ງແວດລ້ອມໃໝ່ຂອງພາສາ.ແຕ່ວ່າການປ່ຽນແປງໃນສະໄໝອິນເຕີເນັດເມື່ອທຽບກັບການປ່ຽນແປງຕ່າງໆທີ່ພາສາຈີນເຄີຍປະສົບໃນອະດີດນັ້ນແລ້ວ,ຮູ້ສຶກວ່າມັນຮຸນແຮງເປັນພິເສດ,ຈະປະຕິບັດຕໍ່ການປ່ຽນແປງນີ້ແນວໃດ,ເວົ້າສຳລັບຊາວຈີນແລ້ວຄິດວ່າຄົງບໍ່ແມ່ນເລື່ອງງ່າຍດາຍ.
|
