ນາຍົກລັດຖະມົນຕີປາເລັສຕີນຮຽກຮ້ອງໃຫ້ປາເລັສຕີນກັບອິສຣາແອນຢຸດຍິງ, ລັດຖະບານອິສຣາແອນປະຕິເສດບໍ່ຮັບເອົາຂໍ້ສະເໜີຢຸດຍິງ
cri
Author: min
ຕາມຂ່າວ CRI: ວັນທີ 8 ກໍລະກົດ, ທ່ານຮານີຢາ ນາຍົກລັດຖະມົນຕີລັດຖະບານປົກຄອງຕົນເອງຂອງປາເລັສຕີນ, ຜູ້ນຳອົງການຮາມັສໄດ້ຮຽກຮ້ອງໃຫ້ສອງຝ່າຍປາເລັສຕີນກັບອິສຣາແອນຢຸດຕິການປະທະກັນຢ່າງນອງເລືອດຢູ່ແຖບກາຊາໃນສະເພາະໜ້າ, ຊອກຫາຊ່ອງທາງແກ້ໄຂວິກິດການໂດຍສັນຕິດ້ວຍຮູບການເຈລະຈາ.
ທ່ານຮານີຢາກ່າວເນັ້ນວ່າ, ລັດຖະບານປາເລັສຕີນຈະອອກແຮງແກ້ໄຂການປະທະກັນໃນສະເພາະໜ້ານີ້ໂດຍສັນຕິດ້ວຍຄວາມພະຍາຍາມທາງການທູດ. ພ້ອມກັນນັ້ນ, ທ່ານຍັງຮຽກຮ້ອງໃຫ້ປະຊາຄົມໂລກເອົາໃຈໃສ່ຊາວປາເລັສຕີນທີ່ຖືກອິສຣາແອນກັກຂັງ, ແລະຮຽກຮ້ອງໃຫ້ອິສຣາແອນປ່ອຍເຈົ້າໜ້າທີ່ລັດຖະບານປົກຄອງຕົນເອງແລະສະມາຊິກລັດຖະສະພາປາເລັສຕີນທີ່ຖືກຈັບຕົວໃນຫວ່າງມໍ່ໆນີ້ນັ້ນໃນທັນທີ.
ມື້ດຽວກັນ, ລັດຖະບານອິສຣາແອນໄດ້ປະຕິເສດບໍ່ຮັບເອົາຂໍ້ສະເໜີຢຸດຍິງຂອງທ່ານຮານີຢາ, ແລະກ່າວວ່າ, ຝ່າຍປາເລັສຕີນຕ້ອງປ່ອຍທະຫານອິສຣາແອນທີ່ຖືກຈັບຕົວນັ້ນກ່ອນ.
ມື້ດຽວກັນ, ທ່ານອານນານ ເລຂາທິການໃຫຍ່ອົງການສະຫະປະຊາຊາດໄດ້ອອກຖະແຫຼງການອີກ, ທວງຢ່າງຮຸນແຮງໃຫ້ບັນດາຝ່າຍຕາເວັນອອກກາງຈົ່ງໃຊ້ການເຄື່ອນໄຫວຢ່າງຮີບດ່ວນ, ເພື່ອຜ່ອນຄາຍວິກິດການມະນຸດສະທຳທີ່ພວມປະກົດຂຶ້ນຢູ່ເຂດດັ່ງກ່າວ.
|
|