|
|
 |
| (GMT+08:00)
2006-07-11 12:25:42
|
 |
|
ນາງຄາທີຊາ ຄູຣັດເຊຍ
cri
|
ນາງຄາທີຊາແມ່ນໄທຣັດເຊຍ,ອາຍຸ24ປີ,ເປັນຄູສອນພາສາຣັດເຊຍຢູ່ໂຮງ ຮຽນສ້າງຄູແຫ່ງໜຶ່ງຂອງເມືອງເຮີ້ກາງແຂວງເຫີ່ຍລົງຈ່ຽງພາກຕາເວັນອອກສຽງເໜືອຂອງຈີນ.ເມື່ອໜຶ່ງປີກ່ອນເມືອງເຮີ້ກາງກັບລັດຕາເວັນອອກໄກໄດ້ແລກປ່ຽນຄູສອນກັນ,ນາງຄາທິຊາຈຶ່ງໄດ້ຈາກລັດຕາເວັນອອກໄກ ບ້ານເກີດຂອງນາງມານະຄອນເຮີ້ກາງ.
ນາງຄາທິຊາມີຕາໂລ້ໆ,ຜົມຍາວສີຄຳ,ງາມຫຼາຍ.ພໍພົບກັນ,ນາງກໍບອກນັກຂ່າວວ່າ,ເຖິງວ່າຢູ່ເມືອງເຮີ້ກາງ,ນອກຈາກດິນຟ້າອາກາດແລ້ວ,ອາຫານດ້ານການກິນແລະດ້ານອື່ນໆລ້ວນແຕ່ຕ່າງກັບຂອງຣັດເຊຍກໍຕາມ,ແຕ່ປະຊາຊົນທ້ອງຖິ່ນ ມີຄວາມກະຕືລືລົ້ນແລະໃຈດີ,ເຮັດໃຫ້ນາງມັກເມືອງນີ້ຢ່າງໄວວາ.ນາງເວົ້າວ່າ,
ຂ້າພະເຈົ້າມັກເມືອງເຮີ້ກາງຫຼາຍ,ນີ້ແມ່ນເມືອງທີ່ສວຍງາມທີ່ສຸດ,ຂ້າພະເຈົ້າຮູ້ສຶກດີໃຈທີ່ສຸດທີ່ມີໂອກາດມາເມືອງນີ້.ຄົນເມືອງນີ້ດີຫຼາຍ,ຂ້າພະເຈົ້າມັກເຮັດວຽກແລະດຳລົງຊີວິດຢູ່ນີ້.
ເມືອງບີໂຣບິດຈານລັດຕາເວັນອອກໄກ ບ້ານເກີດຂອງນາງຄາທີຊາຕັ້ງຢູ່ພາກຕາເວັນອອກສຽງໃຕ້ຂອງຣັດເຊຍ,ຢູ່ຕໍ່ໜ້າເມືອງເຮີ້ກາງທີ່ມີແມ່ນ້ຳເຫີ່ຍລົງຈ່ຽງຂວາງຂັ້ນ.ໃນປີ1999,ເມືອງເຮີ້ກາງກັບລັດຕາເວັນອອກໄກໄດ້ຜູກເປັນເມືອງແລະລັດມິດຕະພາບ.ນາງຄາທີຊາໄດ້ມີຄວາມສົນໃຈນຳຈີນທີ່ຢູ່ຝັ່ງກົງກັນຂ້າມແຕ່ດົນແລ້ວ.ເມື່ອ6ປີກ່ອນ,ນາງອາຍຸ18ປີ,ເພື່ອນຈີນຂອງພໍ່ເຄີຍໄປຢາມພໍ່ຢູ່ເຮືອນ,ໄດ້ເລົ່າວັດທະນະທຳປະຫວັດສາດຂອງຈີນສູ່ນາງຟັງ,ນາງຈຶ່ງຕິດອົກຕິດໃຈນຳຈີນຕັ້ງແຕ່ນັ້ນມາ.
ຕໍ່ຈາກນັ້ນ,ນາງຄາທີຊາກໍເລີ່ມຮຽນພາສາຈີນນຳເພື່ອນຈີນຜູ້ນີ້ຂອງພໍ່,ນາງກໍມີຊື່ຈີນທີ່ມ່ວນໆຄື ຈ່ຽງຮົງ,ຈ່ຽງແມ່ນນາມສະກຸນ,ຮົງແປວ່າສາຍຮຸງ,ນາງຕັ້ງໃຈໄວ້ວ່າໃນອະນາຄົດຈະສ້າງຂົວທີ່ງາມດັ່ງຄືສາຍຮຸງ,ເປັນທູດຜູ້ແລກປ່ຽນວັດທະ ນະທຳລະຫວ່າງຣັດເຊຍກັບຈີນ.
ໃນເວລາຂຶ້ນຫ້ອງ,ນາງຄາທີຊາມັກລົມກັບນັກຮຽນດ້ວຍພາສາຈີນເລື້ອຍໆ.ເຖິງວ່າຟັງແລ້ວນາງຍັງມີສຳນຽງຣັດເຊຍກໍຕາມ,ແຕ່ນັກຮຽນກໍຟັງເຂົ້າໃຈໄດ້ໝົດ.
ຍ້ອນວ່ານັກຮຽນທີ່ນາງສອນນັ້ນນ້ອຍກວ່ານາງບໍ່ເທົ່າໃດປີ,ສະນັ້ນລະຫວ່າງຄູກັບນັກຮຽນຈຶ່ງເວົ້າເຂົ້າໃຈກັນດີ.ເຖິງວ່າຢູ່ນຳກັນພຽງແຕ່ປີດຽວເທົ່ານັ້ນ,ແຕ່ນັກຮຽນທັງຫຼາຍຮັກຄູຣັດເຊຍທີ່ສວຍງາມຜູ້ນີ້ຫຼາຍ.ທ້າວກ່ວນຢື ນັກຮຽນຜູ້ໜຶ່ງເວົ້າວ່າ,
ພວກເຮົາລົມກັນໄດ້ສະບາຍເພາະບໍ່ມີຊ່ອງຫວ່າງຂອງສອງຮຸ້ນຄົນ,ຫຼາຍເທື່ອອາຈານໄດ້ເລົ່າເລື່ອງມ່ວນໆກ່ຽວກັບບ້ານເກີດແລະປະເທດຂອງຕົນສູ່ພວກເຮົາຟັງ,ແລະຍັງໄດ້ຕັ້ງຊື່ຣັດເຊຍທີ່ມ່ວນໆໃຫ້ພວກເຮົາໝົດທຸກຄົນ,ຄູຮ້ອງຊື່ຣັດເຊຍຂອງພວກເຮົາ,ພວກເຮົາກໍຮ້ອງຊື່ຈີນຂອງຄູ.
ນາງຄາທີຊາມັກສອນພາສາຣັດເຊຍໃຫ້ນັກຮຽນໃນສະພາບຕົວຈິງ,ເຊັ່ນຖ້າຢາກສອນເນື້ອໃນກ່ຽວກັບຊື້ຂອງ,ນາງກໍພານັກຮຽນໄປຊູເບີມາເກັດ,ບອກພວກເຂົາເຈົ້າສິນຄ້າແຕ່ລະຢ່າງພາສາຣັດເຊຍເວົ້າແນວໃດ.ການສອນແບບນີ້ນັກຮຽນມັກທີ່ສຸດ,ຂຶ້ນຫ້ອງຮຽນພາສາຣັດເຊຍແມ່ນເລື່ອງມ່ວນ.ນາງລິວຟ່າລຽນ ນັກຮຽນຜູ້ໜຶ່ງບອກນັກຂ່າວວ່າ,
ໃນໂມງຮຽນຂອງຄູຄາທີຊາຟົດຟື້ນທີ່ສຸດ,ເພິ່ນຈະສອນດ້ວຍຫຼາຍວິທີ,ເພື່ອໃຫ້ເຮົາເຂົ້າໃຈສັບໜຶ່ງ,ຄູອາດຈະອະທິບາຍດ້ວຍຄວາມເວົ້າ,ດ້ວຍສັນຍານມືແລະຮູບພາບເປັນຕົ້ນ,ດັ່ງນັ້ນພວກເຮົາຈຶ່ງຮຽນໄດ້ໄວແລະຈື່ໄດ້ດີ.ພວກເຮົາຄືເອື້ອຍນ້ອງແລະເພື່ອນມິດທີ່ດີ.
ແຕ່ຍາມນ້ອຍນາງຄາທີຊາກໍມັກວິຈິດຕະກຳ,ເມື່ອຮຽນຢູ່ມະຫາວິທະຍາໄລນາງໄດ້ເລືອກຮຽນແຕ້ມຮູບດ້ວຍສີນ້ຳມັນ.ຢູ່ເມືອງເຮີ້ກາງ,ນາງມັກແຕ້ມຮູບເພື່ອສະແດງໃຫ້ນັກຮຽນທັງຫຼາຍຮູ້ວັດທະນະທຳຂອງຣັດເຊຍ.ນາງກໍມັກວາດແຕ້ມທຸກສິ່ງທຸກຢ່າງທີ່ໄດ້ເຫັນຢູ່ຈີນນັ້ນເປັນຮູບພາບ.ຢູ່ເທິງຝາຫໍພັກຂອງນາງ,ໄດ້ຕິດຮູບແຕ້ມຫຼາຍແຜ່ນຂອງນາງເອງ,ມີກຳແພງຍັກທີ່ສະຫງ່າ,ແມ່ນ້ຳຊົ່ງຮວ່າທີ່ສວຍງາມແລະໜອງຈິ້ງໂພ່ທີ່ໃສສະອາດເປັນຕົ້ນ.ນາງອ່ານຈິ່ງໆ ນັກຮຽນຜູ້ໜຶ່ງໄດ້ຍ້ອງຍໍຄວາມສາມາດແຕ້ມຮູບຂອງຄູຄາທີຊາທີ່ສຸດ.ນາງເວົ້າວ່າ,
ຄູແຕ້ມຮູບເກັ່ງຫຼາຍ,ພວກເຮົາຮູ້ສຶກວ່າເພິ່ນມີພອນສະຫວັນທີ່ສຸດ,ມີແນວຄິດກະຕືລືລົ້ນແລະລ້ຳໜ້າ.
ເວລານອກໂມງສອນ,ຄູຄາທີຊາມັກປ່ອຍວ່າວນຳກັນກັບນັກຮຽນ,ບາງເທື່ອຍັງໃຫ້ນັກສອນຮ້ອງເພງຈີນ.ຖ້ານາງຮູ້ສຶກວ່າເພງໃດມ່ວນກໍຂໍເອົາເນື້ອເພງນັ້ນ,ແລ້ວໄປຮຽນຮ້ອງເອງ.ຫວ່າງມໍ່ໆນີ້,ນາງໄດ້ຮຽນຮ້ອງເພງຈີນເພງໜຶ່ງທີ່ພັນລະນາຄວາມຮັກແພງລະຫວ່າງລູກກັບພໍ່ແມ່ເພງນີ້ຊື່ປ້າໆມ່າໆແປວ່າພໍ່ແມ່,ນາງຍັງໄດ້ຮ້ອງໃຫ້ນັກຂ່າວຟັງ.
ນາງຄາທີຊາໄດ້ຫາເວລາຮຽນຍົກລະດັບພາສາຈີນທາງດ້ານປາກເວົ້າແລະ ຂຽນຂອງຕົນໃຫ້ສູງຂຶ້ນ.ທະແນມແຕ່ພົບຜູ້ທີ່ຮູ້ຈັກກັນ,ນາງກໍເປັນເຈົ້າການທັກທາຍດ້ວຍພາສາຈີນແລະລົມກັນຈັກຄວາມສອງຄວາມ.ໃນຫໍພັກຂອງນາງ,ຢູ່ຕາມຈອກແລະໂທລະພາບລ້ວນແຕ່ໄດ້ຕິດໂຕໜັງສືຈີນແລະອັກສອນຜັນສຽງ ພາສາຈີນ,ໝາຍຄວາມວ່ານາງໄດ້ຮຽນພາສາຈີນຢູ່ທຸກເວລາໃນຊີວິດການເປັນຢູ່.ດຽວນີ້,ນາງສາມາດລົມກັບຄົນທ້ອງຖິ່ນດ້ວຍພາສາຈີນຢ່າງຫຼ່ຽນໄຫຼແລ້ວ.
ຍັງອີກປີໜຶ່ງນາງຄາທີຊາກໍຈະກັບເມືອຣັດເຊຍແລ້ວ,ນາງຢາກຕໍ່ເວລາເຮັດວຽກຢູ່ຈີນອີກ.ນາງເວົ້າວ່າ,
ຂ້າພະເຈົ້າມັກຈີນຫຼາຍ,ການມາເຮັດວຽກຢູ່ຈີນກໍແມ່ນຄວາມຝັນອັນຈົບງາມໃນໃຈຂ້າພະເຈົ້າ,ຂ້າພະເຈົ້າໄດ້ຖືຈີນເປັນບ້ານເກີດທີສອງຂອງຕົນ.ຖ້າແຫ່ງນີ້ຕ້ອງການຂ້າພະເຈົ້າ,ຂ້າພະເຈົ້າຈະຢູ່ຕໍ່ໄປ,ເຮັດວຽກຢູ່ຈີນຕະຫຼອດໄປ.
ປີນີ້ແມ່ນປີຣັດເຊຍ,ຫວ່າງມໍ່ໆນີ້,ຄະນະຜູ້ແທນອົງການປົກຄອງລັດຕາເວັນອອກໄກຂອງຣັດເຊຍທີ່ເປັນບ້ານເກີດຂອງນາງຄາທີຊາໄດ້ມາຢ້ຽມຢາມເມືອງເຮີ້ກາງ,ນາງຄາທີຊາໄດ້ພົບເພື່ອນມິດຫຼາຍຄົນທີ່ມາຈາກບ້ານເກີດ. ນາງເວົ້າວ່າ,ນາງຢາກໃຫ້ນັກຮຽນຈີນຂອງຕົນພະຍາຍາມຮຽນພາສາຣັດເຊຍ,ເມື່ອຮອດປີໜ້າຈັດປີຈີນຢູ່ຣັດເຊຍ,ນາງຈະໄດ້ພານັກຮຽນໄປຢາມບ້ານເກີດຂອງນາງ.
|
|
|
