ຕາມ​ຂ່າວ CRI: ​ແຕ່​ເດືອນ​ມັງກອນ​ຮອດ​ເດືອນ​ມິຖຸນາ​ປີ​ນີ້, ຢູ່ຈີນ​ໄດ້​ເກີດ​​ອຸບັດ​ຕິ​ເຫດ​ການ​ສັນ​ຈອນ 1 ​ແສນ 9 ໝື່ນ​ລາຍ, ​ໄດ້ຫຼຸດລົງ 14% ​ເມື່ອ​ທຽບ​ກັບ​ໄລຍະ​ດຽວ​ກັນ​ຂອງ​ປີ​ກາຍ.

ວັນ​ທີ 11 ກໍລະກົດ, ນັກ​ຂ່າວ​ໄດ້​ຊາບ​ຈາກ​ງານ​ຖະ​ແຫຼງຂ່າວ​ທີ່​ກະຊວງ​ປ້ອງ​ກັນ​ຄວາມ​ສະ​ຫງົບ​ຂອງ​ຈີນ​ຈັດ​ຂຶ້ນນັ້ນວ່າ, ​ໃນ 6​ ​ເດືອນ​ຕົ້ນປີ​ນີ້, ພາກສ່ວນ​ຄຸ້ມ​ຄອງ​ການ​ສັນ​ຈອນ​ຂອງ​ອົງ​ການ​ປ້ອງ​ກັນ​ຄວາມ​ສະຫງົບ​ຂອງ​ຈີນ​ໄດ້​ເຮັດ​ວຽກ​ປັບປຸງ​ລາຍ​ສະ​ເພາະ​ກ່ຽວ​ກັບ​ຍວດ​ຍານ​​ທີ່​ບໍ່​ໄດ້​ຈົດ​ທະ​ບຽນ​ແລະ​ບໍ່​ມີ​ໃບ​ຂັບ​ຂີ່ ​ແລະຍວດ​ຍານ​ທີ່​ໝົດ​ອາຍຸ​ການ, ​ໄດ້​ໂຮມ​ສູນ​ກວດ​ກາ​ລົດ​ໂດຍ​ສານ​ແລ່ນຕາມ​ເສັ້ນ​ທາງຫຼວງ​ແລະ​​ເສັ້ນທາງຕອນມີ​ຄວາມ​ອັນ​ຕະ​ລາຍ, ​ເມື່ອ​ທຽບ​ກັບ​ໄລ​ຍະ​ດຽວ​ກັນ​​ໃນ​ປີ​ກາຍແລ້ວ, ຈຳນວນ​ອຸບັດ​ຕິ​ເຫດ​ການ​ສັນຈອນ ຈຳ​ນວນ​ຄົນ​ຕາຍ​ແລະ​ຄວາມ​ເສຍ​ຫາຍ​​ໂດຍ​ກົງດ້ານ​ຊັບ​ສິນ​ໃນອຸບັດ​ຕິ​ເຫດ​ໃນທົ່ວ​ປະ​ເທດ​ໄດ້​ຫຼຸດ​ລົງ​ໃນ​ລະ​ດັບ​ໃດ​ໜຶ່ງ.