|
ລະດູຮ້ອນຫາກໍ່ວຽນມາເຖິງ, ຢູ່ໃນມະຫາວິທະຍາໄລປັກກິ່ງ ເຊິ່ງເປັນໂຮງຮຽນຊັ້ນສູງທີ່ມີຊື່ສຽງຂອງຈີນ, ກໍ່ເຕັມໄປດ້ວຍບັນຍາກາດແຫ່ງອິນເດຍທີ່ຄຶກຄຶ້ນ,ບຸນອິນເດຍທີ່ພວມຈັດຂຶ້ນຢູ່ມະຫາວິທະ ຍາໄລປັກກິ່ງໄດ້ກໍ່ກະແສວັດທະນະທຳອິນເດຍໃນບັນດາອາຈານແລະນັກສຶກສາທັງຫລາຍຢູ່ແຫ່ງນີ້.
ທີ່ທ່ານພວມຟັງຢູ່ນີ້ແມ່ນລະບຳອິນເດຍທີ່ສະແດງໂດຍສິນລະປິນທັງຫລາຍຂອງຈີນ,ເຊິ່ງເປັນການເປີດສາກບຸນອິນເດຍຂອງມະຫາວິທະຍາໄລປັກກິ່ງ. ການເຄື່ອນໄຫວເທື່ອນີ້ແມ່ນເນື້ອໃນລາຍຫນຶ່ງຂອງປີໄມຕີຈິດຈີນອິນເດຍປີ 2006,ເຊິ່ງແມ່ນສູນຄົ້ນຄວ້າອິນເດຍຂອງມະຫາວິທະຍາໄລປັກກິ່ງແລະສະຖານທູດອິນເດຍປະຈຳຈີນຮ່ວມກັນຈັດຂຶ້ນ.
ມະຫາວິທະຍາໄລປັກກິ່ງແມ່ນສູນຄົ້ນຄວ້າແລະສິດສອນອິນເດຍສຶກ ສາຂອງຈີນ.ເມື່ອຕົ້ນສະຕະວັດແລ້ວນີ້,ມະຫາວິທະຍາໄລປັກກິ່ງກໍ່ໄດ້ເລີ່ມຄົ້ນ ຄວ້າປັດຊະຍາ ວັນນະຄະດີແລະພາສາສາດຂອງອິນເດຍຢ່າງເປັນລະບົບ.ປີ 1946,ມະຫາວິທະຍາໄລປັກກິ່ງໄດ້ສ້າງຕັ້ງພະແນກພາສາສາດແລະວັນນະຄະດີຕາເວັນອອກ,ໃຕ້ຄວາມພະຍາຍາມຂອງທ່ານຈີ້ຊ້ຽນລິນແລະທ່ານຈີນເຄີມູ້ ຜູ່ຊ່ຽວຊານດ້ານອິນເດຍສຶກສາແລະທ່ານອື່ນໆ,ການຄົ້ນ ຄວ້າແລະການສຶກສາອິນເດຍສຶກສາທີ່ມີຄວາມຫມາຍຍຸກປັດຈຸບັນໄດ້ເລີ່ມ ແຕກຫນໍ່ຈໍ່ຫນງຢູ່ຈີນ,ແລະໄດ້ແຕກດອກອອກຜົນຢ່າງອຸດົມສົມບຸນ.ປີ 2004, ມະຫາວິທະຍາໄລປັກກິ່ງໄດ້ສ້າງຕັ້ງສູນຄົ້ນຄວ້າອິນເດຍ,ທ່ານວາສພາອີ ນາ ຍົກລັດຖະມົນຕີອິນເດຍທີ່ມາຢ້ຽມຢາມຈີນໃນຄາວນັ້ນໄດ້ເປີດປ້າຍໃຫ້ແກ່ ການສ້າງຕັ້ງສູນດັງກ່າວ.ເດືອນເມສາປີ 2005,ທ່ານເວີນເຈ່ຍປາວ ນາຍົກ ລັດຖະມົນຕີຈີນຢ້ຽມຢາມອິນເດຍ, ຈີນກັບອິນເດຍໄດ້ປະກາດສ້າງການພົວ ພັນຄູ່ຂາຮ່ວມມືຍຸດທະສາດທີ່ອວ່າຍຫນ້າໄປສູ່ສັນຕິພາບແລະຄວາມຈະເລີນ ຮຸ່ງເຮືອງ.ນາຍົກລັດຖະມົນຕີຂອງສອງປະເທດພ້ອມກັນຕົກລົງວ່າ,ຈັດເອົາປີ 2006 ເປັນປີໄມຕີຈິດຈີນອິນເດຍ.
ບຸນອິນເດຍຂອງມະຫາວິທະຍາໄລປັກກິ່ງໄດ້ເລີ່ມຈັດຂຶ້ນເມື່ອວັນທີ 22 ພຶດສະພາ,ແລ້ວດຳເນີນໄປເປັນເວລາ 10 ມື້,ມີການເຄື່ອນໄຫວຕ່າງໆຄື ງານບັນຍາຍ, ງານວາງສະແດງ, ງານສະແດງ,ງານສັງສັນລະຫວ່າງນັກສຶກສາຈີນກັບອິນເດຍເປັນຕົ້ນ,ເນື້ອໃນກ່ຽວພັນເຖິງງານສຳມະນາດົນຕີອິນເດຍ,ລະ ບຳອິນເດຍ, ເສດຖະກິດອິນເດຍກັບການຄ້າລະຫວ່າງຈີນອິນເດຍ,ແລະການພົວພັນລະຫວ່າງຈີນກັບອິນເດຍແລະນະໂຍບາຍທຶນຕ່າງປະເທດຂອງອິນເດຍເປັນຕົ້ນ, ທັງມີງານສາຍຮູບເງົາອິນເດຍທີ່ຜູ່ຊົມຈີນນິຍົມ.
ໃນງານເປີດສາກບຸນອິນເດຍ,ໄດ້ວາງສະແດງຮູບຖ່າຍຮ້ອຍກວ່າແຜ່ນກ່ຽວກັບເມທາຈານຄັນທີ ບິດາແຫ່ງຊາດອິນເດຍແລະເນື້ອໃນອື່ນໆທີ່ ສະຖານທູດອິນເດຍປະຈຳຈີນສະຫນອງໃຫ້.ຮູບຖ່າຍເຫລົ່ານີ້ມີເນື້ອໃນອຸດົມ ສົມບູນ,ໄດ້ສະແດງໃຫ້ເຫັນປະເພນີອິນເດຍທີ່ມີຫລາຍສີຫລາຍສັນ, ເຮັດໃຫ້ນັກສຶກສາຈຳນວນຫລວງຫລາຍຢືນຊົມ. ນາງຊ້າຍອີລິນ ນັກສຶກສາໃຫ້ສຳພາດຕໍ່ນັກຂ່າວວ່າ, ສາມາດໂຮມສູນຊອກຮູ້ສິ່ງທີ່ກ່ຽວກັບອິນເດຍຫລາຍປານນີ້ຢູ່ໃນໂຮງຮຽນແມ່ນດີຫລາຍ.ນາງເວົ້າວ່າ:
ການຈັດການເຄື່ອນໄຫວບຸນອິນເດຍແມ່ນດີຫລາຍ,ມີເນື້ອໃນອຸດົມສົມ ບູນ, ສາມາດຊ່ອຍພວກເຮົາມີຄວາມຮູ້ກ່ຽວກັບອິນເດຍຫລາຍກວ່າເກົ່າ.ຈີນກັບອິນເດຍແມ່ນປະເທດບ້ານໃກ້ເຮືອນຄຽງ, ທັງແມ່ນປະເທດໃຫຍ່ທີ່ພວມພັດທະນາ,ຄວນຈັດການເຄື່ອນໄຫວແລກປ່ຽນວັດທະນະທຳແບບນີ້ໃຫ້ຫລາຍ.
ທ່ານສາສະດາຈານຈ່ຽງຈິງຂຸຍຂອງສູນຄົນຄວ້າອິນເດຍຂອງມະຫາ ວິທະຍາໄລປັກກິ່ງ ຜູ່ຈັດຕັ້ງການເຄື່ອນໄຫວເທື່ອນີ້ເຫັນວ່າ, ການຈັດບຸນອິນເດຍຢູ່ມະຫາວິທະຍາໄລປັກກິ່ງມີຄວາມຫມາຍຫລາຍ.ທ່ານເຫັນວ່າ, ໃນການໄປມາຫາສູ່ກັນລະຫວ່າງສອງປະເທດ, ການໄປມາຫາສູ່ກັນລະຫວ່າງເຈົ້າ ຫນ້າທີ່ລັດຖະບານແລະບຸກຄົນວິຊາສະເພາະນັ້ນແມ່ນສຳຄັນຫລາຍ,ແຕ່ການໄປມາຫາສູ່ກັນລະຫວ່າງມວນຊົນທຳມະດາສາມັນໂດຍສະເພາະແມ່ນລະຫວ່າງໄວຫນຸ່ມນັ້ນກໍ່ສຳຄັນຄືກັນ.ທ່ານເວົ້າວ່າ:
ການຂະຫຍາຍຕົວຂອງການພົວພັນລະຫວ່າງສອງປະເທດ,ຈຸດຫນັກແມ່ນໄວຫນຸ່ມມີຄວາມເຫັນແນວໃດ.ໃຫ້ໄວຫນຸ່ມມີໂອກາດຊອກຮູ້ອິນເດຍ, ນີ້ກໍ່ແມ່ນອຳນວຍໂອກາດໃຫ້ອິນເດຍເພື່ອສະແດງຕົນເອງ.ນັກສຶກສາຂອງຈີນໂດຍສະເພາະແມ່ນນັກສຶກສາຂອງມະຫາວິທະຍາໄລປັກກິ່ງມີຄວາມຮັບຮູ້ເລິກເຊິ່ງຕໍ່ບັນຫານີ້,ເຫັນວ່າ, ຈີນກັບອິນເດຍສາມາດເກາະແຂນກັນຢ່າງແທ້ຈິງ, ຈິ່ງມີຄວາມຈະເລີນຮຸ່ງເຮືອງແລະສັນຕິພາບພ້ອມກັນໄດ້.
ຈີນກັບອິນເດຍລ້ວນແຕ່ແມ່ນປະເທດອາລະຍະທຳບູຮານ,ການແລກ ປ່ຽນວັດທະນະທຳລະຫວ່າງສອງປະເທດທີ່ໄດ້ບັນທຶກໄວ້ໃນປະຫວັດສາດນັ້ນລື່ນກາຍ 2000 ປີ.ກ່ອນຄ.ສ.ສອງສະຕະວັດ, ນັກການທູດແລະພໍ່ຄ້າຂອງຈີນສະໄຫມຮ້ານໄດ້ເປີດເສັ້ນທາງສາຍໄຫມທີ່ຈາກຈີນໄປສູ່ຝ່າຍຕາເວັນຕົກ,ອິນເດຍກໍ່ແມ່ນປະເທດສຳຄັນກວ່າຫມູ່ປະເທດຫນຶ່ງບົນເສັ້ນທາງ ສາຍນີ້, ສິນຄ້າແລະວັດທະນະທຳຈີນຜ່ານອິນເດຍແລ້ວສົ່ງໄປຮອດເອີລົບ; ກ່ອນຄ.ສ.ຫນຶ່ງສະຕະວັດ, ວັດທະນະທຳສາສະຫນາພຸດໄດ້ແຜ່ເຂົ້າຈີນ,ແລະຄ່ອຍໆກາຍເປັນພາກສ່ວນຫນຶ່ງຂອງວັດທະນະທຳຈີນ.ທ່ານນາລິນຊູລີ ເອກ ອັກຄະລັດຖະທູດອິນເດຍປະຈຳຈີນໄດ້ຕີລາຄາສູງຕໍ່ການແລກປ່ຽນວັດທະ ນະທຳຈີນອິນເດຍ.ທ່ານເຫັນວ່າ, ເມື່ອເຂົ້າສູ່ສະຕະວັດທີ 21, ຈີນແລະອິນເດຍທີ່ເປັນປະເທດພວມພັດທະນາໃຫຍ່ສອງປະເທດລ້ວນແຕ່ປະເຊີນກັບໂອກາດຄັ້ງປະຫວັດການທີ່ພັດທະນາຢ່າງວ່ອງໄວ, ມີຄວາມອາດເປັນໄປໄດ້ທີ່ຮ່ວມມືກັນໃນຫລາຍຂົງເຂດ.ໃນພິທີຈັດການເຄື່ອນໄຫວເທື່ອນີ້, ທ່ານເວົ້າວ່າ:
ຄືກັນກັບອິນເດຍ, ຈີນກໍ່ມີປະເພນີວັດທະນະທຳອັນເກົ່າແກ່, ປະເພນີວັດທະນະທຳຂອງສອງປະເທດພວກເຮົາມີສິ່ງທີ່ຄືກັນຫລາຍຢ່າງ. ຈີນກັບອິນເດຍໃນຖານເປັນປະເທດໃກ້ຄຽງທີ່ມີໄມຕີຈິດຕໍ່ກັນສາມາດຮ່ຳຮຽນເຊິ່ງ ກັນແລະກັນໃນຫລາຍດ້ານ, ພວກເຮົາສາມາດຖອດຖອນບົດຮຽນເຊິ່ງກັນແລະກັນ,ແລະຮ່ຳຮຽນເຊິ່ງກັນແລະກັນໃນຫລາຍຂົງເຂດ,ຄືວັດທະນະທຳ ການສຶກສາ ສາທາ ລະນະສຸກແລະເສດຖະກິດເປັນຕົ້ນ, ບົດຮຽນຂອງຝ່າຍຫນຶ່ງແມ່ນສຳຄັນຫລາຍຕໍ່ຝ່າຍກົງກັນຂ້າມ.
ທ່ານທູດເວົ້າວ່າ, ການຂະຫຍາຍຕົວຢ່າງວ່ອງໄວຂອງການພັດ ທະນາຂອງຈີນໃນຫລາຍປີມານີ້ໄດ້ເຮັດໃຫ້ທ່ານມີຄວາມປະທັບໃຈຢ່າງເລິກເຊິ່ງ.ໃນຂະນະທີ່ພັດທະນາເສດຖະກິດ,ຈີນກໍ່ໄດ້ເອົາໃຈໃສ່ໃນລະດັບສູງນຳການຂະຫຍາຍຕົວຂອງວັດທະນະທຳ,ໄດ້ຮັບເອົາວັດທະນະທຳທີ່ມາຈາກພາຍນອກເຊິ່ງລວມທັງວັດທະນະທຳອິນເດຍ.ມະຫາວິທະຍາໄລປັກກິ່ງຈັດບຸນອິນເດຍມີຜົນດີຕໍ່ການຊຸກຍູ້ໄວຫນຸ່ມຈີນຊອກຮູ້ອິນເດຍ, ແລະເພີ່ມທະວີການໄປມາຫາສູ່ກັນຢ່າງມີໄມຕີຈິດລະຫ່າງພື້ນເມືອງຈີນອິນເດຍ.
ຕາມຊາບວ່າ, ປີໄມຕີຈິດຈີນອິນເດຍໄດ້ກຳນົດໂຄງການແລກປ່ຽນລະ ຫວ່າງສອງປະເທດປະມານ 50 ໂຄງການ,ກ່ຽວພັນເຖິງການເມືອງ ເສດຖະ ກິດການຄ້າ ວັດທະນະທຳ ການສຶກສາ ວິທະຍາສາດເຕັກນິກແລະການປ້ອງກັນປະເທດເປັນຕົ້ນ, ໃນນັ້ນ,ໂຄງການແລກປ່ຽນວັດທະນະທຳມີເນື້ອໃນອຸດົມສົມບຸນທີ່ສຸດ, ລວມມີ ຕ່າງຈັດງານສາຍຮູບເງົາຢູ່ຝ່າຍກົງກັນຂ້າມ, ສິນລະປິນງິ້ວປັກກິ່ງຈີນໄປສະແດງຢູ່ອິນເດຍ,ຄະນະຮ້ອງແລະຟ້ອນໂບເລວຸດ ຄະນະຮ້ອງແລະຟ້ອນປະເພນີອິນເດຍຢ້ຽມຢາມຈີນເປັນຕົ້ນ.ໃນຖານເປັນເນື້ອໃນລາຍຫນຶ່ງຂອງການເຄື່ອນໄຫວເທື່ອນີ້,ຄະນະນັກຂ່າວວິທະຍຸ CRI ກໍ່ພວມຢ້ຽມຢາມວັດທະນະທຳຢູ່ອິນເດຍ.
|
