|
|
 |
| (GMT+08:00)
2006-07-13 17:42:15
|
 |
|
ຄູໃຫຍ່ໂຮງຮຽນປະຖົມ ມັດທະຍົມອາເມລິກາຢ້ຽມຢາມຈີນແລະສຳຜັດສະເໜຂອງວັດທະນະທຳພາຈີນ(ສຽງ)
cri
|
ຫວ່າງກ່ອນນີ້ບໍ່ດົນ,ຄູໃຫຍ່ຂອງໂຮງຮຽນປະຖົມ ມັດທະຍົມແລະເຈົ້າໜ້າທີ່ວົງການການສຶກສາຂອງອາເມລິກາ400ກວ່າຄົນໄດ້ມາປັກກິ່ງ,ເພື່ອຢ້ຽມຢາມຈີນເປັນເວລາໜຶ່ງອາທິດ.ການຢ້ຽມຢາມເທື່ອນີ້ຈັດຕັ້ງໂດຍຫ້ອງການໜ່ວຍນຳພາການເຜີຍແຜ່ພາສາຈີນຢູ່ໃນໂລກຂອງຈີນກັບສະພາມະຫາວິທະຍາໄລອາເມລິກາ,ໂດຍມີຈຸດປະສົງເຊື້ອເຊີນຄູໃຫຍ່ໂຮງຮຽນປະຖົມມັດທະຍົມແລະເຈົ້າໜ້າທີ່ວົງການການສຶກສາຂອງອາເມລິກາມາຢ້ຽມຢາມຈີນ,ເພື່ອໃຫ້ພວກຂາເຈົ້າໄດ້ຮູ້ໄດ້ເຫັນວັດທະນະທຳພາສາແລະລະບົບການສຶກສາຂອງຈີນໂດຍກົງ,ຊຸກຍູ້ການແລກປ່ຽນດ້ານວັດທະນະທຳພາສາລະຫວ່າງສອງຝ່າຍ.ໃນລາຍການສວນວິທະຍາສາດແລະການສຶກສາພາກນີ້,ອຸດົມຂໍແນະນຳສະພາບທີ່ກ່ຽວຂ້ອງກັບການເຄື່ອນໄຫວຄັ້ງນີ້ສູ່ທ່ານຟັງ.
ວັດທະນະທຳຈີນມີປະຫວັດດົນນານແລະມີສະເໜ,ບໍ່ວ່າຢູ່ຈີນຫຼືຕ່າງປະເທດ,ມີຄົນນັບບໍ່ຖ້ວນຕິດໃຈນຳ.ປະຈຸບັນນີ້,ຢູ່ອາເມລິກາ,ຜູ້ຮຽນພາສາຈີນນັບມື້ນັບຫຼາຍ.ສະນັ້ນ,ໃນປີ 2003,ສະພາມະຫາວິທະຍາໄລອາເມລິກາໄດ້ຕົກລົງຕັ້ງຫຼັກສູດແລະການສອບເສັງພາສາຈີນຢູ່ໃນໂຄງການຈັດວາງລ່ວງໜ້າ ຄືໂຄງການAPທີ່ມີຊື່ສຽງ.ໂຄງການAPໝາຍເຖິງສະພາມະຫາວິທະຍາໄລອາເມລິກາຕັ້ງຫຼັກສູດມະຫາວິທະຍາໄລຢູ່ໂຮງຮຽນມັດທະຍົມ,ຜູ້ທີ່ໄດ້ຜ່ານໃນການສອບເສັງຈະໄດ້ຮັບຄະແນນມະຫາວິທະຍາໄລລ່ວງໜ້າ,ມະຫາວິທະຍາໄລຈະຮັບເອົາງ່າຍກວ່າ.ສະນັ້ນ,ມີນັກຮຽນມັດທະຍົມຫຼາຍຄົນຈຶ່ງຮຽນຫຼັກສູດAPແລະເຂົ້າຮ່ວມການສອບເສັງ.ການຕົກລົງຂອງສະພາມະຫາວິທະຍາໄລອາເມລິກາກໍໄດ້ຮັບການສະໜັບສະໜູນຈາກຫ້ອງການໜ່ວຍນຳພາການເຜີຍແຜ່ພາສາຈີນຢູ່ໃນໂລກຂອງຈີນ,ສອງຝ່າຍຈຶ່ງປຶກສາຕົກລົງໃຊ້ມາດຕະການຕ່າງໆຊຸກຍູ້ການສິດສອນພາສາຈີນຢູ່ອາເມລິກາ,ການເຄື່ອນໄຫວທີ່ຄູໃຫຍ່ໂຮງຮຽນປະຖົມແລະມັດທະຍົມອາເມລິກາມາຢ້ຽມ ຢາມຈີນນັ້ນກໍແມ່ນມາດຕະການໜຶ່ງ.
ຕາມການສຳຫຼວດຂອງສະພາມະຫາວິທະຍາໄລອາເມລິກາ,ມີໂຮງຮຽນປະຖົມແລະມັດທະຍົມອາເມລິກາປະມານ2500ຫຼັງຍິນດີຕັ້ງຫຼັກສູດພາສາຈີນ,ບັນດາຄູໃຫຍ່ທີ່ມາຢ້ຽມ ຢາມຈີນເທື່ອນີ້ກໍມາຈາກໂຮງຮຽນເຫຼົ່ານີ້.ທ່ານອານເບີດ ທອມເຊີນ ຄູໃຫຍ່ໂຮງຮຽນມັດທະຍົມປາຍເມືອງຮາເບີ ລັດແມຣີແລນອາເມລິກາເວົ້າວ່າ:"ຂ້າພະເຈົ້າເຂົ້າຮ່ວມການຢ້ຽມຢາມເທື່ອນີ້ແມ່ນເພື່ອຊອກຮູ້ວັດທະນະທຳຈີນ,ຫຼັງຈາກກັບເມືອອາເມລິກາແລ້ວຈະບອກໃຫ້ນັກຮຽນທັງຫຼາຍຮູ້,ໃຫ້ພວກເຂົາເຈົ້າມີຄວາມສົນໃຈນຳການຮຽນພາສາຈີນແລະຮູ້ຈັກໂລກ."
ໃນເວລາຢູ່ປັກກິ່ງ,ຄູໃຫຍ່ແລະເຈົ້າໜ້າທີ່ວົງການການສຶກສາຂອງອາເມລິກາໄດ້ໄປທ່ຽວສະຖານທີ່ທ່ອງທ່ຽວທີ່ມີຈຸດພິເສດຂອງຈີນ ຄື ສວນອີ້ເຮີຢວນແລະທາງຮ່ອມເປັນຕົ້ນ,ທ່ານສູເຈ່ຍລູ້ ຮອງປະທານຄະນະປະຈຳສະພາປະຊາຊົນແຫ່ງຊາດຈີນ ນັກພາສາສາດທີ່ມີຊື່ສຽງຂອງຈີນຍັງໄດ້ຈັດການບັນລະຍາຍທີ່ມີຫົວຂໍ້ຈຳເພາະກ່ຽວກັບວັດທະນະທຳພາ ສາຈີນໃຫ້ແຂກອາເມລິກາ,ການເຄື່ອນໄຫວເຫຼົ່ານີ້ເຮັດໃຫ້ຄູໃຫຍ່ແລະເຈົ້າໜ້າທີ່ວົງການການສຶກສາຂອງອາເມລິກາໄດ້ສຳຜັດວັດທະນະທຳຈີນຢ່າງໃກ້ຊິດ,ແລະໄດ້ເຂົ້າໃຈຈີນ ຢ່າງເລິກເຊິ່ງກວ່າເກົ່າ.
ນອກນີ້,ຄູໃຫຍ່ແລະເຈົ້າໜ້າທີ່ວົງການການສຶກສາຂອງອາເມລິກາຍັງໄດ້ໄປທັດສະນະສຶກສາໂຮງຮຽນປະຖົມແລະມັດທະຍົມຂອງປັກກິ່ງ,ແລກປ່ຽນຄວາມເຫັນກັບຄູແລະນັກຮຽນຂອງໂຮງຮຽນແລ້ວໄດ້ຮູ້ວ່າ ໂຮງຮຽນຂອງຈີນແມ່ນດຳເນີນການສິດສອນແນວໃດ,ເຊິ່ງລວມທັງການສອນພາສາຈີນໃຫ້ນັກຮຽນຕ່າງປະເທດແນວໃດ.ຕົວຢ່າງຄື ຢູ່ໂຮງຮຽນມັດທະຍົມສັງກັດມະຫາວິທະຍາໄລປະຊາຊົນຈີນ,ຝ່າຍໂຮງຮຽນໄດ້ແນະນຳຈິນຕະນາການສຶກສາຂອງໂຮງຮຽນຈີນທີ່ສົ່ງເສີມໃຫ້ນັກຮຽນພັດທະນາຢ່າງຮອບດ້ານ,ແລະຍັງໄດ້ແນະນຳສະພາບການສອນພາສາຈີນໃຫ້ນັກຮຽນຕ່າງປະເທດເປັນພິເສດ.
ທ່ານຢາງຈິ່ນພີງ ຫົວໜ້າພະແນກສາກົນຂອງໂຮງຮຽນຫຼັງນີ້ແນະນຳວ່າ:"ນອກຈາກຕັ້ງຫຼັກສູດພາສາຈີນສຳລັບນັກຮຽນຕ່າງປະເທດແລ້ວ,ຍັງມີຫຼັກສູດວັດທະນະທຳ ດົນຕີແລະກິລາຂອງຈີນເປັນຕົ້ນ.ທຳມະດາເມື່ອໄດ້ຮຽນປີໜຶ່ງແລ້ວ,ນັກຮຽນສ່ວນຫຼາຍສາມາດຟັງເຂົ້າໃຈການສິດສອນຂອງຄູຈີນ,ແລະຮຽນຢ່າງເປັນປົກກະຕິ."
ໂຮງຮຽນມັດທະຍົມສັງກັດມະຫາວິທະຍາໄລປະຊາຊົນຈີນໄດ້ສ້າງພາບປະທັບໃຈອັນເລິກເຊິ່ງໃຫ້ແກ່ບັນດາຄູໃຫຍ່ແລະເຈົ້າໜ້າທີ່ວົງການການສຶກສາຂອງອາເມລິກາທີ່ມາທັດສະນະສຶກສາ,ທ່ານນາງບຼູເຈ ຈິນສ໌ກີ ຮອງຫົວໜ້າສູນຈີນຂອງມະຫາວິທະຍາໄລມິນນີໂຊຕາອາເມລິກາທີ່ຮັບຜິດຊອບການບຳລຸງສ້າງຄູສອນພາສາຈີນໃຫ້ໂຮງຮຽນປະຖົມແລະມັດທະຍົມເວົ້າວ່າ:"ໂຮງຮຽນຫຼັງນີ້ດີຫຼາຍ,ຂ້າພະເຈົ້າບໍ່ໄດ້ຄິດເລີຍວ່າ,ຢູ່ຈີນມີໂຮງຮຽນມັດທະຍົມປາຍດີປານນີ້."
ນອກນີ້,ຝ່າຍຈີນຍັງໄດ້ຈັດວາງຄູໃຫຍ່ແລະເຈົ້າໜ້າທີ່ວົງການການສຶກສາຂອງອາເມລິກາໄປຊົມງານວາງສະແດງແບບຮຽນພາສາຈີນ.ແບບຮຽນຫຼາຍສິບກວ່າຊະນິດຂອງ10ກວ່າສຳນັກງານພິມຈຳໜ່າຍໄດ້ເຂົ້າຮ່ວມການວາງສະແດງ,ແບບຮຽນເຫຼົ່ານີ້ມີຫຼາຍປະເພດ ຄື ປື້ມ ກະແສັດແລະສາລະຜັດສື່ເປັນຕົ້ນ,ຕ່າງມີຈຸດພິເສດຂອງໃຜລາວ.ບັນດາຄູໃຫຍ່ແລະເຈົ້າໜ້າທີ່ວົງການສຶກສາຂອງອາເມລິກາຮູ້ສຶກດີໃຈຫຼາຍທີ່ຈີນໄດ້ສະໜອງແບບຮຽນເຫຼົ່ານີ້ໃຫ້ພວກເຂົາເຈົ້າ,ເພາະວ່າ,ແບບຮຽນເຫຼົ່ານີ້ພໍດີແມ່ນສິ່ງທີ່ພວກເຂົາເຈົ້າຕ້ອງການ.
ພາຍຫຼັງສິ້ນສຸດການຢ້ຽມຢາມຢູ່ປັກກິ່ງແລ້ວ,ຄູໃຫຍ່ແລະເຈົ້າໜ້າທີ່ວົງການການສຶກສາຂອງອາເມລິກາໄດ້ແບ່ງເປັນ15ຈຸໄປທັດສະນະສຶກສາຢູ່15ເຂດແຂວງ ເຊັ່ນ ແຂວງສ້ານຊີ່ ລຽວນີງແລະຈ່ຽງຊູ່ເປັນຕົ້ນ.
ເຖິງວ່າການຢ້ຽມຢາມຢູ່ຈີນມີແຕ່ອາທິດດຽວທໍ່ນັ້ນ,ແຕ່ສະເໜອັນພິເສດຂອງວັດທະນະທຳພາສາຈີນພ້ອມດ້ວຍການປ່ຽນແປງແລະການພັດທະນາຢ່າງວ່ອງໄວຂອງຈີນໄດ້ເປັນພາບປະທັບໃຈອັນເລິກເຊິ່ງໄວ້ໃຫ້ຄູໃຫຍ່ແລະເຈົ້າໜ້າທີ່ວົງການການສຶກສາຂອງອາເມລິກາ.ພວກເຂົາເຈົ້າເຫັນວ່າ,ຕໍ່ໄປພາຍໜ້າ,ພາສາຈີນຈະນັບມື້ນັບໄດ້ຮັບຄວາມນິຍົມກັນ,ທ່ານນາງເດໂບລາ ເດລິສເລ ເຈົ້າໜ້າທີ່ການສຶກສາຂອງເມືອງໄຮສ໌ ລັດໂອຮາຍໂອອາເມລິກາເວົ້າວ່າ:"ບໍ່ວ່າໃນຂົງເຂດເສດຖະກິດຫຼືວ່າຂົງເຂດແນວຄິດວັດທະນະທຳ,ຈີນລ້ວນແຕ່ແມ່ນກຳລັງແຂງແຮງແງ່ໜຶ່ງໃນໂລກ.ໃນການໄປມາຫາສູ່ກັນກັບໂລກໃນອະນາຄົດ,ຕ້ອງຟັງຄວາມເຫັນຂອງຜູ້ອື່ນໃຫ້ຫຼາຍກວ່າເກົ່າ,ໂດຍສະເພາະແມ່ນຄວາມເຫັນຂອງຄົນຈີນ."
ທ່ານນາງແອລິສ໌ ຊີເກຼັນ ຫົວໜ້າພະແນກສຶກສາທິການລັດມີນນີໂຊຕາອາເມລິກາໄດ້ສະແດງວ່າ,ພາຍຫຼັງກັບເມືອອາເມລິກາແລ້ວຈະເລັ່ງລັດຊຸກຍູ້ວຽກງານຕັ້ງຫຼັກສູດພາສາຈີນໃຫ້ໄວເຂົ້າ.ທ່ານນາງເວົ້າວ່າ:"ພວກຂ້າພະເຈົ້າຈະຄິດໄລ່ວ່າ ໂຄງການເຫຼົ່ານີ້ຕ້ອງການເງິນເທົ່າໃດ,ແລ້ວຈຶ່ງຮ້ອງຂໍເອົາທຶນກັບລັດຖະບານມາສະໜັບສະໜູນໂຄງການລາຍນີ້.ພວກຂ້າພະເຈົ້າຈະຫ້າງຫາທຶນອຸດໜູນການຄ້າຈຳນວນໜຶ່ງກໍໄດ້,ສະນັ້ນ,ພວກຂ້າພະເຈົ້າຫວັງເລີ່ມປະຕິບັດໂຄງການຫຼັກສູດພາສາຈີນເຫຼົ່ານີ້ພາຍໃນໜຶ່ງປີຫຼືໄວກວ່ານັ້ນ."
ຕາມແນະນຳວ່າ,ການເຄື່ອນໄຫວທີ່ຄູໃຫຍ່ອາເມລິກາມາຢ້ຽມຢາມຈີນຄັ້ງນີ້ພຽງແຕ່ແມ່ນພາກສ່ວນໜຶ່ງຂອງການແລກປ່ຽນວັດທະນະທຳພາສາລະຫວ່າງຈີນກັບອາເມລິກາ,ຕາມສັນຍາລະຫວ່າງຫ້ອງການໜ່ວຍນຳພາການເຜີຍແຜ່ພາສາຈີນຢູ່ໃນໂລກຂອງຈີນກັບສະພາມະຫາວິທະຍາໄລອາເມລິກາ,ການເຄື່ອນໄຫວທີ່ໃຫ້ຄູໃຫຍ່ອາເມລິກາມາຢ້ຽມຢາມຈີນນັ້ນຈະຈັດຂຶ້ນຕໍ່ໄປໃນ5ປີຂ້າງໜ້າ.ນອກນີ້,ຫ້ອງການໜ່ວຍນຳພາການເຜີຍແຜ່ພາສາຈີນໃນໂລກຂອງຈີນຍັງຈະສະໜັບສະໜູນໂຮງຮຽນອາເມລິກາຕັ້ງຫຼັກສູດພາສາຈີນດ້ວຍມາດຕະການຕ່າງໆ ເຊັ່ນຈັດວາງຜູ້ອາສາສະໝັກ50ຄົນໄປສອນພາສາຈີນຢູ່ໂຮງຮຽນຂອງອາເມລິກາ,ສະໜອງທຶນລາງວັນການສຶກສາໃຫ້ນັກຮຽນອາເມລິກາຜູ້ດີເລີດມາຮຽນຢູ່ຈີນ,ແລະຈັດຊຸດອົບຮົມຄູສອນພາສາຈີນຂອງອາເມລິກາເປັນຕົ້ນ.
|
|
|
