|
ທ່ານຜູ້ຟັງທີ່ໂຄລົບ,ທາງລົດໄຟຊິງໄຮຕິເບດທີ່ຍາວ1956ກິໂລແມັດໄດ້ເປີດໃຫ້ລົດແລ່ນຕະຫຼອດສາຍແລ້ວ,ທາງລົດໄຟທີ່ສ້າງຢູ່"ຫຼັງຄາໂລກ"ເສັ້ນນີ້ໄດ້ຮັບຄວາມເອົາໃຈໃສ່ຫຼາຍຕັ້ງແຕ່ໄລຍະວາງແຜນການ,ໃນນັ້ນນອກຈາກການອອກແບບແລະກໍ່ສ້າງແມ່ນເລື່ອງຍາກທີ່ສຸດແລ້ວ,ສິ່ງທ້າທາຍໃຫຍ່ກວ່າໝູ່ແມ່ນສິ່ງແວດລ້ອມຊີວະພາບອັນບອບບາງທີ່ສຸດຂອງພູພຽງຊິງໄຮຕິເບດ.ໃນລາຍການຈີນປັດຈຸບັນພາກນີ້,ເຊີນຟັງບົດແຈ້ງຂ່າວເລື່ອງ:ການອະນຸລັກສິ່ງແວດລ້ອມໃນການສ້າງສາທາງລົດໄຟຊິງໄຮຕິເບດ.
ຈາກເມືອງລາຊາ ເທສະບານຂອງເຂດຕິເບດປົກຄອງຕົນເອງໄປທາງທິດເໜືອ400ກວ່າກິໂລແມັດມີໜອງແຫ່ງໜຶ່ງທີ່ມີເນື້ອທີ່ກວ້າງກວ່າ300ກິໂລແມັດມົນທົນ,ຊື່ວ່າ"ໜອງຊົວນາ".ນໍ້າອັນເສາະໃສໃນໜອງແລະທົ່ງຫຍ້າທຳມະຊາດຢູ່ແຄມໜອງແມ່ນບ່ອນເພີ່ງພາອາໄສຂອງສັດປ່າທີ່ຈີນອະນຸລັກເປັນພິເສດຂອງຈີນຫຼາຍຊະນິດຄືນົກຂຽນຄໍດຳ,ຫ່ານຟ້າ,ເປັດນ້ຳແລະເຍືອງຕິເບດເປັນຕົ້ນ.
ປັດຈຸບັນ,ໜອງຊົວນາທີ່ສວຍງາມໄດ້ກາຍເປັນໜອງທີ່ໃກ້ກັບທາງລົດໄຟຊິງໄຮຕິເບດກວ່າໝູ່,ບ່ອນໃກ້ສຸດພຽງແຕ່ຫ່າງກັນບໍ່ທໍ່ໃດສິບແມັດທໍ່ນັ້ນ.ທ່ານອຽນເພີຍຈູນ ຜູ້ຮັບຜິດຊອບໜ້າທີ່ກໍ່ສ້າງທາງລົດໄຟຕອນນີ້ໄດ້ຊີ້ໃຫ້ນັກຂ່າວເບິ່ງກຳເພງຕ່ຳໆຍາວ20ກວ່າກິໂລແມັດກໍ່ດ້ວຍກະສອບດິນຊາຍ1ແສນກວ່າກະສອບແລະບອກນັກຂ່າວວ່າ: "ເພື່ອບໍ່ໃຫ້ໜອງຊົວນາຖືກເຊື່ອມພິດ,ພວກເຮົາໄດ້ໃຊ້ມາດຕະການ,ກໍ່ກຳແພງກະສອບດິນຊາຍແລະຕາໜ່າງມາຂວາງຂັ້ນ,ໄດ້ຮັບປະກັນໃຫ້ນ້ຳໃນໜອງສະອາດ."
ທ່ານອຽນເພີຍຈູນຍັງແນະນຳວ່າ,ໜອງຊົວນາແມ່ນໜອງພູພຽງແທ້ໆ,ຈາກລະດັບນ້ຳທະເລ4600ກວ່າແມັດ,ສິ່ງແວດລ້ອມຊີວະພາບພາຍໃນເຂດໜອງແມ່ນບອບບາງທີ່ສຸດ,ອຸນຫະພູມຕ່ຳເປັນເວລາຍາວນານແລະລະດູເຕີບໃຫຍ່ສັ້ນເຮັດໃຫ້ ພືດປົກຫຸ້ມຂອງແຫ່ງນັ້ນຟື້ນຍາກທີ່ສຸດຖ້າຖືກທຳລາຍ.ເພື່ອໃຫ້ພືດປົກຫຸ້ມເດີມບໍ່ຖືກທຳລາຍ,ພວກເຂົາເຈົ້າໄດ້ໃຊ້ມາດຕະການ,ຍ້າຍເດີ່ນຫຍ້າໄປປູກຢູ່ບ່ອນບົວລະບັດຮັກສາ,ພາຍຫຼັງສ້າງພື້ນທາງສຳເລັດແລ້ວ,ຈຶ່ງຍ້າຍມາປູກໃສ່ຄືນ,ແລະອະນຸລັກຮັກສາ.
ກິດຈະການໜອງຊົວນາພຽງແຕ່ແມ່ນພາກສ່ວນໜຶ່ງຂອງການສ້າງທາງລົດໄຟຊິງໄຮຕິເບດ,ການຍ້າຍບ່ອນ,ບົວລະບັດຮັກສາແລະຟື້ນຟູພືດປົກຫຸ້ມເທິງພູພຽງທີ່ບອບບາງແມ່ນໄດ້ດຳເນີນໃນຕະຫຼອດຂະບວນການສ້າງທາງລົດໄຟຊິງໄຮຕິເບດ.ຢູ່ໃນສະຖານທີ່ສ້າງທາງລົດໄຟ,ເຂດກໍ່ສ້າງໄດ້ລ້ອມໄວ້ດ້ວຍສາຍລະວັງໄພຢ່າງເຄັ່ງຄັດ,ກຳມະກອນເຮັດວຽກກາຍເສັ້ນລະວັງໄພຈະຖືກປັບໃໝຢ່າງໜັກ.
ເມື່ອທຽບກັບການປົກປ້ອງທຳມະຊາດຄືພືດປົກຫຸ້ມເປັນຕົ້ນແລ້ວ,ເລື່ອງທີ່ຜູ້ສ້າງທາງລົດໄຟຊິງໄຮຕິເບດຮັກສາສັດປ່າກໍຍິ່ງຈັບໃຈຄົນ.ຢູ່ສອງຟາກທາງລົດໄຟຊຳໄຮຕິເບດທີ່ຍາວເກືອບ2000ກິໂລແມັດ,ໄດ້ມີເຂດສະຫງວນທຳມະຊາດຢູ່ແລ້ວ11ແຫ່ງແລະພວມວາງແຜນຢູ່ອີກຫຼາຍແຫ່ງ,ໃນນັ້ນລວມທັງເຂດສະຫງວນທຳມະຊາດເຄີເຄີຊີລີທີ່ມີຊື່ສຽງ,ສັດປ່າລ້ຳຄ່າ10ກວ່າຊະນິດໄດ້ເຄື່ອນໄຫວຢູ່ສອງຟາກທາງລົດໄຟເລື້ອຍໆ,ໃນນັ້ນລວມທັງເຍືອງຕິເບດ,ລໍປ່າຕິເບດແລະງົວຈາມມະລີປ່າເປັນຕົ້ນ.
ເພື່ອອະນຸລັກສັດລ້ຳຄ່າເຫຼົ່ານີ້,ຜູ້ອອກແບບທາງລົດໄຟຊິງໄຮຕິເບດໄດ້ຄົ້ນຄວ້າກົດເກນເຄື່ອນໄຫວແລະຍົກຍ້າຍຂອງພວກມັນຢ່າງລະອຽດ,ແລະໄດ້ຈົ່ງຊ່ອງທາງຈຳເພາະສຳລັບໃຫ້ສັດປ່າຂ້າມຜ່ານ30ກວ່າແຫ່ງຕາມສອງທາງຂ້າງລົດໄຟ.ໃນລະດູສັດປ່າຍົກຍ້າຍແຕ່ເດືອນມິຖຸນາຫາເດືອນສິງຫາທຸກປີ,ກິດຈະການກໍ່ສ້າງຕອນຕ່າງໆຂອງທາງລົດໄຟຊິງໄຮຕິເບດຈົນກະທັ້ງບໍ່ເສຍດາຍຄວາມເສຍຫາຍມື້ລະລ້ານກວ່າຢວນ,ຢຸດຕິການກໍ່ສ້າງເພື່ອຖ້າສັດປ່າຜ່ານເຂດກໍ່ສ້າງຕາມທຳມະຊາດ,ເລື່ອງທີ່ພະນັກງານກໍ່ສ້າງກອບກູ້ແລະຊ່ອຍເຫຼືອສັດປ່ານັ້ນແຮ່ງນັບບໍ່ຖ້ວນ.
ຢູ່ສະຖານີອະນຸລັກຊົວນານດາເຈຂອງເຂດສະຫງວນທຳມະຊາດເຄີເຄີຊີລີ,ຊາວໜຸ່ມເຜົ່າຕິເບດຜູ້ໜຶ່ງທີ່ມີຊື່ວ່າເວີນກາບອກນັກຂ່າວ່າ,ຜູ້ສ້າງທາງລົດໄຟຊິງໄຮຕິເບດໄດ້ຮ່ວມມືກັບພະນັກງານໃນເຂດສະຫງວນເປັນຢ່າງດີ;ລາວເວົ້າວ່າ,
"ລະຫວ່າງພູຄູນລູນກັບແມ່ນ້ຳທົວທົວ,ພວກເຮົາຈະບອກຝ່າຍອອກແບບທາງລົດໄຟວ່າສັດປ່າຜ່ານກາຍບ່ອນໃດເລື້ອຍໆ,ສະເໜີໃຫ້ພວກເຂົາເຈົ້າສ້າງທາງຜ່ານໃຫ້ສັດຢູ່ບ່ອນທີ່ເໝາະສົມ.ໃນເວລາຫາກໍ່ສ້າງທາງລົດໄຟຊິງໄຮຕິເບດ, ມີກຳມະກອນຫຼາຍທີ່ສຸດ,ບາງເທື່ອມີສັດປ່າຍົກຍ້າຍ,ພວກເຮົາກໍສະເໜີໃຫ້ພວກເຂົາເຈົ້າເຊົາເຮັດວຽກສອງສາມມື້,ຖ້າເຍືອງຕິເບດແລະສັດອື່ນໆຜ່ານໄປແລ້ວຈິ່ງເຮັດວຽກ."
ໃນເວລາເອົາຂ່າວຢູ່ຕາມທາງລົດໄຟຊິງໄຮຕິເບດ,ນອກຈາກທາງລົດໄຟຄົດໆລ້ຽວໆທີ່ເນັ່ງໄປທາງໄກແລະເຄື່ອງກໍ່ສ້າງປະກອບແລ້ວ,ນັກຂ່າວເກືອບບໍ່ເຫັນມີຮ່ອງຮອຍບຸກເບີກກໍ່ສ້າງໃດໆ.ຕາມແນະນຳວ່າ,ກິດຈະການກໍ່ສ້າງທາງລົດໄຟຊິງໄຮຕິເບດມີຄວາມຮຽກຮ້ອງຢ່າງເຄັ່ງຄັດທີ່ສຸດຕໍ່ວຽກງານຟື້ນຟູຊີວະພາບທຳມະຊາດຂອງສະຖານທີ່ກໍ່ສ້າງ.ທ່ານຟານເວ້ຊຸ່ນ ຜູ້ຈັດການໂຄງການທີ່ຮັບຜິດຊອບວຽກງານປູລາງລົດໄຟຊິງໄຮຕິເບດກ່າວວ່າ:
"ພວກເຮົາຕ້ອງໄປຂໍເອົາທີ່ດິນທີ່ໃຊ້ກໍ່ສ້າງນຳຂະແໜງການອະນຸລັກສິ່ງແວດລ້ອມທ້ອງຖິ່ນ,ກ່ອນຈະໃຊ້ຕ້ອງຖ່າຍຮູບຖ່າຍວີດີໂອເອົາບ່ອນທີ່ຈະກໍ່ສ້າງແລ້ວໆ, ຈຶ່ງສ້າງສິ່ງກໍ່ສ້າງຊົ່ວຄາວໄດ້,ພາຍຫຼັງກິດຈະການສຳເລັດແລ້ວ,ສິ່ງກໍ່ສ້າງຊົ່ວຄາວເຫຼົ່ານີ້ຕ້ອງມ້າງອອກໝົດ,ຫຼັງຈາກນັ້ນກໍຟື້ນຟູໃຫ້ຢູ່ໃນສະພາບເດີມຕາມທີ່ຖ່າຍໄວ້ໃນວີດີໂອແລະຮູບພາບ.ນອກນີ້,ໃນການກໍ່ສ້າງ,ພວກເຮົາໄດ້ສັ່ງໃຫ້ເອົາຂີ້ເຫຍື້ອການກິນການປູ່ໃສ່ໄວ້ໃນຖົງ,ແລ້ວໂຮມສູນແບ່ງເປັນປະເພດຈັດການ."
ຕາມໄດ້ຊາບ,ທົ່ວກິດຈະການກໍ່ສ້າງທາງລົດໄຟຊິງໄຮຕິເບດໄດ້ລົງທຶນຫຼາຍກວ່າ1ຕື້400ລ້ານຢວນໃນດ້ານອະນຸລັກສິ່ງແວດລ້ອມຊີວະພາບ,ຈົນໄດ້ເປັນໜຶ່ງໃນໂຄງການກໍ່ສ້າງທາງລົດໄຟຂອງຈີນນັບມາຮອດປັດຈຸບັນ.ໃນເວລາໃຫ້ສຳພາດຕໍ່ນັກຂ່າວcriພວກເຮົາ,ທ່ານດາວາຊີເຢັນ ຫົວໜ້າຫ້ອງການໂຄງການລາຊາຂອງມູນນິທິທຳມະຊາດໂລກໄດ້ຢືນຢັນການກະທຳຂອງລັດຖະບານຈີນທີ່ຕັ້ງໜ້າອະນຸລັກສິ່ງແວດລ້ອມຊີວະພາບໃນການສ້າງທາງລົດໄຟຊິງໄຮຕິເບດ;ທ່ານເວົ້າວ່າ:
"ເວົ້າໃນດ້ານຈິນຕະນາການດ້ານການອອກແບບແລະກໍ່ສ້າງແລິວ,ທາງລົດໄຟຊິງໄຮຕິເບດແມ່ນກິດຈະການທີ່ກ້າວໜ້າແລະອະນຸລັກສິ່ງແວດລ້ອມ,ໄດ້ພະຍາຍາມຫຼີກເວັ້ນບໍ່ໃຫ້ມີຜົນກະທົບຕໍ່ສິ່ງແວດລ້ອມ."
ຕໍ່ຄວາມເອົາໃຈໃສ່ຂອງວົງການຕ່າງໆກ່ຽວກັບວ່າຈະເອົາໃຈໃສ່ແນວໃດນຳການອະນຸລັກສິ່ງແວດລ້ອມໃນການໝູນເດີນຂອງທາງລົດໄຟຊິງໄຮຕິເບດໃນພາຍໜ້າ,ຜູ້ຮັບຜິດຊອບທີ່ກ່ຽວຂ້ອງຂອງກະຊວງທາງລົດໄຟຈີນແນະນຳວ່າ,ເພື່ອອະນຸລັກສິ່ງແວດລ້ອມຊີວະພາບອັນບອບບາງຂອງພູພຽງຊິງໄຮຕິເບດ,ລົດໄຟທີ່ແລ່ນຕາມທາງລົດໄຟຊິງໄຮຕິເບດຈະອັດແຈບໝົດ,ຂີ້ເຫຍື້ອ,ສິ່ງເປິເປື້ອນແລະນໍ້າໂສໂຄກໃນລົດລ້ວນແຕ່ບໍ່ອະນຸຍາດໃຫ້ລະບາຍອອກທາງປ່ອງຢ້ຽມໃນເວລາລົດແລ່ນ,ເອົາໄປໂຮມກັນຈັດການຢູ່ສະຖານີລົດໄຟຕາມກຳນົດ,ອາຍອຸ່ນຕາມສະຖານີຕ່າງໆກໍ່ຕ້ອງໃຊ້ພະລັງງານຕາເວັນເປັນຕົ້ນແລະລະບາຍສິ່ງເຊື່ອມພິດຕ່າງໆໃຫ້ໜ້ອຍລົງ.ຈີນຈະພະຍາຍາມສ້າງທາງລົດໄຟຊິງໄຮຕິເບດໃຫ້ເປັນທາງລົດໄຟຊີວະພາບພູພຽງ,ແລະສະໜອງບົດຮຽນອັນດີງາມໃນດ້ານອະນຸລັກສິ່ງແວດລ້ອມໃຫ້ແກ່ການສ້າງໂຄງການພື້ນຖານໂຄງລ່າງຂະໜາດໃຫຍ່ໃນພາຍໜ້າ.
|
