|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການໂລກກິລາ. ຫ່າງຈາກມື້ເປີດງານກິລາໂອລິມປິກປັກກິ່ງປີ 2008 ຍັງມີເວລາ 2 ປີປາຍ, ໃນຂະນະທີ່ກໍ່ສ້າງສະໜາມກິລາງານກິລາໂອລິມປິກ ດັດແປງສິ່ງແວດລ້ອມນະຄອນປັກກິ່ງແລ້ວ, ການໂຄສະນາໂສມໜ້າປັກກິ່ງ ສົ່ງເສີມວັດທະນະທຳຈີນ ແລະໂຄສະນານ້ຳໃຈໂອລິມປິກກໍແມ່ນຂອດສຳຄັນຂອງວຽກງານກະກຽມງານກິລາໂອລິມປິກ. ສະ ນັ້ນ, ຄະນະກຳມະການຈັດງານກິລາໂອລິມປິກປັກກິ່ງໄດ້ເຊື້ອເຊີນດາລາຊາວຈີນໃນວົງການບັນເທີງແລະວົງການກິລາ 100 ກວ່າຄົນປະກອບເປັນຄະນະ, ຈັດການເຄື່ອນໄຫວວັດທະນະທຳແລະກິລາຢ່າງເປັນລະບົບ ເພື່ອເປີດກວ້າງຊື່ສຽງຂອງງານກິລາໂອລິມປິກປັກກິ່ງ. ຕໍ່ໄປເຊີນຟັງບົດແຈ້ງຂ່າວລະອຽດ.
ວຽກງານກະກຽມງານກິລາໂອລິມປິກປັກກິ່ງປີ 2008 ໄດ້ຮັບການສະໜັບສະໜູນຈາກລັດຖະບານແລະປະຊາຊົນຈີນຢ່າງແຂງແຮງ, ແລະກໍໄດ້ຮັບຄວາມສົນໃຈຢ່າງກວ້າງຂວາງໃນທົ່ວໂລກ. ຕາມໂຄງຄວາມຄິດຂອງຄະນະກຳມະການຈັດງານກິລາໂອລິມປິກປັກກິ່ງ, ໃນຂະນະທີ່ຊຸກຍູ້ການກໍ່ສ້າງ "ຮາດແວ" ເຊັ່ນ ສະໜາມກິລາແລະການສ້າງສາສິ່ງແວດລ້ອມຂອງຕົວເມືອງນັ້ນ, ການຊຸກຍູ້ການສ້າງສາ "ຊອຟແວ" ແຫ່ງ "ງານກິລາໂອລິມປິກມະນຸດສາດ" ກໍແມ່ນເນື້ອໃນສຳຄັນຂອງວຽກງານກະກຽມງານກິລາໂອລິມປິກ. ການເຄື່ອນໄຫວທຸກລາຍທີ່ກ່ຽວພັນເຖິງ "ງານກິລາໂອລິມປິກມະນຸດຊາດ" ຕ້ອງການສາທາລະນະຊົນເຂົ້າຮ່ວມຢ່າງກວ້າງຂວາງ. ເພື່ອດຶງດູດຄົນທັງຫຼາຍມາເຂົ້າຮ່ວມ, ເປີດກວ້າງຊື່ສຽງຂອງງານກິລາໂອລິມປິກປັກກິ່ງ, ຄະນະກຳມະການຈັດງານກິລາໂອລິມປິກປັກກິ່ງຈະສວຍໃຊ້ "ຊື່ສຽງຂອງດາລາ", "ຄະນະດາລາຊາວຈີນສະໜັບສະໜູນ" ກໍເລີຍໄດ້ກຳເນີດຂຶ້ນ.
ຄະນະດາລາດັ່ງກ່າວລວມທັງດາລາຂອງແຜ່ນດິນໃຫຍ່ ຮົງກົງ ມາກາວແລະໄຕ້ຫວັນຂອງຈີນໃນວົງການບັນເທີງແລະວົງການກິລາ 100 ກວ່າຄົນທີ່ພວມມີຊື່ສຽງດົ່ງດັງທີ່ສຸດຢູ່ຈີນແລະຕ່າງປະເທດ. ເປົ້າໝາຍຮ່ວມຂອງພວກເຂົາເຈົ້າແມ່ນ: ສວຍໃຊ້ຊື່ສຽງຂອງຕົນເອງ, ໂຄສະນາໂສມໜ້າປັກກິ່ງ ສົ່ງເສີມວັດທະນະທຳຈີນ ໂຄສະນານ້ຳໃຈໂອລິມປິກ.
ທ່ານອີຈ້າຍຊິ່ງ ກຳມະການບໍລິຫານງານຄະນະກຳມະການໂອລິມປິກສາກົນ ຮອງປະທານບໍລິຫານງານຄະນະກຳມະການຈັດງານກິລາໂອລິມປິກປັກກິ່ງເຫັນວ່າ, ເຊື້ອເຊີນດາລາວົງການບັນເທີງແລະກິລາປະກອບເປັນຄະນະສະໜັບສະໜູນເພື່ອເປີດກວ້າງຊື່ສຽງຂອງງານກິລາໂອລິມ ປິກປັກກິ່ງ ແມ່ນການລິເລີ່ມອັນໜຶ່ງ, ຈະໄດ້ຮັບຜົນຫຼາຍທີ່ສຸດ. ທ່ານເວົ້າວ່າ: ຂ້າພະເຈົ້າເຫັນວ່າ ການເຄື່ອນໄຫວນີ້ຍ່ອມຈະມີຜົນສະທ້ອນຢ່າງໃຫຍ່ໃນໝູ່ແຟນເພງແລະແຟນຮູບເງົາ, ໂດຍສະເພາະມີດາລາວົງການບັນເທີງຂອງຮົງກົງ ມາກາວແລະໄຕ້ຫວັນໄດ້ເຂົ້າຮ່ວມ, ຈະມີຜົນສະທ້ອນຢ່າງໃຫຍ່ໃນໂລກຊາວຈີນພົ້ນທະເລ.
ດາລາວົງການບັນເທີງເຫຼົ່ານີ້ກໍ່ມັກເຂົ້າຮ່ວມການເຄື່ອນໄຫວທີ່ມີສ່ວນກ່ຽວຂ້ອງກັບງານກິລາໂອລິມປິກປັກກິ່ງທີ່ສຸດ, ນີ້ບໍ່ພຽງແຕ່ແມ່ນຍ້ອນຮັກຫອມປະເທດຊາດທໍ່ນັ້ນ, ພວກເຂົາເຈົ້າກໍ່ເຊື່ອວ່າ, ຕົນເອງເຂົ້າຮ່ວມການເຄື່ອນໄຫວເຫຼົ່ານີ້, ຈະຍົກສູງຄຸນຄ່າໂສມໜ້າຂອງຕົນເອງ. ດາລາຫຼາຍຄົນກ່າວວ່າ, ໃນຂະນະທີ່ພວກເຂົາເຈົ້າທຸລະກິດວຽກງານຕົນເອງນັ້ນ, ກໍຈະພະຍາຍາມເຂົ້າຮ່ວມການເຄື່ອນໄຫວໂຄສະນາງານກິລາໂອລິມປິກປັກກິ່ງ. ທ່ານເຈິ່ງຈື້ເວິຍ ດາລາຮູບເງົາແລະໂທລະພາບຮົງກົງເວົ້າວ່າ: ໃນ 2 ປີຂ້າງໜ້ານີ້ຈະມີວຽກຫຼາຍ, ແຕ່ລະເດືອນກໍມີການເຄື່ອນໄຫວ, ພວກຂ້າພະເຈົ້າຜັດປ່ຽນກັນເຂົ້າຮ່ວມ, ຜູ່ໃດມີເວລາຫວ່າງຜູ່ນັ້ນກໍຈະໄປເຂົ້າຮ່ວມການເຄື່ອນໄຫວໂຄສະນາ, ພະຍາຍາມຮຽກຊາວຕ່າງປະເທດມາປັກກິ່ງ ເບິ່ງຈີນຈັດງານກິລາໂອລິມປິກໃຫ້ດີແນວໃດ.
ຕໍ່ໄປພາຍໜ້າ, ຄະນະສະໜັບສະໜູນຈະປະສານສົມທົບກັບຄະນະກຳມະການຈັດງານກິລາໂອລິມປິກປັກກິ່ງ ເຮັດວຽກໂຄສະນາສາທາລະນະປະໂຫຍດຕ່າງໆຂອງງານກິລາໂອລິມປິກປັກກິ່ງໃຫ້ດີ, ເຂົ້າຮ່ວມການເຄື່ອນໄຫວໂຄສະນາດ້ານຕ່າງໆ ເຊັ່ນ ວັດທະນະທຳ ກິລາ ການອະນຸລັກສິ່ງແວດລ້ອມແລະການສົ່ງຕໍ່ທວນໄຟ, ແລະການແລກປ່ຽນປະເພດຕ່າງໆດ້ານວັດທະນະທຳແລະກິລາ.
ດາລາທັງຫຼາຍກ່າວສະແດງໂດຍທົ່ວໄປວ່າ, ງານກິລາໂອລິມປິກປັກກິ່ງປີ 2008 ແມ່ນເລື່ອງໃຫຍ່ຂອງຊາວຈີນທຸກຖ້ວນໜ້າ, ການໂຄສະນາງານກິລາໂອລິມປິກປັກກິ່ງ ສະແດງໂສມໜ້າອາລົມແລະຈິດໃຈໂອລິມປິກຂອງຊາວຈີນແມ່ນໜ້າທີ່ຮັບຜິດຊອບທີ່ປັດປ່າຍບໍ່ໄດ້ຂອງດາລາວົງການບັນເທີງ. ທ່ານນາງເສິງຟາງຢວນ ດາລາເພງທີ່ຊື່ດັງຂອງແຜ່ນດິນໃຫຍ່ຈີນເວົ້າວ່າ: ຈັດຕັ້ງຄະນະສະໜັບສະໜູນນີ້ແມ່ນເພື່ອຮຽກຄົນຍິ່ງຫຼາຍມາເອົາໃຈໃສ່ນຳງານກິລາໂອລິມ ປິກ, ພວກຂ້າພະເຈົ້າໃນຖານະເປັນດາລາເພງທີ່ຄົນທັງຫຼາຍລື້ງໜ້າລື້ງຕາ, ນຳໃຊ້ຊື່ສຽງຂອງຕົນ, ໃຫ້ຄົນທັງຫຼາຍເອົາໃຈໃສ່ແລະສະໜັບສະໜູນງານກິລາໂອລິມປິກປັກກິ່ງ.
ນອກຈາກເຂົ້າຮ່ວມການເຄື່ອນໄຫວໂຄສະນາຕ່າງໆແລ້ວ, ຮູບແບບເຂົ້າຮ່ວມງານກິລາໂອລິມປິກປັກກິ່ງອີກຢ່າງໜຶ່ງຂອງດາລາວົງການສິລະປະກຳ ໂດຍສະເພາະແມ່ນວົງການດົນຕີ ແມ່ນເຂົ້າຮ່ວມການແຕ່ງເພງປະຈຳງານກິລາໂອລິມປິກ. ທ່ານນາງເສິງຟາງຢວນທີ່ກ່າວມາຂ້າງເທີງນັ້ນ, ກໍໄດ້ຮ່ວມມືກັບຜູ່ອື່ນແຕ່ງເພງໂຄສະນາຄຳຂວັນງານໂອລິມປິກປັກກິ່ງ "ໂລກແຫ່ງດຽວກັນ ຄວາມຝັນອັນດຽວກັນ". ຕາມສະຖິຕິຂອງຄະນະກຳມະການຈັດງານກິລາໂອລິມປິກປັກກິ່ງ, ໃນເພງປະຈຳງານກິລາໂອລິມປິກປັກກິ່ງເກືອບ 1000 ເພງທີ່ເຂົ້າຮ່ວມການປະກວດທີ່ພວກເຂົາເຈົ້າໄດ້ຮັບນັ້ນ, ມີກວ່າເຄິ່ງໜຶ່ງແມ່ນແຕ່ງໂດຍນັກດົນຕີວິຊາການ. ຄະນະກຳມະການຈັດງານກິລາໂອລິມ ປິກປັກກິ່ງຈະປະກວດເພງເຫຼົ່ານີ້, ແລະຕົກລົງເພງປະຈຳງານກິລາໂອລິມປິກປັກກິ່ງປີ 2008 ໃນທີ່ສຸດ.
|
