ຕາມຂ່າວCRI,ວັນທີ17ກໍລະກົດ,ຢູ່ແຊງເປແຕສະບວກ,ທ່ານຫູຈິນທາວປະທານປະເທດຈີນໄດ້ແຍກອອກພົບປະທ່ານປູຕິນ ປະທານາທິບໍດີຣັດເຊຍ ທ່ານຊີລັກ ປະທານາທິບໍດີຝະຣັ່ງ ແລະທ່ານໂປຼດີ ນາຍົກລັດຖະມົນຕີອີຕາລີ,ແລະໄດ້ພ້ອມກັນກັບທ່ານປູຕິນແລະທ່ານມານໂມຮານ ຊິງ ນາຍົກລັດຖະມົນຕີອິນເດຍຈັດການພົບປະລະຫວ່າງຜູ່ນຳສາມປະເທດ.
ໃນເວລາພົບປະກັບທ່ານປູຕິນ,ທ່ານຫູຈິນທາວໄດ້ຕີລາຄາສູງຕໍ່ການພົວພັນຈີນຣັດເຊຍ.ທ່ານກ່າວວ່າ,ສອງປະເທດຈະເພີ່ມທະວີການປະສານງານຍຸດທະສາດໃນບັນຫາສຳຄັນຂອງສາກົນແລະພາກພື້ນ,ສືບຕໍ່ເສີມຂະຫຍາຍບົດບາດສຳຄັນໃນການປົກປັກຮັກສາສັນຕິພາບແລະສະຖຽນລະພາບຂອງສາກົນແລະພາກພື້ນ.ທ່ານຫູຈິນທາວຫວັງໃຫ້ສອງປະເທດລົງເລິກການຮ່ວມມືໃນຂົງເຂດພະລັງງານ,ປະຕິບັດການຮ່ວມມືໃນໂຄງການໃຫຍ່ດ້ານພະລັງງານ.
ໃນເວລາພົບປະກັບທ່ານຊີລັກ ທ່ານຫູຈິນທາວຊີ້ອອກວ່າ,ສອງປະເທດໄດ້ດຳເນີນການຮ່ວມມືທີ່ມີຜົນສຳເລັດອຸດົມສົມບູນໃນຫຼາຍບັນຫາສຳຄັນຂອງສາກົນແລະເຂດແຄວ້ນ,ຫວັງໃຫ້ສອງປະເທດເພີ່ມທະວີການຮ່ວມມືດ້ານອຸດສາຫະກຳການບິນ,ເລີ່ມຕົ້ນກໍ່ສ້າງໂຄງການຮ່ວມມືຢ່າງເປັນທາງການໂດຍໄວ.
ໃນເວລາພົບປະທ່ານໂປຼດີ,ທ່ານຫູຈິນທາວກ່າວວ່າ,ການພົວພັນຈີນອີຕາລີໄດ້ຂະຫຍາຍຕົວຢ່າງສະດວກ,ສອງປະເທດໄດ້ສ້າງການພົວພັນຄູ່ຂາຍຸດທະສາດຮອບດ້ານແລ້ວ,ສອງປະເທດຄວນຮັດແໜ້ນການປຶກສາຫາລືແລະຮ່ວມມືຍຸດທະສາດໃນວຽກງານລະຫວ່າງຊາດ.ຝ່າຍຈີນຫວັງໃຫ້ສອງປະເທດດຳເນີນການແລກປ່ຽນວັດທະນະທຳດ້ວຍຫຼາຍຮູບການ,ສ້າງພື້ນຖານສັງຄົມທີ່ໝັ້ນແກ່ນກວ່າເກົ່າໃຫ້ແກ່ມິດຕະພາບລະຫວ່າງປະຊາຊົນສອງຊາດ.
ມື້ດຽວກັນ,ໃນເວລາທ່ານຫູຈິນທາວພ້ອມກັບທ່ານປູຕິນແລະທ່ານມານໂມຮານຊິງຈັດການພົບປະລະຫວ່າງຜູ່ນຳຈີນ,ຣັດເຊຍແລະອິນເດຍ,ທ່ານກ່າວວ່າ,ສາມປະເທດມີອິດທິພົນສຳຄັນໃນວຽກງານລະຫວ່າງຊາດແລະເຂດແຄວ້ນ,ການພົວພັນເຊິ່ງກັນແລະກັນຕ່າງໄດ້ຂະຫຍາຍຕົວຢ່າງສະດວກ,ແລະຕ່າງໄດ້ສ້າງການພົວພັນຄູ່ຂາຍຸດທະສາດ.ເສດຖະກິດສັງຄົມຂອງສາມປະເທດມີທ່ວງທ່າພັດທະນາອັນດີງາມ,ມີຄວາມຕາບຈູນກັນຫຼາຍສົມຄວນ.ສາມປະເທດຄວນນຳໃຊ້ເງື່ອນໄຂທີ່ມີຜົນດີເຫຼົ່ານີ້ຢ່າງເຕັມສ່ວນ,ກຳໂອກາດ,ລົງເລິກການຮ່ວມມືຍຸດທະສາດລະຫວ່າງສາມຝ່າຍ.
|
