|
|
 |
| (GMT+08:00)
2006-07-18 14:46:12
|
 |
|
ອຸດົມການຮ່ວມຂອງສະມາຊິກພັກກອມມູນິດຈີນສາມຮຸ້ນຄົນໃນຄອບຄົວດຽວ
cri
|
ກາຍເປັນສະມາຊິກພັກກອມມູນິດຈີນຢ່າງມີກຽດແມ່ນເປົ້າໝາຍສູ້ຊົນຈົນຕະຫຼອດຊີວິດຂອງຊາວຈີນຢ່າງຫຼວງຫຼາຍ.ຍ້ອນມີອຸດົມການຄືກັນ,ສາມເຊັ່ນຄົນໃນຄອບຄົວດຽວລ້ວນແຕ່ແມ່ນສະມາຊິກພັກກອມມູນິດຈີນນັ້ນແມ່ນໄດ້ເຫັນບໍ່ໜ້ອຍຢູ່ຈີນ.ພວກເຮົາຈະພາທ່ານໄປຢາມ ຄອບຄົວທຳມະດາຄອບຄົວໜຶ່ງຢູ່ແຂວງຢຸນນານພາກຕາເວັນຕົກສຽງໃຕ້ຂອງຈີນ,ໄປຟັງເລື່ອງຂອງສະມາຊິກພັກກອມນິດຈີນສາມຮຸ້ນຄົນໃນຄອບຄົວດຽວທີ່ເຕີບໃຫຍ່ໃນຍຸກຕ່າງກັນ.
ຕອນເຊົ້າທຸກໆມື້,ທ່ານລູກ່າງ ອາຍຸ30ປີປາຍກໍໄປທະນາຄານແຫ່ງໜຶ່ງຢູ່ເມືອງຄຸນມິງແຂວງຢຸນນານ,ເລີ່ມເຮັດວຽກໃນມື້ໜຶ່ງ.ໃນສາຍຕາຂອງໝູ່ຮ່ວມງານ,ທ່ານລູກ່າງທີ່ອາຍຸໜຸ່ມພັດມີທ່າທາງໝັ້ນທ່ຽງ,ຖ້າມີວຽກໜັກຫຍັງເພິ່ນກໍເປັນເຈົ້າການໄປເຮັດ.ແຕ່ລະມື້ເມື່ອເລີກການແລ້ວ,ເພິ່ນກໍຈະເຮັດອະນາໄມຫ້ອງການໃຫ້ສະອາດ,ແລ້ວຈຶ່ງເມືອບ້ານ.ຊາວໜຸ່ມຜູ້ທີ່ເບິ່ງຊົງຄືຄົນທຳມະດາຜູ້ນີ້,ພັດໄດ້ເຂົ້າເປັນສະມາຊິກພັກກອມມູນິດມາ12ປີແລ້ວ.
ທ່ານລູກ່າງເວົ້າວ່າ,ເວລາຮຽນຢູ່ໂຮງຮຽນມັດທະຍົມ,ເພິ່ນກໍຢາກເຂົ້າເປັນສະມາຊິກພັກກອມມູນິດຈີນແລ້ວ,ພັກມີຖານະສູງສົ່ງໃນໃຈຂອງທ່ານ.ເພິ່ນເວົ້າວ່າ,
ຂ້າພະເຈົ້າຖືຕະຫຼອດວ່າສະມາຊິກພັກເປັນຜູ້ສູງສົ່ງ,ຮູ້ສຶກວ່າເຂົ້າເປັນສະມາຊິກພັກຍາກຫຼາຍ,ຕ້ອງຍົກລະດັບຂອງຕົນໃຫ້ສູງຂຶ້ນຢ່າງບໍ່ຢຸດຢັ້ງຈົນເຖິງລະດັບໃດໜຶ່ງແລ້ວຈຶ່ງສາມາດພິຈາລະນາເຂົ້າເປັນສະມາຊິກພັກໄດ້.
ຫຼັງຈາກຮຽນຈົບຈາກໂຮງຮຽນມັດທະຍົມແລ້ວ,ທ່ານລູກ່າງໄດ້ເຂົ້າເປັນທະຫານ.ໃນເວລານັ້ນ,ຄວາມປາຖະໜາຢາກເຂົ້າເປັນສະມາຊິກພັກໄດ້ຊຸກຍູ້ໃຫ້ເພິ່ນກ້າວໄປໜ້າຢ່າງຫ້າວຫັນໂດຍຕະຫຼອດ.ໃນໄລຍະຢູ່ໃນກອງທັບ,ທ່ານລູກ່າງບໍ່ພຽງແຕ່ເຝິກຊ້ອມຢ່າງດຸໝັ່ນທໍ່ນັ້ນ,ຍັງເປັນເຈົ້າການຫາບແບກໜ້າທີ່ທີ່ຂ້ອນຂ້າງຍາກ.ໃນທີ່ສຸດມີມື້ໜຶ່ງ,ທ່ານລູກ່າງໄດ້ຜ່ານການທົດສອບຂອງຄະນະພັກຂອງກອງທັບ,ແລ້ວກາຍເປັນສະມາຊິກພັກກອມມູນິດຜູ້ໜຶ່ງ.
ທ່ານລູກ່າງບອກນັກຂ່າວວ່າ,ຕົນເອງຢາກເຂົ້າເປັນສະມາຊິກພັກມາແຕ່ດົນແລ້ວ,ນອກຈາກສະມາຊິກພັກກອມມູນິດທີ່ເປັນກຸ່ມຄົນກ້າວໜ້າດຶງດູດເພິ່ນແລ້ວ,ຜົນສະທ້ອນທາງຄອບຄົວກໍແມ່ນປັດໄຈສຳຄັນອັນໜຶ່ງ.ເພາະວ່າປູ່ແລະພໍ່ຂອງເພິ່ນລ້ວນແຕ່ແມ່ນສະມາຊິກພັກກອມມູນິດຈີນ.
ທ່ານລູຢິນເຊິ່ງເປັນປູ່ຂອງທ່ານລູກ່າງ,ໃນຄາວຍັງໜຸ່ມເຄີຍເຂົ້າຮ່ວມສົງຄາມຕໍ່ຕ້ານຍີ່ປຸ່ນ,ເຄີຍເປັນພິຍານຂອງໄລຍະເວລາສຳຄັນເຊັ່ນໄຊຊະນະແຫ່ງສົງຄາມຕໍ່ຕ້ານຍີ່ປຸ່ນ ປະເທດຈີນໃໝ່ສະຖາປະນາຂຶ້ນເປັນຕົ້ນ.ທ່ານລູຢິນເຊິ່ງແມ່ນໄດ້ເຂົ້າເປັນສະມາຊິກພັກໃນເວລາກອງທະຫານຍີ່ປຸ່ນເຂົ້າຮຸກຮານຈີນ,ທ່ານເຄີຍເຫັນທະຫານຍີ່ປຸ່ນຜູ້ຮຸກຮານສັງຫານພີ່ນ້ອງຮ່ວມຊາດຂອງຕົນ,ແລະເຫັນປະເທດຊາດທີ່ຕົນຮັກຫອມນັ້ນຖືກທະຫານຍີ່ປຸ່ນຢຽບຢ່ຳ.ສະນັ້ນ,ໃນເວລາພັກກອມມູນິດຈີນນຳພາປະຊາຊົນຕໍ່ຕ້ານທະຫານຍີ່ປຸ່ນ,ທ່ານລູຢິນເຊິ່ງກໍໄດ້ເຂົ້າເປັນສະມາຊິກພັກກອມມູນິດ,ແລ້ວເຂົ້າຮ່ວມໃນຖັນແຖວຕໍ່ຕ້ານຜູ້ຮຸກຮານຕ່າງຊາດ.ທ່ານເວົ້າວ່າ,
ໃນເວລານັ້ນ,ຂ້າພະເຈົ້າເຂົ້າເປັນສະມາຊິກພັກກອມມູນີດກໍແມ່ນເພື່ອເອົາຊະນະທະຫານຍີ່ປຸ່ນຜູ່ຮຸກຮານຈີນ.ໃນຄາວນັ້ນຂ້າພະເຈົ້າເປັນຊາວໜຸ່ມທີ່ເຕັມໄປດ້ວຍຄວາມກະຕືລືລົ້ນ,ພວກເຮົາຍອມເສຍສະຫຼະທຸກສິ່ງທຸກຢ່າງເພື່ອພາລະກິດຂອງພັກ.
ທ່ານລູຢິນເຊິ່ງແມ່ນເຂົ້າເປັນສະມາຊິກພັກໃນໄລຍະສົງຄາມ,ສ່ວນທ່ານລູຈ້ຽນກົວ ລູກຊາຍຂອງທ່ານຫາກແມ່ນເຂົ້າເປັນສະມາຊິກພັກກອມມູນິດໃນເວລາປະເທດຈີນໃໝ່ດຳເນີນການກໍ່ສ້າງຢ່າງຂະໜາດໃຫຍ່.ທ່ານລູຈ້ຽນກົວທີ່ເຕີບໃຫຍ່ໃນຄ້າຍທະຫານມາແຕ່ເດັກເວົ້າວ່າ,ຄວາມຮັກຫອມຂອງພໍ່ທີ່ມີຕໍ່ພັກກອມມູນິດມີຜົນສະທ້ອນຕໍ່ເພິ່ນຕະຫຼອດມາ.ທ່ານເວົ້າວ່າ,
ພໍ່ບອກຂ້າພະເຈົ້າເລື້ອຍໆວ່າ:"ແຕ່ກ່ອນຄອບຄົວພວກເຮົາທຸກຍາກຫຼາຍ,ເມື່ອພໍ່ເຂົ້າຮ່ວມການປະຕິວັດແລ້ວ,ໃຕ້ການບຳລຸງສ້າງຂອງພັກ,ພວກເຮົາຈຶ່ງມີຊີວິດທີ່ຜາສຸກຄືດຽວນີ້ພວກລູກມີແຕ່ເດີນໄປນຳພັກກອມມູນິດຈີນ,ເຂົ້າຮ່ວມອົງການພັກ,ຈຶ່ງສາມາດເຮັດວຽກເພື່ອປະຊາຊົນແລະພັກຢ່າງດີກວ່າເກົ່າ.
ໃນເວລາເຂົ້າເປັນສະມາຊິກພັກ,ທ່ານລູຈ້ຽນກົວພວມຢູ່ໃນກອງທັບ,ຊີວິດໃນຄ້າຍທະຫານໃນຍຸກສັນຕິພາບ,ນອກຈາກເຝິກແອບການທະຫານແລ້ວ,ຍັງຕ້ອງປູກຜັກ,ເຮັດອະນາໄມ.ແຕ່ລະເທື່ອທ່ານລູຈ້ຽນກົວກໍເປັນເຈົ້າການນຳໜ້າໂດຍຕະຫຼອດ,ເຮັດວຽກໜັກວຽກເປຶ້ອນເປິເຫຼົ່ານັ້ນ.
ຫຼັງຈາກປະຕິຮູບແລະໄຂປະຕູສູ່ພາຍນອກແລ້ວ,ທ່ານລູຈ້ຽນກົວໄດ້ອອກຈາກກອງທັບກາຍເປັນລັດຖະກອນຜູ້ໜຶ່ງ,ໄປເຮັດວຽກບຸກຄະລາກອນຢູ່ພະແນກແຮງງານຂອງແຂວງຢຸນນານ.ເມື່ອຫາກໍເຮັດວຽກ,ເພື່ອລຶ້ງກັບສະພາບແວດລ້ອມແລະຕຳແໜ່ງວຽກງານອັນໃໝ່,ໃນໃຈຂອງທ່ານໄດ້ຄິດຕະຫຼອດມາວ່າ,
ຂ້າພະເຈົ້າຄິດຢູ່ທຸກເວລາວ່າຂ້າພະເຈົ້າແມ່ນສະມາຊິກພັກກອມມູນິດ,ຄວນລຶ້ງກັບວຽກງານຂອງທ້ອງຖິ່ນໂດຍໄວ,ບໍ່ໃຫ້ມີຄວາມຜິດພາດໃດໆ,ຖ້າມີຄວາມຜິດພາດ,ກໍຈະລະອາຍໃຈຕໍ່ພັກ.
ດຽວນີ້,ທ່ານລູຈ້ຽນກົວໄດ້ອອກກິນເບ້ຍບຳນານຄືກັນກັບພໍ່ແລ້ວ.ເມື່ອຮອດທ້າຍສັບປະດາ,ທ່ານລູກ່າງກໍໄປຢາມພວກເພິ່ນ.ທ່ານລູກ່າງເວົ້າວ່າ,ເຖິງວ່າພໍ່ແລະປູ່ເຖົ້າແລ້ວກໍຕາມ,ແຕ່ການກະທຳບາງຢ່າງຂອງພວກເພິ່ນທີ່ເປັນສະມາຊິກພັກກອມມູນິດ,ເຮັດໃຫ້ທ່ານມີພາບປະທັບໃຈອັນເລິກເຊິ່ງທີ່ສຸດ.ເມື່ອທ່ານລູກ່າງຍັງນ້ອຍ,ປູ່ກໍໄດ້ເປັນນາຍທະຫານທີ່ມີຊື່ສຽງແລ້ວ,ແຕ່ສິ່ງທີ່ເຮັດໃຫ້ລູກ່າງປະຫຼາດໃຈແມ່ນ,ເຖິງວ່າມີລົດປະຈຳຕຳແໜ່ງ,ແຕ່ປູ່ພັດບໍ່ຂີ່ລົດ,ຫາກຍ່າງໄປເຂົ້າການແລະຮ່ວມປະຊຸມຄືກັນກັບທະຫານທຳມະດາ.ສ່ວນພໍ່,ກ່ອນອອກກິນເບ້ຍບຳນານສອງປີ,ທາງຫົວໜ່ວຍລະດົມຂົນຂວາຍພະນັກງານໄປເຮັດວຽກຢູ່ເຂດທຸກຍາກ,ຕາມທຳມະດາພໍ່ບໍ່ໄປກໍໄດ້,ແຕ່ພໍ່ພັດເປັນເຈົ້າການອາສາສະໝັກໄປເຮັດວຽກຢູ່ເຂດທຸກຍາກແລ້ວກໍເຮັດວຽກຢູ່ຫັ້ນເປັນເວລາສອງປີ.
ໃນຄາວນັ້ນ,ທ່ານລູກ່າງຍັງເປັນເດັກນ້ອຍ,ບໍ່ເຂົ້າໃຈການກະທຳຂອງປູ່ແລະພໍ່,ເມື່ອເພິ່ນຄ່ອຍໆເຕີບໃຫຍ່ຂຶ້ນແລ້ວຈຶ່ງເຂົ້າໃຈວ່າປູ່ແລະພໍ່ແມ່ນໃຊ້ມາດຖານ ສະມາຊິກພັກກອມມູນິດມາຄາດໝາຍຕົນເອງຢ່າງເຄັ່ງຄັດໂດຍຕະຫຼອດ.ຕັ້ງແຕ່ນັ້ນມາ,ທ່ານລູກ່າງກໍຫັນຈາກການເຄົາລົບປູ່ແລະພໍ່ມາເປັນການຫຍັບມໍ່ກັບພວກເພິ່ນ.ເມື່ອທ່ານລູກ່າງກາຍເປັນສະມາຊິກພັກກອມມູນິດ,ໃນທີ່ສຸດ,ທ່ານໄດ້ເຂົ້າໃຈການກະທຳຂອງປູ່ແລະພໍ່ໃນເມື່ອກ່ອນແລ້ວ.ທ່ານລູກ່າງເວົ້າວ່າ,ເວລາເຮັດວຽກ,ຂ້າພະເຈົ້າຄິດໂດຍຕະຫຼອດວ່າ,ຂ້າພະເຈົ້າແມ່ນສະມາຊິກພັກ.ບໍ່ວ່າເຮັດວຽກຫຍັງ,ຂ້າພະເຈົ້າກໍຫວັງຢາກເຮັດໃຫ້ດີກວ່າຜູ່ອື່ນ.
ວັນເວລາໄດ້ຜ່ານພົ້ນໄປຢ່າງໄວວາ,ສາມເຊັ່ນຄົນຂອງທ່ານລູກ່າງຍັງດຳລົງຊີວິດຕໍ່ໄປ,ການສະແຫວງຫາລັດທິກອມມູນິດຂອງພວກເພິ່ນກໍສືບຕໍ່ກັນໄປ.
|
|
|
