|
|
 |
| (GMT+08:00)
2006-07-19 18:05:57
|
 |
|
ເພງຂອງນາງຊ້າຍສິນ
cri
Author: mo
|
ທີ່ນີ້ ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ້ຟັງທີ່ເຄົາລົບ, ຍິນດີຕ້ອນຮັບທ່ານຮັບຟັງລາຍການຢ່ອນອາລົມໃນວັນເສົາ, ຂ້າພະເຈົ້າແມ່ນແສງແກ້ວ. ໃນລາຍການມື້ນີ້, ຂ້າພະເຈົ້າຂໍແນະນຳເພງປະມວນໜຶ່ງທີ່ຂັບຮ້ອງໂດຍນາງຊ້າຍສິນ ນັກຮ້ອງໄຕ້ຫວັນຈີນສູ່ທ່ານຟັງ. ກ່ອນອື່ນ ເຊີນຟັງເພງ"zai na yao yuan de di fang" ຢູ່ແດນທີ່ກວງໄກ.
ທີ່ທ່ານພວມຟັງຢູ່ນີ້ແມ່ນເພງ"zai na yao yuan de di fang" ຢູ່ແດນທີ່ກວງໄກ ຂັບຮ້ອງໂດຍນາງຊ້າຍສິນ. ນີ້ແມ່ນທ່ານວາງໂລ້ປິ່ນ ນັກແຕ່ງເພງທີ່ມີຊື່ສຽງຂອງຈີນຮຽບຮຽງໃໝ່ຕາມເພງພື້ນເມືອງພາກຕາເວັນຕົກສຽງເໜືອຂອງຈີນ. ທຳນອງອອນຊອນທັງມີຄວາມກະຕືລືລົ້ນ, ເຕັມໄປດ້ວຍຈິດອາລົມດັ່ງກາບກອນ ງາມວິຈິດປານພາບແຕ້ມ. ເນື້ອເພງມີຢູ່ວ່າ, "ຢູ່ແດນທີ່ກວງໄກ, ມີນາງູສາວຄົນຮູ້ຜູ້ດີ, ຜູ້ໃດຍ່າງກາຍຕູບຂອງນາງໄປ, ຍ່ອມຫຼຽວເບິ່ງນາງດ້ວຍຄວາມອາໄລ. ຮອຍຍິ້ມເທິງໃບໜ້ານາງ, ງາມດັ່ງດວງຕາເວັນທີ່ແດງຮຸນໆ, ດວງຕາອັນໃສແຈ່ມຂອງນາງຄືດັ່ງດວງຈັນທີ່ແຈ້ງສະຫວ່າງເທິງຟ້າ."
ຢູ່ເວທີເພງຈີນ, ນາງຊ້າຍສິນ ນັກຮ້ອງໄຕ້ຫວັນຄືກັບຕົ້ນໄມ້ຂຽວຕະຫຼອດປີ, ໃນທ້າຍຊຸມປີ 70 ສະຕະວັດທີແລ້ວ, ນາງກໍໄດ້ຂຶ້ນຊື່ລືນາມຍ້ອນເພງ"qia si ni de wen rou" ຄືດັ່ງຄວາມລະມ່ອມລະໄມຂອງເຈົ້າ. ເນື້ອເພງມີຢູ່ວ່າ: "ໃນມື້ນັ້ນຂອງເດືອນນັ້ນປີນັ້ນ, ຂ້ອຍບໍ່ຊ່າງຈະອອກປາກອຳລາ, ຂໍໃຫ້ທຸກສິ່ງສຸກຢ່າງຜ່ານໄປ. ແຕ່ນີ້ບໍ່ແມ່ນເລື່ອງງ່າຍ, ເຮົາທັງສອງໃຜກໍບໍ່ຮ້ອງໄຫ້, ຂໍໃຫ້ມັນຈາງຫາຍໄປໃນຄວາມມິດງຽບ. ມາຮອດດຽວນີ້, ເວລາຜ່ານໄປປີແລ້ວປີອີກ, ຂ້ອຍອົດຄຶດຮອດບໍ່ໄດ້, ຄຶດຮອດເຈົ້າ, ຄຶດຮອດອະດີດ, ຂໍໃຫ້ລົມທະເລຈົ່ງພັດຂຶ້ນອີກ, ພຽງແຕ່ເພື່ອມີຟອງທະເລ, ທີ່ລະມ່ອມລະໄມຄືກັບເຈົ້າ."
ນາງຊ້າຍສິນມີສຽງທຸ້ມ, ທຸ່ນທ່ຽງ, ລີລາການສະແດງກໍຄ່ຽມຄົມ, ສຸພາບສະຫງ່າງາມ, ໄດ້ຮັບຄວາມຊົມເຊີຍຈາກຜູ້ຟັງໄວຕ່າງໆ. ເພງbei yi wang de shi guang ເວລາທີ່ຖືກຫຼົງລືມ ນາງກໍໄດ້ໃຊ້ສຽງຄໍທີ່ມີສະເໜຂອງນາງຢ່າງເຕັມທີ່, ຈົນກາຍເປັນເພງອະມະຕະ. ມາ, ຫຼັບຕາຟັງນຳກັນ, ໃນຍາມລາຕີອັນດີງາມໃນມື້ມີ້.
"ແມ່ນໃຜເຄາະປ່ອງຢ້ຽມຂ້ອຍ? ແມ່ນໃຜພວມດີດພິນ? ຄວາມຫຼັງທີ່ລືມໄປແລ້ວຄ່ອຍໆກັບຄືນສູ່ຄວາມຊົມຈຳ. ພາບອັນມ່ວນຊື່ນປະກົດຂຶ້ນໃນສະໝອງ. ສາຍຝົນໂຮຍຮຳໃສ່ປ່ອງຢ້ຽມ, ພາໃຫ້ຂ້ອຍຫວນຄິດເຫັນອະດີດຕະການ."
ເພງ"zai yin se de yue guang xia" ໃຕ້ແສງຈັນສີເງິນ ແມ່ນເພງພື້ນເມືອງທີ່ນິຍົມກັນຮ້ອງໃນໝູ່ຊົນເຜົ່າທາທາເອີເຂດຊິນຈ່ຽງ ພາກຕາເວັນຕົກສຽງເໜືອຂອງຈີນ. ທຳນອງເພງອອນຊອນນິ້ມນວນ, ສະແດງໃຫ້ເຫັນຄວາມຫວນຄືນຄວາມຮັກໃນອະດີດຂອງຄົນທັງຫຼາຍ.
ເນື້ອເພງມີຢູ່ວ່າ,"ເທິງຫາດຊາຍສີເງິນ, ແສງຈັນສາດສ່ອງ, ຂ້ອຍຊອກຫາຮ່ອງຮອຍໃນອະດີດ, ແຕ່ອະດີດພັດມົວໝອງແລ້ວ. ຄືດັ່ງຄວາມຝັນ. ເຈົ້າຢູ່ໃສ, ນ້ອງສາວທີ່ຈາກໄປດົນນານ?"
ຕໍ່ໄປ, ເຊີນຟັງເພງພື້ນເມືອງເຂດກວາງຊີທີ່ໃຫ້ຊື່ວ່າ"hua zhen yin xian xian chuan zhen"ເຂັມແສ່ວສອດດ້າຍ, ດ້າຍແຍ່ເຂັມ ຂັບຮ້ອງໂດຍນາງຊ້າຍສິນ. ໃນເວລາຈັດທຳເພງນີ້, ນາງຊ້າຍສິນໄດ້ເຂົ້າຮ່ວມການແຕ່ງທຳນອງແລະການປະດິດຄິດແຕ່ງອື່ນໆ, ເພງທີ່ໄດ້ຮຽບຮຽງໃໝ່ແລ້ວໄວ ມ່ວນ ແລະຈັບໃຈ, ໂດຍສະເພາະແມ່ນນາງຊ້າຍສິນຍັງໄດ້ຮ້ອງສຽງຫື່ໆໄປພ້ອມ, ເຮັດໃຫ້ເພງນີ້ຍິ່ງນິ້ມນວນແລະມີຊີວິດຊີວາ.
ເນື້ອເພງມີຢູ່ວ່າ: ເຂັມແສ່ວສອດດ້າຍ, ດ້າຍແຍ່ເຂັມ, ຜູ້ບ່າວບໍ່ຮູ້ໃຈຜູ້ສາວ. ນົກຮູ້ປາຢູ່ໃນນ້ຳ, ແຕ່ປາບໍ່ຮູ້ນົກຢູ່ໃນປ່າ. ຖ້າຊອກປາບໍ່ເຫັນຢ່າຄຽດນ້ຳເດີ້, ຊອກນົກບໍ່ເຫັນກໍຢ່າຕິປ່າເດີ້, ບໍ່ແມ່ນນົກບໍ່ຢາກບິນອອກມາຫາ. ແຕ່ຫາກຍ້ອນຜູ້ຊາຍ 10 ຄົນໃດມີ 9 ຄົນບໍ່ລະອຽດ.
ທ່ານຜູ້ຟັງ, ມ້ວນທ້າຍລາຍການມື້ນີ້, ເຊີນຟັງເພງ"ni de yan shen"ສາຍຕາຂອງເຈົ້າ ຂັບຮ້ອງໂດຍນາງຊ້າຍສິນ. ເນື້ອເພງມີຢູ່ວ່າ: ຄືດັ່ງຝົນຕົກໃສ່ໃຈຂ້ອຍ, ຮູ້ສຶກເລິກລັບແທ້ໆ. ຂ້ອຍອົດບໍ່ໄດ້ຈຶ່ງແຫງນເບິ່ງເຈົ້າ, ແຕ່ເຈົ້າພັດມິດເສີຍ. ເຖິງວ່າເຈົ້າບໍ່ປາກບໍ່ຈາ, ແຕ່ຂ້ອຍພັດລືມຍາກ. ສາຍຕາຂອງເຈົ້າໃນຍາມນັ້ນ, ແຈ່ມໃສທັງສວຍງາມ, ມິດຕະພາບອັນໂອບອ້ອມ, ພາໃຫ້ຂ້ອຍດີໃຈເຫຼືອພັນລະນາ.
ທ່ານຜູ້ຟັງທີ່ເຄົາລົບ, ທີ່ຟັງມານັ້ນແມ່ນເພງ"ni de yan shen" ສາຍຕາຂອງເຈົ້າ ຂັບຮ້ອງໂດຍນາງຊ້າຍສິນ. ເຖິງວ່າເຮົາຫ່າງໄກກັນຫຼາຍ, ແສງແກ້ວບໍ່ສາມາດໄດ້ເຫັນສາຍຕາຂອງທ່ານ, ແຕ່ຄື້ນວິທະຍຸໄດ້ດຶງພວກເຮົາໃຫ້ເຂົ້າໃກ້ຊິດກັນ. ເອົາລະ, ຂອບໃຈທ່ານໄດ້ສະໜັບສະໜູນລາຍການຢ່ອນອາລົມໃນວັນເສົາຕະຫຼອດມາ, ພົບກັນໃໝ່ໃນວັນເສົາໜ້າ, ສະບາຍດີ.
|
|
|
