|
ຕາມຂ່າວCRI,ຕາມສະຖິຕິຫຼ້າສຸດໃນວັນທີ19ກໍລະກົດຂອງພະແນກທີ່ກ່ຽວຂ້ອງຂອງອິນໂດເນເຊຍ,ຈຳນວນຄົນຕາຍໃນຄື້ນຊູນາມີທີ່ເກີດຂຶ້ນຍ້ອນແຜ່ນດິນໄຫວຢູ່ເຂດທະເລເກາະຊາວາໃນວັນທີ17ກໍລະກົດໄດ້ເພີ່ມຂຶ້ນຮອດ550ຄົນແລ້ວ.ສ່ວນໃນວັນທີ19ກໍລະກົດ,ເກາະຊາວາໄດ້ເກີດແຜ່ນດິນໄຫວຢ່າງຮຸນແຮງເທື່ອທີສອງໃນ3ມື້ມານີ້,ປັດຈຸບັນ,ຍັງບໍ່ທັນໄດ້ຮັບສັນຍານເຕືອນໄພຄື້ນຊູນາມີເທື່ອ.
ດຽວນີ້,ກອງກອບກູ້ວິຊາສະເພາະພວມອອກແຮງດຳເນີນວຽກກອບກູ້ຢູ່ເຂດປະສົບໄພພາຍໃຕ້ການປະສານສົມທົບຂອງທະຫານແລະຕຳຫຼວດ1000ກວ່າຄົນ,ວັນທີ19ກໍລະກົດ,ເຂດປະສົບໄພແຫ່ງຕ່າງໆໄດ້ຂຸດເອົາສົບຜູ່ເສຍຊີວິດງວດໜຶ່ງ.ນອກນີ້,ຍັງມີ275ຄົນຢູ່ໃນບັນຊີລາຍຊື່ຜູ່ຫາຍສາບສູນ,ຜູ່ປະສົບໄພ5ໝື່ນກວ່າຄົນຖືກຈັດວາງໃຫ້ໄປຢູ່ສະຖານທີ່ຫຼີກໄພຊົ່ວຄາວ.ເຈົ້າໜ້າທີ່ຂອງອົງການປະສານງານກໍູ້ໄພທຳມະຊາດແຫ່ງຊາດອິນໂດເນເຊຍກ່າວວ່າ,ມີຊາວຕ່າງປະເທດ5ຄົນໄດ້ປະສົບເຄາະຮ້າຍ, 9ຄົນຖືກບາດເຈັບ.
ນອກນີ້,ຂ່າວແຈ້ງວ່າ,ເວລາ6ໂມງ ຍັງ5ນາທີ ຂອງຕອນແລງວັນທີ19ກໍລະກົດ,ເວລາທ້ອງຖິ່ນ,ອິນໂດເນເຊຍໄດ້ເກີດແຜ່ນດິນໄຫວຮຸນແຮງຂັ້ນ6,2ລິກເຕີອີກເທື່ອໜຶ່ງ.ຕາມກົມອຸຕຸນິຍົມແລະທໍລະນີສາດຂອງອິນໂດເນເຊຍກ່າວວ່າ,ໃຈກາງເກີດແຜ່ນດິນໄຫວເທື່ອນີ້ແມ່ນຢູ່ຊ່ອງແຄບຊູນດາທີ່ຢູ່ລະຫວ່າງເກາະຊາວາກັບເກາະຊູມັດຕຼາແຫ່ງອິນໂດເນເຊຍ.ປັດຈຸບັນ,ຍັງບໍ່ທັນມີລາຍງານຂ່າວກ່ຽວກັບຄົນຕາຍຫຼືບາດເຈັບແລະຄວາມເສຍຫາຍດ້ານຊັບສິນໃນແຜ່ນດິນໄຫວເທື່ອນີ້.
ສື່ມວນຊົນອິນໂດເນເຊຍລາຍງານວ່າ:ເຖິງວ່າປາຍ ແຜ່ນດິນໄຫວເກີດຂຶ້ນເລື້ອຍໆ,ແຕ່ ຜູ່ປະສົບໄພສ່ວນໜຶ່ງໄດ້ກັບຄືນສູ່ເຮືອນຊານຂອງຕົນຕາມໆກັນແລ້ວ.
|
