|
|
 |
| (GMT+08:00)
2006-07-20 18:30:19
|
 |
|
ໂລກເລີ່ມຫຍັບເຂົ້າໃກ້ກັບພາສາຈີນ(ສຽງ)
cri
|
ທຳມະດາແລ້ວ,ພາສາອັງກິດແມ່ນການເລືອກເອົາກ່ອນໝູ່ຂອງຄົນທັງຫຼາຍໃນເວລາຮຽນພາສາທີສອງ,ແລະມາຮອດປະຈຸບັນ,ພາສາອັງກິດຍັງແມ່ນພາສາສາກົນທີ່ສຳຄັນ.ແຕ່ວ່າ,ຄຽງຄູ່ກັບກຳລັງເສດຖະກິດຂອງຈີນເຂັ້ມແຂງຂຶ້ນແລະຖານະສາກົນຍົກສູງຂຶ້ນ,ໃນທົ່ວໂລກມີຄົນນັບມື້ນັບຫຼາຍເລື້ອກຮຽນພາສາຈີນເປັນພາສາທີສອງ.ຕາມສະຖິຕິ,ປະຈຸບັນນີ້,ໃນທົ່ວໂລກໄດ້ມີ30ກວ່າລ້ານຄົນທີ່ພາສາແມ່ບໍ່ແມ່ນພາສາຈີນນັ້ນກຳລັງຮ່ຳຮຽນພາສາຈີນ,ໃນນັ້ນ,ມີຄົນບໍ່ໜ້ອຍເຫັນວ່າ ການຮູ້ພາສາຈີນຫຼືບໍ່ແມ່ນປັດໄຈສຳຄັນອັນໜຶ່ງຂອງສ່ວນບຸກຄົນແລະວິສາຫະກິດຈະມີທ່າແຮງຫຼືບໍ່ໃນການແຂ່ງຂັນສາກົນ.
ນາງເຄີສຕິນ ສະທອມ ຕາສີຟ້າຜົມສີຄຳ,ແມ່ນນັກສຶກສາຂອງມະຫາວິທະຍາໄລມິນສະແທວເຢຍລະມັນ.ໃນຍາມຮຽນຢູ່ໂຮງຮຽນມັດທະຍົມປາຍ,ນາງກໍສົນໃຈນຳພາສາຈີນແລະປະເທດຈີນ.ເມື່ອເຂົ້າມະຫາວິທະຍາໄລແລ້ວ,ນາງເຄີສຕິນໄດ້ເລືອກຮຽນວິຊາພາສາຈີນຢ່າງສົມຫວັງ.ເມື່ອໄດ້ຮຽນສີ່ປີແລ້ວ,ປະຈຸບັນນີ້,ນາງສາມາດລົມກັບເພື່ອນຮຽນຈີນດ້ວຍພາສາຈີນຢ່າງຫ່ຼຽນໄຫຼແລ້ວ.ນາງບອກນັກຂ່າວວ່າ,ພາສາຈີນແມ່ນການເລືອກເອົາທີ່ດີຫຼາຍ,ນາງເວົ້າວ່າ:"ປະຈຸບັນນີ້,ຢູ່ຈີນມີໂອກາດຫຼາຍ,ຫຼາຍບໍລິສັດຂອງເຢຍລະມັນໄດ້ຕັ້ງສາຂາຢູ່ຈີນ,ເຢຍລະມັນກັບຈີນໄດ້ມີການພົວພັນການຄ້ານັບມື້ນັບແໜ້ນແຟ້ນ.ສະນັ້ນ,ຂ້າພະເຈົ້າຄິດວ່າ,ຮຽນພາສາຈີນຈະຊ່ອຍຫາວຽກເຮັດງານທຳໄດ້ງ່າຍ."
ນາງເຄີສຕິນເວົ້າວ່າ,ປະຈຸບັນນີ້,ຢູ່ເຢຍລະມັນ,ມີຄົນນັບມື້ນັບຫຼາຍຮຽນພາສາຈີນ.ໃນເວ ລານາງຫາກໍ່ເຂົ້າມະຫາວິທະຍາໄລ,ໃນຫ້ອງຮຽນພາສາຈີນທຸກຫ້ອງມີນັກສຶກສາພຽງແຕ່10ຄົນທໍ່ນັ້ນ,ແຕ່ປະຈຸບັນນີ້,ໄດ້ມີຮອດ40ຄົນແລ້ວ.
ທີ່ຈິງແລ້ວ,ພາສາຈີນແມ່ນພາສາທີ່ສັບສົນຫຼາຍ,ໂດຍສະເພາະເວົ້າສຳລົບຄົນຝ່າຍຕາເວັນຕົກແລ້ວ,ທຳນອງສຽງແລະຮູບຕົວໜັງສືຈີນເຮັດໃຫ້ຜູ້ຮຽນຫຼາຍຄົນຮູ້ສຶກປວດຫົວ.ແຕ່ວ່າ,ຄຽງຄູ່ກັບຈີນໄຂປະຕູສູ່ພາຍນອກກວ້າງແລະເສດຖະກິດຈີນເຕີບໂຕດ້ວຍຈັງຫວະໄວໂດຍຕະຫຼອດ,ການໄປມາຫາສູ່ກັນແລະການຕິດຕໍ່ພົວພັນລະຫວ່າງຈີນກັບໂລກນັບມື້ນັບກວ້າງຂວາງແລະເລິກເຊິ່ງ,ຄົນຕ່າງປະເທດນັບມື້ນັບຫຼາຍກໍເລີ່ມນິຍົມຮຽນພາສາຈີນ.
ທ່ານນາງວາງຊ່າວແມ່ນອາຈານຈີນທີ່ສອນພາສາຈີນຢູ່ສ.ເກົາຫຼີ,ນາງບອກນັກຂ່າວວ່າ, ດຽວນີ້,ຄົນສ.ເກົາຫຼີຫຼວງຫຼາຍມັກເລືອກເອົາພາສາຈີນເປັນພາສາທີສອງ,ນັກຮຽນຫຼາຍ ຄົນມີຄວາມກະຕືລືລົ້ນໃນການຮຽນພາສາຈີນ,ເຮັດໃຫ້ນາງກະຕຸ້ນໃຈທີ່ສຸດ.ນາງເວົ້າວ່າ:"ໃນການສອນພາສາຈີນ,ຂ້າພະເຈົ້າຮູ້ສຶກວ່າ,ຄົນສ.ເກົາຫຼີມັກພາສາຈີນ,ແລະສົນໃຈນຳຈີນ,ພວກເຂົາເຈົ້າເວົ້າວ່າ,ຖ້າມີໂອກາດຈະໄປເຮັດວຽກຫຼືທ່ອງທ່ຽວຢູ່ຈີນ."
ປະຈຸບັນນີ້,ຈີນແມ່ນຄູ່ຂາການຄ້າໃຫຍ່ກວ່າໝູ່ຂອງສ.ເກົາຫຼີ,ໃນ5ປີທີ່ຜ່ານມາ,ຈຳນວນຄົນສ.ເກົາຫຼີທີ່ຮຽນພາສາຈີນໄດ້ເພີ່ມຂຶ້ນ66%,ປະຈຸບັນນີ້,ມີນັກຮຽນມັດທະຍົມແລະນັກສຶກສາມະຫາວິທະຍາໄລຫຼາຍແສນຄົນກຳລັງຮຽນພາສາຈີນ;ໃນໝູ່ນັກສຶກສາຕ່າງປະເທດທີ່ຮຽນພາສາຈີນຢູ່ຈີນນັ້ນ,ນັກສຶກສາສ.ເກົາຫຼີຫຼາຍກວ່າໝູ່,ຄືກວມ40%.ເວົ້າສຳລັບຄົນສ.ເກົາຫຼຫຼາຍຄົນແລ້ວ,ຖ້າໃນຊີວະປະຫວັດໄດ້ຂຽນວ່າ"ສາມາດເວົ້າພາສາຈີນຫຼ່ຽນໄຫຼ"ກໍມີສ່ວນທີ່ຈະໄດ້ວຽກເຮັດຫຼາຍທີ່ສຸດ.ທີ່ຈິງແລ້ວ,ບໍ່ພຽງແຕ່ຢູ່ສ.ເກົາຫຼີ,ຢູ່ເຂດອື່ນຂອງອາຊີ,ຢູ່ເອີລົບແລະອາເມລິກາ,ພາສາຈີນກໍໄດ້ກາຍເປັນພາສາໃໝ່ທີ່ຕ້ອງຮຽນຮູ້ໃນລະດັບໃດໜຶ່ງ.
ພາຍໃຕ້ການຊຸກຍູ້ຂອງຄວາມກະຕືລືລົ້ນໃນການຮ່ຳຮຽນພາສາຈີນ,ລັດຖະບານຂອງ ຫຼາຍປະເທດກໍໄດ້ເລີ່ມເອົາໃຈໃສ່ນຳວຽກງານສອນພາສາຈີນ.ທ່ານວູມີນຕວນ ເຈົ້າໜ້າທີ່ກະຊວງສຶກສາທິການແລະອົບຮົມຂອງຫວຽດນາມເວົ້າວ່າ:"ດຽວນີ້,ນັກຮຽນຫວຽດນາມມັກຮຽນພາສາຈີນທີ່ສຸດ.ນອກຈາກມະຫາວິທະຍາໄລແລ້ວ,ຢູ່ຫວຽດນາມຍັງມີສູນພາສາຈີນຫຼາຍບ່ອນ,ນັກຮຽນຫຼວງຫຼາຍຊອກຮຽນພາສາຈີນໃນເວລາຫວ່າງ."
ຕາມຊາບວ່າ,ຢູ່ຫຼາຍເຂດຂອງເຢຍລະມັນ,ພາສາຈີນໄດ້ກາຍເປັນວິຊາສອບເສັງທີ່ເປັນເອກະພາບກັນຂອງໂຮງຮຽນມັດທະຍົມ;ຢູ່ອັງກິດ,ພາກສ່ວນການສຶກສາໄດ້ສະໜັບສະ ໜູນການສ້າງໂຄງຮ່າງສິດສອນພາສາຈີນຂອງໂຮງຮຽນມັດທະຍົມ;ຢູ່ອິນໂດເນເຊຍ,ພາກສ່ວນການສຶກສາມີແຜນຈະຕັ້ງຫຼັກສູດພາສາຈີນສຳລັບໂຮງຮຽນມັດທະຍົມ8ພັນກວ່າຫຼັງໃນທົ່ວປະເທດໃນປີໜ້າ.
ເພື່ອກວດສອບລະດັບພາສາຈີນຂອງຄົນຕ່າງປະເທດ,ແຕ່ປີ1991ເປັນຕົ້ນມາ,ຈີນໄດ້ຕັ້ງ ການສອບເສັງລະດັບພາສາຈີນທີ່ແນໃສ່ບຸກຄົນທີ່ພາສາແມ່ບໍ່ແມ່ນພາສາຈີນ.ປະຈຸບັນນີ້,ຢູ່34ປະເທດໃນທົ່ວໂລກມີ150ກວ່າບ່ອນສອບສອບເສັງລະດັບພາສາຈີນ.ເມື່ອມີປະກາດຊະນີຍະບັດລະດັບທີ່ສົມຄູ່ກັນແລ້ວ,ຄົນຕ່າງປະເທດຮ້ອງຂໍເຂົ້າຮຽນຢູ່ໂຮງຮຽນຊັ້ນສູງຂອງຈີນໄດ້.
ທ່ານຄຼິສ ມູສທີ່ມາຈາກອາເມລິກາກໍແມ່ນເຂົ້າຮ່ວມການສອບເສັງລະດັບພາສາຈີນເພື່ອຈຸດປະສົງດັ່ງກ່າວ,ທ່ານເວົ້າວ່າ:"ຂ້າພະເຈົ້າຄິດວ່າ,ເຂົ້າຮ່ວມການສອບເສັງລາຍນີ້ມີ ຫຼາຍມູນເຫດ,ຄື ໜຶ່ງ,ຢາກຮູ້ລະດັບພາສາຈີນຂອງຕົນ,ຢາກຮູ້ວ່າ ໃນດ້ານໃດຕົນເອງຍັງອ່ອນຍັງຕ້ອງຮຽນຕື່ມ;ສອງ,ນີ້ແມ່ນການສອບເສັງມາດຖານລະດັບຊາດຂອງຈີນ,ຖ້າຂ້າພະເຈົ້າຢາກຂໍຮຽນປະລິນຍາໂທຫຼືວິຊາອື່ນຢູ່ຈີນ,ຕາມຄາດໝາຍ,ຂ້າພະເຈົ້າກໍຕ້ອງເສັງໃຫ້ໄດ້ຂັ້ນ6ຂອງການສອບເສັງລະດັບພາສາຈີນ."
ໃນຫຼາຍປີມານີ້,ຍ້ອນວ່າແຫ່ງຕ່າງໆໃນໂລກໄດ້ປະກົດມີກະແສນິຍົມຮຽນພາສາຈີນຕໍ່ເນື່ອງກັນ,ຫຼາຍປະເທດຂາດເຂີນຄູສອນພາສາຈີນໄດ້ກາຍເປັນບັນຫາທີ່ນັບມື້ນັບໜັກ ໜ່ວງ.ໃຕ້ສະພາບການດັ່ງກ່າວ,ລັດຖະບານຈີນຕົກລົງໃຊ້ຮູບການຮ່ວມມືລະຫວ່າງຈີນກັບຕ່າງປະເທດ,ຕັ້ງສະຖາບັນຂົງຈື້ຢູ່ພົ້ນທະເລ,ເພື່ອເປັນອົງການທີ່ສອນພາສາຈີນແລະເຜີຍແຜ່ວັດທະນະທຳຈີນຕໍ່ບຸກຄົນພົ້ນທະເລ,ແລະໄດ້ຕັ້ງສະຖາບັນຂົງຈື້ແຫ່ງທຳອິດໃນໂລກຢູ່ສ.ເກົາຫຼີໃນປີ2004.ນັບມາຮອດປະຈຸບັນນີ້,ໄດ້ສ້າງສະຖາບັນຂົງຈື້ແລະຫ້ອງຮຽນຂົງຈື້80ແຫ່ງຢູ່36ປະເທດແລະເຂດແຄວ້ນແລ້ວ.ຕາມໄດ້ຊາບ,ສະຖາບັນຂົງຈື້ເຫຼົ່ານີ້ສ່ວນຫຼາຍໄດ້ຈັດການເຄື່ອນໄຫວຕ່າງໆ ເຊັ່ນ ສອນພາສາຈີນ ໃຫ້ຄຳປຶກສາກ່ຽວກັບການ ມາຮຽນຢູ່ຈີນແລະການສຳຜັດວັດທະນະທຳຈີນເປັນຕົ້ນ;ປະຈຸບັບນີ້,ສະຖາບັນຂົງຈື້ໄດ້ ກາຍເປັນສະຖານທີ່ສຳຄັນກວ່າໝູ່ສຳລັບຄົນຕ່າງປະເທດຮຽນພາສາຈີນແລະຊອກຮູ້ຈີນແລ້ວ.
ໃນຂະນະທີ່ພາສາຈີນໄດ້ຮັບຄວາມນິຍົມຊົມເຊີຍນັບມື້ນັບຫຼາຍ,ຢູ່ແຫ່ງຕ່າງໆ,ການສະໜອງແບບຮຽນພາສາຈີນຊະນິດຕ່າງໆ ເຊັ່ນ "ຄຳສົນທະນາພາສາຈີນ301ປະໂຫຍກ"ແລະ"ສວນສະໝຸກພາສາຈີນ"ເປັນຕົ້ນບໍ່ພໍກັບຄວາມຕ້ອງການ.ຕາມໄດ້ຊາບ,ພາກສ່ວນທີ່ກ່ຽວຂ້ອງຂອງຈີນຈະຈັດຕັ້ງໂຮງຮຽນຊັ້ນສູງແລະສຳນັກງານພິມຈຳໜ່າຍທີ່ກ່ຽວຂ້ອງຂອງຈີນແລະຕ່າງປະເທດດຳເນີນການສຳຫຼວດຄົ້ນຄວ້າຢ່າງເປັນລະບົບຕໍ່ໂຄງຮ່າງແລະແບບຮຽນພາສາຈີນຂອງຫຼາຍປະເທດ ຄື ອາເມລິກາ ອັງກິດແລະຝຣັ່ງເປັນຕົ້ນ,ປ່ຽນແບບຮຽນໃໝ່;ເລັ່ງລັດຄົ້ນຄວ້າແລະເຜີຍແຜ່ແບບຮຽນພາສາຈີນສາລະພັດສື່ສຳລັບຊາວຕ່າງປະເທດແບບດີຈີຕອນ.
ນອກນີ້,ຕໍ່ໄປພາຍໜ້າ,ຈີນຍັງຈະສືບຕໍ່ແຕ່ງຜູ້ອາສາສະໝັກໄປສອນພາສາຈີນຫຼືຊ່ອຍພະແນກການສຶກສາຂອງຕ່າງປະເທດດຳເນີນວຽກງານສອນພາສາຈີນ.ພ້ອມກັນນັ້ນ,ພາກສ່ວນທີ່ກ່ຽວຂ້ອງຂອງຈີນຍັງຈະເລັ່ງລັດປ່ຽນແປງເງື່ອນໄຂແລະອຸປະກອນການສອນພາສາຈີນຂອງຕົນ,ສຳລັບນັກຮຽນຕ່າງປະເທດທີ່ມາຮຽນພາສາຈີນຢູ່ຈີນຫຼາຍຂຶ້ນເລື່ອຍໆ.
|
|
|
