|
ທ່ານຜູ້ຟັງທີ່ໂຄລົບ,ວັນທີ8 ກໍລະກົດ,ກອງປະຊຸມມໍລະດົກໂລກຄັ້ງທີ30ໄດ້ຈັດຂຶ້ນຢູ່ວິນນຸສ ນະຄອນຫຼວງຂອງລີຕົວນີ,ຖິ່ນທີ່ໝີແພນດາອາໄສຢູ່ແລະເມືອງຮ້າງລາຊະທານີທ້າຍສະໄໝລາຊະວົງຊ່າງຂອງຈີນຕ່າງໄດ້ຮ້ອງຂໍເປັນມໍລະດົກທຳມະຊາດໂລກແລະມໍລະດົກວັດທະນະທຳໂລກ.ໃນຫຼາຍປີມານີ້,ການຮ້ອງຂໍເປັນມໍລະດົກໂລກແມ່ນເລື້ອງທີ່ຄົນທັງຫຼາຍມັກໂຈຕະນາກັນຢູ່ຈີນ,ຖິ່ນຖານຕ່າງໆທີ່ເປັນຊັບພະຍາກອນມໍລະດົກກໍໄດ້ພາກັນທຳຄວາມພະຍາຍາມຢ່າງບໍ່ລົດລະເພື່ອ"ຮ້ອງຂໍເປັນມໍລະດົກໂລກ".ແຕ່ວ່າ,ປັດຈຸບັນ,ມີຄົນນັບມື້ນັບຫຼາຍກໍຮູ້ແລ້ວວ່າ,ການຍົກລະດັບຄຸ້ມຄອງແຫຼ່ງມໍລະດົກໃຫ້ສູງຂຶ້ນຢ່າງຮອບດ້ານ,ຍັງແມ່ນສຳຄັນກວ່າຮ້ອງຂໍເປັນມໍລະດົກໂລກອີກຊ້ຳ.ໃນລາຍການຈີນປັດຈຸບັນພາກນີ້ພວກເຮົາຈະແນະນຳສະພາບໃນດ້ານນີ້ສູ່ຟັງ.
ກ່ອນອື່ນ,ຂໍແນະນຳໂດຍຫຍໍ້ກ່ຽວກັບຖິ່ນທີ່ໝີແພນດາອາໄສຢູ່ແລະເມືອງຮ້າງລາຊະທານີທ້າຍສະໄໝລາຊະວົງຊ່າງຂອງຈີນ.ໝີແພນດາແມ່ນສັດທີ່ມໍ່ຈະສູນພັນທີ່ທົ່ວໂລກເອົາໃຈໃສ່ນຳ,ຖືເປັນສັດ"ຫີນ"ທີ່ມີຊີວິດ,ມີສະເພາະແຕ່ຢູ່ຈີນ.ບໍລິເວນທີ່ໝີແພນດາເພີ່ງພາອາໄສຢູ່ໃນແຂວງເຊສວນມີເນື້ອທີ່ເກືອບໜຶ່ງໝື່ນກິໂລແມັດມົນທົນ,ເຂດໃຈກາງກວມເນື້ອທີ່5ພັນກວ່າກິໂລແມັດມົນທົນ,ມີຖານະສຳຄັນໃນດ້ານຮັກສາຊີວະຊາດໃຫ້ມີຫຫຼາຍຢ່າງຫຼາຍແນວ.ເມືອງຮ້າງລາຊະທານີທ້າຍສະໄໝລາຊະວົງຊ່າງຕັ້ງຢູ່ຊານເມືອງອ່ານຢາງແຂວງເຫີນານທາງພາກກາງຂອງຈີນ,ແມ່ນຮ່ອງຮອຍລາຊະທານີຂອງລາຊະວົງຊ່າງເມື່ອ3000ປີກ່ອນຂອງຈີນ,ຂຸດຄົ້ນເທື່ອທຳອິດໃນປີ1928.ບູຮານນະສະຖານແຫ່ງນີ້ມີເນື້ອທີ່ປະມານ24ກິໂລແມັດມົນທົນ.ຜູ້ຊ່ຽວຊານບູຮານນະຄະດີຂອງຈີນໄດ້ຄົ້ນພົບຕົວໜັງສືອອງເຕົ່າກະດູກສັດແລະເຄື່ອງທອງສຳລິດເປັນຕົ້ນຈຳນວນຫຼວງຫຼາຍຢູ່ແຫ່ງນີ້,ໄດ້ວັດຖຸບູຮານຫຼາກຫຼາຍທີ່ສຳຄັນທີ່ສຸດຕໍ່ການຄົ້ນຄວ້າອາລະຍະທຳບູຣານຂອງຈີນ.
ໃນຫຼາຍປີມານີ້,ອົງການປົກຄອງທ້ອງຖິ່ນຂອງແຫຼ່ງຊັບພະຍາກອນມໍລະດົກສອງແຫ່ງດັ່ງກ່າວໄດ້ເຮັດວຽກຫຼາຍຢ່າງເພື່ອ"ຮ້ອງຂໍເປັນມໍລະດົກໂລກ"ແລະເພີ່ມທະວີການຄຸ້ມຄອງມໍລະດົກ,ໄດ້ຮັບຜົນຢ່າງເດັ່ນຊັດ.ທີ່ຈິງແລ້ວ,ອົງການປົກຄອງທ້ອງຖິ່ນຕ່າງໆຂອງຈີນລ້ວນແຕ່ມີຄວາມຫ້າວຫັນສົມຄວນໃນດ້ານຮ້ອງຂໍເປັນມໍລະດົກໂລກ,ແຕ່ພ້ອມນັ້ນ,ກໍປະກົດມີການຂຸດຄົ້ນຫຼາຍເກີນສ່ວນແລະຖືມໍລະດົກໂລກເຫຼົ່ານີ້ເປັນ"ຕົ້ນເງິນຕົ້ນຄຳ".ທ່ານກົ່ວຈ່ານ ເຈົ້າໜ້າທີ່ພະແນກມໍລະດົກໂລກຂອງກົມວັດຖຸບູຮານແຫ່ງຊາດຈີນເວົ້າຢ່າງບໍ່ປິດບໍ່ອຳວ່າ:
"ຈີນມີອານາເຂດກວ້າງໃຫຍ່ໄພສານ,ລະດັບເສດຖະກິດແລະວັດທະນະທຳບໍ່ສະໝໍ່າສະເໝີກັນ,ຢູ່ບາງແຫ່ງມີທ່າອຽງທີ່ເອົາໃຈໃສ່ນຳແຕ່ການຮ້ອງຂໍ,ຖືເບົາການຄຸ້ມຄອງ,ເອົາໃຈໃສ່ນຳແຕ່ການຂຸດຄົ້ນ,ຖືເບົາການອະນຸລັກຮັກສາໃນລະດັບຕ່າງກັນ."
ປີ2001,ຢູ່ຈ່າງເຈ່ຍເຈ້ຍ ມໍລະດົກໂລກແຫ່ງໜຶ່ງທີ່ຕັ້ງຢູ່ແຂວງຮູນານຈີນ,ຍ້ອນວ່າສ້າງສິ່ງກໍ່ສ້າງສຳລັບການທ່ອງທ່ຽວຄືອູ່ໄຟຟ້າ,ລິບໄຟຟ້າ,ໂຮງແຮມເປັນຕົ້ນຢ່າງບໍ່ມີການຈຳກັດຢູ່ເຂດທິວທັດ,ຈົນຖືກຜູ້ຊ່ຽວຊານຄະນະກຳມະການມໍລະດົກໂລກກ່າວເຕືອນ,ຍັງຕ້ອງເສຍເງິນຢ່າງຫຼວງຫຼາຍເພື່ອມ້າງສິ່ງກໍ່ສ້າງເຫຼົ່ານີ້ຢູ່ເຂດທິວທັດ.ຍ້ອນການກະທຳດັ່ງກ່າວ,ໃນກອງປະຊຸມມໍລະດົກໂລກຄັ້ງທີ26ທີ່ຈັດຂຶ້ນໃນປີ2002,ໂຄງການທີ່ຈີນຮ້ອງຂໍບໍ່ໄດ້ຮັບອະນຸມັດຈັກໂຄງການ.
ລັດຖະບານຈີນໄດ້ຮູ້ເຫັນປະກົດການດັ່ງກ່າວເມື່ອຫຼາຍປີກ່ອນແລ້ວ,ແລະໄດ້ໃຊ້ມາດຕະການຫຼາຍຢ່າງ.ວັນທີ6ກໍລະກົດປີນີ້,ກະຊວງກໍ່ສ້າງຂອງຈີນໄດ້ປະກາດລາຍຊື່ແຫຼ່ງຊັບພະຍາກອນທີ່ກຽມຮ້ອງຂໍເປັນມໍລະດົກທຳມະຊາດ,ແລະມໍລະດົກທັງທຳມະຊາດແລະວັດທະນະທຳງວດທຳອິດ,ມີເຂດທິວທັດແລະປູຊະນີຍະສະຖານ30ແຫ່ງໄດ້ຈັດເຂົ້າໃນລາຍຊື່.ຕາມກຳນົດ,ຕໍ່ໄປພາຍໜ້າ,ບ່ອນ ທີ່ຮ້ອງຂໍເປັນມໍລະດົກໂລກ,ຕ້ອງມີຢູ່ໃນລາຍຊື່ສະບັບນີ້ແລ້ວ.ຍິ່ງສຳຄັນກວ່ານີ້ແມ່ນ,ລາຍຊື່ສະບັບນີ້ຄຸ້ມຄອງແບບປ່ຽນແປງໄດ້,ຖ້າແຫຼ່ງຊັບພະຍາກອນມໍລະດົກແຫ່ງໃດເສື່ອມຄຸນນະພາບຫຼືການຄຸ້ມຄອງບໍ່ດີ,ກໍຈະຖືກຄັດອອກຈາກລາຍຊື່.ທ່ານນາງເຊິນນສຽວລີ ຜູ້ວາງແຜນລວມຂອງກະຊວງກໍ່ສ້າງຈີນກ່າວວ່າ,
"ການຈັດໃຫ້ມີລາຍຊື່ກຽມເປັນມໍລະດົກໂລກແມ່ນມາດຕະການສຳຄັນເພື່ອບູລະນະກົນໄກອະນຸລັກມໍລະດົກທຳມະຊາດ,ແລະມໍລະດົກທີ່ເປັນທັງມໍລະດົກທຳມະຊາດແລະມໍລະດົກວັດທະນະທຳຂອງຈີນໃຫ້ສົມບູນຕື່ມອີກ,ແມ່ນສິ່ງຮັບປະກັນໃຫ້ຊັບພະຍາກອນມໍລະດົກຂອງຈີນໄດ້ຮັບການອະນຸລັກແລະການພັດທະນາແບບຍຶນຍົງ,ທັງມີຜົນດີຕໍ່ການອະນຸລັກຊັບພະຍາກອນມໍລະດົກຂອງຈີນໃຫ້ດີກວ່າເກົ່າ."
ກ່ຽວກັບເຮັດແນວໃດຄຸ້ມຄອງຊັບພະຍາກອນມໍລະດົກທີ່ໄດ້ຈັດເຂົ້າເປັນມໍລະດົກໂລກແລ້ວນັ້ນໃຫ້ມີປະສິດທິພາບສູງ,ຈີນກໍພວມຄົ້ນຄວ້າຢ່າງຕັ້ງໜ້າຢູ່,ເພື່ອແກ້ໄຂຄວາມຫຍຸ້ງຍາກທີ່ປະເຊີນໃນດ້ານການຄຸ້ມຄອງໃນສະເພາະໜ້ານີ້. ມໍລະດົກໂລກຂອງຈີນຕ່າງສັງກັດຫຼາຍຂະແໜງວິຊາແລະພະແນກຄືວັດຖຸບູຮານ,ການກໍ່ສ້າງ,ການປ່າໄມ້,ການອະນຸລັກສິ່ງແວດລ້ອມ,ການທ່ອງທ່ຽວ,ແລະສາສະໜາເປັນຕົ້ນ,ຍ້ອນວ່າອົງການປົກຄອງທຸກຂັ້ນແລະພາກສ່ວນຕ່າງກັນຄຸ້ມຄອງແບບສັບໄຂວ່ກັນ,ບາງແຫ່ງຍັງມອບສິດຄຸ້ມຄອງແລະສິດທຸລະກິດໃຫ້ບໍລິສັດດ້ວຍຮູບແບບຕ່າງກັນ,ສະນັ້ນ,ເບົ້າແບບການຄຸ້ມຄອງຍັງຕ້ອງດັດແປງ.
ໃນຫຼາຍປີມານີ້,ລັດຖະບານຈີນໄດ້ໃຫ້ຄວາມເອົາໃຈໃສ່ນຳການອະນຸລັກມໍລະດົກວັດທະນະທຳທົ່ວປະເທດຫຼາຍຂຶ້ນຢ່າງເດັ່ນຊັດ,ແລະກໍຂ້ຽວເລັງວາງກົດໝາຍ.ທ້າຍປີກາຍນີ້,ຄະນະລັດຖະບານຈີນໄດ້ຕົກລົງກຳນົດວັນເສົາເທື່ອທີ່ສອງຂອງເດືອນມິຖຸນາແຕ່ລະປີເປັນ"ວັນມໍລະດົກວັດທະນະທຳ"ແຫ່ງຊາດ,ນີ້ໄດ້ເຮັດໃຫ້ມວນຊົນທຸກຄົນເພີ່ມທະວີສະຕິອະນຸລັກມໍລະດົກວັດທະນະທຳ.
ໂດຍຕອບສະໜອງການຕົກລົງດັ່ງກ່າວ,ໃນຫຼາຍປີມານີ້,ສຽງຮຽກຮ້ອງໃຫ້ອະນຸລັກມໍລະດົກໃນໝູ່ມວນຊົນກໍ່ພວມດັງແຮງຂຶ້ນຢ່າງບໍ່ຢຸດຢັ້ງ.ເມື່ອຕົ້ນປີນີ້,ຢູ່ຈ່າງເຈ່ຍເຈ້ຍ ສະຖານທີ່ມໍລະດົກໂລກໄດ້ເຊີນກອງທະຫານອາກາດຣັດເຊຍມາສະແດງສີມືການບິນພິເສດຢູ່ພູທ່ຽນເມິນກ່ອນສະແດງ.ຝ່າຍເຈົ້າພາບໄດ້ກ່າວໃນງານຖະແຫຼງຂ່າວວ່າ,ເຮືອບິນຈະບິນລອດຖ້ຳພູທ່ຽນເມິນຊຶ່ງຖືເປັນລາຍການທີ່ຍອດຍິ່ງ.ຖ້ຳທ່ຽນເມິນແມ່ນຖ້ຳໃຫຍ່ທຳມະຊາດທີ່ຊອດພູ,ມີໜ້ອຍທີ່ສຸດໃນໂລກ.ແຕ່ສຽງດັງຮຶ້ມໆຂອງເຮືອບິນຈະສະເທືອນແລະຈົນເຖິງຂັ້ນເປັນໄພອັນຕະລາຍຕໍ່ຖ້ຳແລະໝົດໜ່ວຍພູຫຼືບໍ່?ໃນເວລານັ້ນ,ມວນຊົນທະຍອຍກັນຄັດຄ້ານໂດຍຜ່ານອິນເຕີເນັດ,ແລະໜັງສືພິມວາລະສານ.ສຸດທ້າຍ,ຈຶ່ງຈຳເປັນຍົກເລີກລາຍການຍົນບິນລອດຖ້ຳທ່ຽນເມິນ.ນອກນີ້,ເລື່ອງຝ່າຍຄຸ້ມຄອງຮ່ອງຮອຍສວນຢວນມິງຢວນປັກກິ່ງຢາກປູຜ້າຢາງຮອງພື້ນໜອງໃນສວນເພື່ອປ້ອງກັນບໍ່ໃຫ້ນ້ຳຊຶມອອກ,ແລະເລື່ອງມະຫາວິທະຍາໄລປັກກິ່ງຢາກມ້າງສິ່ງກໍ່ສ້າງບູຮານ ໃນມະຫາວິທະຍາໄລເປັນຕົ້ນ,ລ້ວນແຕ່ດູດດຶງຄວາມເອົາໃຈໃສ່ໂດຍທົ່ວໄປຂອງສາທະລະນະຊົນ,ໃນທີ່ສຸດ,ແຜນການທີ່ບໍ່ສົມເຫດສົມຜົນເຫຼົ່ານີ້ໄດ້ຖືກຍົກເລີກ.
ກ່ຽວກັບກອງປະຊຸມມໍລະດົກໂລກປີນີ້,ສື່ມວນຊົນຈີນເຫັນໂດຍທົ່ວໄປວ່າ,ສອງໂຄງການຄືຖິ່ນທີ່ໝີແພນດາອາໄສຢູ່ແລະເມືອງຮ້າງລາຊະທານີທ້າຍສະໄໝລາຊະວົງຊ່າງທີ່ຈີນຮ້ອງຂໍເປັນມໍລະດົກໂລກນັ້ນມີຄວາມອາດເປັນໄປໄດ້ຫຼາຍທີ່ສຸດ.ທ່ານກົ່ວຈ່ານ ເຈົ້າໜ້າທີ່ພະແນກມໍລະດົກໂລກຂອງກົມວັດຖຸບູຮານແຫ່ງຊາດຈີນເຫັນວ່າ,ການຮ້ອງຂໍໃຫ້ເອົາມໍລະດົກຂອງຊາດຈັດເປັນມໍລະດົກໂລກແມ່ນເລື່ອງດີແທ້,ແຕ່ສຳຄັນກວ່ານີ້ແມ່ນ,ຜ່ານຈາກການຮ້ອງຂໍ,ຍົກລະດັບຄຸ້ມຄອງມໍລະດົກຂອງຈີນໃຫ້ສູງຂຶ້ນຢ່າງຮອບດ້ານ.ທ່ານເວົ້າວ່າ:
"ຈຸດປະສົງຂອງພວກເຮົາບໍ່ແມ່ນພຽງແຕ່ເພື່ອໃຫ້ຕົນມີມໍລະດົກໂລກຫຼາຍຂຶ້ນແຕ່ຢ່າງດຽວ,ເຖິງຈະບໍ່ໄດ້ຮ້ອງຂໍເປັນທາງການ,ກໍ່ສາມາດຖອດຖອນເອົາທັດສະນະຄະຕິແລະວິທີຂອງມໍລະດົກໂລກ,ອາໄສກຳລັງດັນດັ່ງກ່າວ,ຊຸກຍູ້ວຽກງານອະນຸລັກມໍລະດົກໂລກຂອງພວກເຮົາຢ່າງຮອບດ້ານ."
ຕາມໄດ້ຊາບ,ແຕ່ນີ້ຕໍ່ໄປ,ຂະແໜງການຮັບຜິດຊອບຄຸ້ມຄອງມໍລະດົກຂອງຈີນຈະເພີ່ມທະວີຕິດຕາມການກວດກາປະຈຳວັນຕໍ່ການຄຸ້ມຄອງມໍລະດົກໂລກ,ແລະສ້າງຕັ້ງອົງການໃຫ້ຄຳເປິກສາຂອງຜູ້ຊ່ຽວຊານ,ການປະຕິຮູບກົນໄກຄຸ້ມຄອງທີ່ກ່ຽວຂ້ອງກໍພວມປຶກສາກັນຢູ່.
|
