ຕາມຂ່າວສານຊິນຮວາ: ວັນທີ 22 ກໍລະກົດ, ເຈົ້າໜ້າທີ່ລັດຖະບານອິນໂດເນເຊຍ​ກ່າວ​ວ່າ, ຈຳ​ນວນ​ຄົນ​ຕາຍ​ໃນ​ໄພ​ຄື້ນຊູ​ນາ​ມີ​ຍ້ອນ​ແຜ່ນດິນ​ໄຫວ​ທີ່​ເກີດ​ຂຶ້ນຢູ່​ເຂດ​ທະ​ເລ​ເກາະ​ຊາ​ວາ​ອິນ​ໂດ​ເນ​ເຊຍ​ໃນ​ວັນ​ທີ 17 ກໍລະກົດ ​ໄດ້​ເພີ່ມ​ຂຶ້ນຮອດ 654 ຄົນ. ວັນ​ທີ 22 ກໍລະ​ກົດ, ຢູ່​ພາງ​ການ​ດາ​ຣານ ​ເຂດ​ປະສົບ​ໄພ​ຮ້າຍ​ແຮງ​ກວ່າ​ໝູ່​ໄດ້​ເກີດ​ແຜ່ນດິນ​ໄຫວ​ຂັ້ນ 5,1 ລິກ​ເທີ​ອີກ.

ຕາມ​ໄດ້​ຊາບ, ຢູ່​ແຂວງ​ຊາ​ວາ​ກາງ ​ແຂວງຊາ​ວາຕາ​ເວັນ​ຕົກ​ແລະ​ແຂວງ​ໂຢກ​ຢາ​ກາ​ຕາ, ​ແຂວງ​ຊາ​ວາຕາ​ເວັນ​ຕົກ​ປະສົບ​ໄພ​ຮ້າຍ​ແຮງ​ກວ່າ​ໝູ່. ປັດຈຸບັນ, ຜູ່​ກູ້​ໄພ​ພວມ​ເປີດ​ກວ້າງ​ຂອບ​ເຂດ​ກູ້​ໄພ, ຢູ່​ບາງ​ບ່ອນ​ໄດ້​ພົບ​ເຫັນ​ຜູ່​ຕາຍ​ຫຼາຍຄົນ, ຄາດ​ວ່າ​ຜູ່​ຕາຍ​ແລະ​ບາດ​ເຈັບ​ຍັງ​ຈະ​ເພີ່ມ​ຂຶ້ນ​ອີກ.
​ແຜ່ນດິນ​ໄຫວ​ແລະ​ຄື້ນຊູ​ນາ​ມີ​ເທື່ອ​ນີ້ ນອກຈາກ​ເປັນ​ການ​ໂຈມ​ຕີ​ຢ່າງ​ໜັກ​ໜ່ວງ​ຕໍ່​ຂະ​ແໜງ​ການທ່​ອງທ່ຽວ​ຂອງ​ທ້ອງ​ຖິ່ນ​ແລ້ວ, ກໍ່​ເຮັດ​ໃຫ້​ຊາວ​ປະມົງ​ທ້ອງ​ຖິ່ນ​ສ່ວນ​ຫຼາຍ​ປະ​ສົບ​ຄວາມ​ເສຍ​ຫາຍ​ຢ່າງ​ໜັກໜ່ວງ.

ຜູ່​ວ່າການທະນາຄານ​ກາງ​ອິນ​ໂດ​ເນ​ເຊຍ​ກ່າວ​ວ່າ, ຫວ່າງ​ມໍ່ໆ​ນີ້ ຢູ່​ແຫ່ງ​ຕ່າງໆ​ທົ່ວ​ປະ​ເທດ​ອິນ​ໂດ​ເນ​ເຊຍ​ໄດ້​ເກີດ​​ໄພ​ທຳ​ມະ​ຊາດ​ເຊັ່ນ ແຜ່ນດິນ​ໄຫວ​​ແລະ​ຄື້ນຊູ​ນາ​ມີ​ເປັນ​ຕົ້ນ​ຢ່າງ​ຕໍ່​ເນື່ອງ, ​ໄດ້​ກະທົບກະ​ເທືອ​ນ​ເຖິງ​ການ​ເຕີບ​ໂຕ​ຂອງ​ເສດຖະກິດ​ແຫ່ງ​ຊາດ​ອິນ​ໂດ​ເນ​ເຊຍ, ກະ​ວ່າ​ຄາດໝາຍ​ທີ່​ເຮັດ​ໃຫ້ ​ເສດຖະກິດ​​ເພີ່ມ​ຂຶ້ນຢູ່​ລະຫວ່າງ 5,2% ຮອດ 5,5% ຈະ​ບັນ​ລຸ​ຜົນ​ເປັນ​ຈິງ​ໄດ້​ຍາກ.