|
|
 |
| (GMT+08:00)
2006-07-25 11:11:31
|
 |
|
ການສ້າງຄວາມສຳພັນທີ່ດີຂອງຄົນເຮືອນໃກ້ຄຽງກັນ
cri
|
ແຕ່ໃດມາ,ຊາວຈີນກໍເອົາໃຈໃສ່ການພົວພັນລະຫວ່າງບ້ານໃກ້ເຮືອນຄຽງ,ແຕ່ບູຮານນະການ,ກໍມີຄວາມເວົ້າທີ່ວ່າ"ພີ່ນ້ອງຢູ່ໄກບໍ່ທໍ່ໝູ່ເພື່ອນເຮືອນໃກ້".ແຕ່ວ່າ,ຊີວິດໃນຕົວເມືອງຍຸກປັດຈຸບັນມີການຂະຫຍາຍຕົວໄວຈຶ່ງເຮັດໃຫ້ເພື່ອນບ້ານໃກ້ຄຽງຄ່ອຍໆຫ່າງເຫີນຈາກກັນ.ເມື່ອ7ປີກ່ອນ,ຢູ່ຄຸ້ມຖະໜົນແຫ່ງໜຶ່ງຂອງເມືອງທຽນສິນ ເມືອງແຄມທະເລພາກເໜືອຂອງຈີນ,ໄດ້ປະດິດສ້າງບຸນໄທເຮືອນໃກ້ຄຽງເປັນຄັ້ງທຳອິດ,ເຊິ່ງມີຈຸດປະສົງ ໃຫ້ເພື່ອນບ້ານໃກ້ຄຽງສະໜີດສະໜົມກັນ.ດຽວນີ້,ບຸນໄທເຮືອນໃກ້ຄຽງໄດ້ແຜ່ຂະຫຍາຍຢູ່ຫຼາຍສິບຕົວເມືອງຂອງຈີນ,ໄທເຮືອນໃກ້ຄຽງກໍຄ່ອຍໆລຶ້ງແກວ່ນກັນ.
ເມື່ອເວົ້າເຖິງຄຳທີ່ວ່າ"ໄທເຮືອນໃກ້ຄຽງ",ໃນໃຈຂອງຊາວຈີນຫຼາຍຄົນລ້ວນແຕ່ ຈະມີຄວາມຮູ້ສຶກອົບອຸ່ນ.ເພາະວ່າຕາມປະເພນີຂອງຈີນ,ເຮືອນໃກ້ຄຽງແມ່ນການພົວພັນອັນສະໜິດສະໜົມທີ່ສຸດ,ຈົນກະທັ້ງສາມາດປຽບທຽບກັບພີ່ນ້ອງຂອງຕົນໃນລະດັບໃດໜຶ່ງ.
ໃນເມື່ອກ່ອນ,ຄົນຈີນສ່ວນຫຼາຍຢູ່ເຮືອນຊັ້ນດຽວ,ບາງທີມີຫຼາຍຄອບຄົວຫຼືຫຼາຍສິບຄອບຄົວຮ່ວມກັນຢູ່ເດີ່ນບ້ານດຽວກັນ.ສຳລັບໄທເມືອງທີ່ຢູ່ເຮືອນຕຶກ,ກໍມີປະກົດການບໍ່ໜ້ອຍທີ່ຫຼາຍຄອບຄົວຮ່ວມກັນໃຊ້ຫ້ອງຄົວຫ້ອງນ້ຳດຽວກັນ.ໄທເຮືອນໃກ້ຄຽງຢູ່ໃກ້ໆກັນ,ໃນເວລາຫວ່າງມັກໄປທ່ຽວລົມເຮືອນໝູ່,ຄ້າຍຄືຄົນໃນຄອບຄົວດຽວ.
ຄຽງຄູ່ກັບການພັດທະນາຂອງສັງຄົມ,ເຮືອນຢູ່ຂອງໄທເມືອງໄດ້ຮັບການປົວແປງໃຫ້ດີຂຶ້ນໂດຍທົ່ວໄປ,ໄທເມືອງໄດ້ພາກັນຍ້າຍໄປຢູ່ເຮືອນຕຶກ,ເຄື່ອງປະກອບຊີວິດການເປັນຢູ່ກໍນັບມື້ນັບດີຂຶ້ນ,ສະພາບການໃຊ້ຫ້ອງຄົວແລະຫ້ອງນ້ຳຮ່ວມກັນນັ້ນກໍໜ້ອຍລົງ.ບວກກັບວ່າຊີວິດທີ່ແຂ່ງຂັນກັບເວລາ,ຄົນປັດຈຸບັນມີສະຕິເພີ່ມຂຶ້ນຕໍ່ເລື່ອງສ່ວນຕົວແລະຊ່ອງຫວ່າງຄອບຄົວ,ລ້ວນແຕ່ເຮັດໃຫ້ການໄປມາຫາສູ່ກັນລະຫວ່າງໄທເຮືອນໃກ້ຄຽງນັບມື້ນັບໜ້ອຍລົງ.
ພະແນກທີ່ກ່ຽວຂ້ອງຂອງນະຄອນຊຽງໄຮ້ເມືອງອຸດສາຫະກຳການຄ້າທີ່ໃຫຍ່ກວ່າໝູ່ຂອງຈີນຈັດການສຳຫຼວດແບບຖອດຕົວຢ່າງເທື່ອໜຶ່ງສະແດງໃຫ້ເຫັນວ່າ,ຄອບຄົວທີ່ໄປມາຫາສູ່ກັນກັບໄທເຮືອນໃກ້ຄຽງເລື້ອຍໆນັ້ນມີແຕ່24%,ມີຄົນເກືອບເຄິ່ງໜຶ່ງບໍ່ຮູ້ຊື່ແລະອາຊີບຂອງຄົນເຮືອນຕິດກັນ.ຢູ່ເມືອງເສີນເຈິ້ນພາກໃຕ້ຂອງຈີນກໍເຄີຍດຳເນີນການສຳຫຼວດຄ້າຍຄືກັນ,ຜົນການສຳຫຼວດສະແດງໃຫ້ເຫັນວ່າ,90%ຂຶ້ນໄປກ່າວວ່າຍິນດີຮູ້ຈັກແລະໄປມາຫາສູ່ກັນກັບໄທເຮືອນໃກ້ຄຽງ,ແລະສ້າງການພົວພັນແບບຊ່ອຍເຫຼືອກັນເປັນຢ່າງດີ.
ຜູ້ຊ່ຽວຊານເຫັນວ່າ,ມີການພົວພັນທີ່ສະໜິດສະໜົມແລະກົມກຽວກັນລະຫວ່າງເຮືອນໃກ້ຄຽງລ້ວນແຕ່ມີຄວາມສຳຄັນຕໍ່ສຸຂະພາບແລະການເຕີໃຫຍ່ທາງກາຍແລະໃຈຂອງສະມາຊິກໃນຄອບຄົວທັງສ້າງຄວາມສະຫງົບທາງສັງຄົມໄດ້ອີກ.ທ່ານຫາວໄມ້ໂຊ່ວ ສາສະດາຈານຂອງສະພາບັນດິດວິທະຍາສາດສັງຄົມທຽນສິນເວົ້າວ່າ,
ການເສີຍເມີຍຕໍ່ກັນຂອງຄົນເຮືອນໃກ້ຄຽງຈະຂັດຂວາງການແລກປ່ຽນຂໍ້ມູນຂ່າວສານແລະອາລົມຈິດ,ຈົນກະທັ້ງພາໃຫ້ເກີດຄວາມຮູ້ສຶກປ່ຽວພອຍແລະບໍ່ປອດໄພ.ນອກນັ້ນ,ຖ້າຂາດການໄປມາຫາສູ່ກັນແລະແລກປ່ຽນກັນໃນຍາມທຳມະດາ,ລະຫວ່າງໄທເຮືອນໃກ້ຄຽງມັກຈະເກີດການຜິດຖຽງກັນຍ້ອນເລື່ອງມະຍິກມະຍ່ອຍ.
ເມື່ອ7ປີກ່ອນ,ເພື່ອຟື້ນຟູການພົວພັນກົມກຽວອັນເປັນມູນເຊື້ອລະຫວ່າງຄົນເຮືອນໃກ້ຄຽງຄືນໃໝ່,ຜູ້ມີຄວາມຈູບຈ້າວຈຳນວນໜຶ່ງຂອງຄຸ້ມຖະໜົນທ່ຽນຖາເຂດເຫີຊີ່ເມືອງທຽນສິນໄດ້ປະດິດສ້າງບຸນໄທເຮືອນໃກ້ຄຽງທີ່ມີຈຸດປະສົງຊຸກຍູ້ໃຫ້ໄທເຮືອນໃກ້ຄຽງປອງດອງກັນ.ທ່ານນາງຈ່ຽວຢາງ ຮອງຫົວໜ້າຂອງສຳນັກງານຄຸ້ມຖະໜົນບອກນັກຂ່າວວ່າ,
ພວກເຮົາຮູ້ສຶກວ່າ,ການພົວພັນລະຫວ່າງໄທເຮືອນໃກ້ຄຽງກົມກຽວກັນຫຼືບໍ່ມີຜົນສະທ້ອນໂດຍກົງຕໍ່ການຍົກຄຸນນະພາບຊີວິດຂອງໄທເມືອງແລະລະດັບສິວິໄລກວມລວມຂອງຄຸ້ມເຮຶອນຢູ່ໃຫ້ສູງຂຶ້ນ.ພວກເຮົາເຫັນວ່ານີ້ແມ່ນຈຸດເລີ່ມຕົ້ນອັນສຳຄັນທີ່ສຸດຂອງວຽກງານພວກເຮົາ,ສະນັ້ນ,ເມື່ອປີ1999,ພວກເຮົາກໍໄດ້ປະດິດສ້າງບຸນໄທເຮືອນໃກ້ຄຽງ.
ບຸນໄທເຮືອນໃກ້ຄຽງທີ່ກຳນົດໃສ່ໃນລະດູໃບໄມ້ຫຼົ່ນ,ຈັດເປັນເວລາອາທິດໜຶ່ງ,ໃນຍາມບຸນ,ຄຸ້ມຖະໜົນຈະຈັດຕັ້ງໃຫ້ມີການເຄື່ອນໄຫວມິດຕະພາບທີ່ອຸດົມສົມບູນແລະມີຫຫຼາຍສີຫຼາຍສັນ,ຕົວຢ່າງຄື,ການແຂ່ງຂັນໝາກລຸກຈີນແລະຮ້ອງເພງ,ຊ່ອຍໄທເຮຶອນໃກ້ຄຽງຜູ້ທຸກຍາກເປັນຕົ້ນ,ແຕ່ລະປີຍັງຈະປະກວດໄທເຮືອນໃກ້ຄຽງທີ່ຢູ່ຮ່ວມກັນຢ່າງກົມກຽວກັນ.ຕາມໄດ້ຊາບ,ຢູ່ຄຸ້ມເຮືອນຢູ່ທີ່ຕັ້ງຢູ່ພາກຕາເວັນຕົກສຽງໃຕ້ຂອງເມືອງທຽນສິນແລະມີປະຊາກອນຢູ່ປະຈຳ6ໝື່ນກວ່າຄົນນີ້,ເຂົາເຈົ້າສ້າງບຸນໄທເຮືອນໃກ້ຄຽງ7ປີມານີ້,ມີ700ກວ່າຄອບຄົວໄດ້ຮັບປະກວດເປັນໄທເຮຶອນໃກ້ຄຽງທີ່ດີຕໍ່ກັນ.
ບຸນໄທເຮຶອນໃກ້ຄຽງໄດ້ເຮັດໃຫ້ເຂົາເຈົ້າຢູ່ໃກ້ຊິດກັນກວ່າເກົ່າ,ແລະສະໜິດສະໜົມກວ່າເກົ່າ.ແມ່ເຖົ້າມາຊື້ໝິນ ປີນີ້ອາຍຸ78ປີອາໄສຢູ່ຄຸ້ມເຮືອນຢູ່ທ່ຽນຖາມາດົນແລ້ວ,ເມື່ອໄດ້ອອກກິນເບ້ຍບຳນານແລ້ວ,ໃນຍາມທຳມະດາ,ແມ່ເຖົ້າມັກເຮັດວຽກຕາມຄວາມສາມາດຂອງຕົນເພື່ອຊ່ອຍໄທເຮືອນໃກ້ຄຽງເລື້ອຍໆ,ຄືສົ່ງຈົດໝາຍແລະເຮັດອະນາໄມທາງຜ່ານໃນຕຶກເປັນຕົ້ນ.ຖ້າຄອບຄົວຂອງແມ່ເຖົ້າມີວຽກຫຍັງ,ຄົນອື່ນກໍເປັນເຈົ້າການໄປຊ່ອຍເຫຼືອເພິ່ນ.ເມື່ອປີກ່ອນ,ຜົວຂອງແມ່ເຖົ້າທີ່ອາຍຸ 80ກວ່າປີໄດ້ເປັນພະຍາດຢ່າງກະທັນຫັນ,ແຕ່ໂຊກດີທີ່ສຸດເພາະມີໄທເຮືອນໃກ້ຄຽງມາຊ່ອຍເຫຼືອ.ເລື່ອງນີ້ໄດ້ເຮັດໃຫ້ແມ່ເຖົ້າມີຄວາມປະທັບໃຈອັນເລິກເຊິ່ງ.ແມ່ເຖົ້າເວົ້າວ່າ,
ໃນຄາວນັ້ນຜົວເພິ່ນເປັນພະຍາດ,ແຕ່ລູກຫຼານບໍ່ຢູ່ເຮືອນ,ຈະເຮັດແນວໃດ?ໄທເຮືອນໃກ້ຄຽງທັງຫຼາຍກໍມາຊ່ອຍສົ່ງຜົວເພິ່ນໄປໂຮງໝໍຮວນຫູ.ຫຼັງຈາກຮອດໂຮງໝໍແລ້ວ,ຜູ້ນີ້ໄປຂຶ້ນທະບຽນ,ຜູ້ນັ້ນໄປເອົາຢາ,ໃຜໆກໍອອກເງິນຊ່ອຍ.ຖ້າບໍ່ມີຄົນເຮືອນໃກ້ຄຽງເຫຼົ່ານີ້,ເພິ່ນຄົງເສຍຊີວິດແລ້ວ.ຈົນຮອດປັດຈຸບັນ,ເມື່ອຄິດຮອດເລື່ອງນີ້ແມ່ເຖົ້າກໍຮູ້ສຶກອົບອຸ່ນທີ່ສຸດ.
ດຽວນີ້,ບຸນໄທເຮືອນໃກ້ຄຽງຂອງຄຸ້ມຖະໜົນທ່ຽນຖາເຂດເຫີຊີ່ເມືອງທຽນສິນບໍ່ພຽງແຕ່ໄດ້ແຜ່ຂະຫຍາຍໄປຮອດຄຸ້ມເຮືອນຢູ່ອື່ນໆຂອງເມືອງທຽນສິນທໍ່ນັ້ນ,ປັດຈຸບັນຢູ່ຕົວເມືອງອື່ນໆຂອງຈີນກໍໄດ້ມີບຸນນີ້.
ຢູ່ເມືອງຮາງໂຈ່ວ ເມືອງທ່ອງທ່ຽວທີ່ມີຊື່ສຽງທີ່ພາກຕາເວັນອອກຂອງຈີນ,ໃນທ້າຍເດືອນຕຸລາທຸກປີກໍຈະຈັດບຸນໄທເຮືອນໃກ້ຄຽງ.ພໍມື້ບຸນວຽນມາຮອດ,ແຖບຜ້າໄໝສີ ເຫຼືອງທີ່ເປັນສັນຍາລັກໃຫ້ແກ່ຄວາມສຸກແລະຄວາມກົມກຽວກັນກໍປິວສະບັດຂຶ້ນເຕັມເມືອງ.ເກືອບໝົດທຸກຄຸ້ມເຮືອນຢູ່ລ້ວນແຕ່ໄດ້ຈັດການເຄື່ອນໄຫວຂອງຕົນ,ຄືງານກິລາໄທເຮືອນໃກ້ຄຽງທີ່ດີຕໍ່ກັນແລະງານຟ້ອນລຳຂອງຄຸ້ມເຮືອນຢູ່ເປັນຕົ້ນ.
ໃນໄລຍະບຸນໄທເຮືອນໃກ້ຄຽງຂອງເມືອງຮາງໂຈ່ວເມື່ອປີກາຍນີ້,ຢູ່ຄຸ້ມເຮືອນຢູ່ຫຼາວຟາງຕີ້ຄຸ້ມຖະໜົນຈ່າວຫຸ່ຍ,ໄທເມືອງໄດ້ຈັດໃຫ້ມີງານລ້ຽງຮ້ອຍຄອບຄົວທີ່ຕ່າງໝູ່ຢ່າງຟົດຟື້ນຢູ່ສະໜາມຫຼວງຄຸ້ມເຮືອນຢູ່.ຮ້ອຍກວ່າຄອບຄົວນີ້ໄດ້ນຳເອົາອາຫານພິເສດທີ່ຕົນເອງຊ່າງກວ່າໝູ່ມາແບ່ງປັນໃຫ້ໄທເຮືອນໃກ້ຄຽງທັງຫຼາຍ.ໃນມື້ນັ້ນ,ຢູ່ໃນທົ່ວສະໜາມຫຼວງກໍເຕັມໄປດ້ວຍກິ່ນຫອມຂອງອາຫານ,ອາຫານທຸກເຍື່ອງກໍໄດ້ຕັ້ງຊື່ຕາມນາມສະກຸນຂອງຄອບຄົວຕົນ,ເຊັ່ນ,ແກງຫົວປາແມ່ເຖົ້າລິວ, ເຕົ້າຫູ້ເອື້ອຍວາງແລະຊິ້ນງົວອາວເຊິນເປັນຕົ້ນ.
ເມື່ອຫວນຄືນເຖິງສະພາບຂອງມື້ນັ້ນ,ນາງຟັ້ນເຟິ້ງຕີ້ບອກນັກຂ່າວຢ່າງເບີກບານມ່ວນຊື່ນວ່າ, ພວກເຮົາຮູ້ສຶກມ່ວນໝົດທຸກຄົນ.ຄົນທັງຫຼາຍລ້ວນແຕ່ກິນຢ່າງແຊບຊ້ອຍ.ຄຸ້ມເຮືອນຢູ່ກໍແມ່ນຄອບຄົວໃຫຍ່.ການເຄື່ອນໄຫວເທື່ອນີ້ໄດ້ເພີ່ມຄວາມເຂົ້າໃຈແລະການຊ່ອຍເຫຼືອຊຶ່ງກັນແລະກັນລະຫວ່າງໄທເຮືອນໃກ້ຄຽງ,ສາມາດເພີ່ມບັນຍາກາດຂອງຄອບຄົວໃຫຍ່ໃຫ້ຫຼາຍຂຶ້ນ.
|
|
|
