|
ລະດູຮ້ອນອຸນຫະພູມສູງ, ຮ່າງກາຍຄົນເຮົາມີເຫື່ອຍ່ອຍອອກຫຼາຍກວ່າລະດູອື່ນຫຼາຍສິບເທົ່າຈົນຮອດຮ້ອຍເທົ່າເພື່ອລະບາຍຄວາມຮ້ອນ, ນ້ຳເຫື່ອນອກຈາກແກ້ຮ້ອນແລ້ວ, ຍັງເຮັດໃຫ້ທາດນ້ຳແລະທາດບຳລຸງໃນຮ່າງກາຍເສຍໄປນຳອີກ, ຖ້າບໍ່ຕື່ມນ້ຳໃຫ້ຮ່າງກາຍຢ່າງທັນການ, ຈະເຮັດໃຫ້ຄົນເຮົາເກີດມີອາການຂາດນ້ຳ: ຄືວິນຫົວ, ຢາກຮາກ, ອຸນຫະພູມຮ່າງກາຍສູງຂຶ້ນ, ອ່ອນເພຍ, ຈົນເຖິງຂັ້ນສະຫຼົບ.
ຫວ່າງກ່ອນນີ້ບໍ່ດົນ, ທ່ານສູຈ້ຽນຢ໋າງ ຫົວໜ້າພະແນກແພດຢາແຜນຈີນຂອງໂຮງໝໍໃຫຍ່ຕຳຫຼວດຈີນບອກນັກຂ່າວວ່າ, ການແກ້ຮ້ອນໃນລະດູຮ້ອນ, ສຳຄັນທີ່ສຸດແມ່ນຕື່ມນ້ຳໃຫ້ຮ່າງກາຍ, ແຕ່ຕື່ມນ້ຳຫຼາຍເກີນໄປຫຼືວິທີບໍ່ຖືກຕ້ອງ, ກໍອາດຈະພາໃຫ້ເກີດຜົນຮ້າຍຕາມມາຢ່າງໜັກໜ່ວງ. ລະດູຮ້ອນຂອງແຕ່ລະປີ, ໂຮງໝໍລ້ວນແຕ່ໄດ້ປົວຜູ້ເປັນພະຍາດທີ່ມີອາການວິນຫົວແລະຢາກຮາກທີ່ບໍ່ມີມູນເຫດຢ່າງເດັ່ນຊັດ, ທ່ານໝໍບົ່ງມະຕິວ່າອາການເບື່ອນ້ຳ.
ອາການເບື່ອນ້ຳໝາຍຄວາມວ່າຄົນເຮົາໄດ້ດື່ມນ້ຳຫຼາຍເກີນໄປໃນໄລຍະສັ້ນໆ, ເຊິ່ງຈະເຮັດໃຫ້ນ້ຳຢູ່ລະຫວ່າງເລືອດກັບຈຸລັງໃນຮ່າງກາຍນັ້ນຈາງລົງຢ່າງກະທັນຫັນ, ຄວາມຂຸ້ນຂອງເລືອດກໍຈາງລົງຄືກັນ, ນ້ຳຈະຊຶມເຂົ້າຈຸລັງ, ເຮັດໃຫ້ຈຸລັງໃຄ່ຂຶ້ນ, ຈຸລັງສະໝອງໃຄ່ຂຶ້ນຍ້ອນນ້ຳຫຼາຍເກີນໄປນັ້ນອາດຈະພາໃຫ້ຄວາມດັນໃນກະໂຫຼກຫົວສູງຂຶ້ນ, ພາໃຫ້ເກີດມີອາການດ້ານເສັ້ນປະສາດແລະຈິດໃຈຕ່າງໆເຊັ່ນ: ວິນຫົວ, ເຫງົານອນ, ງຸດງິດ, ປະສາດສັບສົນ, ຈຳແນກທາງບໍ່ໄດ້, ຈົນເຖິງຂັ້ນສະຫຼົບ.
ທ່ານສູຈ້ຽນຢ໋າງຍັງເວົ້າວ່າ, ນອກຈາກດື່ມນ້ຳຫຼາຍເກີນໄປແລ້ວ, ການເລືອກເຄື່ອງດື່ມບໍ່ຖືກຕ້ອງກໍຈະນຳເອົາຜົນຮ້າຍມາໃຫ້ຮ່າງກາຍຄືກັນ, ສົມມຸດວ່າທາງໂຮງໝໍກໍເຄີຍຮັບປົວຜູ້ເປັນພະຍາດຜິວໜັງພູມແພ້ຍ້ອນເຄື່ອງດື່ມ, ແລະຮັບປົວເດັກນ້ອຍທີ່ດື່ມເຄື່ອງດື່ມປະເພດຫວານຫຼາຍເກີນໄປແລ້ວພາໃຫ້ຍ່ອຍອາຫານບໍ່ດີ.
ບັດນີ້, ພວກເຮົາຂໍແນະນຳຄຸນຄ່າດ້ານສຸຂະພາບແລະການຄະລຳເຄື່ອງດື່ມ6ປະເພດ.
1, ນ້ຳດື່ມປະເພດຫຸ້ມຫໍ່
ຄຸນຄ່າດ້ານສຸຂະພາບ: ບົດບາດຕົ້ນຕໍຂອງນ້ຳປະເພດນີ້ແມ່ນຕື່ມນ້ຳໃສ່ຮ່າງກາຍ, ນ້ຳແຮ່ສາມາດສະໜອງຈຸນລະສານຈຳນວນໜຶ່ງ.
ຜົນກະທົບທາງລົບ: ນ້ຳບໍລິສຸດຂາດທາດແຮ່ແລະຈຸນລະສານ, ດື່ມນ້ຳປະເພດນີ້ເປັນເວລາດົນນານຈະມີຜົນຮ້າຍຕໍ່ຮ່າງກາຍ; ທາດແຮ່ບາງປະເພດໃນນ້ຳ ແຮ່ອາດຈະເຮັດໃຫ້ມາດຕາສ່ວນຈຸນລະສານຂອງນ້ຳສູງກວ່ານ້ຳປະປາ, ດື່ມນ້ຳປະເພດນີ້ເປັນເວລາດົນນານອາດຈະພາໃຫ້ເປັນພະຍາດຕ່າງໆເຊັ່ນໜີ້ວໝາກໄຂ່ຫຼັງເປັນຕົ້ນ.
2, ປະເພດຊາ
ຄຸນຄ່າດ້ານສຸຂະພາບຂອງເຄື່ອງດື່ມປະເພດຊາ: ໃນໃບຊາມີທາດແຮ່28ຊະນິດທີ່ຮ່າງກາຍຄົນເຮົາຕ້ອງການ, ສາມາດລົບລ້າງຄວາມອິດເມື່ອຍແລະຫຼຸດໄຂມັນຂອງເລືອດໃຫ້ໜ້ອຍລົງ.
ຜົນກະທົບທາງລົບ: ດື່ມຊາປຸກຫຼາຍເກີນໄປຈະເຮັດໃຫ້ນ້ຳກະເພາະອາຫານຈາງລົງ, ເຮັດໃຫ້ນ້ຳກະເພາະອາຫານບໍ່ສາມາດຍ່ອຍອາຫານໄດ້ຢ່າງເປັນປົກກະຕິ, ຈະເປັນເຈັບທ້ອງໄດ້ງ່າຍ.
ການຄະລຳ: ເມື່ອກິນອີ່ມແລ້ວດີທີ່ສຸດຢ່າດື່ມຊາ, ຖ້າບໍ່ດັ່ງນັ້ນຈະຂັດຂວາງການດູດຊຶມເອົາທາດໂປຼຕິນແລະທາດເຫຼັກຂອງຮ່າງກາຍຄົນເຮົາ.
3, ເຄື່ອງດື່ມປະເພດນ້ຳໝາກໄມ້
ຄຸນຄ່າດ້ານສຸຂະພາບ: ເຄື່ອງດື່ມປະເພດນີ້ມີກາກບອນຮີດຼັດ, ກະລຸຍກົສ, ນ້ຳຕານໝາກໄມ້ເປັນຕົ້ນທີ່ຮ່າງກາຍຄົນເຮົາດູດເອົາໄດ້ງ່າຍແລະວິຕາມິນ, ທາດແຮ່ແລະຈຸນລະສານທີ່ອຸດົມສົມບູນເປັນຕົ້ນ.
ຜົນກະທົບທາງລົບ: ເຄື່ອງດື່ມປະເພດໝາກໄມ້ມີບາງຢ່າງມີອັດຕານ້ຳຕານສູງຫຼາຍ, ຖ້າດື່ມກ່ອນນອນອາດຈະເພີ່ມຄວາມສ່ຽງເປັນພະຍາດເສັ້ນເລືອດຫົວໃຈແລະສະໝອງ, ດື່ມຫຼາຍໂພດອາດຈະເພີ່ມພາລະຂອງໝາກໄຂ່ຫຼັງ.
ການຄະລຳ: ຖ້າເອົາໃຫ້ເດັກອ່ອນດື່ມຄວນປົນນ້ຳໃສ່ໃຫ້ຈາງລົງກ່ອນ, ຫຼີກເວັ້ນບໍ່ໃຫ້ນ້ຳຕານ, ບີນ້ຳຕານ, ທາດແຍກດ້ວຍໄຟຟ້າໃນເຄື່ອງດື່ມໄປກະຕຸກກະເພາະອາຫານທີ່ຍັງບໍ່ສົມບູນຂອງເດັກ; ຜູ້ເປັນບາດໃນກະເພາະອາຫານບໍ່ຄວນດື່ມຫຼາຍ.
4, ເຄື່ອງດື່ມປະເພດໂປຼຕິນ
ຄຸນຄ່າດ້ານສຸຂະພາບ: ເພີ່ມຕື່ມທາດໂປຼຕິນແລະພະລັງ, ເຊັ່ນເຄື່ອງດື່ມແກ່ນໝາກອະມັ່ງແລະນ້ຳໝາກຖົ່ວເປັນຕົ້ນ.
ຜົນກະທົບທາງລົບ: ໃນໝາກຖົ່ວເຫຼືອງມີເຊື້ອໝັກແລະທາດອາວີດິນຫຼາຍຢ່າງ, ມີແຕ່ຈັດເຊື້ອໝັກຢ່າງສິ້ນເຊິງໃນຂະບວນການປຸງແຕ່ງນ້ຳໝາກຖົ່ວແລ້ວຈິ່ງສາມາດທຳລາຍພວກມັນ. ຄົນຈຳນວນໜຶ່ງດື່ມນ້ຳໝາກຖົ່ວທີ່ບໍ່ໄດ້ຜ່ານການປຸງແຕ່ງຕາມຫຼັກວິທະຍາສາດນັ້ນອາດຈະພາໃຫ້ມີອາການກະຕຸກຫຼອດຍອຍອາຫານຂ້າງເທິງ.
ການຄະລຳ: ຢ່າດື່ມເມື່ອທ້ອງຫວ່າງ, ຖ້າບໍ່ດັ່ງນັ້ນທາດໂປຼຕິນໃນເຄື່ອງດື່ມປະເພດນີ້ຈະກາຍເປັນກາລູລີໃນຮ່າງກາຍຄົນເຮົາ.
5, ເຄື່ອງດື່ມປະເພດກາກໂບນິກອາຊິດ
ຄຸນຄ່າດ້ານສຸຂະພາບ: ເຄື່ອງດື່ມປະເພດກາກໂບນິກອາຊິດມີລົດແຊບແລະແກ້ຄວາມຮ້ອນໄດ້ດີ, ສາມາດເພີ່ມນ້ຳໃສ່ຮ່າງກາຍໄດ້, ແຕ່ເວົ້າທົ່ວໄປແລ້ວ, ບໍ່ມີຄຸນຄ່າບຳລຸງສຸຂະພາບຫຼາຍປານໃດ.
ຜົນກະທົບທາງລົບ: ໃນເຄື່ອງດື່ມກາກໂບນິກອາຊິດຄືນ້ຳອັດລົມນັ້ນສ່ວນຫຼາຍມີອາຊິດຟົສຟໍລິກເປັນຕົ້ນ, ເມື່ອເຂົ້າໄປໃນຮ່າງກາຍແລ້ວປະສົມກັບທາດການຊີອົມ, ຈະມີຜົນກະທົບໜັກຕໍ່ແຂ້ວແລະກະດູກ.
ຄະລຳ: ຢ່າດື່ມເຄື່ອງດື່ມປະເພດນີ້ຫຼາຍ, ໂດຍສະເພາະແມ່ນຄົນໄວກາງຄົນເດັກນ້ອຍແລະຜູ້ເຖົ້າ.
6, ເຄື່ອງດື່ມປະເພດມີສັບພະຄຸນພິເສດ
ຄຸນຄ່າດ້ານສຸຂະພາບ: ມີສັບພະຄຸນພິເສດທີ່ເຄື່ອງດື່ມອື່ນບໍ່ມີ, ເຄື່ອງດື່ມປະເພດທີ່ມີບົດບາດຕ້ານຄວາມອິດເມື່ອຍ, ເຮັດໃຫ້ຮ່າງກາຍຈ່ອຍລົງເພື່ອຄວາມງາມເປັນຕົ້ນນັ້ນມີສັບພະຄຸນປັບປຸງກະເພາະອາຫານແລະລຳໄສ້, ຊຸກຍູ້ການປ່ຽນຖ່າຍໃນຮ່າງກາຍ, ລະບາຍທາດພິດແລະບຳລຸງຜິວໜ້າເປັນຕົ້ນ.
ການຄະລຳ: ຜູ້ເປັນໂຣກຫົວໃຈແລະເລືອດດັນສູງນັ້ນບໍ່ຄວນດື່ມເຄື່ອງດື່ມປະເພດນີ້ຫຼາຍເກີນໄປ, ເພາະວ່າທາດໂຊດີອົມໃນເຄື່ອງດື່ມເຫຼົ່ານີ້ຈະເພີ່ມພາລະໃຫ້ແກ່ໝາກຫົວໃຈ.
|
