|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການໂລກກິລາ. ໃນເວລາ "ງານກິລາໂອລິມປິກມະນຸດສາດ" ຖືກກຳນົດເປັນໜຶ່ງໃນສາມທັດສະນະຄະຕິງານກິລາໂອລິມປິກປີ 2008 ນັ້ນ, ຄະນະກຳມະການຈັດງານກິລາໂອລິມປິກປັກກິ່ງກໍເລີ່ມສຸມໃສ່ການເອົາກິລາກັບຮູບແບບສິລະປະວັດທະນະທຳຕ່າງໆປະສານສົມທົບກັນ. ໃນນັ້ນ ດົນຕີໄດ້ຖືກຖືເປັນຮູບແບບສິລະປະຢ່າງໜຶ່ງທີ່ຍິ່ງສາມາດສະແດງເຖິງ "ສີສັນມະນຸດສາດ" ຂອງງານກິລາໂອລິມປິກ. ເລີ່ມແຕ່ປີ 2003 ເປັນຕົ້ນມາ, ຄະນະກຳມະການຈັດງານກິລາໂອລິມປິກປັກກິ່ງກໍເລີ່ມດຳເນີນການເຄື່ອນໄຫວປະກວດເພງງານກິລາໂອລິມປິກປັກກິ່ງປີ 2008 ແລ້ວ, ຫວັງຢາກປະກວດໄດ້ເພງງານກິລາໂອລິມປິກທີ່ດີເລີດ. ໃນລາຍການໂລກກິລາພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: "ເພງພັນບົດດັງກ້ອງງານກິລາໂອລິມປິກປັກກິ່ງ".
ຕອນຄ່ຳວັນທີ 15 ກໍລະກົດ, ງານລາຕີມອບລາງວັນການເຄື່ອນໄຫວປະກວດເພງງານກິລາໂອລິມປິກປັກກິ່ງປີ 2008 ຄັ້ງທີ 3 ແລະພິທີປິດງານວັດທະນະທຳໂອລິມປິກປັກກິ່ງຄັ້ງທີ 4 ໄດ້ຈັດຂຶ້ນຢູ່ໂຮງລະຄອນສະຕະວັດປັກກິ່ງ, ເພງ 16 ບົດທີ່ໄດ້ຮັບລາງວັນໃນງານປະກວດເທື່ອນີ້ກໍຖືກສະແດງຢ່າງເປີດເຜີຍເປັນເທື່ອທຳອິດ, ເພງຕ່າງໆທີ່ກະຕຸ້ນໃຈຄົນສັນລະເສີນຄວາມດີງາມຂອງງານກິລາໂອລິມປິກແລະຄວາມກະຕືລືລົ້ນຂອງການກິລາ, ໄດ້ຮັບສຽງຕົບມືອັນຟົດຟື້ນຈາກຜູ່ຊົມ. ທ່ານເຫີເຈິ້ນຫຼຽງ ກຳມະການຄະນະກຳມະການໂອລິມປິກສາກົນ ປະທານກິດຕິມະສັກຄະນະກຳມະການໂອລິມປິກຈີນກ່າວວ່າ, ສິລະປະແມ່ນພາຫະນະສຳຄັນທີ່ສືບທອດແລະແຜ່ຂະຫຍາຍຈິດໃຈໂອລິມປິກ, ທ່ານຫວັງວ່າ ໃນຂະນະທີ່ປັກກິ່ງຈັດງານກິລາໂອລິມປິກນັ້ນ ກໍສາມາດຈົ່ງໄວ້ບົດປະພັນສິລະປະງານກິລາໂອລິມປິກທີ່ເປັນຕົວແບບ. ທ່ານເວົ້າວ່າ:
ມີສິລະປິນບໍ່ໜ້ອຍໄດ້ມີແຮງບັນດົນໃຈຈາກການກິລາ, ໄດ້ສ້າງບົດປະພັນທີ່ຍິ່ງໃຫຍ່ອະມະຕະໃນດ້ານວັນນະຄະດີ ດົນຕີ ການແກະສະຫຼັກແລະວິຈິດຕະກຳ. ງານກິລາໂອລິມປິກໄດ້ເຜີຍແຜ່ອຸດົມການແລະຈິດໃຈຢ່າງດົນນານກວ່າເກົ່າແລະກວ້າງຂວາງກວ່າເກົ່າໂດຍຜ່ານຈາກບົດປະພັນສິລະປະເຫຼົ່ານີ້, ຂ້າພະເຈົ້າຫວັງວ່າໃນງານກິລາໂອລິມປິກປັກກິ່ງປີ 2008, ນັກກິລາຂອງຈີນຈະຊີງໄດ້ຜົນງານດີເດັ່ນ, ແລະກໍ່ຫວັງໃຫ້ມີບົດປະພັນທີ່ເປັນຕົວແບບໃນດ້ານສິລະປະວັນນະຄະດີ.
ໃນເພງ 16 ບົດທີ່ໄດ້ຮັບລາງວັນໃນງານປະກວດເພງງານກິລາໂອລິມປິກເທື່ອນີ້, ມີເພງທີ່ແຕ່ງໂດຍນັກດົນຕີທີ່ຊື່ດັງຂອງຈີນ ເຊັ່ນ "ໂລກດຽວກັນ ຄວາມຝັນດຽວກັນ" ແລະ "ບິນພ້ອມກັນ" ເປັນຕົ້ນ, ກໍມີເພງທີ່ແຕ່ງໂດຍນັກດົນຕີລຸ້ນໃໝ່ ເຊັ່ນ "ຕະລຸມບອນສູ່ຫຼຽນຄຳ" ເປັນຕົ້ນ. ຕອນຄ່ຳວັນທີ 15 ກໍລະກົດ, ໂຮງລະຄອນສະຕະວັດປັກກິ່ງມີແສງໄຟຟ້າແຈ້ງສະຫວ່າງ, ສຽງເພງທີ່ກະຕຸ້ນໃຈຄົນແລະການເຕັ້ນລຳທີ່ເບີກບານມ່ວນຊື່ນໄດ້ສະແດງເຖິງພອນໄຊແລະຄວາມຫວັງຕໍ່ງານກິລາໂອລິມປິກປັກກິງຂອງຄົນທັງຫຼາຍ. ໃນເວລາກ່າວເຖິງຄວາມເຂົ້າໃຈຕໍ່ເພງງານກິລາໂອລິມປິກ, ທ່ານເຜິງລ້ຽງ ນັກຮ້ອງເພງ "ຕະລຸມບອນສູ່ຫຼຽນຄຳ" ເວົ້າວ່າ:
ເພງທີ່ພວກຂ້າພະເຈົ້າຮ້ອງໃນມື້ນີ້ແມ່ນ "ຕະລຸມບອນສູ່ຫຼຽນຄຳ", ບໍ່ວ່ານັກກິລາຜູ່ໃດ ກໍຕ້ອງພະຍາຍາມຝຶກແອບ, ຈຶ່ງຈະຊີງໄດ້ຫຼຽນຄຳໃນມື້ໃດມື້ໜຶ່ງ. ໃນເວລາພວກເຮົາຮ້ອງເພງດັ່ງກ່າວກໍ່ຮູ້ສຶກກະຕຸ້ນໃຈໂດຍປະລິຍາຍ, ທັງຮ້ອງເພງທັງຄຶດວ່າ, ນັກກິລາເໝື່ອຍຄືແນວນີ້, ກໍ່ແມ່ນເພື່ອເຂົ້າຮ່ວມງານກິລາໂອລິມປິກປັກກິ່ງປີ 2008, ພວກເຮົາມີແຕ່ສາມາດສະແດງຄວາມສະໜັບສະໜູນນັກກິລາທັງຫຼາຍດ້ວຍສຽງເພງ.
ການເຄື່ອນໄຫວຂໍເພງງານກິລາໂອລິມປິກຄັ້ງນີ້ ໄດ້ດຶງດູດມວນຊົນອັນໄພສານເຂົ້າຮ່ວມຢ່າງຫ້າວຫັນ, ຄະນະກຳມະການຈັດງານກິລາໂອລິມປິກໄດ້ຮັບເນື້ອເພງລວມ 8000 ກວ່າບົດ, ນົດເພງ 700 ກວ່າບົດ. ໃນງານລາຕີມອບລາງວັນ, ເພງງານກິລາໂອລິມປິກທີ່ອອນຊອນມ່ວນຫູທີ່ໄດ້ຮັບລາງວັນເຮັດໃຫ້ຜູ່ຊົມເພີດເພີນລືມໄລ, ທ້າວໂຈ່ວຮຸ່ຍ ຜູ່ຊົມທີ່ເປັນນັກຮຽນເວົ້າວ່າ:
ການສະແດງໃນຄືນນີ້ໜ້າຊົມທີ່ສຸດ, ເພງງານກິລາໂອລິມປິກທີ່ມ່ວນຫູຫຼາຍບົດໄດ້ສ້າງຄວາມ ປະທັບໃຈອັນເລິກເຊິ່ງໄວ້ໃຫ້ແກ່ຂ້າພະເຈົ້າ, ກິລາກັບດົນຕີໄດ້ປະສານສົມທົບກັນຢ່າງຈົບງາມທີ່ສຸດ. ໂດຍສະເພາະແມ່ນເພງ "ເຈົ້າເຮົາເຂົາ ຟ້າວມາເຂົ້າຮ່ວມ", ມີຈັງຫວະຄຶກຄັກ, ຂ້າພະເຈົ້າຟັງແລ້ວກໍຢາກເຂົ້າຮ່ວມໃນວຽກງານຜູ່ອາສາສະໝັກງານກິລາໂອລິມປິກເລີຍ.
ເຈົ້າໜ້າທີ່ທັງຫຼາຍຂອງຄະນະກຳມະການຈັດງານກິລາໂອລິມປິກປັກກິ່ງກ່າວວ່າ, ຫວັງວ່າການຈັດການເຄື່ອນໄຫວເທື່ອນີ້ ຄົງຈະສາມາດກະຕຸ້ນຄວາມຫ້າວຫັນແຕ່ງເພງຂອງນັກດົນຕີທັງຫຼາຍຂອງຈີນ, ເຮັດໃຫ້ງານກິລາໂອລິມປິກສາມາດຈົ່ງໄວ້ບົດເພງງານກິລາໂອລິມປິກທີ່ສາທາຊະນະຊົນນິຍົມກັນຮ້ອງແລະເປັນຕົວແບບ. ພ້ອມກັນນັ້ນ ເຈົ້າໜ້າທີ່ທັງຫຼາຍຂອງຄະນະກຳມະການຈັດງານກິລາໂອລິມປິກປັກກິ່ງກໍ່ເຊື່ອວ່າ, ການປະກາດແລະຮ້ອງເພງໂອລິມປິກທີ່ດີເລີດ, ຈະມີຜົນດີຕໍ່ປັກກິ່ງໃນການສ້າງບັນຍາກາດໂອລິມປິກອັນຟົດຟື້ນແລະເຂັ້ມຂຸ້ນ.
|
