|
ເວທີປາໄສພາກພື້ນອາຊຽນຄັ້ງທີ13ຈັດຂຶ້ນຢູ່ມາເລເຊຍ
cri
ຕາມຂ່າວCRI, ວັນທີ28ກໍລະກົດ,ເວທີປາໄສພາກພື້ນອາຊຽນຄັ້ງທີ13ໄດ້ຈັດຂຶ້ນຢູ່ກົວລາລຳເປີ ນະຄອນຫຼວງມາເລເຊຍ.ໃນກອງປະຊຸມ,ລັດຖະມົນຕີການຕ່າງປະເທດຫຼືຜູ່ຕາງໜ້າຂອງ25ປະເທດໄດ້ປຶກສາຫາລືບັນຫາຄວາມປອດໄພຂອງພາກພື້ນແລະສາກົນເຊັ່ນສະຖານະການຕາເວັນອອກກາງ,ບັນຫານີວເຄຼຍແຫຼມເກົາຫຼີເປັນຕົ້ນ.
ຕາມຂ່າວແຈ້ງວ່າ,ຕອນບ່າຍມື້ດຽວກັນ,ລັດຖະມົນຕີ ການຕ່າງປະເທດຂອງ8ປະເທດຄືຈີນ,ສ.ເກົາຫຼີ,ອາເມລິກາ,ຍີ່ປຸ່ນ,ຣັດເຊຍ,ອົສຕຼາລີ,ການາດາແລະມາເລເຊຍຈະຈັດກອງປະຊຸມ,ປຶກສາຫາລືສະຖານະການແຫຼມເກົາຫຼີແລະບັນຫາຄວາມປອດໄພຂອງອາຊີຕາເວັນອອກສຽງເໜືອ.
ຕາມໄດ້ຊາບ,ເວທີປາໄສພາກພື້ນອາຊຽນຄັ້ງນີ້ຈະດຳເນີນເປັນເວລາມື້ໜຶ່ງ,ໃນເວລາປິດປະຊຸມ,ຈະຜ່ານຮັບຮອງຖະແຫຼງການສາມສະບັບເຊັ່ນຖະແຫຼງການຂອງເວທີປາໄສພາກພື້ນອາຊຽນກ່ຽວກັບການຊຳລະໄພພິບັດແລະການຮັບມືສະພາບສຸກເສີນເປັນຕົ້ນ.
ເວທີປາໄສພາກພື້ນອາຊຽນແມ່ນຊ່ອງທາງສົນທະນາແລະຮ່ວມມືກັນດ້ານຄວາມປອດໄພລະຫວ່າງຫຼາຍຝ່າຍທາງການທີ່ສຳຄັນທີ່ສຸດໃນພາກພື້ນອາຊີປາຊີຟິກໃນປັດຈຸບັນ.ປັດຈຸບັນ,ເວທີປາໄສດັ່ງກ່າວມີ25ສະມາຊິກ,ເຊິ່ງລວມທັງ10ປະເທດອາຊຽນ,10ຄູ່ເຈລະຈາຂອງອາຊຽນພ້ອມດ້ວຍອີກຫ້າປະເທດຄືປາປົວນີວກີນີ,ສ.ປ.ປ.ເກົາຫຼີ,ມົງໂກລີ,ປາກີສະຖານແລະຕີມໍເລັສເຕ.
|
|
