|
|
 |
| (GMT+08:00)
2006-07-31 10:30:26
|
 |
|
ຄວາມເວົ້າກ່ຽວກັບຄວາມຮັກອັນຄົມຄາຍ
cri
Author: min
|
ສະບາຍດີ, ທ່ານຜູ້ຟັງທີ່ຮັກແພງ, ດີໃຈຫຼາຍທີ່ໄດ້ພົບກັບທ່ານໃນລາຍການຄາລົມຄົມຄາຍອີກຕາມເຄີຍ, ຂ້າພະເຈົ້າແມ່ນອຸດົມ!
ອີກສອງມື້ກໍ່ແມ່ນເດືອນເຈັດອອກໃໝ່ 7 ຄ່ຳຈັນທະຄະຕິຈີນແລ້ວ, ຊຶ່ງກໍແມ່ນວັນຄູ່ຮັກຂອງຈີນ, ມີນິທານປະລຳປະລາເລົ່າລືກັນວ່າ, ແຕ່ກີ້ແຕ່ກ່ອນ, ໃນສະໄໝບູຮານ, ມີອ້າຍບ່າວລ້ຽງຄວາຍທີ່ທຸກຍາກຜູ້ໜຶ່ງໄດ້ຮັກກັນກັບລູກສາວຫຼ້າຂອງເທບພະເຈົ້າເທິງສະຫວັນຊັ້ນຟ້າ, ສອງຄົນແຕ່ງດອງເປັນຜົວເປັນເມຍກັນ, ຜົວຄາດໄຖປູກຝັງ, ເມຍຕ່ຳແຜ່ນ, ດຳລົງຊີວິດຢ່າງມີຄວາມສຸກ. ພາຍຫຼັງມາ, ເທບພະເຈົ້າແລະເຈົ້າແມ່ເທິງຟ້າໄດ້ຮູ້ເລື່ອງ, ໄດ້ຂີດເສັ້ນເປັນທາງຊ້າງເຜືອກອອກລະຫວ່າງເຂົາເຈົ້າທັງສອງ, ແຕ່ນັ້ນມາ, ທ້າວລ້ຽງຄວາຍກັບນາງຕ່ຳຜ້າຈຶ່ງມີແຕ່ຢືນຈ້ອງມອງກັນຢູ່ຄົນລະຟາກຝັ່ງທາງຊ້າງເຜືອກ. ເມື່ອດົນນານມາແລ້ວ, ເທບພະເຈົ້າກັບເຈົ້າແມ່ເທິງຟ້າກະຕຸ້ນໃຈຍ້ອນຄວາມຮັກອັນຈິງໃຈລະຫວ່າງເຂົາເຈົ້າສອງຄົນ, ຈຶ່ງອະນຸຍາດໃຫ້ເຂົາເຈົ້າພົບໜ້າກັນປີລະເທື່ອໃນເດືອນ 7 ອອກໃໝ່ 7 ຄ່ຳທຸກປີ, ເມື່ອຮອດມື້ນັ້ນ, ນົກແຂວທັງໝົດໃນເມືອງມະນຸດຈຶ່ງບິນຂຶ້ນສູ່ທ້ອງຟ້າ, ຕໍ່ກັນເປັນຂົວນົກແຊວເພື່ອໃຫ້ເຂົາເຈົ້າພົບກັນຢູ່ເທິງຂົວ. ພາຍຫຼັງມາ, ຄົນທັງຫຼາຍຈຶ່ງຖືວັນນີ້ເປັນວັນແຫ່ງຄວາມຮັກຂອງຈີນ, ຄ້າຍຄືກັບວັນວາເລນທາຍຂອງຝ່າຍຕາເວັນຕົກ.
ຕັ້ງແຕ່ບູຮານນະການມາ, ທຸກຊົນຊາດຊົນເຜົ່າກໍ່ມີນິທານຮັກອັນດີງາມເລົ່າລືກັນມາ, ຄວາມຮັກແມ່ນເນື້ອເລື່ອງທີ່ຄົນທັງຫຼາຍເວົ້າບໍ່ໜົກຈັກເທື່ອ. ໃນປະຫວັດສາດ, ບຸກຄົນຜູ້ມີຊື່ສຽງຫຼາຍຄົນກໍໄດ້ມີຄວາມເວົ້າອັນແຫຼມຄົມເລິກເຊິ່ງກ່ຽວກັບຄວາມຮັກປະໄວ້ຢ່າງມາກມາຍ, ໃນລາຍການມື້ນີ້, ພວກເຮົາໄດ້ຮວບໂຮມເອົາຄວາມເວົ້າເຫຼົ່ານີ້ມາອ່ານສູ່ທ່ານຟັງ.
ທ່ານເຊ໌ກສ໌ເປຍ ນັກປະພັນອັງກິດເວົ້າວ່າ: ເຖິງວ່າເວລາແລະໜ້າຕາຈະເຮັດໃຫ້ຄວາມຮັກຫ່ຽວແຫ້ງ, ແຕ່ຄວາມຮັກແທ້ຈິງຈະມີຄວາມກະຕືລືລົ້ນຄືຄວາມຮັກຄັ້ງແຮກຕະຫຼອດໄປ, ທ່ານຍັງເວົ້າວ່າ:ເມື່ອຄວາມຮັກໄດ້ເຂົ້າໄປໃນໃຈຂອງຄົນແລ້ວ, ຈະຕີຈະດ່າແນວໃດມັນກໍບໍ່ໜີດອກ, ໃນເມື່ອມັນໄດ້ເຂົ້າມາໃນໂຕເຈົ້າແລ້ວ, ມັນກໍ່ຈະຍຶດຄອງໝົດທຸກສິ່ງທຸກຢ່າງຂອງເຈົ້າ.
ທ່ານແຊນລີ ນັກກະວີໂລມັງຕິກທີ່ມີຊື່ສຽງຂອງອັງກິດເຄີຍມີການອຸປະມາທີ່ງາມວິຈິດທີ່ສຸດກ່ຽວກັບການຈູບ, ທ່ານເວົ້າວ່າ: ການຈູບແມ່ນວິຍານກັບວິຍານພົບກັນຢູ່ຮິມສົບຂອງຜູ້ຮັກກັນ.
ທ່ານໂມລີແອເຣິ ນັກປະພັນຜູ້ສຳຄັນກວ່າໝູ່ໃນສະຕະວັດທີ 17 ຂອງຝຣັ່ງເວົ້າວ່າ, ຖ້າບໍ່ຄຶດຮອດກັນ, ເຈົ້າກໍ່ບໍ່ຫ່ອນມີຄວາມສຸກ. ຖ້າຂັບໄລ່ຄວາມຮັກອອກຈາກຊີວິດ, ກໍ່ທໍ່ກັບຂັບໄລ່ຄວາມມ່ວນຊື່ນອອກໄປ.
ທ່ານດົກທອຍເຢັບສະກີ ນັກປະພັນນະວະນິຍາຍທີ່ມີຊື່ສຽງໃນສະຕະວັດທີ 19 ຂອງຣັດເຊຍເວົ້າວ່າ, ຖ້າຮັກກັນຢ່າງຈິງແຈແທ້, ຄວາມເຂົ້າໃຈຜິດແຫ່ງຄວາມຮັກກໍ່ຈະລືມໄປໃນທັນທີ.
ທ່ານຊັງຊັກ ຣຸດໂຊ, ນັກນຶກຄຶກໃນຂະບວນການວັດທະນະທຳປະຊາທິປະໄຕຂອງຝຣັ່ງເວົ້າວ່າ: ການຜູກພັນຄວາມຮັກຢ່າງຈິງໃຈແມ່ນການຜູກພັນທີ່ບໍລິສຸດຜຸດຜ່ອງກວ່າສິ່ງອື່ນໆທັງໝົດ, ໃນອາລົມຈິດທຸກຢ່າງຂອງພວກເຮົາ, ທີ່ເຮັດໃຫ້ຄົນຫຼົງໄຫຼກວ່າໝູ່ແມ່ນຄວາມຮັກ.
ທ່ານອັງແກນເວົ້າວ່າ: ສິ່ງທໍລະມານໃຈທີ່ສູງສົ່ງທີ່ສຸດ, ແຮງກ້າທີ່ສຸດແລະເປັນເລື່ອງສ່ວນຕົວທີ່ສຸດກໍແມ່ນຄວາມທໍລະມານໃຈຍ້ອນຄວາມຮັກ.
ຄວາມຮັກແມ່ນເນື້ອຫາທີ່ບໍ່ເກົ່າແກ່ຈັກເທື່ອ, ເວົ້າທໍ່ໃດກໍໃໝ່ໄປເລື້ອຍໆ, ດັ່ງນັ້ນ, ຈຶ່ງມີຄົນເວົ້າວ່າ, ຄວາມຮັກແມ່ນເຄື່ອງຫຼິ້ນລູກບາດ. ຕໍ່ໄປ, ຂ້າພະເຈົ້າກໍຈະເລົ່າຄວາມເວົ້າມໃໝ່ໆມ່ວນໆກ່ຽວກັບຄວາມຮັກສູ່ທ່ານຟັງ:
ພໍ່ຄົວເວົ້າວ່າ: ຄວາມຮັກແມ່ນຫົວຜັກບົ່ວຝຣັ່ງ, ເຈົ້າແກະມັນອອກແຕ່ລະການ, ມັນກໍຈະເຮັດໃຫ້ເຈົ້ານ້ຳຕາໄຫຼນຳມັນ.
ນາຍໝໍເວົ້າວ່າ: ຄວາມຮັກເໝືອນດັ່ງການເປັນຫວັດ, ຄົນທີ່ຕິດເຊື້ອໂຣກແຫ່ງຄວາມຮັກນັ້ນ, ຕົວະຕົນເອງບໍ່ໄດ້, ຕົວະຜູ້ອື່ນກໍບໍ່ໄດ້.
ນັກອຸຕຸນິຍົມວິທະຍາເວົ້າວ່າ: ຄວາມຮັກບໍ່ຢ້ານມືດ, ຢູ່ແຈໃດແຈໜຶ່ງໃນສວນອຸທິຍານແຮ່ງມືດ, ຜູ້ຮັກກັນກໍ່ແຮ່ງມັກໄປ. ຄວາມຮັກບໍ່ຢ້ານຮ້ອນ, ເຖິງວ່າອຸນຫະພູມຈະສູງເຖິງ 100 ອົງສາເຊ, ຜູ້ຮັກກັນກໍຍັງມັກເຟືອກັນຢູ່. ຄວາມຮັກບໍ່ຢ້ານໜາວ, ເວລາຫິມະຕົກ, ຜູ້ຮັກກັນກໍຍັງອອກໄປຍ່າງບົນຖະໜົນຕາມເຄີຍ.
ນັກບູຮານຄະດີເວົ້າວ່າ, ຄວາມຮັກຄືກັບນ້ຳ, ສາດອອກໄປກໍເກັບຄືນບໍ່ໄດ້ແລ້ວ. ຄວາມຮັກຄືກັບເຄື່ອງປັ້ນດິນເຜົາ, ເມື່ອມັນແຕກແລ້ວ, ແມ່ນຕິດໃຫ້ດີຄືນຄືເກົ່າຍາກ, ຄວາມຮັກຄືກັບວັດຖຸບູຮານທີ່ຂຸດອອກຈາກດິນ, ທັງເກົ່າແກ່ທັງໃໝ່ອ່ຽມ.
ຄົນທັງຫຼາຍຍັງເວົ້າວ່າ: ເມື່ອສອງຄົນຮັກກັນ, ເວົ້າສຳລັບໂລກແລ້ວ, ເຈົ້າອາດຈະແມ່ນຄົນທຳມະດາຜູ້ໜຶ່ງ, ແຕ່ເວົ້າສຳລັບຜູ້ຮັກເຈົ້າແລ້ວ, ເຈົ້າພັດແມ່ນໂລກຂອງລາວ.
ຄວາມຫ່າງທີ່ໄກກວ່າໝູ່ໃນໂລກ, ບໍ່ແມ່ນຄວາມຫ່າງລະຫວ່າງການເກີດກັບການຕາຍ, ບໍ່ແມ່ນຢູ່ຄົນລະຝາກຟ້າ, ຫາກແມ່ນຂ້ອຍຢືນຢູ່ຕໍ່ໜ້າເຈົ້າ, ເຈົ້າຍັງບໍ່ຮູ້ວ່າ, ຂ້ອຍຮັກເຈົ້າ.
ທ່ານຜູ້ຟັງທີ່ຮັກແພງ, ໃນລາຍການມື້ນີ້, ພວກເຮົາໄດ້ແນະນຳຄວາມເວົ້າກ່ຽວກັບຄວາມຮັກອັນຄົມຄາຍສູ່ທ່ານຟັງ, ທີ່ຈິງແລ້ວ, ຄວາມຮັກແມ່ນເນື້ອຫາທີ່ຄົນເຮົາມັກລົມກັນຢ່າງບໍ່ມີມື້ສິ້ນສຸດຈັກເທື່ອ, ມັນເຮັດໃຫ້ຄົນມີຄວາມສຸກທັງເຮັດໃຫ້ຄົນທໍລະມານໃຈ. ອີກສອງມື້ກໍ່ແມ່ນວັນແຫ່ງຄວາມຮັກທີ່ມີມູນເຊື້ອຂອງຈີນແລ້ວ, ນະທີ່ນີ້, ພວກເຮົາຂໍອວຍພອນໃຫ້ຜູ້ຮັກກັນແຕ່ລະຄູ່ຈົ່ງມີຄວາມສຸກຄວາມສຳລານ, ລາຍການຄາລົມຄົມຄາຍພາກນີ້ຂໍສ້ຽງສຸດລົງພຽງທໍ່ນີ້, ອຸດົມແລະວິໄລວັນຜູ້ຮຽບຮຽງຂອບໃຈທ່ານທີ່ຮັບຟັງ, ພົບກັນໃໝ່ໃນອະທິດໜ້າ, ສະບາຍດີ!
|
|
|
