|
ຂະແຫນງການປະດິດຄິດສ້າງວັດທະນະທຳແມ່ນຂະແຫນງການຈຸດຮ້ອນກວ່າຫມູ່ຢູ່ສາກົນໃນຊູ່ມື້ນີ້, ການເຮັດແນວໃດເອົາງານກິລາໂອລິມປິກພົວພັນກັບຂະແຫນງການປະດິດຄິດສ້າງວັດທະນະທຳ,ນີ້ແມ່ນຫົວຂໍ້ໃຫຍ່ອັນຫນຶ່ງ.ໃນເວທີປາໄສ ການປະດິດຄິດສ້າງວັດທະນະທຳໂອລິມປິກກັບການພັດທະນາຕົວເມືອງທີ່ຫາກໍ່ສິ້ນສຸດລົງນັ້ນ, ຜູ່ຊ່ຽວຊານແລະນັກປາດທັງຫລາຍໄດ້ປະກອບຄຳຄິດຄຳເຫັນຂອງໃຜລາວກ່ຽວກັບງານກິລາໂອລິມປິກປັກກິ່ງປີ 2008 ກັບການພັດທະນາຂະແຫນງການວັດທະນະທຳຂອງປັກກິ່ງ.
ເວທີປາໄສການປະດິດຄິດສ້າງວັດທະນະທຳໂອລິມປິກກັບການພັດທະນາຕົວເມືອງແມ່ນເນື້ອໃນສຳຄັນອັນຫນຶ່ງຂອງງານວັດທະນະທຳໂອລິມປິກປັກກິ່ງປີ 2008 ຄັ້ງທີ 4.ນັກປາດແລະຜູ່ຊ່ຽວຊານຫລາຍສິບຄົນທີ່ມາຈາກອັງກິດ ອາເມລິກາ ໂຮນລັງ ການາດາ ອົສຕຼາລີແລະຈີນໄດ້ເຂົ້າຮ່ວມເວທີປາໄສ,ປະກອບຄຳຄິດຄຳເຫັນໃຫ້ແກ່ການພັດທະນາຂະແຫນງການປະດິດຄິດສ້າງວັດທະນະທຳໂອລິມປິກປັກກິ່ງຈາກຫລາຍດ້ານແລະຫລາຍແງ່ກ່ຽວກັບຫົວຂໍ້ຕ່າງໆຄື ການຕີຄວາມຫມາຍໃຫມ່ໃຫ້ແກ່ງານໂອລິມປິກແລະຕົວເມືອງເຈົ້າພາບ,ເນື້ອໃນວັດທະນະທຳກິລາແລະການປະດິດຄິດສ້າງວັດທະນະທຳໃຕ້ເບື້ອງຫລັງໂອລິມປິກ,ບົດຮຽນທາງບວກແລະທາງລົບຂອງຕົວເມືອງເຈົ້າພາບຈັດງານໂອລິມປິກທຸກຄັ້ງທີຜ່ານມາ.
ທ່ານຈອນ.ຮອບກິນສ ນັກເສດຖະສາດທີ່ມີຊື່ສຽງຂອງອັກງິດທີ່ຕັ້ງເດີນທາງມາຮ່ວມເວທີປາໄສໂດຍຈຳເພາະມີສົມຍານາມເປັນບິດາແຫ່ງເສດ ຖະກິດປະດິດສ້າງ, ທ່ານເຄີຍໃຫ້ຄຳປຶກສາແກ່ລັດຖະບານແລະອົງການຈັດ ຕັ້ງວັດທະນະທຳຂອງຫລາຍປະເທດໃນໂລກ.ທ່ານເຫັນວ່າ, ບໍ່ວ່າແມ່ນກິລາຫລືແມ່ນສິລະປະ,ເຄັດລັບແຫ່ງຜົນສຳເລັດລ້ວນແຕ່ຄ້າຍຄືກັນທີ່ສຸດ. ທ່ານສະເຫນີໃຫ້ປັກກິ່ງຖືໂອກາດງານໂອລິມປິກປີ 2008,ເຮັດໃຫ້ນັກກິລາຜູ່ດີເດັ່ນກວ່າຫມູ່ແລະສິລະປິນທີ່ມີຄວາມສາມາດຫລາຍກວ່າຫມູ່ໃນໂລກມາປະສານສົມທົບກັນ.ທ່ານເຫັນວ່າ,ງານໂອລິມປິກສຳລັບຈີນແລ້ວແມ່ນໂອກາດທີ່ຫາຍາກ.ທ່ານເວົ້າວ່າ:
ຂ້າພະເຈົ້າເຫັນວ່າງານໂອລິມປິກແມ່ນໂອກາດດີອັນຫນຶ່ງທີ່ເຮັດໃຫ້ໂລກສຸມສາຍຕາໃສ່ຈີນ.ຫລາຍໆຄົນຈະມາຈີນໃນປີ 2008,ສະນັ້ນ,ສຳລັບປັກກິ່ງແລ້ວ, ນີ້ແມ່ນໂອກາດດີອັນຫນຶ່ງທີ່ສະແດງໂສມຫນ້າດີທີ່ສຸດຂອງຕົນເອງຕໍ່ທົ່ວໂລກ.ເຊິ່ງສາມາດບອກໃຫ້ຊາວໂລກຮູ້ວ່າ, ໃນຕົວເມືອງນີ້, ຄົນທັງຫລາຍແມ່ນມີຄວາມຄິດແລະມີຫົວຄິດປະດິດຄິດສ້າງ.ຖ້າວ່າປັກກິ່ງສາ ມາດສະແດງຕໍ່ໂລກວ່າ: ໄທເມືອງປັກກິ່ງລ້ວນແຕ່ສາມາດສະແດງຕົນເອງໃນດ້ານສິລະປະແລະວັດທະນະທຳ,ນີ້ຈະຊ່ອຍຍົກໂສມຫນ້າຂອງຕົວເມືອງໃຫ້ສູງຂຶ້ນ.
ປັດຈຸບັນ, ສື່ມວນຊົນແລະປະຊາຊົນຈີນເຫັນໂດຍທົ່ວໄປວ່າ,ປັກກິ່ງຈົນກະທັ້ງທົ່ວປະເທດຈີນ, ຄວນກຳໂອກາດຈັດງານໂອລິມປິກ,ຊຸກຍູ້ໃຫ້ເສດ ຖະກິດແລະວັດທະນະທຳພັດທະນາພ້ອມກັນ.ໂດຍສະເພາະແມ່ນປັກກິ່ງ ຕົວເມືອງເຈົ້າພາບຍິ່ງຄວນຖືໂອກາດຈັດງານໂອລິມປິກ, ຊຸກຍູ້ໃຫ້ພາລະບົດ ບາດແລະອົງປະກອບອຸດສາຫະກຳຂອງຕົວເມືອງມີການພັດທະນາຢ່າງໃຫຍ່.ແຕ່ທ່ານຊີໂຈວຊວນ ຜູ່ຊ່ຽວຊານທີ່ເຂົ້າຮ່ວມເວທີປາໄສພັດໄດ້ສະແດງຄວາມວິຕົກກັງວົນຂອງຕົນ.
ທ່ານຊີໂຈວຊວນແມ່ນຜູ່ຄຸມງານໃຫຍ່ຂອງສູນຄົນຄວ້ານະໂຍບາຍວັດທະນະທຳຮົງກົງ,ທັງແມ່ນສະຖາປະນິກທີ່ມີຊື່ສຽງທີ່ສຸດ,ໃຫ້ຄຳປຶກສາແກ່ອົງການປົກຄອງແລະພາກສ່ວນວັດທະນະທຳຂອງເຂດພິເສດຮົງກົງ.ທ່ານເຫັນວ່າ, ການຈັດງານໂອລິມປິກແມ່ນໂອກາດອັນຫນຶ່ງ, ແຕ່ຍິ່ງຄວນເອົາງານກິລາທີ່ຈັດເປັນເວລາເຄິ່ງເດືອນອັນສັ້ນໆນັ້ນຈັດເຂົ້າໃນແຜນພັດທະນາ ລວມແລະຍາວໄກຂອງຕົວເມືອງ, ປະຕິບັດຕໍ່ງານໂອລິມປິກຢ່າງໃຈເຢັນແລະນອກຕົວ.ທ່ານເວົ້າວ່າ:
ງານໂອລິມປິກແມ່ນໂອກາດອັນຫນຶ່ງ, ຈາກງານໂອລິມປິກ, ພວກເຮົາສາມາດພັດທະນາຫລາຍສິ່ງຫລາຍຢ່າງ, ແຕ່ຖ້າບໍ່ມີງານໂອລິມປິກ, ພວກເຮົາກໍ່ຄວນພັດທະນາສິ່ງເຫລົ່ານີ້,ສິ່ງເຫລົ່ານີ້ສຳຄັນຫລາຍຕໍ່ການພັດທະນາຂອງຕົວເມືອງ.ການພັດທະນາຕົວເມືອງແມ່ນເປົ້າຫມາຍອັນຫນຶ່ງ,ສ່ວນງານໂອລິມ ປິກພຽງແຕ່ແມ່ນກິດຈະການອັນຫນຶ່ງທີ່ຈັດຂຶ້ນເທື່ອດຽວເທົ່ານັ້ນ.ເມື່ອງານນີ້ສິ້ນສຸດລົງແລ້ວ, ຕົວເມືອງຍັງຢູ່,ອຸດສາຫະກຳຕ່າງໆກໍ່ຍັງຢູ່.ສະນັ້ນ, ແຕ່ຫາກໍ່ເລີ່ມຕົ້ນ, ເປົ້າຫມາຍຂອງພວກເຮົາກໍ່ຕ້ອງພິຈາລະນາຈາກການພັດທະນາຂອງຕົວເມືອງແລະອຸດສາຫະກຳ, ພິຈາລະນາວ່າຈະປະສານສົມທົບກັບງານໂອລິມປິກແນວໃດ,ຫາກບໍແມ່ນເຮັດກົງກັນຂ້າມ.ດຽວນີ້ມີຫລາຍຄົນຄິດວ່າ, ພວກເຮົາໄດ້ຈັດງານໂອລິມປິກແລ້ວ,ພວກເຮົາຈະນຳໃຊ້ມັນແນວໃດ, ທີ່ຈິງຄວນຄິດແບບກົງກັນຂ້າມ.
ຜູ່ຊ່ຽວຊານແລະນັກປາດທີ່ເຂົ້າຮ່ວມເວທີປາໄສສ່ວນຫລາຍແມ່ນສົນໃຈນຳໂອກາດທີ່ງານໂອລິມປິກນຳມາໃຫ້, ກົງກັນຂ້າມ, ທ່ານສາສະດາຈານຈິນຢວນຟູຂອງມະຫາວິທະຍາໄລປະຊາຊົນຈີນຍິ່ງເອົາໃຈໃສ່ນຳການພັດທະ ນາຕົວເມືອງພາຍຫລັງຈັດງານໂລອິມປິກແລ້ວ, ເອົາໃຈໃສ່ນຳຜົນສະທ້ອນຍາວໄກຕໍ່ຂະແຫນງການປະດິດຄິດສ້າງວັດທະນະທຳຂອງງານໂອລິມປິກ.ທ່ານສາສະດາຈີ່ນແມ່ນຫົວຫນ້າສູນຄົນຄວ້າງານໂອລິມປິກມະນຸດສາດທີ່ມະຫາວິທະຍາໄລປະຊາຊົນຈີນສ້າງຕັ້ງຂຶ້ນເມື່ອປີ 2000.ສູນນີ້ເຄີຍໄດ້ວາງຄຳຂວັນດົ່ງດັງທີ່ວ່າ:ໂລກໃຫ້ເຮົາ 16 ມື້, ເຮົາຈະໃຫ້ໂລກຫ້າພັນປີ,ຫວັງຖືໂອກາດຈັດງານໂອລິມປິກໃຫ້ທົ່ວໂລກຊອກຮູ້ວັດທະນະທຳຂອງຈີນ.ໃນເວລາໃຫ້ສຳພາດຕໍ່ນັກຂ່າວ, ທ່ານເວົ້າວ່າ:
ແຕ່ກ່ອນ, ພວກເຮົາບໍ່ໄດ້ພິຈາລະນາເຖິງການພົວພັນລະຫວ່າງງານໂອລິມປິກກັບເສດຖະກິດ.ດຽວນີ້, ເສດຖະກິດໂອລິມປິກແມ່ນພາກສ່ວນສຳຄັນທີ່ສຸດຂອງແນວຄິດໂອລິມປິກແລະວັດທະນະທຳໂອລິມປິກ. ຈະແກ້ໄຂບັນ ຫາຫລັງງານໂອລິມປິກແນວໃດ?ວິທີທີ່ພວກເຮົາຊອກໄດ້ໃນດຽວນີ້ກໍ່ແມ່ນພັດທະນາຂະແຫນງການປະດິດຄິດສ້າງຢ່າງຮອບດ້ານ, ຖືງານໂອລິມປິກເປັນໂອກາດເອື້ອອຳນວຍ, ເຮັດໃຫ້ມັນໄດ້ຮັບການຍົກສູງຂຶ້ນຢ່າງມະຫາ ສານໃນໄລຍະບາດລ້ຽວ,ສະນັ້ນ,ສະໄຫມຫລັງງານໂອລິມປິກກໍ່ໄດ້ກາຍເປັນໄລຍະທີ່ຂະແຫນງການປະດິດຄິດສ້າງພັດທະນາຢ່າງວ່ອງໄວ,ໂດຍປະລິ ຍາຍມັນກໍ່ຈະຂ້າມຜ່ານຢ່າງຫມັ້ນທ່ຽງໄດ້.
ນັກປາດຜູ່ນີ້ເວົ້າວ່າ, ໃນປະຫວັດງານໂອລິມປິກ, ມີຕົວເມືອງເຈົ້າພາບຈຳນວນຫນຶ່ງໄດ້ປະສົບບັນຫາເສດຖະກິດແລະສັງຄົມບໍ່ຫນ້ອຍຫລັງງານໂອລິມປິກ, ປັກກິ່ງຄວນຖອດຖອນເອົາບົດຮຽນທາງລົບຂອງພວກເຂົາເຈົ້າ.ປັກກິ່ງແມ່ນຕົວເມືອງໃຫຍ່ທີ່ມີປະຊາກອນ 16 ລ້ານຄົນ, ພວມຢູ່ໃນໄລຍະທີ່ເສດຖະກິດພັດທະນາຢ່າງວ່ອງໄວ,ການເອົາງານໂອລິມປິກປະສານສົມທົບກັບຂະແຫນງການປະດິດຄິດແຕ່ງວັດທະນະທຳຈະມີອະນາຄົດຂ້ອນຂ້າງດີ.
ຄວາມເຫັນຈາກແງ່ຕ່າງກັນໄດ້ສະຫນອງແລວຄວາມຄິດໃຫມ່ແກ່ຄະ ນະກຳມະການຈັດງານໂອລິມປິກປັກກິ່ງແລະຜູ່ຕົກລົງນະໂຍບາຍທັງຫລາຍກ່ຽວກັບການພັດທະນາຕົວເມືອງ.ນີ້ກໍ່ແມ່ນຄວາມຫວັງຂອງເຈົ້າພາບເວທີປາໄສຄັ້ງນີ້.ທ່ານຈ່ຽງຊ້ຽວອີ ປະທານປະຕິບັດງານຂອງຄະນະກຳມະການຈັດງານໂອລິມປິກປັກກິ່ງເຫັນວ່າ, ງານວັດທະນະທຳໂອລິມປິກທີ່ຈັດຂຶ້ນປີລະເທື່ອ ເຊິ່ງເລີ່ມແຕ່ປີ 2003 ນັ້ນ, ບໍ່ພຽງແຕ່ໄດ້ເຜີຍແຜ່ຄວາມຮູ້ກ່ຽວກັບກິລາໂອລິມປິກແກ່ມວນຊົນທໍ່ນັ້ນ, ກໍ່ໄດ້ໂຮມສູນກຳລັງຂອງຜູ່ຊ່ຽວຊານແລະນັກປາດ, ໄດ້ອຳນວຍການສະຫນັບສະຫນູນດ້ານສະຕິປັນຍາແກ່ປັກກິ່ງຈັດງານໂອລິມປິກປີ 2008 ໃຫ້ດີ.ໃນພິທີໄຂງານວັດທະນະທຳປີນີ້, ທ່ານເຄີຍເວົ້າວ່າ:
ຂະຫນາດການເຄື່ອນໄຫວຂອງງານວັດທະນະທຳໄດ້ເປີດກວ້າງອອກເລື້ອຍໆ,ເນື້ອໃນແລະຮູບການກໍ່ອຸດົມສົມບູນຂຶ້ນ.ການຈັດການເຄື່ອນໄຫວວັດທະນະທຳໂອລິມປິກທຸກລາຍທີ່ຖືວັດທະນະທຳໂອລິມປິກເປັນຫລັກໃຫ້ດີນັ້ນ, ແມ່ນຊ່ອງທາງສຳຄັນຂອງພວກເຮົາໃນການສ້າງບັນຍາກາດໂອລິມປິກອັນເຂັ້ມຂຸ້ນ,ແລະດຶງດູດວົງການຕ່າງໆເອົາໃຈໃສ່ນຳງານໂອລິມປິກ, ທັງແມ່ນພາຫະນະສຳຄັນຂອງພວກເຮົາທີ່ຜ່ານຈາກງານໂອລິມປິກສະແດງໃຫ້ເຫັນສະເຫນອັນມະຫາສານຂອງອາລະຍະທຳແລະວັດທະນະທຳຂອງຈີນ, ແລະບັນລຸໂອລິມປິກມະນຸດສາດ.
ທ່ານຈ່ຽງຊ້ຽວອີເວົ້າວ່າ, ປັກກິ່ງໄດ້ສະເຫນີທັດສະນະຄະຕິຈັດງານໂອລິມປິກສີຂຽວ ງານໂອລິມປິກວິທະຍາສາດເຕັກນິກແລະງານໂອລິມປິກມະນຸດສາດ, ອັນທີ່ວ່າງານໂອລິມປິກມະນຸດສາດກໍ່ແມ່ນເອົາທັດສະນະຄະຕິແລະນ້ຳໃຈໂອລິມປິກ ປະສານສົມທົບກັບການພັດທະນາຂອງຕົວເມືອງແລະການພັດທະນາຂອງຂະແຫນງການປະດິດຄິດສ້າງ, ບໍ່ພຽງແຕ່ໄດ້ເພີ່ມເນື້ອໃນໃຫມ່ແກ່ງານໂອລິມປິກເທົ່ານັ້ນ, ແລະກໍ່ໄດ້ເພີ່ມປັດໄຈໃຫມ່ແກ່ການພັດທະນາຂະແຫນງການປະດິດຄິດສ້າງວັດທະນະທຳຂອງປັກກິ່ງກໍ່ຄືຂອງຈີນອີກດ້ວຍ.
|
