|
|
 |
| (GMT+08:00)
2006-08-03 18:42:07
|
 |
|
ຄະນະອາລີລາງ(ສຽງ)
cri
|
ທີ່ທ່ານພວມຟັງຢູ່ນີ້ແມ່ນເພງZuowoziji ຂ້ອຍເປັນຂ້ອຍເອງ, ຂັບຮ້ອງໂດຍຄະນະອາລີລາງ. ປີ 2002, ພວກເຂົາເຈົ້າໄດ້ຮັບລາງວັນຖ້ວຍເງິນເພງສະໄໝນິຍົມວິຊາສະເພາະ ແລະລາງວັນພິເສດນັກຮ້ອງທີ່ຜູ້ຊົມນິຍົມກວ່າໝູ່ ຂອງຈຸວິຊາສະເພາະໃນການປະກວດນັກຮ້ອງໄວໜຸ່ມທາງໂທລະພາບສະໄໝທີ 10 ທີ່CCTVຈັດຂຶ້ນ. ໃນລາຍການມື້ນີ້, ພວກເຮົາໄດ້ຈັດເອົາເພງສ່ວນໜຶ່ງຂອງພວກເຂົາເຈົ້າມາສູ່ຟັງ.
ຄະນະອາລີລາງແມ່ນປະກອບດ້ວຍຊາວໜຸ່ມເຜົ່າເກົາຫຼີ 4 ຄົນ, ຊຶ່ງລ້ວນແຕ່ແມ່ນຊາວໜຸ່ມກິ່ງແຂວງຢຽນປຽນປົກຄອງຕົນເອງຂອງແຂວງຈີລີນ ພາກຕາເວັນອອກສຽງເໜືອຂອງຈີນ. ອ້າຍບ່າວ 4 ຄົນນີ້, ສຽງຮ້ອງຂອງແຕ່ລະຄົນຕ່າງມີເອກະລັກພິເສດຂອງຕົນເອງ, ເມື່ອປະສານສຽງກັນແລ້ວ, ຮູ້ສຶກວ່າເຂົ້າກັນດີເປັນພິເສດ.
ຫຼັງຈາກຮຽນຈົບຈາກມະຫາວິທະຍາໄລແລ້ວ, ອ້າຍບ່າວສີ່ຄົນນີ້ຕົກລົງມາຝຶກຝົນຢູ່ປັກກິ່ງ, ໂຊກດີທີ່ໄດ້ຮູ້ຈັກກັບນາຍໜ້າຂອງບໍລິສັດວັດທະນະທຳປາຍເຕຍປັກກິ່ງ, ທ່ານເຫັນວ່າ, ອ້າຍບ່າວສີ່ຄົນນີ້ສຽງມ່ວນ, ສະຫຼາດ, ມີອະນາຄົດ, ເລີຍເຊັນສັນຍາກັບພວກເຂົາເຈົ້າ, ພວກເຂົາເຈົ້າເລີຍໄດ້ກາຍເປັນນັກຮ້ອງຂອງບໍລິສັດວັດທະນະທຳປາຍເຕຍປັກກິ່ງ.
ທີ່ຟັງມານັ້ນແມ່ນເພງZhenxinganxieni ຂອບໃຈເຈົ້າຢ່າງຈິງໃຈ, ຂັບຮ້ອງໂດຍຄະນະອາລີລາງ. ເມື່ອໄດ້ເຊັນສັນຍາກັນແລ້ວ, ບໍລິສັດວັດທະນະທຳປາຍເຕຍປັກກິ່ງໄດ້ຝືກອົບຮົບພວກເຂົາເຈົ້າຕື່ມອີກ, ເຊີນຄູສອນລະບຳມາແຕ່ຕ່າງປະເທດໂດຍສະເພາະ, ກຽມຈະອອກແຜ່ນCDແຜ່ນທຳອິດຂອງພວກເຂົາເຈົ້າ. ໃນຂະນະນີ້, ໂທລະພາບCCTV ໄດ້ຈັດງານປະກວດນັກຮ້ອງຊາວໜຸ່ມທົ່ວປະເທດຄັ້ງທີ 10, ທາງບໍລິສັດຈຶ່ງໄດ້ສົ່ງພວກເຂົາເຈົ້າໄປປະກວດ. ແລະເປັນໜ້າດີໃຈ, ເມື່ອໄດ້ທຳຄວາມພະຍາຍາມແລ້ວ, ຄະນະອາລີລາງຊິງໄດ້ 2 ລາງວັນດ້ວຍການຂັບຮ້ອງແລະລີລາການສະແດງອັນດີເລີດຂອງພວກເຂົາເຈົ້າ.
ທີ່ຟັງມານັ້ນແມ່ນເພງJieshu ສິ້ນສຸດ, ທີ່ຂັບຮ້ອງໂດຍຄະນະອາລີລາງ.
ແຕ່ໄດ້ຮັບລາງວັນເປັນຕົ້ນມາ, ຄະນະອາລີລາງກໍຍິ່ງຂຸ້ນນຳວຽກຫຼາຍ, ນອກຈາກເຂົ້າຮ່ວມການສະແດງປະເພດຕ່າງໆພາຍໃນປະເທດແລ້ວ, ພວກເຂົາເຈົ້າຍັງໄດ້ໄປສະແດງຢູ່ເຊອຸ່ນ ຕາມຄຳເຊີນຂອງໂທລະພາບKBS ຂອງເກົາຫຼີໃຕ້, ໄດ້ຮັບຄວາມນິຍົມຊົມຊອບເອົາແທ້ເອົາວ່າຈາກແຟນເພງເກົາຫຼີໃຕ້. ຕໍ່ໄປ, ພວກເຮົາມາຟັງເພງ:Qinglvjiuba ບາເຫຼົ້າຄູ່ຮັກ.
ເນື້ອເພງຮ້ອງວ່າ, ຢູ່ບາເຫຼົ້າຄູ່ຮັກ, ແຕ່ລະມື້ມີຜູ້ເຂົ້າໆອອກໆ, ມີຜູ້ຮັກກັນ, ແລະກໍມີຜູ້ເລີກກັນ, ຄວາມຮູ້ສຶກປິ້ນຕາມຈັງຫວະເພງໃນCDຢູ່ບໍ່ເຊົາ, ໃນຫ້ອງອົບອຸ່ນຫລາຍ, ດົນຕີມ່ວນອອນຊອນ, ສາຍຕາທັງຄູ່ຈ້ອງມອງກັນ; ແສງທຽນໄໝ້ຮອດຈຸດເດືອດ, ເຫຼົ້າທີ່ໃສ່ນ້ຳກ້ອນ, ເຮັດໃຫ້ເມົາໃນຄືນນີ້…
ເພງທີ່ເຮັດໃຫ້ຄະນະອາລີລາງດັງຂຶ້ນນັ້ນກໍຊື່ວ່າ"ອາລີລາງ". ແຕ່ເດີມ, ແມ່ນເພງພື້ນເມືອງເຜົ່າເກົາຫຼີ, ມີຫຼາຍຄົນຄຶດວ່າ, ຄະນະອາລີລາງຄົງຈະຮ້ອງແຕ່ເພງລັກສະນະຊົນເຜົ່າຕະຫຼອດໄປ, ແຕ່ພວກເຂົາເຈົ້າເວົ້າວ່າ, ໃນດ້ານເອກະລັກດົນຕີ, ພວກເຂົາເຈົ້າຈະໄປຕາມລົດນິຍົມສາກົນ, ທີ່ຈິງ ເວົ້າໃນຄວາມໝາຍໃດໜຶ່ງແລ້ວ, ລັກສະນະຊົນຊາດແມ່ນນິຍົມກັນທີ່ສຸດ.
ຕໍ່ໄປ ເຊີນຟັງເພງອາລີລາງ ທີ່ເຮັດໃຫ້ພວກເຂົາເຈົ້າມີຊື່ມີສຽງ.
ອາລີລາງແມ່ນເປີ້ນພູແຫ່ງໜຶ່ງຂອງເຜົ່າເກົາຫຼີ. ເນື້ອເພງຮ້ອງວ່າ, ໂອ້, ອາລີລາງ ອາລີລາງ, ອ້າຍທີ່ຈາກນ້ອງໄປນັ້ນ, ພວມຍ່າງຜ່ານເປີ້ນພູອາລີລາງໄປ, ນ້ອງຄຶດວ່າ, ໄປບໍ່ໄກ, ອ້າຍຫາກຈະກັບມາດອກ, ໂອ້ ອາລີລາງ ອາລີລາງ.ມ້ວນທ້າຍລາຍການມື້ນີ້, ພວກອ້າຍບ່າວຄະນະອາລີລາງເວົ້າວ່າ, ເປົ້າໝາຍຕໍ່ໄປຂອງພວກເຂົາເຈົ້າແມ່ນເດີນໄປສູ່ໂລກ, ແຕ່ດຽວນີ້, ພວກເຂົາເຈົ້າຍັງມີຂໍ້ຂາດຕົກຢູ່ຫຼາຍ, ພວກເຂົາເຈົ້າຈະຕາບຈູນຂໍ້ບົກຜ່ອງເຫຼົ່ານີ້ ພາຍໃນເວລາສັ້ນສຸດ, ແລ້ວມຸ່ງໄປສູ່ໂລກ. ພວກເຮົາອວຍພອນໃຫ້ຄະນະອາລີລາງ ຍິ່ງມີອະນາຄົດໄປໄກກວ່າເກົ່າ, ສ້າງຜົນງານສະຫງ່າລາສີກວ່າເກົ່າ.
|
|
|
