|
CRIລາຍງານວ່າ,ບົດລາຍງານສຳຫຼວດສະພາບປະກອບອາຊີບຂອງຊາວໜຸ່ມຈີນສະບັບໜຶ່ງທີ່ປະກາດໃນວັນທີ20ພຶດສະພາສະແດງໃຫ້ເຫັນວ່າ,ຊາວໜຸ່ມຈີນນັບມື້ນັບຫຼາຍໄດ້ປະກອບອາຊີບໂດຍຜ່ານການສ້າງພາລະກິດຢ່າງເປັນເຈົ້າຕົນເອງ,ອົງການຈັດຕັ້ງຊາວໜຸ່ມຂອງຈີນກໍພວມສະໜອງການຊ່ອຍເຫຼືອໃນຫຼາຍດ້ານໃຫ້ແກ່ຊາວໜຸ່ມສ້າງພາລະກິດ.
ເພື່ອຊອກຮູ້ສະພາບປະກອບອາຊີບຂອງຊາວໜຸ່ມຈີນ,ຫົວໜ່ວຍຕ່າງໆເຊັ່ນສະຖາບັນຄົ້ນຄວ້າວິທະຍາສາດແຮງງານຂອງກະຊວງແຮງງານແລະປະກັນສັງຄົມຈີນເປັນຕົ້ນໄດ້ຮ່ວມກັນດຳເນີນການສຳຫຼວດລາຍໜຶ່ງ,ຢູ່4ຕົວເມືອງແຕ່ເໜືອຮອດໃຕ້ຂອງຈີນຄືນະຄອນຕ້າລຽນ, ນະຄອນທຽນສິນ,ນະຄອນສາງຊ່າ,ນະຄອນລີວໂຈ່ວ,ໄດ້ສຳຫຼວດຕໍ່ຊາວໜຸ່ມ7ພັນຄົນທີ່ມີອາຍຸລະຫວ່າງ15ປີຮອດ29ປີ.ຜົນການສຳຫຼວດສະແດງໃຫ້ເຫັນວ່າ,ຊາວໜຸ່ມລື່ນກາຍ20%ໄດ້ເລືອກເອົາການສ້າງພາລະກິດຢ່າງເປັນເຈົ້າຕົນເອງມາບັນລຸການປະກອບອາຊີບ.ສ່ວນຊາວໜຸ່ມເຫຼົ່ານີ້ສ່ວນຫຼາຍແມ່ນເປັນເຈົ້າການສ້າງພາລະກິດ,ມີແຕ່15%ແມ່ນຍ້ອນຊອກຫາວຽກເຮັດງານທຳທີ່ມີເງິນເດືອນເປັນປະຈຳບໍ່ໄດ້, ຈິ່ງເດີນຕາມເສັ້ນທາງສ້າງພາລະກິດ.
ໃນເວລາອະທິບາຍມູນເຫດທີ່ປະກົດມີສະພາບດັ່ງກ່າວ,ທ່ານນາງຈ່າງລີ້ປິນ ຜູ້ຮັບຜິດຊອບຂອງສະຖາບັນຄົ້ນຄວ້າວິທະຍາສາດແຮງງານຂອງກະຊວງແຮງງານແລະປະກັນສັງຄົມຈີນເວົ້າວ່າ:
"ຊາວໜຸ່ມທີ່ສ້າງພາລະກິດເຫັນວ່າການສ້າງພາລະກິດຢ່າງເປັນເຈົ້າຕົນເອງມີຄວາມຄ່ອງແຄ້ວໃນດ້ານເວລາ,ມີລັກສະນະອິດສະຫຼະຫຼາຍ,ລາຍໄດ້ກໍສູງສົມຄວນ.ເມື່ອສັງເກີດຈາກສະພາບການສຳຫຼວດແລ້ວເຫັນວ່າ,ສະພາບການສ້າງພາລະກິດຢ່າງເປັນເຈົ້າການລ້ວນແຕ່ຢູ່ໃນຂັ້ນດີສົມຄວນ"
ທ່ານນາງຈ່າງລີ້ປິນເວົ້າວ່າ,ເຖິງວ່າຊາວໜຸ່ມມີຄວາມຫ້າວຫັນຫຼາຍໃນການສ້າງພາລະກິດ,ແຕ່ໃນການສຳຫຼວດກໍໄດ້ພົບເຫັນວ່າ,ໃນເວລາສ້າງພາລະກິດ,ພວກເຂົາເຈົ້າກໍໄດ້ປະສົບບັນຫາຕ່າງໆເຊັ່ນຂາດຂໍ້ມູນຂ່າວສານ, ເຕັກນິກບໍ່ສູງ,ທຶນສ້າງພາລະກິດບໍ່ພຽງພໍແລະບັນຫາອື່ນໆ.ເພື່ອສະໜັບສະໜູນຊາວໜຸ່ມສ້າງພາລະກິດ,ໃນຫຼາຍປີມໍ່ໆນີ້,ສະຫະພັນຊາວໜຸ່ມແຫ່ງຊາດຈີນ ເຊິ່ງເປັນອົງການຈັດຕັ້ງຊາວໜຸ່ມຈີນໄດ້ໃຊ້ມາດຕະການຕ່າງໆ,ຊ່ອຍແກ້ໄຂຄວາມຫຍຸ້ງຍາກໃຫ້ແກ່ພວກຊາວໜຸ່ມທີ່ສ້າງພາລະກິດ.ທ່ານໂຈ່ວສຽງ ຜູ້ຮັບຜິດຊອບຂອງອົງການດັ່ງກ່າວສະເໜີໃຫ້ຮູ້ວ່າ:
"ພວກເຮົາໄດ້ຈັດຕັ້ງປະຕິບັດການເຄື່ອນໄຫວທີ່ຊາວໜຸ່ມຈີນສ້າງພາລະກິດຢູ່ຂອບເຂດທົ່ວປະເທດຈີນ,ເຊິ່ງເອົາສ້າງສາພາລະກິດເປັນຫົວຂໍ້,ເອົາການອົບຮົມຊາວໜຸ່ມຜູ້ມີຄວາມຮູ້ຄວາມສາມາດທີ່ສ້າງພາລະກິດເປັນບ່ອນບຸກທະລຸ, ເອົາການສະໜັບສະໜູນການສ້າງພາລະກິດ,ອົບຮົມວິຊາເຕັກນິກ,ການບໍລິການສື່ກາງ,ການຊ່ອຍເຫຼືອການປະກອບອາຊີບເປັນເນື້ອໃນສຳຄັນ,ເຊິ່ງໄດ້ອົບຮົມແລະສະໜັບສະໜູນຊາວໜຸ່ມ8ໝື່ນກວ່າຄົນສ້າງຕັ້ງວິສາຫະກິດຂອງຕົນ"
ທ່ານໂຈ່ວສຽງກ່າວວ່າ,ໃນ6ປີມານີ້,ການເຄື່ອນໄຫວດັ່ງກ່າວໄດ້ອົບຮົມວິຊາເຕັກນິກສ້າງພາລະກິດໃຫ້ແກ່ຊາວໜຸ່ມເກືອບ4ແສນຄົນ,ພ້ອມທັງໄດ້ສ້າງຕັ້ງກອງທຶນສ້າງພາລະກິດຊາວໜຸ່ມຈີນ.ນັບມາຮອດປັດຈຸບັນ,ຍອດມູນຄ່າກອງທຶນດັ່ງກ່າວໄດ້ມີເຖິງ1ຕື້ຢວນ,ຊາວໜຸ່ມທີ່ສ້າງສາພາລະກິດສາມາດຮ້ອງຂໍເງິນກູ້ບໍ່ມີດອກເບັ້ຍຈາກກອງທຶນດັ່ງກ່າວ,ເພື່ອແກ້ໄຂບັນຫາຫຍຸ້ງຍາກທີ່ຂາດເຂີນເງິນທຶນໃນການສ້າງສາພາລະກິດໄລຍະຕົ້ນ.
ນອກຈາກການເຄື່ອນໄຫວຊາວໜຸ່ມຈີນສ້າງພາລະກິດແລ້ວ,ສະຫະພັນຊາວໜຸ່ມແຫ່ງຊາດຈີນຍັງໄດ້ຮ່ວມມືກັບສາກົນຢ່າງກວ້າງຂວາງ,ຮ່ຳຮຽນເອົາບົດຮຽນກ້າວໜ້າໃນສາກົນທີ່ຊ່ອຍເຫຼືອຊາວໜຸ່ມສ້າງສາພາລະກິດ.ປີ2003,ຈີນເລີ່ມປະຕິບັດແຜນການສາກົນກ່ຽວກັບຊາວໜຸ່ມຈີນສ້າງສາພາລະກິດ,ເມື່ອຮອດທ້າຍປີ2004,ແຜນການດັ່ງກ່າວໄດ້ດູດດຶງເງິນທຶນ3ລ້ານ4ແສນກວ່າຢວນ,ສະໜັບສະໜູນຊາວໜຸ່ມສ້າງຕັ້ງວິສາຫະກິດຂະໜາດກາງແລະຂະໜາດນ້ອຍ20ກວ່າແຫ່ງ.
ກ່ຽວກັບປະກົດການທີ່ຊາວໜຸ່ມສ້າງສາພາລະກິດຢ່າງເປັນເຈົ້າຕົນເອງ,ທ່ານນາງຊຸນອີ ຜູ້ຊ່ຽວຊານວິທະຍາຄານວິຊາຄຸ້ມຄອງກວ່າງຮວາມະຫາວິທະຍາໄລປັກກິ່ງໄດ້ວິເຄາະວ່າ:"ຊາວໜຸ່ມສ້າງສາພາລະກິດໄດ້ສ່ອງແສງໃຫ້ເຫັນວ່າ,ເສດຖະກິດຈີນນັບມື້ນັບຄຶກຄັກກວ່າເກົ່າ.ນອກນີ້,ມັນເປັນຂີດໝາຍສຳຄັນຢ່າງໜຶ່ງທີ່ສ່ອງແສງໃຫ້ເຫັນການພັດທະນາຢ່າງເສລີຂອງສັງຄົມ.ສະແດງໃຫ້ເຫັນວ່າຊາວໜຸ່ມສາມາດເຮັດເລື່ອງທີ່ຕົນຢາກເຮັດ."
|
