|
ຂໍໃຫ້ສາຍຕາເຮົາຈົ່ງພົບກັນໃນດວງຈັນທາ——ເພື່ອອຳລາທ່ານອຸດົມ
cri
Author: min
|
ສະບາຍດີ, ທ່ານຜູ້ຟັງທີ່ເຄົາລົບ, ສົມບູນຜູ້ດຳເນີນລາຍການດີໃຈຫຼາຍທີ່ໄດ້ພົບກັບທ່ານອີກໃນລາຍການຄາລົມຄົມຄາຍ.
ທ່ານຜູ້ຟັງທີ່ຮັກແພງ, ໃນຊີວິດຂອງຄົນເຮົາ, ຍ່ອມມີການເຕົ້າໂຮມກັນແລະກໍມີການລາຈາກກັນໄປຢູ່ສະເໝີ, ໃນຊີວິດ, ບາງທີອາດຈະໄດ້ພົບກັບຄົນຕ່າງໆ, ແຕ່ບໍ່ຮູ້ຈັກກັນ, ຮອດຮູ້ຈັກກັນ, ເຂົ້າໃຈກັນ, ຮັກແພງກັນ, ສຸດທ້າຍກໍຈາກກັນໄປອີກ. ການໄດ້ພົບກັນຮູ້ຈັກກັນແມ່ນສາຍແນນຢ່າງໜຶ່ງ, ເລື່ອງຈາກກັນໄປນັ້ນແມ່ນເລື່ອງທີ່ຫຼີກເວັ້ນບໍ່ໄດ້. ຈີນມີຄວາມເວົ້າຄວາມໜຶ່ງທີ່ວ່າ: ໃນໂລກນີ້, ບໍ່ມີງານລ້ຽງໃດທີ່ຈະບໍ່ເລີກກັນຈັກເທື່ອ, ໝາຍຄວາມວ່າ, ງານລ້ຽງທີ່ມ່ວນຊື່ນປານໃດກໍຕ້ອງມີການສິ້ນສຸດລົງທັງນັ້ນ, ແລະກໍໝາຍຄວາມວ່າ, ມີຍາມເຕົ້າໂຮມກັນກໍຕ້ອງມີຍາມອຳລາຈາກກັນ. ດົນຕີມ່ວນປານໃດກໍຕ້ອງມີບ່ອນສຸດສ້ຽງ. ໃນບົດກະວີບົດໜຶ່ງຂອງຊູຊື້ ນັກກະວີລາຊະວົງຊົ້ງ, ມີກະວີສອງວັກຂຽນວ່າ: ດວງຈັນມີມື້ແຈ້ງມື້ບົດມື້ເພັງມື້ດັບ, ຄົນເຮົາມີຍາມມ່ວນຍາມເສົ້າ, ຍາມພົບກັນຈາກກັນ. ຄວາມມ່ວນຄວາມໂສກ, ຍາມພົບກັນຈາກກັນຂອງຄົນເຮົາ, ກໍຄືກັບດວງພະຈັນ, ມີມື້ແຮມມື້ເຕັມດວງ, ມັນແມ່ນເລື່ອງທີ່ແນ່ນອນ, ແຕ່ເຖິງວ່າ, ມັນແມ່ນເລື່ອງທີ່ແນ່ນອນ, ແຕ່ຮອດເວລາທີ່ເຮົາຕ້ອງລາຈາກກັນ, ກໍຍັງຮູ້ສຶກຕົກໃຈ, ໝອງໃຈ, ອາໄລອາວອນ.
ສຽງນີ້ທ່ານອາດຈະຮູ້ສຶກຄຸ້ນຫູດີນໍ, ສຽງຂອງເພິ່ນເຄີຍເປັນເພື່ອທ່ານມາ 4 ປີປາຍແລ້ວ, ແມ່ນແລ້ວ, ແມ່ນສຽງຂອງທ່ານອຸດົມ ວັນພານຸວົງ, ຜູ້ຊ່ຽວຊານພາກພາສາລາວວິທະຍຸພວກເຮົາ.
ເມື່ອ 4 ປີກ່ອນ, ທ່ານອຸດົມໄດ້ມາຈີນ, ມາເຮັດວຽກຢູ່ພະແນກພາສາລາວຂອງວິທະຍຸສາກົນແຫ່ງປະເທດຈີນ. ໃນ 4 ປີທີ່ຜ່ານມາ, ເພິ່ນແມ່ນອາຈານຂອງພວກເຮົາໃນດ້ານພາສາ, ໄດ້ສິດສອນຄວາມຮູ້ຫຼາຍຢ່າງແລະທາງວຽກງານ, ຊ່ອຍພວກເຮົາປັບປຸງລາຍການ. ນອກຈາກວຽກງານແລ້ວ, ເພິ່ນກໍໄດ້ຜູກມິດຕະພາບອັນເລິກຊຶ່ງກັບພວກເຮົາ, ເປັນໝູ່ເທື່ອທີ່ຮັກແພງຂອງພວກເຮົາ, ເຄີຍໄປທ່ຽວບູຊະນີຍະສະຖານຫຼາຍແຫ່ງຢູ່ປັກກິ່ງກັບພວກເຮົາ, ໄປຊອກກິນອາຫານແຊບໆຢູ່ໃນເມືອງ, ໄປເບິ່ງເຕະບານເບິ່ງຮູບເງົານຳກັນ, ອາທິດແລ້ວ, ເພິ່ນຍັງໄດ້ໄປທ່ຽວວັດຊ້າວລິນ, ເຊິ່ງແມ່ນບ່ອນທີ່ເພິ່ນຢາກໄປທີ່ສຸດ. ທ່ານອຸດົມແມ່ນຄົນມັກມ່ວນ, ເຂົ້າຄົນງ່າຍ, ມັກເວົ້າຢອກ, ສະໜິດສະໜົມກັບພວກເຮົາ, ເມື່ອໄດ້ຍິນສຽງດົນຕີທີ່ມ່ວນຊື່ນແລ້ວ, ເພິ່ນກໍອົດບໍ່ໄດ້, ຟ້ອນເຢີບໆຂຶ້ນໂລດ. ແຕ່ມາເຮັດວຽກຢູ່ຈີນ, ທ່ານອຸດົມຮຽນເວົ້າພາສາຈີນໄດ້ຫຼາຍບໍ່ຢອກ, ມີສອງຄວາມທີ່ທ່ານມັກເວົ້າທີ່ສຸດ, ກໍແມ່ນ "ren lao xin bu lao", ແປວ່າເຖົ້າແຕ່ກາຍ, ຫົວໃຈຍັງໜຸ່ມ, "wo bu pa gui, wo pa gu du", ຂ້ອຍບໍ່ຢ້ານຜີ, ຂ້ອຍຢ້ານເຫງົາ.
ໃນ 4 ປີທີ່ຜ່ານມານີ້, ເພິ່ນໄດ້ນຳເອົາຄວາມມ່ວນຊື່ນແລະສຽງຫົວມາໃຫ້ໝູ່ຢູ່ອ້ອມຂ້າງເລື້ອຍໆ, ພວກເຮົາໄດ້ເຮັດວຽກມານຳກັນ 4 ປີ, ໄດ້ມີຄວາມຊົງຈຳອັນດີງາມຢ່າງຫຼາກຫຼາຍ. ອີກບໍ່ທໍ່ໃດມື້, ທ່ານອຸດົມກໍຈະສິ້ນສຸດການເຮັດວຽກຢູ່ຈີນ, ແລ້ວເດິນທາງກັບເມືອລາວ. 4 ປີເປັນເວລາທີ່ຍາວສົມຄວນ, ພວກເຮົາຈະຈາລຶກຄວາມຊົງຈຳໃນ 4 ປີນີ້ໄວ້ໃນໃຈ. ວາງໂປ, ນັກກະວີສະໄໝລາຊະວົງທາງຂອງຈີນເວົ້າວ່າ, "hai nei cun zhi ji，tian ya ruo bi lin", ໝາຍຄວາມວ່າ, ໃນໂລກນີ້ມີເພື່ອນຜູ້ຮູ້ໃຈກັນ, ເຖິງຈະຢູ່ຄົນລະຝາກຟ້າ, ກໍເໝືອນຢູ່ໃກ້ຄຽງກັນ.
ຜູ້ຟັງທີ່ຕິດຕາມລາຍການພວກເຮົາເລື້ອຍໆ, ອາດຈະຍັງຈື່ວ່າ, ລາຍການຄາລົມຄົມຄາຍໃນ 1 ປີທີ່ຜ່ານມາແມ່ນທ່ານອຸດົມເປັນຜູ້ຈັດທຳ, ໃນເວລາທີ່ໃກ້ຈະຈາກກັນໄປ, ພວກເຮົາຂໍຈັດລາຍການຄາລົມຄົມຄາຍພາກນີ້ເພື່ອເປັນການສົ່ງທ່ານອຸດົມ, ໃນບົດກະວີທີ່ກ່າວໃນຕອນຕົ້ນຂອງລາຍການ, ຍັງມີອີກວັກໜຶ່ງທີ່ຄົນທັງຫຼາຍມັກຍົກມາເວົ້າເລື້ອຍໆ, ຄື: "Dan yuan ren chang jiu, qian li gong chan juan", ໝາຍຄວາມວ່າ, ຂໍໃຫ້ທຸກຄົນຈົ່ງອາຍຸໝັ້ນຂວັນຍືນ, ຂໍໃຫ້ສາຍຕາເຮົາຈົ່ງພົບກັນໃນດວງຈັນທາ, ສຸດທ້າຍນີ້, ຂ້າພະເຈົ້າກໍຂໍຢືມກະວີວັກນີ້ອວຍພອນໃຫ້ທ່ານອຸດົມຈົ່ງມີຄວາມສຸກຄວາມສຳລານແລະສົມຫວັງທຸກປະການ. ຢ່າລືມຍາມມ່ວນຊື່ນທີ່ພວກເຮົາເຄີຍຮ່ວມງານນຳກັນເດີ້, ຢ່າລືມວິທະຍຸສາກົນແຫ່ງປະເທດຈີນ, ຢ່າລືມຢູ່ປັກກິ່ງທີ່ກວງໄກ, ຍັງມີເທື່ອສະໜິດສະໜົມພວກເຮົາຫຼາຍຄົນ, ສ່ວນພວກເຮົານັ້ນຈະອວຍພອນທ່ານຕະຫຼອດໄປ. ສຸດທ້າຍ, ພວກເຮົາກໍຂໍອວຍພອນໃຫ້ເພື່ອນຜູ້ຢູ່ຄົນລະຟາກຟ້າ, ຈົ່ງອາຍຸໝັ້ນຂວັນຍືນ, ໃນຍາມຄຶດຮອດ, ຂໍໃຫ້ສາຍຕາເຮົາຈົ່ງພົບກັນໃນດວງຈັນທາ!
ເຊື່ອວ່າ, ພວກເຮົາຍັງຈະມີໂອກາດຈະພົບກັນອີກ, ຈົ່ງໂຊກດີ, ທ່ານອຸດົມ!
|
|
