|
ສິ່ງຄວນຮູ້ບາງຢ່າງໃນເວລາເກີດແຜ່ນດິນໄຫວ
cri
ໃນລາຍການມື້ນີ້, ພວກເຮົາຈະແນະນຳສິ່ງຄວນຮູ້ບາງຢ່າງໃນເວລາເກີດແຜ່ນດິນໄຫວ.
ໃນເວລາເກີດແຜ່ນດິນໄຫວແບບທຳລາຍ, ຄິດສະເລ່ຍແລ້ວ, ນັບແຕ່ຄົນເຮົາຮູ້ສຶກສະເທືອນຮອດເວລາທີ່ສິ່ງກໍ່ສ້າງຖືກທຳລາຍນັ້ນມີແຕ່12ວິນາທີເທົ່ານັ້ນ, ໃນເວລາອັນສັ້ນໆນີ້, ທ່ານຢ່າຕື້ນຢ່າຢ້ານ, ຄວນອີງໃສ່ສະພາບແວດລ້ອມ ແລ້ວຊອກຫາຮັກສາຄວາມປອດໄພຂອງຕົນໃນທັນທີ. ຖ້າທ່ານຢູ່ເຮືອນຊັ້ນດຽວ, ທ່ານກໍຟ້າວແລ່ນອອກໄປທາງນອກ. ຖ້າຢູ່ເຮືອນຕຶກ, ຢ່າໂຕນລົງໄປເດັດຂາດ, ຄວນຕັດໄຟຟ້າແລະປິດອາຍແກສທັນທີ, ໄປຊອກລີ້ຢູ່ບ່ອນທີ່ອ່າວຄັບແຄບເຊັ່ນຫ້ອງນ້ຳເປັນຕົ້ນ, ຫຼືວ່າໝິ້ນເຂົ້າໃຕ້ໂຕະຫຼືກ້ອງຕຽງ, ເມື່ອແຜ່ນດິນໄຫວຜ່ານໄປແລ້ວ, ຕ້ອງໜີໄປຫາບ່ອນປອດໄພໂດຍໄວ, ເພື່ອປ້ງກັນປາຍແຜ່ນດິນໄຫວ. ໃນເວລາແຜ່ນດິນໄຫວຖ້າຢູ່ສະຖານທີ່ທີ່ມີຄົນຫຼາຍເຊັ່ນໂຮງຮຽນ, ຮ້ານຄ້າ, ໂຮງຮູບເງົາເປັນຕົ້ນ, ບໍ່ຄວນແຕກຕື່ນເດັດຂາດ, ຄວນໄປຫາລີ້ຢູ່ກ້ອງໂຕະ, ກ້ອງຕັ່ງຫຼືເຄື່ອງທີ່ໝັ້ນແກ່ນໃນທັນທີ, ເມື່ອເຊົາໄຫວແລ້ວຈິ່ງຖອນອອກໄປຢ່າງມີລະບຽບ. ຜູ້ເຮັດວຽກຢູ່ບ່ອນເກີດແຜ່ນດິນໄຫວເຊັ່ນຄູເປັນຕົ້ນຕ້ອງທຸ່ນທ່ຽງ, ບັນຊາຄົນທັງຫຼາຍລີ້ໄພຢູ່ກັບທີ່, ຢ່າພາໝູ່ແລ່ນໂລເລເດັດຂາດ. ຖ້າພົບແຜ່ນດິນໄຫວໃນຂະນະທີ່ຍ່າງຢູ່ຕາມຖະໜົນຫົນທາງ, ຄວນເອົາມືບັງຫົວໄວ້, ໜີໄກຈາກເຮືອນຕຶກໂດຍໄວ, ໄປຫາແຖບກາງຖະໜົນ. ຖ້າພົບແຜ່ນດິນໄຫວໃນຂະນະທີ່ຢູ່ຊານເມືອງ, ຄວນລະວັງຢູ່ໄກຈາກພູຜາ, ທາງຄ້ອຍທາງຊັນ, ແຄມຝັ່ງແລະໃຕ້ສາຍໄຟແຮງສູງເປັນຕົ້ນ. ຖ້າຖືກຖົມຢູ່ກ້ອງອາຄານທີ່ເພພັງ, ຄວນເຮັດໃຈທຸ່ນທ່ຽງ, ຊອກຫາວິທີຊ່ອຍຕົນເອງ. ຖ້າເອົາຕົວລອດບໍ່ໄດ້, ກໍຄວນຮັກສາກຳລັງກາຍໄວ້, ພະຍາຍາມຊອກຫານ້ຳແລະອາຫານກິນ, ສ້າງເງື່ອນໄຂໃຫ້ໂຕຢູ່ລອດ, ລໍຖ້າຄົນມາກອບກູ້ເອົາ.
ໜຶ່ງ, ຖ້າແມ່ນຢູ່ໃນເຮືອນ, ຄວນເອົາໃຈໃສ່ດັ່ງຕໍ່ໄປນີ້:
1, ວາງແຜນປ້ອງກັນໄພແຜ່ນດິນໄຫວຂອງຄອບຄົວ, ກຽມອາຫານແລະເຄື່ອງດື່ມໄວ້, ກວດແລະລົບລ້າງຄວາມອັນຕະລາຍທີ່ແຝງຊ້ອນຢູ່ໃນເຮືອນຊອກຮູ້ສະພາບແວດລ້ອມໃຫ້ຈະແຈ້ງ, ເຮືອນທີ່ບໍ່ທົນຕໍ່ແຜ່ນດິນໄຫວຕ້ອງສ້ອມແປງໃຫ້ໝັ້ນແກ່ນ, ຖ້າແມ່ນເຮືອນເກົ່າທີ່ເປ່ເພແປງບໍ່ໄດ້ຕ້ອງຍ້າຍໜີໂດຍໄວ.
2, ຈັດວາງເຟີນີເຈີແລະເຄື່ອງຂອງຕ່າງໆໃຫ້ເໝາະສົມ, ເຄື່ອງທີ່ຫ້ອຍຢູ່ເທິງຝາຕ້ອງເອົາລົງຫຼືແປງໃຫ້ໝັ້ນ, ປ້ອງກັນບໍ່ໃຫ້ມັນຕົກໃສ່ຄົນ. ມ້ຽນເຄື່ອງທີ່ໄໝ້ງ່າຍລະເບີດງ່າຍແລະຂອງມີພິດນັ້ນໄວ້ຢູ່ບ່ອນທີ່ປອດໄພ. ມ້ຽນມັດເຄື່ອງໃຊ້ຕ່າງໆ, ຕາມປະຕູແລະລະບຽງບໍ່ໃຫ້ມີຂອງວາງຂວາງ, ຈັດການໜ້າມຸກໃຫ້ລຽບລ້ອຍ, ຍົກເອົາໂຖດອກໄມ້ລົງມາວາງໄວ້ທາງລຸ່ມ, ວາງເຟີນີເຈີໃຫຍ່ໃຫ້ໝັ້ນຄົງ, ປ້ອງກັນບໍ່ໃຫ້ໂຫງ້ຍລົງທັບຄົນ, ເຟີນີເຈີແລະເຄື່ອງຂອງຕ່າງໆ, ອັນໜັກຕ້ອງວາງທາງລຸ່ມອັນເບົາວາງທາງູເທິງ. ກ້ອງເຟີນີເຈີທີ່ໝັ້ນແກ່ນໃຫ້ປະໄວ້ເປົ່າຫວ່າງ, ເພື່ອເປັນບ່ອນລີ້ໃນເວລາເກີດໄພແຜ່ນດິນໄຫວ. ແປງຕຽງໃຫ້ໝັ້ນຄົງ, ກຽມເຄື່ອງໃຊ້ຈຳເປັນເພື່ອປ້ອງກັນແຜ່ນດິນໄຫວ.
3, ກຽມກະເປົ໋າປ້ອງກັນໄພແຜ່ນດິນໄຫວສຳລັບຄອບຄົວ, ວາງໄວ້ຢູ່ບ່ອນທີ່ເອົາງ່າຍ.
ສອງ, ຖ້າເກີດແຜ່ນດິນໄຫວໃນຂະນະທີ່ຢູ່ສະຖານທີ່ສາທາລະນະ, ຄວນເອົາໃຈໃສ່ວ່າ,
ຟັງການບັນຊາຂອງຜູ້ປະຕິບັດງານ, ຢ່າແຕກຕື້ນຫຼາຍ, ໂຫ້ກັນໄປຫາທາງອອກ, ໃຫ້ຫຼີກອອກຈາກຝູງຄົນ, ເພື່ອບໍ່ໃຫ້ຖືກແຫຍ້ເຂົ້າແຈຝາຫຼີຮົ່ວເຫຼັກ.
1, ຖ້າແມ່ນຢູ່ໃນໂຮງລະຄອນແລະຫໍກິລາ: ໃຫ້ນັ່ງລົງກັບບ່ອນຫຼືໝູບລົງກ້ອງຕັ່ງ; ລະວັງຫຼີກໜີຈາກບ່ອນທີ່ມີໄຟຟ້າແລະພັດລົມຫ້ອຍຢູ່ເທິງເພດານເປັນຕົ້ນ; ເອົາກະເປົ໋າຢອງຫົວໄວ້ເພື່ອຮັກສາຫົວ, ເມື່ອແຜ່ນດິນໄຫວຜ່ານໄປແລ້ວ, ໃຫ້ຟັງຕາມການບັນຊາຂອງຜູ້ປະຕິບັດງານ, ໜີອອກໄປຢ່າງມີລະບຽບ.
2, ຖ້າແມ່ນຢູ່ຮ້ານຄ້າແລະຮ້ານຂາຍປຶ້ມ, ໃຫ້ຊອກຫາບ່ອນຢູ່ຂ້າງຕູ້ຂາຍເຄື່ອງ, ເຟີນີເຈີຕ່ຳໆຫຼືເສົາທີ່ໝັ້ນແກ່ນ, ຫຼືວ່າແຈເຮືອນແລ້ວນັ່ງລົງ, ເອົາມືຫຼືສິ່ງຂອງບັງຫົວໄວ້; ຢ່າສູ່ໃກ້ກັບປະຕູປ່ອງຢ້ຽມແກ້ວຫຼືຕູ້ແກ້ວ; ຢ່າຢູ່ໃກ້ຫ້າງວາງສິນຄ້າທີ່ສູງໃຫຍ່ທັງບໍ່ໝັ້ນຫຼືມີຂອງໜັກໆຫຼືຂອງແຕກງ່າຍວາງຢູ່; ຢ່າລີ້ຢູ່ໃຕ້ປ້າຍໂຄສະນາສິນຄ້າແລະໃຕ້ໄຟຟ້າທີ່ຫ້ອຍຢູ່ເພດານ.
3, ຖ້າແມ່ນໃນລົດຕ້ອງຫາບ່ອນຈັບໃຫ້ແໜ້ນ, ເພື່ອບໍ່ໃຫ້ລົ້ມຫຼືໄປຕຳຖືກບ່ອນໃດບ່ອນໜຶ່ງ; ນັ່ງລົງ, ລີ້ຢູ່ມໍ່ບ່ອນນັ່ງ, ເມື່ອເຊົາໄຫວແລ້ວຈິ່ງລົງລົດ.
ສາມ, ຈຸດສຳຄັນໃນການລີ້ໄພແຜ່ນດິນໄຫວ: ຄວນໃຊ້ທ່າແນວໃດ
ໃນເວລາເກີດແຜ່ນດິນໄຫວນັ້ນ, ຄວນແລ່ນຫຼືຄວນລີ້, ຜູ້ຊ່ຽວຊານສ່ວນຫຼາຍເຫັນວ່າ, ໃນເວລາແຜ່ນດິນພວມໄຫວຢູ່ຄວນຫາບ່ອນລີ້ຢູ່ກັບບ່ອນ, ເຊົາໄຫວແລ້ວຈິ່ງໜີໄປບ່ອນປອດໄພໂດຍໄວ, ແມ່ນວິທີລີ້ໄພທີ່ດີສົມຄວນໃນເວລາແຜ່ນດິນໄຫວ. ລີ້ໄພຄວນຊອກລີ້ຢູ່ກ້ອງຫຼືຂ້າງເຄື່ອງຂອງທີ່ໝັ້ນແກ່ນແລະບັງໂຕໄດ້ຢູ່ໃນເຮືອນ, ລີ້ຢູ່ບ່ອນທີ່ເປັນຊ່ອງຫວ່າງສາມແຈແລະອ່າວແຄບ, ແລະບ່ອນທີ່ມີສິ່ງຄ້ຳໄວ້, ຫຼືວ່າຢູ່ກາງແຈ້ງທີ່ກວ້າງຂວາງແລະປອດໄພ.
ທາຮ່າງກາຍໃນເວລາລີ້ໄພ: ຄວນໝູບນັ່ງຢ່ອງຢໍ້ຫຼືນັ່ງລົງ, ພະຍາຍາມຂົດໂຕ, ຈັບເຄື່ອງຂອງທີ່ໝັ້ນຄົງເຊັ່ນຂາໂຕະເປັນຕົ້ນ. ຮັກສາຫົວແລະຕາ, ບັງປາກແລະດັງໄວ້. ຢ່າໄປນຳຝູງຄົນ, ຢ່າແຫຍ້ກັນໂຫ້ກັນໄປ, ຢ່າໄຕ້ໄຟ, ເພາະວ່າໃນອາກາດອາດຈະມີອາຍທີ່ໄປໄຟຫຼືລະເບີດງ່າຍ.
|
|
