|
|
 |
| (GMT+08:00)
2006-08-09 18:28:38
|
 |
|
ເພງມ່ວນພາເພີນ
cri
Author: mo
|
ສະບາຍດີທ່ານຜູ້ຟັງທີ່ເຄົາລົບ, ແສງແກ້ວຍິນດີຕ້ອນຮັບທ່ານເຂົ້າສູ່ລາຍການຢ່ອນອາລົມໃນວັນເສົາຂອງວິທະຍຸ CRI.
ຕົ້ນປີນີ້, ເວທີເພງຂອງເຂດໃນຈີນໄດ້ປະກົດມີຄະນະຮ້ອງທີ່ຊື່ວ່າ: ຈຽນ.ມີລີ. ພວກເຂົາເຈົ້າໄດ້ນຳເອົາປະມວນເພງທີ່ຊື່ວ່າ" ຊີວິດສ່ວນຕົວ" ປະເພດເຄື່ອງເສບໄຟຟ້າມາສູ່ຟັງ, ຄະນະຈຽນ.ມີລີຕ່າງກັບຄະນະຮ້ອນອື່ນໆທີ່ຜ່ານມາ, ແມ່ນປະກອບໂດຍນາງຊູນາ ສາວຈີນແລະທ້າວຊຽວເວີນ ອ້າຍບ່າວຝຣັ່ງ, ແມ່ນຄະນະຮ້ອງຈີນຝຣັ່ງຄະນະທຳອິດບົນເວທີເພງຂອງເຂດໃນຈີນ. ເມື່ອປີ2005, ຄະນະຮ້ອງຈຽນ.ມີລີກໍໄດ້ຈຳໜ່າຍແຜ່ນສຽງຫຼາຍເພງຢູ່ຝຣັ່ງ, ລວມທັງເພງ"ຊີວິດສ່ວນຕົວ"ໃນປະມວນເພງCDຊື່ດຽວກັນ, ແລະຍັງມີເພງSEALED BEAST ແລະເພງ THE FINAL COUNTDOWN ເພງຂອງຄະນະEUROPE ຄະນະດົນຕີຣັອກແອນໂຣນທີ່ມີຊື່ສຽງໃນໂລກ. ຍ້ອນວ່າເຄີຍຈຳໜ່າຍເພງຢູ່ຝຣັ່ງ, ແລະໄດ້ຮັບຄວາມນິຍົມຊົມຊອມຢູ່ແຫ່ງນັ້ນ, ສະນັ້ນ, ບໍລິສັດແຜ່ນສຽງຈູຊູທີ່ຄະນະຈຽນ.ມີລີສັງກັດໄດ້ເລືອກເອົາຝຣັ່ງເປັນບ່ອນຈຳໜ່າຍປະມວນເພງໃໝ່ກ່ອນໝູ່. ທີ່ທ່ານຟັງຢູ່ນີ້ແມ່ນເພງ"ຊີວິດສ່ວນຕົວ"ທີ່ຂັບຮ້ອງໂດຍຄະນະຈຽນ.ມີລີ.
ນາງນ້າອີງແມ່ນນັກຮ້ອງເພງສະໄໝນິຍົມທີ່ມີຊື່ສຽງຢູ່ເຂດໃນຈີນ, ນາງມີນິດໄສຈະແຈ້ງ, ລີລາການສະແດງກໍສະຫງ່າ, ຈຶ່ງໄດ້ຮັບຄວາມຊົມເຊີຍຈາກແຟນເພງທັງຫຼາຍຕະຫຼອດມາ. ປີ 1998, ນາງນ້າອິງໄດ້ຈຳໜ່າຍປະມວນເພງຊຸດທີສາມຊື່ວ່າ"ພິຊິດ", ໃນປະມວນເພງນີ້, ເອົາເພງຮັກເປັນຫຼັກ, ມີເພງຕື່ນຝັນ, ເພງພິຊິດ, ເພງຕ້ອງມີເຈົ້າ ຄວາມຮັກຈຶ່ງສົມບູນເປັນຕົ້ນ, ບັນລະບາຍອາລົມຈິດອັນອ່ອນໂຍນແລະສະດຸ້ງໄວ ປ່ຽນໄວຂອງຜູ້ຍິງ, ໄດ້ຮັບຄວາມນິຍົມຊົມຊອບຈາກແຟນເພງໂດຍສະເພາະແມ່ນແຟນເພງເພດຍິງ. ຕໍ່ໄປເຊີນຟັງເພງຕື່ນຝັນທີ່ຂັບຮ້ອງໂດຍນາງນ້າອີງ.
ໃນເພງຕື່ນຝັນ, ນາງນ້າອີງໄດ້ເຊີນນາງອວງໄຟ່ ສ່ຽວຮັກຂອງນາງ ທັງເປັນນັກຮ້ອງຊື່ດັງຂອງຮົງກົງມາຮ້ອງປະສານສຽງໃຫ້. ນາງນ້າອີງມີສຽງຕ່ຳແລະສີແຫບໆ, ນາງອວງໄຟ່ພັດມີສຽງສູງປານເມກໝອກ, ການຮ່ວມມືຂອງສອງຄົນພວກເພິ່ນສົມເປັນແບບຢ່າງ.
ໃນຫຼາຍປີມານີ້, ເວທີເພງຂອງເຂດໃນຈີນໄດ້ປະກົດມີນັກຮ້ອງເພດຍິງທີ່ຊ່າງແຕ່ງເພງເອົາເອງຫຼາຍຄົນ, ນາງເຢ້ເຊ້ຍ ອາຍຸ 19 ປີທີ່ຫາກໍອອກມາຮ້ອງເພງໃນປີນີ້ກໍແມ່ນຜູ້ໜຶ່ງ. ເດືອນເມສາປີນີ້, ນາງໄດ້ປະກົດຕົວຢູ່ຕໍ່ໜ້າຄົນທັງຫຼາຍໂດຍນຳເອົາປະມວນເພງ"ຮັກເຈົ້າຫຼາຍກວ່າຮັກຕົນເອງ". ໃນປະມວນເພງນີ້, ນາງເຢ້ເຊ້ຍໄດ້ຂຽນເນື້ອເພງເອົາເອງທັງໝົດ. ໃນເພງປະມວນນີ້, ເນື້ອຮ້ອງແລະທຳນອງເພງລ່ຽນໄຫຼ, ຈັງຫວະແຂງແຮງ. ນາງເຢ້ເຊ້ຍຊ່າງຄຸມສຽງຂອງຕົນໄດ້ດີທີ່ສຸດ, ນາງໄດ້ຈັດເພງເຫຼົ່ານີ້ໃຫ້ເປັນພາບດົນຕີທີ່ອ່ອນຊອນ. ຕໍ່ໄປ, ເຊີນຟັງເພງ"ຮັກເຈົ້າຫຼາຍກວ່າຮັກຕົນເອງ" ຂັບຮ້ອງໂດຍນາງເຢ້ເຊ້ຍ.
"ທ້ອງຟ້າລາຕີພາໃຫ້ຂ້ອຍຄິດຮອດເຈົ້າ, ດວງດາວທີ່ເຫຼື້ອມຍິບຍັບ, ດວງໃດກໍວ່າຂ້ອຍຮັກເຈົ້າ. ເຈົ້າມັກຈູງແຂນຂ້ອຍ, ແລ້ວວ່າ ຈະຍ່າງໄປນຳຂ້ອຍ, ໃຫ້ຂ້ອຍມີຄວາມຝັນແຫ່ງຊີວິດອັນສົມບູນ. ຄວາມຈົບຄວາມງາມໃນຄຳໝັ້ນສັນຍາພັດຄືກັບດາວຮ່ວງ, ຮຸ່ງເຮືອງແຕ່ແວັບດຽວ. ຂ້ອຍມີແຕ່ຮັກເຈົ້າຫຼາຍກວ່າຮັກຕົນເອງ, ວ່າແຕ່ໄດ້ພົບເຈົ້າພຽງບຶດດຽວ, ຂ້ອຍກໍຈະເຮັດໃຈກ້າ, ບໍ່ປະລະຢ່າງງ່າຍດາຍ. ໃນໂລກຂອງຂ້ອຍ, ເຈົ້າເຄີຍແມ່ນສຸດທີ່ຮັກພຽງຜູ້ດຽວຂອງຂ້ອຍ."
ເທິງເວທີເພງຊູ່ມື້ນີ້, ຄັນວ່ານັກຮ້ອງໃໝ່ກໍໝາຍເຖິງຜູ້ໜຸ່ມ, ແຕ່ນັກຮ້ອງຈຳນວນໜຶ່ງທີ່ອາຍຸບໍ່ໜຸ່ມນັ້ນກໍໄດ້ຂຶ້ນສູ່ເວທີເພງດ້ວຍທ່າທາງນັກຮ້ອງໃໝ່, ແລ້ວສ້າງພາລະກິດດົນຕີຂອງຕົນເອງ. ທ່ານຈ່ຽງມູ້ກໍແມ່ນຜູ້ໜຶ່ງ. ທ່ານຈ່ຽງມູ້ປີນີ້ອາຍຸ 43 ປີແລ້ວ, ທ່ານຮຽນຈົບຈາກສະຖາບັນດົນຕີເຊີນຢາງ, ໃນນາມເປັນນັກຮ້ອງໃໝ່, ອາຍຸທ່ານກໍນັບວ່າແກ່ແລ້ວ, ແຕ່ອາຍຸບໍ່ໄດ້ກາຍເປັນສິ່ງກີດຂວາງເສັ້ນທາງດົນຕີຂອງທ່ານ, ກົງກັນຂ້າມ, ພັດເຮັດໃຫ້ແຟນເພງຮູ້ສຶກເຖິງຄວາມຍຶດໝັ້ນສະແຫວງຫາດົນຕີຂອງທ່ານ. ຫວ່າງກ່ອນນີ້ບໍ່ດົນ, ທ່ານຈ່ຽງມູ້ໄດ້ມອບເພງປະມວນໜຶ່ງໃຫ້ແຟນເພງ ເຊິ່ງເປັນເພງປະມວນທຳອິດຂອງທ່ານທີ່ໃຫ້ຊື່ວ່າ ຄົນເຈັບດົນຕີ, ການຕັ້ງຊື່ດັ່ງກ່າວແມ່ນຍ້ອນວ່າ, ໃນສາຍຕາຂອງໝູ່ເພື່ອນ, ທ່ານຈ່ຽງມູ້ແມ່ນຄົນເຈັບທີ່ປ່ວງບ້າຍ້ອນດົນຕີ, ແມ່ນຄົນເຈັບທີ່ຖືດົນຕີເປັນວິນຍານ.
ປະມວນເພງ"ຄົນເຈັບດົນຕີ"ມີຈັງຫວະອ່ອນໂຍນມ່ວນຊື່ນ, ທ່ານຈ່ຽງມູ້ໄດ້ເລົ່າເລື່ອງຄວາມຮັກທີ່ກະຕຸ້ນໃຈຄົນດ້ວຍສຽງເພງ. ໃນສຽງເພງຂອງທ່ານ, ທ່ານຈະໄດ້ຍິນຄວາມເສົ້າໝອງຂອງໄວໜຸ່ມແລະຄວາມເປີດໂປ່ງຂອງໄວກາງຄົນ, ຍິ່ງຟັງ ກໍຍິ່ງເພີດເພີນຢູ່ໃນໂລກດົນຕີຂອງທ່ານ. ທີ່ທ່ານຟັງຢູ່ນີ້ແມ່ນເພງ"ເສຍເຈົ້າ". ເນື້ອເພງມີຢູ່ວ່າ: "ເຖິງຂ້ອຍຈະເສຍໄຊ ຍ່ອຍຍັບໃນທີ່ສຸດ, ເຖິງຂ້ອຍຈະສິ້ນເນື້ອປະດາຕົວ, ເຖິງຂ້ອຍຈະໂທດຕົນເອງໃນທີ່ສຸດ, ຂ້ອຍບໍ່ຄຽດເຈົ້າ. ອາດຈະແມ່ນລົມລິຂິດຫາກເປັນແນວນີ້, ອາດຈະແມ່ນເທວະດາໄດ້ຈັດວັນເວລາໄວ້ແລ້ວ, ອາດຈະແມ່ນຂ້ອຍບໍ່ທັນບອກເຈົ້າ, ຂ້ອຍຮັກເຈົ້າ. ຫວນຄຶດເລື່ອງຂອງເຮົາໃນອະດີດ, ຄືຍັງຢູ່ຕໍ່ໜ້າ, ພາດເຈົ້າໄປແມ່ນຄວາມໂສກເສົ້າຂອງຂ້ອຍໃນຕະຫຼອດຊີວິດ. ເຄິຍມີເຈົ້າ, ແຕ່ຂ້ອຍບໍ່ໄດ້ຖະໜອມ, ຂ້ອຍເຄີຍຮັກເຈົ້າ, ຂ້ອຍຈະຫວນຄຶດຕະຫຼອດຊີວິດ."
ເມື່ອສິບກວ່າປີກ່ອນນີ້, ທ່ານເຈິ້ງຈຸ່ນໄດ້ຮ້ອງເພງກັບຄືນລາຊາ ເຮັດໃຫ້ແຟນເພງທັງຫຼາຍຈື່ຈຳທ່ານຈົນຮອດສູ່ມື້ນີ້, ໃນເພງນີ້ໄດ້ມີເນື້ອຮ້ອງທີ່ວ່າ"ກັບຄືນສູ່ລາຊາ" ຊ້ຳກັນຫຼາຍຫຼົບຫຼາຍຕ່າວ, ຄືກັບຊອກຫາບ່ອນເພິ່ງທາງຈິດໃຈ, ໄດ້ສະເທືອນໃຈຄົນຈົນນັບບໍ່ຖ້ວນ. ມ້ວນທ້າຍລາຍການມື້ນີ້, ເຊີນຟັງເພງ"ກັບຄືນສູ່ລາຊາ" ຂັບຮ້ອງໂດຍທ່ານເຈິ້ງຈຸ່ນ.
ທ່ານຜູ້ຟັງທີ່ເຄົາລົບ, ລາຍການຢ່ອນອາລົມໃນວັນເສົາພາກນີ້ຂໍສ້ຽງສຸດລົງພຽງທໍ່ນີ້, ສະບາຍດີ.
|
|
|
