|
|
 |
| (GMT+08:00)
2006-08-10 11:26:36
|
 |
|
ການປ້ອງກັນແລະປິ່ນປົວພະຍາດເປັນລົມອຳມະພາດ(ສຽງ)
cri
Author: shuo
|
ພະຍາດເປັນລົມອຳມະພາດແມ່ນພະຍາດເສັ້ນເລືອດສະໝອງກະທັນຫັນທີ່ເປັນໄພຂົ່ມຂູ່ສຸຂະພາບແລະຊີວິດຂອງມະນຸດຢ່າງຮ້າຍແຮງ.ຂໍ້ມູນທີ່ກ່ຽວຂ້ອງສະແດງໃຫ້ເຫັນວ່າ,ແຕ່ ລະປີຢູ່ຈີນມີຜູ້ເປັນລົມອຳມະພາດໃໝ່1ລ້ານ5ແສນຄົນ,ໃນນັ້ນມີເຄິ່ງໜຶ່ງຈະເສຍຊີວິດ, ສ່ວນຜູ້ລອດຕາຍສ່ວນຫຼາຍທີ່ສຸດກໍຈະເສຍຄວາມສາມາດໃນການອອກແຮງງານໃນລະ ດັບທີ່ຕ່າງກັນ,ເຊິ່ງໄດ້ເປັນການຫາບແບກອັນໜັກໜາຂອງຄອງຄົວແລະສັງຄົມ.ໃນລາຍການສວນວິທະຍາສາດແລະການສຶກສາພາກນີ້,ພວກເຮົາຂໍສະເໜີໃຫ້ທ່ານຮູ້ກ່ຽວກັບວິທີ ປ້ອງກັນການເປັນລົມອຳມະພາດແລະວິທີປິ່ນປົວອັນກ້າວໜ້າ.
ທ່ານວາງຊິ່ນເໝີຍປີນີ້ອາຍຸ65ປີ,ສຸຂະພາບແຂງແຮງດີຢູ່,ແຕ່ກ່ອນບໍ່ເຄີຍຕິດພະຍາດອັນ ໜັກໜ່ວງຫຍັງ.ຕອນເຊົ້າມື້ໜຶ່ງໃນລະດູໃບໄມ້ປົ່ງປີນີ້,ທ່ານວາງຂີ່ລົດຖີບໄປຊື້ຜັກຢູ່ຕະ ຫຼາດ,ທັນໃດນັ້ນຮູ້ສຶກວິນຫົວ,ແລ້ວສະຫຼົບໄປ.ເມື່ອມີຄວາມຮູ້ສຶກຕົວຄືນໃໝ່ແລ້ວ,ທ່ານຂໍໃຫ້ຄົນທຽວທາງຊ່ອຍເອີ້ນລົດພະຍາບານສົ່ງຕົນໄປໂຮງໝໍ.ຢູ່ຫ້ອງປິ່ນປົວສຸກເສີນ,ທ່ານ ໝໍກວດແລ້ວ,ກໍໄດ້ບົ່ງມະຕິພະຍາດຂອງທ່ານວາງຊິ່ນເໝີຍຢ່າງວ່ອງໄວ.ທ່ານວາງຈຸ່ນ ນາຍໝໍຂອງພະແນກປະສາດພາຍນອກໂຮງໝໍ301ກອງທັບປົດປ່ອຍປະຊາຊົນຈີນບອກວ່າ:"ພວກເຮົາໄດ້ເຮັດCTA ຄືກວດເສັ້ນເລືອດຂອງທ່ານວາງຊິ່ນເໝີຍ,ແລ້ວພົບວ່າ,ເສັ້ນເລືອດແດງໃນຄໍຂອງທ່ານມີບ່ອນແຄບບ່ອນໜຶ່ງຢ່າງເດັ່ນຊັດ,ຄືແຄບກວ່າປົກກະຕິເຖິງ90%,ແມ່ນພະຍາເສັ້ນເລືອດແດງຄໍຕີບທີ່ອັນຕະລາຍສູງສຸດ."
ພະຍາດເສັ້ນເລືອດແດງຄໍຕີບແມ່ນສາເຫດຕົ້ນຕໍທີ່ສຸດທີ່ພາໃຫ້ເປັນລົມອຳມະພາດແບບຂາດເລືອດ.ມີຜູ້ເປັນລົມອຳມະພາດແບບຂາດເລືອດ60%ແມ່ນມາຈາກສາເຫດທີ່ເສັ້ນເລືອດແດງຢູ່ຄໍຕີບເຂົ້າພາໃຫ້ເສັ້ນເລືອດສະໝອງອັດຕັນ.ຄຽງຄູ່ກັບເສັ້ນເລືອດນັບມື້ນັບຕີບເຂົ້າ,ອາການພະຍາດຈະນັບມື້ນັບໜັກຂຶ້ນ,ໃນທີ່ສຸດຈະພາໃຫ້ເປັນລົມອຳມະພາດຢ່າງໜັກໜ່ວງ.ເສັ້ນເລືອດແດງໃນຄໍຂອງທ່ານວາງຊິ່ນເໝີຍແຄບກວ່າປົກກະຕິ90%,ພາໃຫ້ເລືອດທີ່ສົ່ງໄປລ້ຽງສະໝອງບໍ່ພຽງພໍ,ຈຶ່ງພາໃຫ້ພາກສ່ວນໜຶ່ງຂອງສະໝອງຂາດອອກຊີແຊນ,ອາການພະຍາດຕ່າງໆຂອງທ່ານລ້ວນແຕ່ເກີດຍ້ອນສາເຫດດັ່ງກ່າວ.
ນອກຈາກພະຍາດເປັນລົມອຳມະພາດແບບຂາດເລືອດແລ້ວ,ຍັງມີພະຍາດເປັນລົມອຳ ມະພາດຊະນິດໜຶ່ງເອີ້ນເປັນພະຍາດເປັນລົມອຳມະພາດແບບອອກເລືອດ.ພະຍາດຊະນິດນີ້ຕົ້ນຕໍແມ່ນຍ້ອນເລືອດດັນສູງພາໃຫ້ເສັ້ນເລືອດແດງຝອຍໃນສະໝອງແຕກ,ແລ້ວເປັນລົມອຳມະພາດ.
ຍ້ອນຫຍັງຈຶ່ງເປັນລົມອຳມະພາດ?ກ່ອນອື່ນ,ການເປັນລົມອຳມະພາດມີການພົວພັນກັບອາຍຸແລະເພດ.ທຳມະດາແລ້ວ,ຄົນອາຍຸສູງກວ່າ55ປີຈະມີອັດຕາທີ່ເປັນລົມອຳມະພາດສູງກວ່າ,ແລະອັດຕາທີ່ເປັນລົມອຳມະພາດຂອງຜູ້ຊາຍສູງກວ່າຜູ້ຍິງ50%.ຖັດມາ,ການເປັນລົມອຳມະພາດຍັງເປັນພະຍາດທີ່ມັກເກີດຍ້ອນກຳມະພັນ.ນອກນີ້,ພະຍາດຕ່າງໆ ເຊັ່ນພະຍາດເລືອດດັນສູງ ພະຍາດເບົາຫວານ ພະຍາດຫົວໃຈ ພະຍາດໄຂມັນໃນເສັ້ນເລືອດແລະຄວາມຕຸ້ຍໂພດເປັນຕົ້ນ,ພ້ອມດ້ວຍຄວາມຊິນເຄີຍໃນການດຳລົງຊີວິດທີ່ບໍ່ຖືກ ຕ້ອງຕ່າງໆ ເຊັ່ນ ສູບຢາແລະມັກດື່ມເຫຼົ້າເປັນຕົ້ນກໍມັກພາໃຫ້ເປັນລົມອຳມະພາດ.
ກ່ອນເປັນລົມອຳມະພາດຈະມີອາການເບື້ອງຕົ້ນຈຳນວນໜຶ່ງ.ທ່ານຫຼີປາວມີນ ຫົວໜ້າພະແນກປະສາດພາຍນອກຂອງໂຮງໝໍ301ກອງທັບປົດປ່ອຍປະຊາຊົນຈີນບອກວ່າ:"ກ່ອນເປັນລົມອຳມະພາດຈະມີອາການຕ່າງໆ,ເຊັ່ນວິນຫົວ ເບິ່ງບໍ່ເຫັນ ເວົ້າບໍ່ແຈ້ງແລະຕີນມືຈັງເປັນຕົ້ນ,ບຶດໜຶ່ງໄຄຂຶ້ນ,ບຶດໜຶ່ງໜັກລົງ,ຖ້າມີສະພາບແບບນີ້,ທ່ານຕ້ອງລະວັງແລ້ວ."
ທ່ານຫຼີບອກວ່າ,ຖ້າວ່າອາການດັ່ງກ່າວເກີດຂຶ້ນເລື່ອຍໆພາຍໃນໜຶ່ງເຖິງສອງມື້,ແລະຕົນເອງມີພະຍາດທີ່ມັກພາໃຫ້ເປັນລົມອຳມະພາດ ຄື ພະຍາດເລືອດດັນສູງແລະພະຍາດເບົາຫວານ,ຫຼືວ່າໃນຄອບຄົວມີປະຫວັດຄົນເປັນລົມອຳມະພາດ,ທ່ານກໍຕ້ອງໄປກວດຢູ່ໂຮງໝໍໃນທັນທີ.ປະຈຸບັນນີ້,ການບົ່ງມະຕິພະຍາດເປັນລົມອຳມະພາດໃນໄລຍະຕົ້ນແມ່ນແນ່ນອນຊັດເຈນທີ່ສຸດ.
ດັ່ງນັ້ນ,ໃນເມື່ອມີຄົນເປັນລົມອຳມະພາດໃນຄອບຄົວຫຼືຢູ່ສະຖານທີ່ສາທາລະນະ,ຈະຊ່ອຍແນວໃດ?ຜູ່ຊ່ຽວຊານແນະນຳວ່າ,ການເປັນລົມມະພາດແມ່ນເກີດຂຶ້ນຢ່າງກະທັນ ຫັນ,ຄົນຢູ່ອ້ອມຂ້າງມັກຮູ້ສຶກຕົກໃຈຈົນບໍ່ຮູ້ຈະຊ່ອຍແນວໃດ.ເຂົາເຈົ້າໄດ້ແຕ່ຮ້ອງຫຼືສັ່ນຜູ້ເປັນລົມອຳມະພາດໃຫ້ຕື່ນຂຶ້ນ.ວິທີນີ້ບໍ່ຖືກຕ້ອງທີ່ສຸດຕໍ່ຜູ້ເປັນລົມອຳມະພາດ,ມັກພາໃຫ້ອາການໜັກລົງ.ຖ້າທ່ານພົບເຫັນຄົນເປັນລົມອຳມະພາດຢ່າງກະທັນຫັນ,ກ່ອນອື່ນ,ຄົນໃນຄອບຄົວຫຼືຄົນຢູ່ອ້ອມຂ້າງຢ່າຕົກໃຈແຮງ,ຢ່າເຄື່ອນຍ້າຍຜູ້ກ່ຽວແລະຮີບໄປເອີ້ນນາຍໝໍ.ນອກນີ້,ຕ້ອງແກ້ກະດຸມເສຶ້ອຂອງຄົນເຈັບອອກເພື່ອໃຫ້ລາວຫາຍໃຈສະດວກ.ຖ້າວ່າຕີນມືຂອງຜູ້ເປັນລົມອຳມະພາດຊັກຈັງ,ນີ້ບໍ່ມີຜົນດີທີ່ສຸດຕໍ່ຜູ້ເປັນລົມອຳມະພາດ,ສະນັ້ນ,ຄົນຢູ່ອ້ອມຂ້າງຕ້ອງບັງຄັບບໍ່ໃຫ້ມັນຊັກ.ນອກນີ້,ໃນເວລາຊັກຢູ່ນັ້ນ,ຜູ້ເປັນລົມອຳມະພາດອາດຈະກັດລີ້ນຕົນເອງ,ສະນັ້ນ,ຄວນໃຊ້ເສື້ອຫຼືຜ້າຍັດເຂົ້າປາກຂອງຜູ້ເປັນລົມອຳມະພາດ.ມີຜູ້ເປັນລົມອຳມະພາດຈຳນວນຫຼວງຫຼາຍມັກຮາກຊະຊາຍ,ຍ້ອນຄວາມບໍ່ຮູ້ສະຕິ,ບາງທີຮາກສິ່ງເປິເປື້ອນອອກມາບໍ່ໝົດກໍກືນເຂົ້າຄືນ,ຖ້າເປັນແນວນີ້,ສິ່ງເປິເປື້ອນອາດຈະໄຫຼເຂົ້າຫຼອດລົມ,ພາໃຫ້ຫາຍໃຈບໍ່ໄດ້.ສະນັ້ນ,ຄວນໃຫ້ຫົວຂອງຜູ້ເປັນລົມອຳມະພາດອ່ຽງໄປຂ້າງໜຶ່ງ,ຖ້າວ່າສິ່ງເປິເປື້ອນເຫຼືອຢູ່ໃນປາກ,ກໍໃຊ້ໄມ້ຖູ່ຂູດອອກມາ.ຖ້າລາວມີແຂ້ວປອມກໍຄວນເອົາອອກ,ເພື່ອຫຼີກເວັ້ນບໍ່ໃຫ້ມັນເຂົ້າຫຼອດລົມ.
ແຕ່ກ່ອນ,ວິທີປິ່ນປົວການເປັນລົມອຳມະພາດແມ່ນການຜ່າຕັດ.ແຕ່ດຽວນີ້ໄດ້ມີວິທີປິ່ນປົວຊະນິດໜຶ່ງທີ່ປອດໄພ ໄດ້ຜົນແລະງ່າຍດາຍ.ທ່ານວາງຊິ່ນເໝີຍກໍແມ່ນໃຊ້ວິທີນີ້ມາປິ່ນ ປົວ.ນາຍໝໍໄດ້ສອດຫ້າງຄ້ຳໂລຫະອັນໜຶ່ງເຂົ້າໄປໃນບ່ອນແຄບໃນເສັ້ນເລືອດໃນຄໍຂອງທ່ານວາງໂດຍຜ່ານທໍ່ສາຍໜຶ່ງ,ເມື່ອສອດເຂົ້າແລ້ວ,ເສັ້ນເລືອດທີ່ຕີບກໍຖືກເປີດກວ້າງ ອອກ.ຍ້ອນວ່າຝາໃນຂອງເສັ້ນເລືອດຄົນເຮົາບໍ່ມີປະສາດ,ສະນັ້ນຈະບໍ່ຮູ້ສຶກເຈັບປວດ. ທ່ານວາງໄດ້ບັນລະຍາຍຄວາມຮູ້ສຶກໃນຄາວນັ້ນວ່າ:"ເມື່ອນາຍໝໍເປີດຫ້າງຄ້ຳອອກແລ້ວ,ຂ້ອຍກໍຮູ້ສຶກເລືອດໄຫຼສະດວກໂລດ,ສະໝອງປອດໂປ່ງ,ບໍ່ໜ້າມືດຄືເກົ່າ."
ວິທີປິ່ນປົວແບບນີ້ບໍ່ຕ້ອງສັກຢາມຶນໝົດຮ່າງກາຍ,ຜູ້ເປັນລົມອຳມະພາດສາມາດຮັບການປິ່ນປົວແບບບໍ່ຕ້ອງໃສ່ຢາສະຫຼົບ,ແລະມີບາດແຜນ້ອຍທີ່ສຸດ.ຕາມທຳມະດາແລ້ວ,24ຊົ່ວໂມງຫຼັງການປິ່ນປົວແລ້ວກໍລຸກຂຶ້ນຈາກຕຽງແລະເຄື່ອນໄຫວໄດ້,ອາການກໍດີຂຶ້ນ,ການນອນໂຮງໝໍກໍສັ້ນເຂົ້າ,ທ່ານວາງຊິ່ນເໝີຍນອນຢູ່ໂຮງໝໍພຽງແຕ່4ມື້ແລ້ວກໍ່ກັບເມືອບ້ານແລ້ວ.ດຽວນີ້,ມີຜູ້ເປັນລົມອຳມະພາດນັບມື້ນັບຫຼາຍມັກເລືອກເອົາວິທີປິ່ນປົວຊະນິດນີ້.
|
|
|
