|
ວັນທີ18 ກໍລະກົດ,ກົມສະຖິຕິແຫ່ງຊາດຈີນປະກາດຢູ່ປັກກິ່ງວ່າ,ໃນ6ເດືອນຕົ້ນປີນີ້,ຍອດຜະລິດຕະພັນລວມພາຍໃນຫຼືGDPຂອງຈີນເພີ່ມຂຶ້ນ10,9%ເມື່ອທຽບກັບໄລຍະດຽວກັນຂອງປີກາຍ,ຈັງຫວະດັ່ງກ່າວສູງກວ່າໄຕມາດທີ່ໜຶ່ງປີນີ້10,3%,ເມື່ອເປັນແນວນີ້,ຄວາມໄວຂອງການເຕີບໂຕທາງເສດຖະກິດຂອງຈີນຍັງຢູ່ໃນຂອບເຂດປົກກະຕິຫຼືບໍ່,ມັນສາມາດສືບຕໍ່ໄປແບບນີ້ໄດ້ຫຼືບໍ່,ຈີນຈະໃຊ້ມາດຕະການດັດສົມຄວບຄຸມຕື່ມອີກຫຼືບໍ່,ເພື່ອຊຸກຍູ້ການພັດທະນາເສດຖະກິດຢ່າງສະໝ່ຳສະເໝີກັນແລະປະສານກົມກຽວກັນ?ໃນລາຍການຈີນໃນປັດຈຸບັນພາກນີ້,ພວກເຮົາຈະລົມກ່ຽວກັບເລື່ອງນີ້.
ວັນທີ18 ກໍລະກົດ,ກົມສະຖິຕິແຫ່ງຊາດຈີນຍັງໄດ້ປະກາດຫຼາຍຕົວເລກສຳຄັນທີ່ກ່ຽວພັນຢ່າງສະໜິດແໜ້ນເຖິງການເພີ່ມຂຶ້ນຂອງGDP:ໃນ6ເດືອນຕົ້ນປີນີ້,ການລົງທຶນໃນດ້ານອະສັ່ງຫາລິມະຊັບທົ່ວສັງຄົມຈີນໄດ້ເພີ່ມຂຶ້ນ29,8ສ່ວນຮ້ອຍຖ້າທຽບໃສ່ໄລຍະດຽວກັນປີກາຍນີ້,ຍອດມູນຄ່ານຳເຂົ້າແລະສົ່ງອອກເພີ່ມຂຶ້ນ23,4%ທຽບໃສ່ໄລຍະດຽວກັນປີກາຍນີ້,ຍອດມູນຄ່າຂາຍຍ່ອຍສິນຄ້າບໍລິໂພກສັງຄົມເພີ່ມຂຶ້ນ13,3%.ຕົວເລກກ່ຽວກັບເສດຖະກິດຈີນເພີ່ມຂຶ້ນໃນ6ເດືອນຕົ້ນປີນີ້,ໂດຍສະເພາະແມ່ນການລົງທຶນດ້ານອະສັງຫາລິມະຊັບແລະການເພີ່ມຂຶ້ນຢ່າງວ່ອງໄວຂອງການຄ້າກັບຕ່າງປະເທດ,ໄດ້ພາໃຫ້ບຸກຄົນໃນວົງການເສດຖະກິດແລະຂະແໜງການລັດຖະບານຂອງຈີນເອົາໃຈໃສ່ໃນລະດັບສູງ.
ທ່ານອີ້ຊ້ຽນຢົງ ຮອງຫົວໜ້າສະຖາບັນຄົ້ນຄວ້າການທະນາຄານຂອງສະພາບັນດິດວິທະຍາສາດສັງຄົມຂອງຈີນເວົ້າວ່າ,ຕົວເລກຄາດໝາຍເສດຖະກິດຄືGDPຂອງຈີນໄດ້ເພີ່ມຂຶ້ນຢ່າງວ່ອງໄວ,ໝາຍຄວາມວ່າເສດຖະກິດຈີນພວມຢູ່ໃນໄລຍະສິບຮີບຮ້ອນເກີນໄປ.ທ່ານເວົ້າວ່າ,
"ເສດຖະກິດຈີນໄດ້ຮ້ອນເກີນໄປດົນແລ້ວ,ບໍ່ວ່າແມ່ນຈັງຫວະເຕີບໂຕຂອງGDP,ການລົງທຶນໃນດ້ານອະສັງຫາລິມະຊັບຫຼືວ່າການປ່ອນເງິນກູ້ຂອງທະນາຄານ,ຕົວເລກຕ່າງໆລ້ວນແຕ່ສະແດງໃຫ້ເຫັນວ່າເສດຖະກິດຈີນພວມໝູນວຽນໄວໂພດ.ການໝູນວຽນຄືແນວນີ້ເຮັດໃຫ້ການເຕີບໂຕຂອງເສດຖະກິດຂອງພວກເຮົາຕໍ່ເນື່ອງບໍ່ໄດ້."
ແຕ່ວ່າ,ທ່ານຢວນກ່າງມິງ ຜູ້ຊ່ຽວຊານເສດຖະກິດຂອງສະພາບັນດິດວິທະຍາສາດສັງຄົມຈີນບໍ່ເຫັນດີກັບຄວາມເຫັນຂອງທ່ານອີ້.ບ່ອນອີງຂອງທ່ານແມ່ນ,ໃນຂະນະທີ່ເສດຖະກິດເຕີບໂຕຢ່າງວ່ອງໄວ,ໃນ6ເດືອນຕົ້ນປີນີ້,ຍອດລະດັບລາຄາບໍລິໂພກຂອງຄົນຈີນພຽງແຕ່ເພີ່ມຂຶ້ນ1,3%,ບໍ່ມີປະກົດການເງິນເຟີ້ອັນຈະແຈ້ງ;ທ່ານເວົ້າວ່າ,
"ພວກເຮົາວິເຄາະວ່າເສດຖະກິດກ້າວເດີນໄປແບບປ້າວຟັງຫຼືບໍ່,ຄວນພິຈາລະນາເລື່ອງອື່ນຕື່ມ.ຈີນບໍ່ມີໄພເງິນເຟີ້,ລາຄາຂອງເຄື່ອງບໍລິໂພກຍັງ ຕ່ຳ.ໃນໄລຍະໜຶ່ງຕໍ່ໜ້າກໍ່ຈະບໍ່ເກີດໄພເງິນເຟີ້,ເບິ່ງຈາກຕົວເລກຄາດໝາຍແນວນີ້ແລ້ວເຫັນວ່າ,ເສດຖະກິດຈີນບໍ່ໄດ້ໄປໄວໂພດ,ແລະມີພື້ນຖານທີ່ໝັ້ນທ່ຽງໃຫ້ແກ່ການເຕີບໂຕຂອງເສດຖະກິດທີ່ຕໍ່ເນື່ອງຕື່ມອີກ."
ຕໍ່ຄຳເຫັນນີ້,ທ່ານອີ້ຊ້ຽນຢົງກໍ່ມີຄຳເຫັນທີ່ແຕກຕ່າງ.ທ່ານເຫັນວ່າ,ຍ້ອນວ່າລາຄາຂອງເຮືອນແລະທີ່ດິນບໍ່ໄດ້ຈັດຢູ່ໃນສະຖິຕິລາຄາບໍລິໂພກຂອງປະຊາຊົນ,ລະດັບລາຄາບໍລິໂພກຂອງປະຊາຊົນມີການປັບຕົວຢ່າງຊ້າໆ,ບໍ່ສາມາດເປັນຕົວແທນອັນແທ້ຈິງຂອງເສດຖະກິດຈີນໃນປັດຈຸບັນໄດ້.ຂໍ້ສະເໜີຂອງທ່ານແມ່ນ,ເພື່ອສະກັດກັ້ນການລົງທຶນດ້ານອະສັງຫາລິມະຊັບທີ່ສູງຂຶ້ນໄວໂພດ,ໃນຫຼາຍປີຕໍ່ໜ້າ,ທະນາຄານກາງຂອງຈີນຄວນສືບຕໍ່ໃຊ້ນະໂຍບາຍຕ່າງໆເຊັ່ນປັບດອກເບ້ຍໃຫ້ສູງຂຶ້ນເປັນຕົ້ນ.ທ່ານເວົ້າວ່າ
"ປັດຈຸບັນໄດ້ປະຕິບັດນະໂຍບາຍດັດສົມດ້ານມະຫາພາກມາຫຼານປີແລ້ວ,ຍ້ອນຫຍັງຈິງບໍ່ມີປະສິດທິຜົນ,ບັນຫາອັນກົກເຄົ້າກວ່າໝູ່ກໍ່ແມ່ນຍ້ອນນະໂຍບາຍອັດຕາດອກເບັ້ຍຕ່ຳ,ພາຍໃຕ້ສະພາບອັດຕາດອກເບັ້ຍຕ່ຳ,ການປ່ອຍເງິນກູ້ຈະເຕີບໂຕໄວໂພດ.ຍ້ອນວ່າຖ້າໄດ້ຮັບເງິນກູ້ກໍ່ມີກຳໄລຫຼາຍຂຶ້ນ,ສະນັ້ນການລົງທຶນແບບຟ້າວຟັ່ງກໍ່ປະກົດມີຂຶ້ນ.ຖ້າບໍ່ປ່ຽນແປງນະໂຍບາຍອັດຕາດອກເບັ້ຍຕ່ຳ,ຕົວເລກ ຕ່າງໆຢູ່ໃນລະດັບສູງຍັງຈະປະກົດຂຶ້ນຢູ່ຕໍ່ໄປ,ສະນັ້ນ,ຕ້ອງແກ້ໄຂບັນຫາເຫຼົ່ານີ້ໂດຍຜ່ານການປັບປ່ຽນອັດຕາດອກເບັ້ຍຕ່ຳ,ເພີ່ມດອກເບັ້ຍໃຫ້ສູງຂຶ້ນ."
ປັດຈຸບັນ,ຫຼາຍຄົນມີຄຳເຫັນຄືກັນກັບທ່ານອີ້ຊ້ຽນຢົງ,ເຖິງວ່າຫຼາຍຄົນເຫັນວ່າເສດຖະກິດຈີນໄດ້ຢູ່ໃນສະພາບຮ້ອນຮົນ,ແຕ່ເຂົາເຈົ້າກໍ່ສະເໜີວ່າຕ້ອງລະມັດລະວັງຕໍ່ອັດຕາລົງທຶນສູງແລະອັດຕາປ່ອຍເງິນກູ້ສູງໃນການເຕີບໂຕຂອງເສດຖະກິດແລະຈະລະເຫຼີງສະຕິການເຕີບໂຕຂອງຕົວເລກດັດຊະນີຂອງລາຄາບໍລິໂພກບໍ່ໄດ້.ຍ້ອນຄາດຄະເນວ່າໃນ6ເດືອນຕົ້ນປີນີ້,ເສດຖະກິດຈີນເລັ່ງການເຕີບໂຕ,ຫວ່າງມໍ່ໆນີ້,ທະນາຄານລົງທຶນສາກົນຫຼາຍແຫ່ງຕ່າງກໍ່ຄາດຄະເນວ່າ,ຈີນຈະເພີ່ມດອກເບັ້ຍໃຫ້ສູງຂຶ້ນໃນເດືອນນີ້,ສື່ມວນຊົນດ້ານເສດຖະກິດການເງິນສາກົນກໍ່ໄດ້ລາຍງານວ່າທະນາຄານສູນກາງຈີນອາດຈະເພີ່ມດອກເບັ້ຍຂຶ້ນອີກ.ໃນວັນພະຫັດແລ້ວນີ້,ຕະຫຼາດຫຸ້ນສ່ວນແລະຕະຫຼາດພັນທະບັດຂອງຈີນລ້ວນແຕ່ປະສົບອຸປະສັກແລະຫຼຸດລົງ.
ໃນງານຖະແຫຼງຂ່າວຂອງວັນທີ18 ກໍລະກົດ,ທ່ານເຈິ້ງຈິ່ນພິງ ໂຄສົກຂອງກົມສະຖິຕິແຫ່ງຊາດຈີນ,ເປີດເຜີຍໃຫ້ຮູ້ວ່າ,ຈີນຈະອີງຕາມສະພາບການຕົວຈິງເພື່ອມາດັດສົມຕື່ມອີກຫຼືບໍ່ໃນໂອກາດທີ່ເໝົາະສົມ.ທ່ານຢັງຢືນວ່າການກ້າວເດີນເສດຂອງເສດຖະກິດຈີນໃນສະເພາະໜ້າມີບາງບັນຫາທີ່ຖືເບົາບໍ່ໄດ້,ເຊັ່ນການລົງທຶນໃນດ້ານອະສັງຫາລິມະຊັບທີ່ເຕີບໂຕໄວ,ປ່ອຍຂເງິນກູ້ຫຼາຍໂພດ,ແລະການສະສົມເງິນຕາຕ່າງປະເທດຫຼາຍໂພດເປັນຕົ້ນ.ແຕ່ພ້ອມກັນນັ້ນ,ທ່ານກ່າວວ່າ,ບັນຫາເຫຼົ່ານີ້ລ້ວນແຕ່ຢູ່ໃນລະດັບທີ່ຄວບຄຸມໄດ້.
ທ່ານເຈິ້ງຈິ່ງພິງກ່າວວ່າ,ແຕ່ຕົ້ນປີນີ້ມາ,ຈີນໄດ້ນຳໃຊ້ນະໂຍບາຍສັບຊ້ອນຄືເພີ່ມດອກເບັ້ຍແລະຄວບຄຸມຂະໜາດປ່ອຍເງິນກູ້ຂອງຂະແໜງການຈຳນວນໜຶ່ງເພື່ອມາຮັບປະກັນແລະຊຸກຍູ້ການພັດທະນາເສດຖະກິດໃຫ້ສົມດຸນຢ່າງກົມກຽວກັນ,ທ່ານເວົ້າວ່າ:
"ຈີນໄດ້ວິເຄາະສະຖານະການເສດຖະກິດໃນປັດຈຸບັນຢ່າງຄັກແນ່,ແລະໄດ້ນຳໃຊ້ມາດຕະການດັດສົມທີ່ມີຜົນສັກສິດຢ່າງເປັນລະບົບ.ດັ່ງນັ້ນພວກຂ້າພະເຈົ້າເຫັນວ່າ,ຂໍພຽງແຕ່ບົນພື້ນຖານທີ່ຮັກສາລັກສະນະຕໍ່ເນື່ອງແລະລັກສະນະໝັ້ນທ່ຽງຂອງນະໂຍບາຍເສດຖະກິດມະຫາພາກ,ໃຊ້ບາງມາດຕະການອັນເຂັ້ມແຂງຕໍ່ບັນຫາອັນພົ້ນເດັ່ນຢ່າງມີລັກສະນະຊັດເຈນ,ອາໄສພາຫະນະເສດຖະກິດແລະກົດໝາຍຫຼາຍໆ,ແລະປະສົມປະສານກັບພາຫະນະການຄຸ້ມຄອງບໍລິຫານອັນຈຳເປັນ.ໂດຍຜ່ານການໃຊ້ມາດຕະການດັດສົມມະຫາພາກຢ່າງເປັນລະບົບຄືແນວນີ້,ພວກເຮົາສາມາດຮັບປະກັນເສດຖະກິດທີ່ຈະບໍ່ເຕີບໂຕໄວເກີນໄປ,ພ້ອມທັງສາມາດຮັບປະກັນເສດຖະກິດທີ່ເຕີບໂຕຢ່າງໝັ້ນທ່ຽງແລະອ່າວໄວໃນ6ເດືອນທ້າຍປີນີ້."
|
