|
|
 |
| (GMT+08:00)
2006-08-15 16:25:41
|
 |
|
ທ່ານທຽນອ່າທົງ ຊ່າງຕັດເສື້ອເກັ່ງ
cri
|
ທ່ານທຽນອ່າທົງແມ່ນຊ່າງຕັດເສື້ອເກັ່ງທີ່ມີຊື່ສຽງຂອງຈີນ,ທ່ານເຄີຍຕັດເສື້ອໃຫ້ແກ່ຜູ້ນຳສຳຄັນຫຼາຍຮຸ້ນຄົນຂອງຈີນເຊັ່ນ,ທ່ານເໝົາເຈີຕົ່ງ ທ່ານເຕີ້ງສ້ຽວພິງເປັນຕົ້ນແລະທ່ານບຸສ ອະດີດປະທານາທິບໍດີອາເມລິກາ ສົມເດັດນະໂຣດົມ ສີຫະນຸ ອະດີດເຈົ້າຊີວິດກຳປູເຈຍເປັນຕົ້ນ.ທ່ານມີສີມືເກັ່ງພິລຶກໃນການອອກແບບແລະຕັດເສື້ອ,ໄດ້ຕັດເສື້ອໃຫ້ແກ່ຜູ້ນຳປະເທດມາເປັນເວລາ50ປີແລ້ວ.ຮູບແຜ່ນໃຫຍ່ຂອງທ່ານເໝົາເຈີຕົ່ງທີ່ຫ້ອຍຢູ່ໜ້າຫໍທ່ຽນອ່ານເມີນປັກກິ່ງນັ້ນ,ເຄື່ອງນຸ່ງຂອງທ່ານເໝົາເຈີຕົ່ງກໍແມ່ນທ່ານທຽນອ່າທົງຕັດໃຫ້.
ທ່ານທຽນອ່າທົງເປັນຄົນສູງຜ້ານກາງ,ຮ່າງກາຍແຂງແຮງດີ,ຜົມຫງອກແຊມ,ໃສ່ແວ່ນ ຕາຂອບສີດຳ,ເບິ່ງແລ້ວເປັນຄົນສຸພາບອ່ອນຫວານ.ມືຂອງທ່ານອ່າວອ້ວນ,ກໍແມ່ນມືຄູ່ນີ້ລະທີ່ໄດ້ອອກແບບແລະຕັດເສື້ອພັນກວ່າຊຸດໃຫ້ຜູ້ນຳປະເທດແລະບໍ່ຕ້ອງດັດແປງຄືນຈັກເທື່ອ.
ບ້ານເກີດຂອງທ່ານທຽນອ່າທົງຢູ່ເຂດຊ່າເຈ່ຍປ່າງທີ່ຊານເມືອງຊາງຊູແຂວງຈ່ຽງຊູ່ພາກຕາເວັນອອກຂອງຈີນ.ທ່ານເກີດໃນຄອບຄົວຊາວນາ,ສະຫຼາດສະຫຼຽວມາແຕ່ໄວເດັກ.ເມື່ອອາຍຸ13ປີ,ພໍ່ກໍສົ່ງທ່ານໄປຮຽນຕັດເສື້ອຢູ່ຊຽງໄຮ້ເມືອງໃຫຍ່ທີ່ຫ່າງຈາກບ້ານເກີດບໍ່ໄກປານໃດ.5ປີຜ່ານໄປແລ້ວ,ທ່ານກໍໄດ້ເປີດຮ້ານຕັດເສື້ອ"ທຽນອ່າທົງ"ຢູ່ຖະໜົນນານກິ່ງທີ່ເປັນຖະໜົນການຄ້າທີ່ມີຊື່ສຽງ,ແລະຂາຍດິບຂາຍດີທີ່ສຸດ.
ເມື່ອປີ1956,ພາຍຫຼັງປະເທດຈີນໃໝ່ສະຖາປະນາຂຶ້ນບໍ່ທັນດົນ,ຍ້ອນທ່ານທຽນອ່າທົງມີສີມືເກັ່ງດ້ານການຕັດເສື້ອທັງເປັນຄົນທ່ຽງທຳກົງໄປກົງມາ,ທ່ານກໍໄດ້ຖືກສັບຊ້ອນໄປຢູ່ປັກກິ່ງ,ຕັດເສື້ອໃຫ້ແກ່ທ່ານປະທານເໝົາເຈີຕົ່ງແລະຜູ້ນຳອື່ນໆໂດຍສະເພາະ,ແລ້ວທ່ານກໍໄດ້ເຮັດວຽກນີ້ມາເປັນເວລາ50ປີ.
ເມື່ອຕັດເສື້ອໃຫ້ແກ່ທ່ານປະທານເໝົາ,ທ່ານທຽນອ່າທົງໄດ້ໃຊ້ວິທີໃໝ່ຢ່າງໃຈກ້າເພື່ອເຮັດໃຫ້ຮູບຊົງອັນລ້ຳສັນຂອງທ່ານປະທານເໝົາພົ້ນເດັ່ນອອກ.
ນອກຈາກຕັດເສື້ອໃຫ້ແກ່ທ່ານປະທານເໝົາເຈີຕົ່ງແລ້ວ,ທ່ານທຽນອ່າທົງຍັງໄດ້ອອກແບບແລະຕັດເສື້ອລັດຖະການຫຼາຍຊຸດໃຫ້ທ່ານໂຈ່ວເອີ່ນໄລ ນາຍົກລັດຖະມົນຕີໃນຄາວນັ້ນພ້ອມດ້ວຍຜູ້ນຳຈີນຮຸ້ນຕໍ່ມາ,ຄືທ່ານເຕິ້ງສຽວພິງ,ທ່ານຈ່ຽງເຈີມິນ,ແລະທ່ານຫູຈິນທາວເປັນຕົ້ນ.ແບບແຜນດຳລົງຊີວິດແບບປະຢັດຂອງຜູ້ນຳເຮັດໃຫ້ທ່ານມີຄວາມປະທັບໃຈອັນເລິກເຊິ່ງ.ທ່ານຫວນຄືນວ່າ,
ມື້ໜຶ່ງທ່ານປະທານຫູຈິນທາວຮຽກຂ້ອຍໄປຫາແລ້ວເວົ້າວ່າ,ມີເສື້ອເກົ່າຜືນໜຶ່ງຢາກໃຫ້ທ່ານດັດແປງໃຫ້ແດ່,ນຸ່ງມາສິບກວ່າປີແລ້ວ.ຄໍເສື້ອຂອງຊຸດຈົ່ງສ່ານຜືນນັ້ນກໍຟຸຍແລ້ວ.ຂ້ອຍກໍຕອບວ່າໄດ້,ແຕ່ເມື່ອດັດແລ້ວຄໍເສື້ອຈະແຄບເຂົ້າຈັກໜ້ອຍ.ທ່ານປະທານເວົ້າວ່າ"ໄດ້,ບໍ່ເປັນຫຍັງ" ເມື່ອຂ້ອຍດັດແປງຮຽບຮ້ອຍແລ້ວ,ທ່ານກໍພໍໃຈຫຼາຍ.
ທ່ານທຽນອ່າທົງຍັງຈື່ໄດ້ວ່າເຄີຍດັດແປງເສື້ອໃຫຍ່ຜືນໜຶ່ງໃຫ້ທ່ານໂຈ່ວເອິນໄລ.ເສື້ອໃຫຍ່ຜືນນັ້ນທັງເກົ່າທັງໝອງຈົນເຮັດໃຫ້ຊ່າງຕັດເສື້ອຜູ້ອື່ນແປງບໍ່ໄດ້.ທ່ານທຽນອ່າທົງກໍມ້າງເສື້ອໃຫຍ່ໃຫ້ແຍກອອກໝົດແລ້ວປ່ຽນທາງໃນເປັນທາງນອກ.ທ່ານນາຍົກນຸ່ງແລ້ວດີໃຈວ່າ,ມັນຄືກັບເສື້ອໃໝ່.
ໃນຫຼາຍປີມານີ້,ທ່ານທຽນອ່າທົງບໍ່ພຽງແຕ່ຕັດເສື້ອເອົາເອງເທົ່ານັ້ນ,ຍັງໄດ້ສອນລູກສິດຮ້ອຍກວ່າຄົນ.ນາງໂຈ່ວຈຸ້ນສຽວກໍແມ່ນຜູ້ໜຶ່ງ.
ນາງໂຈ່ວຈຸ້ນສ້ຽວກໍແມ່ນຜູ້ເຖົ້າທີ່ມີອາຍຸ60ກວ່າປີແລ້ວ.ໃນສາຍຕາຂອງນາງ,ພໍ່ຄູຄົນນີ້ດຸໝັ່ນຂະຫຍັນພຽນ,ເຮັດວຽກເອົາຈິງເອົາຈັງ.ນາງໄດ້ຮຽນນຳພໍ່ຄູເປັນເວລາ40ປີ.ໃນ40ປີນີ້,ນາງເຫັນພໍ່ຄູວັດຄວາມຍາວ,ຕັດຜ້າແລະໃຊ້ຈັກຫຍິບ,ທຸກສິ່ງທຸກຢ່າງລ້ວນແຕ່ເຮັດເອົາຈິງຢ່າງເອົາຈັງໂດຍຕະຫຼອດ.ນາງເວົ້າວ່າ,
ເພິ່ນມີມາດຖານອັນເຂັ້ມງວດທີ່ສຸດໃນດ້ານວຽກງານ,ຄືເຮັດໃຫ້ດີຍິ່ງຂຶ້ນເລື້ອຍໆ.ເພິ່ນຍັງສອນພວກເຮົາຄວນເປັນຄົນແນວໃດ,ເຮັດວຽກແນວໃດ.ຕະຫຼອດຊີວິດນີ້ຂ້ອຍລືມບໍ່ໄດ້ພໍ່ຄູຊ່ອຍເຫຼືອຂ້ອຍ.ຂ້ອຍຂໍຂອບອົກຂອບໃຈນຳເພິ່ນເພິ່ນແທ້ໆ.
ນອກຈາກຊຸດຈົ່ງສ່ານແລ້ວ,ທ່ານທຽນອ່າທົງຍັງຕັດຊຸດສາກົນເກັ່ງອີກ,ໄດ້ຮັບຄວາມນິຍົມຊົມຊອບຈາກປະມຸກລັດແລະທູດຕ່າງປະເທດປະຈຳຈີນຈຳນວນໜຶ່ງ.ໃນຊຸມປີ1970,ເມື່ອທ່ານບຸສ ອະດີດປະທານາທິບໍດີອາເມລິກາເຮັດວຽກຢູ່ປັກກິ່ງ,ກໍເຄີຍຂີ່ລົດຖີບໄປໂຮງງານຜະລິດເຄື່ອງນຸ່ງຮົງຕູທີ່ທ່ານທຽນອ່າທົງເຮັດວຽກຢູ່ນັ້ນເພື່ອໃຫ້ທ່ານທຽນອ່າທົງຕັດເສື້ອຕາມຮູບຄີງຂອງຕົນ.ຖັດຈາກນັ້ນຫຼາຍປີເມື່ອທ່ານບຸສທີ່ເປັນປະທານາທິບໍດີໃນຄາວນັ້ນມາຢ້ຽມ ຢາມຈີນ,ທ່ານບອກນັກຂ່າວວ່າ:"ຊຸດສາກົນທີ່ຂ້າພະເຈົ້ານຸ່ງນີ້ແມ່ນທ່ານທຽນຊ່າງຕັດເສື້ອຂອງຈີນຕັດໃຫ້." ສົມເດັດນະໂຣດົມ ສີຫະນຸ ອະດີດເຈົ້າຊີວິດກຳປູເຈຍກໍເຄີຍດຳລົງຊີວິດຢູ່ຈີນເປັນເວລາຍາວນານ,ໃນຄາວນັ້ນທ່ານທຽນອ່າທົງກໍແມ່ນຫົວໜ້າຊ່າງຕັດເສື້ອຂອງພະອົງ.ເອກອັກຄະລັດຖະທູດຂອງຫຼາຍສິບປະເທດປະຈຳຈີນກໍໃຫ້ທ່ານຕັດຊຸດສາກົນ.ແຂກຕ່າງປະເທດລ້ວນແຕ່ຍ້ອງຍໍວ່າສືມືຕັດເສື້ອຂອງທ່ານທຽນອ່າທົງແມ່ນລະດັບນຳໜ້າໃນໂລກ.
ຍ້ອນຄວາມຕ້ອງການຂອງວຽກງານ,ທ່ານທຽນອ່າທົງໄດ້ອາໄສຢູ່ທຳນຽບຈົ່ງນານໄຫທີ່ເປັນສຳ ນັກງານຂອງຜູ້ນຳຈີນເປັນເວລາຍາວນານ.ສະນັ້ນຄົນທຳມະດາກໍມີຄວາມຮູ້ສຶກເລິກລັບກ່ຽວກັບຊ່າງຕັດເສື້ອເກັ່ງຜູ້ນີ້.ແຕ່ທ່ານທຽນອ່າທົງພັດບໍ່ເຫັນດີນຳຄວາມເວົ້າດັ່ງກ່າວ.ທ່ານເວົ້າວ່າ,ທີ່ຈິງແລ້ວ,ໃຫ້ລູກຄ້າທຳມະດາມີເສຶ້ອງາມນຸ່ງກໍແມ່ນຄວາມປາຖະໜາຂອງຕົນ.ທ່ານເຄີຍໄປຂາຍເສື້ອຜ້າດ້ວຍຕົນເອງຢູ່ຮ້ານສະເພາະຢູ່ຄຸ້ມການຄ້າວາງຝູຈິງຂອງປັກກິ່ງ,ແລະໄດ້ສຳຜັດກັບຄວາມກະຕືລືລົ້ນຂອງລູກຄ້າທີ່ລຽນແຖວເພື່ອຊື້ເອົາເຄື່ອງນຸ່ງ.ມີຫຼາຍເທື່ອທ່ານຈ່າຍຄ່າເດີນທາງເອົາເອງເພື່ອໄປສອນການຕັດເສື້ອແລະຖ່າຍທອດບົດຮຽນໃຫ້ກຳມະກອນຢູ່ໂຮງງານຕັດຫຍິບຂອງລັດແຫ່ງໜຶ່ງ.
ເມື່ອປີ2005,ທ່ານທຽນອ່າທົງທີ່ມີອາຍຸ80ປີໄດ້ອອກກິນເບ້ຍບຳນານຢ່າງເປັນທາງການແລ້ວ.ທ່ານຄິດວ່າຕົນເອງຍັງແຂງແຮງດີ,ຍັງສາມາດເຮັດສິ່ງທີ່ຕົນຢາກເຮັດມາດົນແລ້ວ,ຕົວຢ່າງວ່າຖ່າຍທອດທັດສະນະແລະສີມືເກັ່ງດ້ານການອອກແບບເຄື່ອງນຸ່ງໃຫ້ແກ່ຄົນຮຸ້ນລຸນຫຼັງເປັນຕົ້ນ.ສະນັ້ນ,ລະດູບານໃໝ່ປີນີ້,ທ່ານໄດ້ຮັບເອົາລູກສິດຫຼ້າຜູ້ໜຶ່ງ,ຄືທ່ານລິວເວີ້ຍຈຸ່ນ,ປະທານຄະນະບໍລິຫານງານຂອງບໍລິສັດເຄື່ອງນຸ່ງຮົງຊ່ານຊູ້ຈ່ຽງຊູ່ຈຳກັດ.ໃນຊູ່ມື້ນີ້ໃນຂະແໜງເຄື່ອງນຸ່ງຂອງຈີນມີການແຂ່ງຂັນກັນຢ່າງດຸເດືອດ,ທ່ານລິວເວີ້ຍຈຸ່ນມີຄວາມເຫັນຕ່າງໝູ່ຄືຜະລິດຊຸດທາງການທີ່ນຸ່ງໃນເວລາທຳມະດາກໍໄດ້ເປັນຕົ້ນຕໍ,ແລະຍາດໄດ້ໂຄຕາຕະຫຼາດສ່ວນໜຶ່ງ.ທ່ານທຽນອ່າທົງມັກລູກສິດຫຼ້າຜູ້ນີ້ຫຼາຍທີ່ສຸດ.ທ່ານເວົ້າວ່າ,
ຂ້ອຍຮັບລູກສິດຜູ້ນີ້ກໍຮູ້ສຶກມີຄວາມສຸກຫຼາຍ.ເພາະວ່າຂ້ອຍອາຍຸ80ປີແລ້ວ,ຮັບເອົາລູກສິດຜູ້ນີ້,ກໍສອນໃຫ້ລາວແດ່,ແລ້ວຂ້ອຍກໍຍັງມີບົດບາດຂຶ້ນຕື່ມ.
ທ່າທີທີ່ເອົາຈິງເອົາຈັງຂອງທ່ານທຽນອ່າທົງໄດ້ຈູງໃຈກຳມະກອນທັງຫຼາຍຂອງບໍລິສັດຮົງຊ່ານຊູ້.ນາງຈ້າວອີ້ເຟິ່ງ ຫົວໜ້າຜູ້ຕິດຕາມການອອກແບບຂອງບໍລິສັດດັ່ງກ່າວເວົ້າວ່າ,
ເພິ່ນມີສີມືເກັ່ງທີ່ສຸດ,ອຸທິດກຳລັງຂອງຕົນຢ່າງຈິງຈັງແລະບໍ່ສະແຫວງຫາຊື່ສຽງດົງດັງ,ນ້ຳໃຈແນວນີ້ແມ່ນສິ່ງທີ່ພວກເຮົາຂາດທີ່ສຸດ.ເພິ່ນຕິດແທດຕົວຈິງ,ໃນເວລາຊີ້ນຳພວກເຮົາ,ເພິ່ນກໍມີລະດັບສູງ,ເຊິ່ງໄດ້ສະແດງອອກໃນເຄື່ອງນຸ່ງທີ່ພວກເຮົາຜະລິດ.
ທ່ານທຽນອ່າທົງມີອາຍຸ80ກວ່າປີແລ້ວ,ສຸຂະພາບຍັງແຂງແຮງດີ.ເພິ່ນເວົ້າວ່າ,ຖ້າຫາກພົບຜູ້ມີຄວາມຮູ້ຄວາມສາມາດ,ອາດຈະຮັບເອົາລູກສິດອີກຜູ້ໜຶ່ງ.ຕະຫຼອດຊີວິດຂອງທ່ານໄດ້ຍຶດໝັ້ນຕໍ່ສອງຄຳເວົ້າວ່າ,ຕັດເສື້ອຢ່າງດຸໝັ່ນຂະຫຍັນພຽນ,ເປັນຄົນທີ່ຊື່ສັດບໍລິສຸດ.
|
|
|
