|
|
 |
| (GMT+08:00)
2006-08-15 18:41:53
|
 |
|
ລັດຖະບານຈີນປະທ້ວງຢ່າງຮຸນແຮງຕໍ່ທ່ານໂຄອິຊຸມິ ນາຍົກຍີ່ປຸ່ນໄປນະມັດສະການວັດຢາຊືຄູນີ(ສຽງ)
cri
Author: shuohong
|
ຕາມຂ່າວCRI:ວັນທີ15ສິງຫາ,ທ່ານຈູນີຊີໂຣ ໂຄອິຊຸມິ ນາຍົກລັດຖະມົນຕີຍີ່ປຸ່ນໄດ້ໄປນະມັດສະການວັດຢາຊືຄູນີທີ່ຕັ້ງປ້າຍບູຊາຂອງອາຊະຍາກອນສົງຄາມຊັ້ນໜຶ່ງໃນສົງຄາມໂລກຄັ້ງທີສອງນັ້ນອີກເທື່ອໜຶ່ງ.ລັດຖະບານຈີນປະທ້ວງຢ່າງຮຸນແຮງຕໍ່ການກະທຳດັ່ງກ່າວທີ່ແຕະຕ້ອງຈິດໃຈຂອງປະຊາຊົນປະເທດປະສົບເຄາະຮ້າຍຈາກສົງຄາມຮຸກຮານຂອງລັດທິລັດຖະທະຫານຍີ່ປຸ່ນນັ້ນຢ່າງໜັກໜ່ວງແລະທຳລາຍພື້ນຖານການເມືອງຂອງການພົວພັນຈີນຍີ່ປຸ່ນ.
ວັນທີ15ສິງຫາເມື່ອ61ປີກ່ອນນີ້,ຍີ່ປຸ່ນໄດ້ປະກາດເສຍໄຊໃນສົງຄາມແລະຍອມຈຳນົນຢ່າງບໍ່ມີເງື່ອນໄຂ,ປະຊາຊົນຈີນແລະປະເທດອາຊີອື່ນໆໄດ້ຮັບໄຊຊະນະໃນສົງຄາມຕ້ານການຮຸກຮານ.ທ່ານລິວຈ້ຽນຊ່າວ ໂຄສົກກະຊວງການຕ່າງປະເທດຈີນກ່າວວ່າ,ທ່ານໂຄອິຊຸມິເລືອກເອົາວັນຍີ່ປຸ່ນເສຍໄຊໃນສົງຄາມຄືວັນທີ15ສິງຫາໄປນະມັດສະການວັດຢາຊືຄູນີທີ່ຕັ້ງປ້າຍບູຊາອາຊະຍາກອນສົງຄາມຊັ້ນໜຶ່ງໃນຖານະນາຍົກລັດຖະມົນຕີ,ແມ່ນການທ້າທາຍຕໍ່ຄວາມເປັນທຳສາກົນແລະຢຽບຢ່ຳມະໂນທຳຂອງມວນມະນຸດ.
ທ່ານເວົ້າວ່າ:"ຈີນແມ່ນປະເທດປະສົບເຄາະຮ້າຍໜັກໜ່ວງກວ່າໝູ່ຈາກສົງຄາມຮຸກຮານຂອງລັດທິລັດຖະທະຫານຍີ່ປຸ່ນ,ສະນັ້ນ,ການຮັບຮູ້ປະຫວັດສາດຕອນນີ້ຢ່າງຖືກຕ້ອງແມ່ນພື້ນຖານການເມືອງທີ່ການພົວພັນຈີນຍີ່ປຸ່ນຈະໄດ້ຮັບການຟຶ້ນຟູແລະຂະຫຍາຍຕົວຫຼັງສົງຄາມ,ແລະກໍແມ່ນປະຖົມປັດໄຈອັນສຳຄັນທີ່ສອງປະເທດພ້ອມກັນມຸ່ງໜ້າໄປສູ່ອະນາຄົດ.ທ່ານນາຍົກ ໂຄອິຊຸມິໄດ້ແຕະຕ້ອງຈິດໃຈຂອງປະຊາຊົນຈີນໃນບັນຫາປະຫວັດສາດມາໂດຍຕະຫຼອດ,ບໍ່ພຽງແຕ່ໄດ້ເສຍຄວາມໄວ້ເນື້ອເຊື່ອໃຈຈາກປະຊາຄົມໂລກທໍ່ນັ້ນ,ຫາກຍັງໄດ້ທຳລາຍພາບພົດແລະຜົນປະໂຫຍດຂອງຍີ່ປຸ່ນເອງອີກດ້ວຍ."
ວັດຢາຊືຄູນີໄດ້ຕັ້ງປ້າຍບູຊາອາຊະຍາກອນສົງຄາມຊັ້ນໜຶ່ງ14ຄົນ ລວມທັງຮີເດຄິ ໂທໂຈະ.ອາຊະຍາກອນສົງຄາມຊັ້ນໜຶ່ງ14ຄົນນີ້ແມ່ນຫົວໂປ່ເຈົ້າໂທດທີ່ກໍ່ໄພພິບັດອັນມະຫາສານ ໃຫ້ອາຊີແລະໂລກໃນປະຫວັດສາດສະໄໝ່.ບໍ່ວ່າໃນສາຍຕາຂອງປະຊາຊົນຍີ່ປຸ່ນ,ຫຼືປະຊາຊົນຈີນແລະສ.ເກົາຫຼີ,ວັດຢາຊືຄູນີກໍບໍ່ແມ່ນວັດທຳມະດາ,ມັນພົວພັນເຖິງຈິດໃຈຂອງປະຊາຊົນປະເທດທີ່ປະສົບເຄາະຮ້າຍສົງຄາມໂລກຄັ້ງທີສອງ,ແລະພົວພັນເຖິງການຮັບຮອງຫຼືເລີກລົ້ມຄວາມເປັນທຳແລະຫຼັກທຳສາກົນ.
ຕັ້ງແຕ່ທ່ານໂກອິຊຸມິດຳລົງຕຳແຫນ່ງນາຍົກລັດຖະມົນຕີຍີ່ປຸ່ນເມື່ອເດືອນເມສາປີ 2001 ເປັນຕົ້ນມາ,ແຕ່ລະປີ,ທ່ານກໍ່ໄປນະມັດສະການວັດຢາຊືຄຸນິ.ວັນທີ 31 ມີນາປີນີ້,ໃນເວລາທ່ານຫູຈິນທາວ ປະທານປະເທດຈີນພົບປະຜູ່ຮັບຜິດຊອບຂອງ 7 ອົງການຈັດຕັ້ງມິດຕະພາບຍີ່ປຸ່ນຈີນຢູ່ປັກກິ່ງ,ທ່ານຊີ້ອອກວ່າ,ການພົວພັນຈີນຍີ່ປຸ່ນມີສະພາບຂັດສົນແມ່ນຍ້ອນຜູ່ນຳຍີ່ປຸ່ນບາງຄົນຍັງຍຶດຫມັ້ນໄປນະມັດສະການວັດຢາຊືຄຸນິ.ແຕ່ທ່ານໂກອິຊຸມິພັດບໍ່ເອົາຫົວຊານຳການຕັກເຕືອນອັນເຄັ່ງຂຶມດ້ວຍເຈຕະນາດີຂອງຝ່າຍຈີນ,ບໍ່ເອົາຫົວຊານຳການຄັດຄ້ານຢ່າງຮຸນແຮງຂອງມວນຊົນພາຍໃນປະເທດຍີ່ປຸ່ນ,ບໍ່ເອົາຫົວຊານຳການກ່າວປະນາມຢ່າງຮຸນແຮງຂອງປະຊາຄົມໂລກ,ແລ້ວໄປນະມັດສະການວັດຢາຊືຄຸນິຢ່າງບັງອາດອີກເທື່ອຫນຶ່ງ.
ເລື່ອງນີ້ກໍ່ເຮັດໃຫ້ພາຍໃນປະເທດຍີ່ປຸ່ນເກີດມີການຖົກຖຽງກັນແລະອະພິປາຍກັນ.ການຢັ່ງປະຊາມະຕິໃນມໍ່ໆນີ້ຢູ່ຍີ່ປຸ່ນສະແດງໃຫ້ເຫັນວ່າ,ມວນຊົນຜູ່ຄັດຄ້ານນາຍົກລັດຖະມົນຕີໄປນະມັດສະການວັດຢາຊືຄຸນິນັ້ນໄດ້ເພີ່ມຂຶ້ນຮອດ60%ແລ້ວ.ສາສະດາຈານກ່າວຫົງ ຫົວຫນ້າຫ້ອງຄົ້ນຄວ້າການເມືອງຂອງສະຖາບັນຄົ້ນຄວ້າຍີ່ປຸ່ນສັງກັດສະພາບັນດິດວິທະຍາສາດສັງຄົມຈີນເຫັນວ່າ,ປະຕິກິລິຍາພາຍໃນປະເທດຍີ່ປຸ່ນສະແດງໃຫ້ເຫັນວ່າຫາງສຽງກັບມວນຊົນມີການຮັບຮູ້ຢ່າງພາວະວິໃສແລະຈະແຈ້ງຕໍ່ບັນຫາວັດຢາຊືຄຸນິ,ສະນັ້ນ,ຄົນທັງຫລາຍຈິ່ງຄອງຄອຍໃຫ້ນັກການເມືອງຍີ່ປຸ່ນຊຸດຫນ້າແກ້ໄຂບັນຫານີ້ຢ່າງສະຫລາດແລະໃຈເຢັນກວ່ານີ້.
ທ່ານລິວຈ້ຽນຊ່າວ ໂຄສົກກະຊວງການຕ່າງປະເທດຈີນກໍ່ກ່າວວ່າ,"ບົນພື້ນຖານເອກະສານການເມືອງສາມສະບັບຈີນຍີ່ປຸ່ນ,ລັດຖະບານແລະປະຊາຊົນຈີນຈະພ້ອມກັບນັກການເມືອງແລະປະຊາຊົນຍີ່ປຸ່ນອັນໄພສານທີ່ຖະຫນຸຖະຫນອມແລະທຸ່ມເຫື່ອເທແຮງເຂົ້າໃນການຮັກສາມິດຕະພາບຈີນຍີ່ປຸ່ນ,ອີງໃສ່ນ້ຳໃຈ"ຖືປະຫວັດສາດເປັນແວ່ນແຍງ,ມຸ້ງຫນ້າໄປສູ່ອະນາຄົດ",ຍຶດຫມັ້ນທຸ່ມເຫື່ອເທແຮງເຂົ້າໃນການໃຫ້ສອງປະເທດຢູ່ຮ່ວມກັນໂດຍສັນຕິ,ມີມິດຕະພາບຕໍ່ກັນທຸກເຊັ່ນຄົນ,ຮ່ວມມືກັນແບບຕ່າງຝ່າຍຕ່າງມີຜົນປະໂຫຍດ,ພ້ອມກັນພັດທະນາ.ພວກຂ້າພະເຈົ້າເຊື່ອວ່າ,ບຸກຄົນຜູ່ເຫັນກວ້າງມອງໄກໃນວົງການຕ່າງໆຂອງຍີ່ປຸ່ນຈະໄປຕາມປ່ອງລອງຕາມແປວຂອງກະແສປະຫວັດສາດ,ອອກແຮງລົບລ້າງສິ່ງຂັດຂວາງດ້ານການເມືອງ,ແລ້ວຊຸກຍູ້ໃຫ້ການພົວພັນລະຫວ່າງຈີນຍີ່ປຸ່ນກັບຄືນເຂົ້າສູ່ວົງໂຄຈອນທີ່ຂະຫຍາຍຕົວຢ່າງເປັນປົກກະຕິໂດຍໄວເທົ່າທີ່ຈະໄວໄດ້."
|
|
|
