|
|
 |
| (GMT+08:00)
2006-08-17 15:54:23
|
 |
|
ຈີນໃຊ້ເຄື່ອງມືເຕັກນິກວິທະຍາສາດຮັກສາສີສັນຂອງຮູບຫຸ່ນທະຫານແລະມ້າຊິນຊີຮອງເຕ້(ສຽງ)
cri
Author: shuo
|
ຮູບຫຸ່ນທະຫານແລະມ້າຊິນຊີຮອງເຕ້ແມ່ນເຄື່ອງທີ່ຝັງຮ່ວມກັບສົບຂອງຊິນຊີຮອງເຕ້ ເຈົ້າຊີວິດອົງທຳອິດໃນປະຫວັດສາດຈີນ,ໄດ້ນາມມະຍົດເປັນສິ່ງອັດສະຈັນແຫ່ງທີ8ຂອງໂລກ.ຫຼາຍປີມານີ້,ຮູບຫຸ່ນທະຫານແລະມ້າຊິນຊີຮອງເຕ້ໄດ້ຕາງໜ້າຈີນໄປວາງສະແດງຢູ່ຫຼາຍປະເທດໃນໂລກ,ເປັນທູດແລກປ່ຽນວັດທະນະທຳລະຫວ່າງຈີນກັບປະເທດຕ່າງໆ.ແຕ່ວ່າ,ຮູບປັ້ນດິນເຜົາທີ່ໄດ້ຝັງຢູ່ໃຕ້ດິນຫຼາຍພັນປີເຫຼົ່ານີ້ເມື່ອຖືກອາກາດ,ສີສັນລວດລາຍທີ່ແຕ້ມຢູ່ຮູບນອກກໍຄ່ອຍໆສູນຫາຍໄປຍ້ອນເກີດການປ່ຽນແປງທາງເຄມີກັບອັອກຊີແຊນ.ເພື່ອຮັກສາສີສັນຂອງຮູບປັ້ນທະຫານແລະມ້າຢ່າງໄດ້ຜົນ,ພະນັກງານຮັກສາວັດຖຸ ບູຮານຂອງຈີນໄດ້ດຳເນີນການຄົ້ນຄວ້າຢ່າງຫຼວງຫຼາຍ.ພວກເພິ່ນໄດ້ໃຊ້ວິທີຫຍັງຈຶ່ງເຮັດໃຫ້ຮູບປັ້ນດິນເຜົາເຫຼົ່ານີ້ຮັກສາສີສັນໄວ້ໄດ້ຄືເກົ່າ?ໃນລາຍການສວນວິທະຍາສາດແລະການສຶກສາພາກນີ້,ຂໍເຊີນທ່ານຟັງບົດແຈ້ງຂ່າວຂອງນັກຂ່າວວິທະຍຸພວກເຮົາ.
ໃນລະດູໃບໄມ້ປົ່ງປີ1974,ຢູ່ເມືອງລີນທົງທີ່ຕັ້ງຢູ່ຫ່າງຈາກເມືອງຊີ່ອ່ານ ເທດສະບານແຂວງສານຊີ່37ກິໂລແມັດ,ໃນເວລາຊາວກະສິກອນທ້ອງຖິ່ນດັ່ງກ່າວຂຸດນ້ຳສ້າງນັ້ນ,ໄດ້ຂຸດຖືກແຜ່ນກະເບື້ອງແຕກຂອງຮູບປັ້ນດິນເຜົາຈຳນວນໜຶ່ງທີ່ເລິກລົງໄປໃນດິນ2ແມັດ ກວ່າ.ການຄົ້ນພົບອັນບັງເອີນດັ່ງກ່າວໄດ້ຮັບຄວາມເອົາໃຈໃສ່ຢ່າງສູງຈາກພາກສ່ວນບູຮານຄະດີຂອງຈີນ,ວຽກງານຂຸດຄົ້ນບູຮານຄະດີທີ່ປະຕິບັດແຕ່ນັ້ນມາໄດ້ເປີດເຜີຍໂສມໜ້າອັນເລິກລັບຂອງສຸສານຊິນຊີຮອງເຕ້ ເຊິ່ງເປັນຄັງສາງປະເສີດດ້ານວັດທະນະທຳທີ່ໄດ້ຝັງຢູ່ໃຕ້ດິນເປັນເວລາ2200ກວ່າປີມາແລ້ວ.
ເມື່ອຍ່າງເຂົ້າພະລາດຊະວັງໃຕ້ດິນທີ່ຍິ່ງໃຫຍ່ສະຫງ່າແຫ່ງນີ້,ຈະເຫັນຮູບປັ້ນດິນເຜົາທະ ຫານຫຼາຍພັນໂຕທີ່ໃຫຍ່ສ່ຳຄົນແທ້,ໃນທ່າທາງອົງອາດສະຫງ່າຜ່າເຜີຍ,ສິ່ງທີ່ເຮັດໃຫ້ຄົນຮູ້ສຶກອັດສະຈັນທີ່ສຸດແມ່ນເຄື່ອງນຸ່ງແລະວາດຊົງຂອງຮູບປັ້ນເຫຼົ່ານີ້ຕ່າງກັນໝົດທຸກໂຕ.ນອກນີ້,ຍັງມີຮູບປັ້ນມ້າທີ່ໃຫຍ່ສ່ຳມ້າແທ້,ແຕ່ລົດສູ້ຣົບນຳຫຼັງ.ຮູບປັ້ນເຫຼົ່ານີ້ສ່ວນຫຼາຍເປັນສີຂີ້ເຖົ່າ,ແຕ່ກໍມີບາງໂຕໃສ່ສີທີ່ສົດໃສທີ່ໄດ້ເຮັດໃຫ້ພວກເຮົາສົນໃຈນຳທີ່ສຸດ.
ທ່ານໂຈ່ວເຖ ນັກຄົ້ນຄວ້າຂອງຫໍພິພິດທະພັນຮູບປັ້ນທະຫານແລະມ້າຊິນຊີຮອງເຕ້ໄດ້ແກ້ບັນຫາດັ່ງກ່າວໃຫ້ພວກເຮົາ.ທ່ານເວົ້າວ່າ,ຕອນທີ່ຫາກໍຂຸດອອກຈາກດິນ,ຮູບປັ້ນທະ ຫານແລະມ້າສ່ວນຫຼາຍຍັງມີສີທີ່ສົດໃສ,ທະຫານມີຜົມສີດຳ,ຜິວສີດຳແດງ,ເສື້ອເກາະສີໝາກກະເບົາແລະແຖບຜ້າສີແດງເປັນຕົ້ນ.ແຕ່ວ່າ,ເມື່ອຂຸດອອກຈາກດິນແລ້ວ,ພໍສຳຜັດກັບອາກາດ,ສີທີ່ສົດໃສກໍຫາຍໄປໃນເວລາສັ້ນໆ.ທ່ານເວົ້າວ່າ:"ລວດລາຍທີ່ມີຫຼາຍສີສັນ ຂອງຮູບປັ້ນທະຫານແລະມ້າຖືກທຳລາຍຕົ້ນຕໍມາຈາກສາເຫດສອງຂໍ້:ໜຶ່ງ,ເມື່ອໄດ້ຝັງຢູ່ໃຕ້ດິນ2ພັນກວ່າປີແລ້ວ,ຊັ້ນນ້ຳສີທີ່ຢູ່ຮູບນອກລອກອອກຕົກສີ;ອັນທີສອງແມ່ນ,ຢູ່ຊັ້ນນ້ຳສີປົນດ້ວຍນ້ຳຢາງ,ເມື່ອຂຸດອອກຈາກດິນແລ້ວ,ເກີດການປ່ຽນແປງທາງເຄມີກັບອັອກຊີແຊນ,ຈຶ່ງສູນຫາຍໄປຢ່າງວ່ອງໄວ."
ໂດຍປະເຊີນກັບບັນຫາທີ່ຫຍຸ້ງຍາກດັ່ງກ່າວ,ຫໍພິພິດທະພັນຮູບປັ້ນທະຫານແລະມ້າຊິນຊີຮອງເຕ້ໄດ້ລົງທຶນແລະໃຊ້ແຮງງານຫຼາກຫຼາຍ,ສ້າງຕັ້ງໜ່ວຍຄົ້ນຄວ້າການຮັກສາລວດ ລາຍທີ່ມີສີສັນຂອງຮູບປັ້ນ.ພວກເຂົາເຈົ້າໄດ້ດຳເນີນການທົດລອງຫຼາຍຢ່າງ,ແລະຕັ້ງໜ້າຮ່ວມມືກັບອົງການຄົ້ນຄວ້າວິທະຍາດສາດທີ່ກ່ຽວຂ້ອງຂອງຕ່າງປະເທດ,ຈຶ່ງຊອກໄດ້ວິທີສອງຢ່າງເພື່ອຮັກສາສີສັນລວດລາຍຂອງຮູບຫຸ່ນທະຫານແລະມ້າຊິນຊີຮອງເຕ້ຢ່າງບັງເກີດຜົນ.
ວິທີໜຶ່ງແມ່ນ,ພາຍໃນ4ນາທີຫຼັງຈາກຂຸດອອກຈາກດິນ,ຕ້ອງເຮັດໃຫ້ຮູບປັ້ນແຂງ,ແລ້ວຍ້າຍຮູບປັ້ນໄປບ່ອນທີ່ມີອູນຫະພູມແລະຄວາມຊຸ່ມສະໝ່ຳສະເໝີ,ນາຍຊ່າງໃຊ້ມີດນ້ອຍໆແລະຟອຍແລບໆແກະແລະປັດຂີ້ດິນທີ່ຕິດຢູ່ນອກລວດລາຍອອກໝົດ.ຖ້າຢາກຮັກສາສີສັນລວດລາຍຂອງຮູບປັ້ນໂຕໜຶ່ງດ້ວຍວິທີດັ່ງກ່າວໃຫ້ແລ້ວ,ຕ້ອງໃຊ້ເວລາໜຶ່ງປີ.
ນັກຄົ້ນຄວ້າວິທະຍາສາດໄດ້ໃຊ້ວິທີດັ່ງກ່າວຮັກສາສີສັນລວດລາຍຂອງຮູບປັ້ນທະຫານ10ໂຕທີ່ຫາກໍຂຸດອອກມາ.ເມື່ອໄດ້ສັງເກດເບິ່ງເກືອບສອງປີແລ້ວ,ສີຂອງຮູບປັ້ນ10ໂຕນີ້ຍັງສົດໃສແລະເປັນທຳມະຊາດ.ສະນັ້ນ,ໜ່ວຍຜູ້ຊ່ຽວຊານຂອງກົມວັດຖຸບູຮານແຫ່ງຊາດຈີນຈຶ່ງຢືນຢັນວ່າ,ຜົນສຳເລັດດ້ານວິທະຍາສາດເຕັກນິກດັ່ງກ່າວໄດ້ບັນລຸຄວາມກ້າວໜ້າລະດັບໂລກໃນວຽກງານຮັກສາວັດຖຸບູຮານທີ່ເຮັດດ້ວຍດິນເຜົາແລະທີ່ມີສີສັນ ລວດລາຍ.
ມີວິທີອີກແນວໜຶ່ງອາດສາມາດຟື້ນຟູສີສັນເດີມຂອງຮູບປັ້ນດິນເຜົາທີ່ໄດ້ຕົກສີໄປແລ້ວ. ນັກວິທະຍາສາດຄົ້ນພົບວ່າ,ໃນສະໄໝບູຮານ,ຄົນລາດຊະວົງຊິນໄດ້ທານ້ຳຢາງຊັ້ນໜຶ່ງໃສ່ຮູບປັ້ນດິນເຜົາກ່ອນຈະແຕ້ມສີໃສ່,ແຕ່ເມື່ອໄດ້ຜ່ານມາ2ພັນກວ່າປີແລ້ວ,ນ້ຳຢາງຄ່ອຍໆແຫ້ງແລະແຕກແຫງ,ນ້ຳສີກໍລອກອອກ.ເພື່ອແກ້ບັນຫາດັ່ງກ່າວ,ຜູ້ຊ່ຽວຊານດ້ານບູຮານຄະດີຂອງຈີນແລະຕ່າງປະເທດໄດ້ທົດລອງທາຢາງກາວໃນສະໄໝນີ້ໃສ່ກະເບື້ອງແຕກທີ່ສີສັນລວດລາຍລອກອອກແລ້ວ,ແລ້ວໃຊ້ລັງສີໄຟຟ້າເອເລັກໂຕຼນິກພະລັງສູງສ່ອງໃສ່,ເຮັດໃຫ້ນ້ຳຢາງຮັກສາຕິດຢູ່ຕາມໂຕຮູບປັ້ນຢ່າງໝັ້ນແກ່ນ.ປະຈຸບັນນີ້,ເມື່ອໄດ້ສັງເກດເບິ່ງຫຼາຍປີແລ້ວ,ສີສັນລວດລາຍທົນດີ.
ຜູ້ຊ່ຽວຊານທີ່ກ່ຽວຂ້ອງກ່າວວ່າ,ໝາກຜົນທາງວິທະຍາສາດເຕັກນິກເຫຼົ່ານີ້ບໍ່ພຽງແຕ່ເຮັດໃຫ້ຮູບຫຸ່ນທະຫານແລະມ້າຊິນຊີຮອງເຕ້ຍັງຮັກສາສີສັນເດີມເມື່ອ2ພັນກວ່າປີກ່ອນທໍ່ນັ້ນ, ຍັງໄດ້ສະໜອງຂໍ້ມູນອັນລ້ຳຄ່າໃຫ້ແກ່ການຄົ້ນຄວ້າບັນຫາປະຫວັດສາດຕ່າງໆ ເຊັ່ນສີໄມ້ລາຍມືແຕ້ມລວດລາຍແລະສີສັນຂອງເຄື່ອງນຸ່ງເປັນຕົ້ນ.ແຕ່ວ່າ,ເວົ້າສຳລັບນັກຄົ້ນຄວ້າວິທະຍາສາດຂອງຫໍພິພິດທະພັນຮູບຫຸ່ນທະຫານແລະມ້າຊິນຊີຮອງເຕ້ແລ້ວ,ວຽກງານຍັງບໍ່ທັນສິ້ນສຸດເທື່ອ,ການຄົ້ນຄວ້າກ່ຽວກັບການຮັກສາສີສັນລວດລາຍຂອງຮູບປັ້ນຍັງດຳເນີນຢູ່ຕໍ່ໄປ.ທ່ານເລີຍຢູ້ພີງ ຮອງຫົວໜ້າຫໍພິພິດທະພັນແຫ່ງນີ້ເວົ້າວ່າ:"ການຮັກສາສີສັນລວດລາຍຂອງຮູບປັ້ນບໍ່ແມ່ນຈຸດປະສົງສຸດທ້າຍຂອງພວກເຮົາ,ສຳຄັນກວ່ານັ້ນແມ່ນ,ວາງສະແດງຮູບປັ້ນໃຫ້ນັກທອ່ງທ່ຽວຈີນແລະຕ່າງປະເທດໄດ້ຊົມ,ເພື່ອໂຄສະນາວັດທະນະທຳດັ້ງເດີມອັນດີເລີດຂອງຈີນຕໍ່ຊາວໂລກ."
ສະນັ້ນ,ໃນຂະນະທີ່ຄົ້ນຄວ້າປັບປຸງເຕັກນິກຮັກສາສີສັນລວດລາຍຂອງຮູບປັ້ນທີ່ມີຢູ່ແລ້ວໃນປະຈຸບັນໃຫ້ດີຂຶ້ນຕື່ມອີກ,ຫໍພິພິດທະພັນຮູບຫຸ່ນທະຫານແລະມ້າຊິນຊີຮອງເຕ້ໄດ້ດຳເນີນການຄົ້ນຄວ້າເພື່ອແກ້ໄຂບັນຫາຕ່າງໆ ເຊັ່ນສີສັນລວດລາຍຂອງຮູບປັ້ນທີ່ຕົກໂໝກດ້ວຍການໃຊ້ມາດຕະການປ້ອງກັນຕົກໂໝກທີ່ໄດ້ຜົນ.ປະຈຸບັນນີ້,ບັນຫາການຕົກໂໝກໃນຂຸມໄດ້ຮັບການແກ້ໄຂໝົດແລ້ວ.
ນັບແຕ່ຫໍພິພິດທະພັນຮູບຫຸ່ນທະຫານແລະມ້າຊິນຊີຮອງເຕ້ເປີດບໍລິການເປັນຕົ້ນມາ,ໄດ້ຕ້ອນຮັບນັກທ່ອງທ່ຽວຈີນແລະຕ່າງປະເທດ55ລ້ານກວ່າຄົນ,ໃນນັ້ນມີນັກທ່ອງທ່ຽວ ຕ່າງປະເທດປະມານ5ລ້ານ5ແສນຄົນ,ມີປະມຸກລັດຫຼືເຈົ້າໜ້າທີ່ຊັ້ນສູງຂອງລັດ140ກວ່າຄົນເຄີຍມາຢ້ຽມຢາມ.ໃນນັ້ນ,ມີຫຼາຍໆທ່ານໄດ້ຍ້ອງຍໍສັນລະເສີນຈີນທີ່ໄດ້ທຳຄວາມພະຍາຍາມເພື່ອປົກປັກຮັກສາຮູບປັ້ນທະຫານແລະມ້າຊິນຊີຮອງເຕ້.ໃນເວລາໄປເອົາຂ່າວ, ນັກຂ່າວວິທະຍຸພວກເຮົາໄດ້ພໍ້ນັກທ່ອງທ່ຽວຝຣັ່ງຜູ້ໜຶ່ງ,ທ່ານຊື່ວ່າຢັງ ອັນດຼູ.ທ່ານບອກນັກຂ່າວວ່າ,ທ່ານຮູ້ສຶກງຶດງໍ້ອັດສະຈັນຕໍ່ໝົດທຸກຢ່າງທີ່ໄດ້ເຫັນຢູ່ນີ້:"ຮູບຫຸ່ນທະຫານແລະມ້າຊິນຊີຮອງເຕ້ອາດເວົ້າໄດ້ວ່າແມ່ນສຸສານເຈົ້າຊີວິດທີ່ໃຫຍ່ກວ່າໝູ່ແລະຮັກສາໄວ້ໄດ້ຢ່າງຄົບຖ້ວນທີ່ສຸດໃນໂລກ.ເມື່ອໄດ້ມາເຫັນ,ຂ້າພະເຈົ້າໄດ້ຮັບຮູ້ເຖິງຄວາມພະຍາຍາມອັນໃຫຍ່ຫຼວງຂອງຈີນໃນການປົກປັກຮັກສາຮ່ອງຮອຍວັດທະນະທຳປະຫວັດສາດ."
|
|
|
