|
|
 |
| (GMT+08:00)
2006-08-18 17:22:42
|
 |
|
ທ່ານນິງຮ້າວ ຜູ້ກຳກັບການສະແດງຂອງຈີນ
cri
Author: mo
|
ຫວ່າງມໍ່ໆນີ້, ຮູບເງົາຈີນເລື່ອງ"ກ້ອນຫີນທີ່ປ່ວງບ້າ"ໄດ້ສ້າງສະຖິຕິທີ່ມີຄົນໄປເບິ່ງຫຼາຍທີ່ສຸດ, ຮູບເງົາເລື່ອງນີ້ລົງທຶນບໍ່ຮອດ 5 ລ້ານຢວນ, ປັດຈຸບັນ, ຈຳນວນເງິນຂາຍປີ້ຢູ່ແຫ່ງຕ່າງໆຂອງຈີນໄດ້ກາຍ 3 ເທົ່າຂອງຍອດຈຳນວນທຶນສ້າງຟີມແລ້ວ, ທ່ານນິງຮ້າວ ຜູ້ກຳກັບການສະແດງຂອງຮູບເງົາເລື່ອງນີ້ໄດ້ກາຍເປັນຜູ້ກຳກັບການສະແດງທີ່ນັກທຸລະກິດລົງທຶນຮູບເງົາທັງຫຼາຍເຫັນໄປໃນແງ່ດີ.
ຮູບເງົາເລື່ອງ"ກ້ອນຫີນທີ່ປ່ວງບ້າ"ແມ່ນຮູບເງົາລື່ນເລີງອ້ອຍຕ້ອຍທີ່ຖືຜູ້ຊາຍເປັນພະເອກແລະເອົາໃຈໃສ່ແຕ່ໂຄງເລື່ອງ, ແມ່ນຜູ້ກຳກັບການສະແດງແລະພະເອກຫຼາຍຄົນຮ່ວມກັນປະດິດສ້າງ. ຮູບເງົາເລື່ອງນີ້ແມ່ນເລົ່າເລື່ອງທີ່ເກີດຂຶ້ນໃນໂຮງງານສິລະປະຫັດຖະກຳແຫ່ງໜຶ່ງທີ່ມໍ່ຈະຫຼົ້ມແຫຼວຢູ່ນະຄອນຈົ່ງກິ່ງ ພາກຕາເວັນຕົກສຽງໃຕ້ຂອງຈີນ. ໃນເວລາມ້າງໂຮງຈັກເກົ່ານັ້ນ, ໄດ້ປະກົດເຫັນແກ້ວມໍລະກົດທີ່ລ້ຳຄ່າທີ່ສຸດກ້ອນໜຶ່ງ. ເພື່ອໃຫ້ໂຮງງານຟື້ນຊີວິດໃໝ່, ຫົວໜ້າໂຮງງານຕົກລົງປະມູນຂາຍແກ້ວມໍລະກົດກ້ອນນີ້. ແຕ່ບໍ່ນຶກວ່າ, ໂຈນສາກົນແລະຂີ້ລັກທ້ອງຖິ່ນລ້ວນແຕ່ສົນໃຈແກ້ວກ້ອນນີ້. ພວກເຂົາເຈົ້າຕ່າງໃຊ້ສີມືຂອງໃຜລາວເຂົ້າໃກ້ແກ້ວມໍລະກົດເທື່ອລະກ້າວ. ໃນຂະນະທີ່ພວກເຂົາເຈົ້າຂັດຂວາງກັນນັ້ນ, ຍັງຕ້ອງປະເຊີນກັບທ່ານປ່າວຊື້ຫົງ ຫົວໜ້າພະແນກປ້ອງກັນຄວາມສະຫງົບຂອງໂຮງງານດັ່ງກ່າວ ເຊິ່ງເປັນອຸປະສັກໃຫຍ່ກວ່າໝູ່. ເມື່ອລອງລິດກັນຢ່າງເປີດເຜີຍແລະທາງລັບ, ແລະແລກປ່ຽນແກ້ວມໍລະກົດແທ້ແລະປອມຫຼາຍຫຼົບຫຼາຍຕ່າວແລ້ວ, ຂີ້ລັກສອງພວກນີ້ຖືກຢອກໃຍຢ່າງສິ້ນເຊີງໃນທີ່ສຸດ.
ເລື່ອງ"ກ້ອນຫີນທີ່ປ່ວງບ້າ"ໄດ້ດຳເນີນເລື້ອງດ້ວຍຫຼາຍເສັ້ນສາຍຕາມກາລະເວລາທີ່ຕ່າງກັນ, ໃນດ້ານສ້າງບຸກຄະລິກຂອງຕົວບຸກຄົນນັ້ນຍິ່ງພົ້ນເດັ່ນ, ຕົວຢ່າງຄື: ຜູ້ບໍ່ມີວັດທະນະທຳຫຼາຍປານໃດພັດເວົ້າພາສາທີ່ສຸພາບຮຽບຮ້ອຍແລະອື່ນໆ, ສ່ວນຕົວສະແດງໃນຟີມເວົ້າພາສາຈົ່ງກິ່ງ ພາສາທ້ອງຖິ່ນດ້ວຍກັນ, ຍິ່ງເຮັດໃຫ້ຜູ້ຊົມຫົວຕະຫຼອດ. ເມື່ອຖາມທ່ານນິງຮ້າວວ່າ, ການຖ່າຍຟີມຕະຫຼົກແບບນີ້, ຢູ່ບ່ອນຖ່າຍທຳຈະມີສຽງຫົວເລື່ອຍໆບໍ່? ທ່ານນິງຮ້າວເວົ້າວ່າ:
"ບໍ່ແມ່ນ, ຢູ່ບ່ອນຖ່າຍທຳເຄັ່ງຂືມຫຼາຍ, ເກືອບບໍ່ມີສຽງຫົວເໝືອນທີ່ຄົນທັງຫຼາຍຄິດ. ມີໜ້ອຍໜຶ່ງ, ແຕ່ບໍ່ຫຼາຍປານໃດ, ຍ້ອນກ່ອນຖ່າຍທຳ ໃຜໆກໍຕັ້ງໃຈອອກແບບ, ແລະໄດ້ກຽມພ້ອມທາງດ້ານຈິດໃຈແລ້ວ, ຄິດແຕ່ວ່າ, ຈະສະແດງອອກມາດ້ວຍວິທີຫຍັງ, ເມື່ອຄົນທັງຫຼາຍເອົາໃຈໃສ່ແຕ່ເລື່ອງໃດເລື່ອງໜຶ່ງ, ມັນກໍບໍ່ໜ້າຫົວແລ້ວ, ທີ່ຈິງແລ້ວ, ບັນຍາກາດຢູ່ບ່ອນຖ່າຍທຳແມ່ນເຄັ່ງຮ້ອນຫຼາຍ."
ທ່ານນິງຮ້າວແມ່ນຊາວໜຸ່ມຜູ້ກຳກັບການສະແດງທີ່ໂຊກດີ. ບໍລິສັດລຶ້ນເລິງອິງອີ້ຈຳກັດທີ່ທ່ານລິວເຕີຮວາ ດາລາເພງແລະນັກສະແດງທີ່ມີຊື່ສຽງຂອງຮົງກົງສ້າງຕັ້ງຂຶ້ນໃນປີກາຍນີ້ໄດ້ເລີ່ມປະຕິບັດແຜນການ"ດາລາໃໝ່ຜູ້ກຳກັບການສະແດງຂອງອາຊີ", ໄດ້ອອກທຶນຊ່ອຍເຫຼືອຊາວໜຸ່ມຜູ້ກຳກັບການສະແດງອາຊີ 6 ຄົນຖ່າຍທຳຮູບເງົາ, ທ່ານນິງຮ້າວກໍແມ່ນຜູ້ກຳກັບການສະແດງຂອງເຂດໃນຈີນພຽງຜູ້ດຽວໃນນັ້ນ. ທ່ານນິງຮ້າວໄດ້ກຳໂອກາດນີ້, ແລະພົ້ນເດັ່ນຂຶ້ນໃນວົງການຮູບເງົາທີ່ມີການແກ່ງແຍ່ງຢ່າງດຸເດືອດນັ້ນຢ່າງໄວວາ.
ທ່ານນິງຮ້າວ ປີນີ້ອາຍຸ 29 ປີ, ເກີດຢູ່ເມືອງທ້າຍຢວນແຂວງຊ່ານສີ່, ແມ່ນລູກຜູ້ດຽວຮຸ້ນທຳອິດຂອງຈີນ. ໃນຍາມຮຽນຢູ່ມັດທະຍົມຕົ້ນ, ທ່ານນິງຮ້າວມັກແຕ້ມຮູບແລະດົນຕີ, ຍັງໄດ້ສ້າງວົງດົນຕີຄະນະໜຶ່ງ, ຄູສອນຖືວ່າແມ່ນບໍ່ຕັ້ງໃຈຮ່ຳຮຽນ. ທ່ານນິງຮ້າວທີ່ມີບຸກຄະລິກເລີຍບໍ່ໄປຮຽນມັດທະຍົມປາຍ, ພັດໄປຮຽນວິຈິດຕະກຳຢູ່ໂຮງຮຽນຊັ້ນກາງຫຼັງໜຶ່ງຢູ່ເມືອງທ້າຍຢວນ. ປີ 1996, ເມື່ອຮຽນຈົບຈາກໂຮງຮຽນຊັ້ນກາງແລ້ວ, ທ່ານນິງຮ້າວໄດ້ປະເຊີນການເລືອກເຟ້ນ. ທ່ານເວົ້າວ່າ:
"ເມື່ອຮຽນຈົບຈາກໂຮງຮຽນຊັ້ນກາງແລ້ວ, ຖືກຈັດໄປເຮັດວຽກຢູ່ຄະນະລະຄອນເມືອງທ້າຍຢວນ, ເຮັດວຽກປີໜຶ່ງແລ້ວ, ຮູ້ສຶກວ່າ, ສະພາບແວດລ້ອມຂອງແຫ່ງນັ້ນບໍ່ມ່ວນ, ວຽກກໍບໍ່ຫຼາຍ, ຂ້ອຍຄິດໄປຄິດມາ, ເວົ້ານຳຕົນເອງວ່າຊິເຮັດແນວໃດ? ຂ້ອຍອາຍຸ 20 ປີແລ້ວ, ເລີຍເວົ້ານຳພໍ່ແມ່ວ່າຂ້ອຍເຮັດບໍ່ໄຫວແລ້ວ, ຂ້ອຍຕ້ອງໜີຈາກແຫ່ງນັ້ນ, ພໍ່ແມ່ບໍ່ເຂົ້າໃຈ, ແຕ່ພໍ່ຍັງໃຫ້ 2 ພັນຢວນແກ່ຂ້ອຍ, ເວົ້າວ່າລູກໄປສາ."
ພໍ່ແມ່ຂອງທ່ານນີງຮ້າວຄິດວ່າ ລູກແມ່ນຢາກໄປທ່ຽວເບິ່ງທາງນອກຊື່ໆ, ບໍ່ມີເງິນໃຊ້ແລ້ວກໍຈະກັບບ້ານ, ແຕ່ທ່ານນິງຮ້າວບໍ່ໄດ້ກັບ. ທ່ານໄປຮອດປັກກິ່ງ, ເຊົ່າຢູ່ຫ້ອງໃຕ້ດິນ, ເລີ່ມກຶກກອງອະນາຄົດແລະຊີວິດຂອງຕົນ. ຫຼັງຈາກນັ້ນ, ທ່ານໄດ້ຮຽນຖ່າຍຮູບ, ຖ່າຍຮູບໃຫ້ດາລາ, ແລ້ວໄປຮຽນຕໍ່ຢູ່ວິທະຍາຄານຮູບເງົາປັກກິ່ງ, ສະສົມຄວາມຮູ້ເທື່ອລະກ້າວ, ແລະເລີ່ມເຂົ້າສູ່ວົງການຮູບເງົາແລະໂທລະພາບ. ປີ 2002, ທ່ານລິວເຕີຮວາຖືກໃຈນຳຮູບເງົາເລື່ອງ"ດິນຫຍ້າຂຽວ"ຂອງທ່ານນິງຮ້າວ, ເລີຍລົງທຶນໃຫ້. ຮູບເງົາເລື່ອງນີ້ໄດ້ສະແດງໃຫ້ເຫັນຄວາມສາມາດຂອງທ່ານນິງຮ້າວທີ່ເປັນຜູ້ກຳກັບການສະແດງ, ສະນັ້ນຈຶ່ງຖືກທ່ານລິວເຕີຮວາຈັດເຂົ້າໃນແຜນການ"ດາລາໃໝ່ຜູ້ກຳກັບການສະແດງຂອງອາຊີ".
ຕໍ່ຜົນສຳເລັດຂອງຮູບເງົາເລື່ອງ"ກ້ອນຫີນທີ່ປ່ວງບ້າ", ທ່ານນິງຮ້າວເວົ້າວ່າ, ທ່ານເອງຄິດແຕ່ຢາກຖ່າຍຮູບເງົາທີ່ມ່ວນໆ, ແລະມີຄົນເຂົ້າຊົມຫຼາຍ. ທ່ານເວົ້າວ່າ:
"ຂ້ອຍເລືອກຖ່າຍກ້ອນຫີນ, ແມ່ນຍ້ອນໄດ້ເບິ່ງສະພາວະຮູບເງົາຂອງໄຕ້ຫວັນ, ຮູ້ສຶກວ່າ, ຮູບເງົາຕ້ອງມີອຸດສາຫະກຳຂອງມັນ, ຖ້າຮູບເງົາອາໃສແຕ່ລັດຖະບານສະໜັບສະໜູນຫຼືຕິດຫ້ອຍຢູ່ນຳອຸດສາຫະກຳອື່ນຈິ່ງດຳລົງຄົງຕົວຢູ່ໄດ້, ຈະພັດທະນາບໍ່ດີ, ບໍ່ພຽງແຕ່ຮູບເງົາການຄ້າຂອງຈີນບໍ່ໄດ້ພັດທະນາ, ໃນສຸດທ້າຍ, ຮູບເງົາສິລະປະຂອງຈີນກໍບໍ່ມີກົກຮາກ, ບໍ່ມີດີນບຳລຸງ. ພວກເຮົາຈຶ່ງຄິດວ່າມີຄວາມອາດເປັນໄປໄດ້ບໍ່ທີ່ຖ່າຍຮູບເງົາທີ່ຕະຫຼາດຮັບຮອງເອົາ. ຖ້າວ່າເຈົ້າຖ່າຍຮູບເງົາແລ້ວຂາຍບໍ່ອອກ, ຊື້ເຂົ້າມາກິນບໍ່ໄດ້, ຈະດຳລົງຊີວິດແນວໃດ?"
ເລື່ອງຈິງໄດ້ຢັ້ງຢືນວ່າ, ຮູບເງົາເລື່ອງ"ກ້ອນຫີນທີ່ປ່ວງບ້າ"ທີ່ທ່ານນິງຮ້າວຖ່າຍນັ້ນແມ່ນຕະຫຼາດຮູບເງົາຈີນຕ້ອງການ. ຫຼັງຈາກຖ່າຍຮູບເງົາເລື່ອງນີ້ແລ້ວບໍ່ດົນ, ທ່ານນິງຮ້າວກໍໄດ້ເຊັນສັນຍາກັບບໍລິສັດCAA, ເຊິ່ງເປັນບໍລິສັດນາຍໜ້າແຫ່ງໜຶ່ງທີ່ໃຫຍ່ກວ່າໝູ່ຂອງອາເມລິກາ. ມີສະມາຊິກຄືທ່ານລີອານ, ທ່ານຈອນວູ, ແລະທ່ານສດິເວີນ ສະບຼິນເບີກເປັນຕົ້ນ. ຮູບເງົາເລື່ອງຕໍ່ໄປຂອງທ່ານນິງຮ້າວຄືເລື່ອງ"ລົດແຂ່ງສີແດງ"ກໍໄດ້ຮັບການລົງທຶນແລ້ວ. ນີ້ແມ່ນຮູບເງົາຕະຫຼົກທີ່ສະແດງເຖິງຊີວິດການເປັນຢູ່ຂອງສາມັນຊົນ.
(ຈົບ)
|
|
|
