|
ວັນທີ1ກໍລະກົດ,ທາງລົດໄຟຊີ່ງໄຫ-ຕິເບດ ເຊິ່ງເປັນກິດຈະການອັນຍິ່ງໃຫຍ່ຂອງຈີນໄດ້ເປີດບໍລິການແລ້ວ,ກິດຈະການດັ່ງກ່າວໄດ້ສະແດງໃຫ້ເຫັນຄວາມດຸໝັ່ນຂະຫຍັນພຽນແລະສະຕິປັນຍາຂອງຜູ້ກໍ່ສ້າງທາງລົດໄຟອັນໄພສານຂອງຈີນ,ເຊື່ອວ່າຜູ້ຟັງລາວທັງຫຼາຍກໍ່ໄດ້ຮູ້ຂ່າວທີ່ກ່ຽວກັບໂຄງການນີ້ໃນລາຍການຂ່າວແລະລາຍການບົດແຈ້ງຂ່າວສະພາບການຂອງຈີນໄປແລ້ວ,ຫວ່າງບໍ່ດົນມານີ້,ມີຜູ້ຟັງຢູ່ຫຼວງພະບາງຜູ້ໜຶ່ງໄດ້ຂຽນຈົດໝາຍມາຍັງພວກເຮົາໂດຍຂຽນວ່າ,"ຈີນໄດ້ສ້າງທາງລົດໄຟພູພຽງສາຍໜຶ່ງຢູ່ບ່ອນທີ່ສູງຈາກລະດັບນ້ຳທະເລກວ່າໝູ່ໃນໂລກ,ນີ້ຈະຊຸກຍູ້ການພັດທະນາເສດຖະກິດຂອງເຂດຕິເບດຢ່າງຫຼວງຫຼາຍ,ຊັບພະຍາກອນທ່ອງທ່ຽວອັນອຸດົມສົມບູນຂອງພູພຽງຊີ່ງໄຫ-ຕິເບດກໍ່ຈະໄດ້ບຸກເບີກຢ່າງມີປະສິດທິຜົນ.ຂ້າພະເຈົ້າໄດ້ຮູ້ດົນແລ້ວວ່າເມືອງລາຊາເຂດຕິເບດແມ່ນບ່ອນສັກສິດຂອງສາດສະໜາພຸດນິກາຍຕິເບດ,ຢູ່ພຸ້ນຍັງມີວັງໂປຕາລາທີ່ມີຊື່ສຽງ,ລາວກໍ່ແມ່ນປະເທດພຸດທະສາດສະໜາ,ດັ່ງນັ້ນຢາກໄປເຫັນແທ້ໆ,ໃນອະນາຄົດ,ຖ້າມີໂອກາດຈະຂີ່ລົດໄຟໄປທ່ຽວ,ຂໍໃຫ້ວິທະຍຸCRIແນະນຳວັງໂປຕາລາໃຫ້ຟັງກ່ອນໄດ້ບໍ່?"
ຜູ້ຟັງຜູ້ນີ້ເອົາໃຈໃສ່ນຳສະພາບຂອງຈີນຫຼາຍທີ່ສຸດ,ພວກເຮົາຮູ້ສຶກດີໃຈຫຼາຍທີ່ໄດ້ມີຜູ້ຟັງແບບນີ້,ພ້ອມກັນນີ້ກໍ່ຂອບໃຈເພິ່ນຫຼາຍ.ໃນລາຍການມື້ນີ້,ພວກເຮົາກໍ່ຈະຕອນສະໜອງຄວາມຕ້ອງການຂອງເພິ່ມດ້ວຍການແນະນຳໃຫ້ຮູ້ວັງໂປຕາລາເມືອງລາຊາເຂດຕິເບດຂອງຈີນ,ພ້ອມທັງໄປສຳຜັດວັດທະນະທຳຊົນເຜົ່າຕິເບດນຳກັນໂດຍຫຍໍ້.
ວັງໂປຕາລາຕັ້ງຢູ່ເທິງພູມາປູເຢີ ພາກຕາເວັນຕົກສຽງເໜືອຂອງເມືອງລາຊາເຂດຕິເບດ,ແມ່ນສິ່ງກໍ່ສ້າງແບບພະລາຊະວັງທີ່ມີຊື່ສຽງ,ແມ່ນສິ່ງຍອດຍິ່ງຂອງສິລະປະສະຖາປັດຕະຍະກຳບູຮານຂອງຊົນເຜົ່າຕິເບດ.
ວັງໂປຕາລາສ້າງຕາມພູ,ປັດຈຸບັນ,ກວມເນື້ອທີ່4ແສນ1ໝື່ນຕາແມັດ,ເນື່ອທີ່ກໍ່ສ້າງ1ແສນ3ໝື່ນຕາແມັດ,ຕຶກຫຼັກຂອງວັງມີ13ຊັ້ນ,ສູງ115ແມັດ,ສ້າງດ້ວຍຫີນແລະໄມ້ທັງໝົດ,ຢູ່ຫຼັງຄາຂອງວັງ5ຫຼັງໄດ້ປົກຫຸ້ມດ້ວຍກະເບື້ອງທອງທີ່ເຄືອບດ້ວຍຄຳ,ເຫຼື້ອມຍິບຍັບ,ສະຫງ່າຜ່າເຜີຍທີ່ສຸດ,ຈົນໄດ້ນາມມະຍົດເປັນ"ວັງສັກສິດຢູ່ເທິງພູພຽງ".
ວັງໂປຕາລາແມ່ນວັງລະດູໜາວຂອງພະດາໄລລາມາທຸກອົງ,ແລະກໍ່ແມ່ນສູນປົກຄອງຂອງຜູ້ປົກຄອງຕິເບດທີ່ປະຕິບັດລະບອບໂຮມການປົກຄອງກັບສາດສະໜາເຂົ້າເປັນອັນດຽວກັນໃນເມື່ອກ່ອນ,ແຕ່ພະດາໄລລາມາອົງທີ5,ເປັນຕົ້ນມາພິທີສາດສະໜາແລະການເມືອງອັນສຳຄັນລ້ວນແຕ່ຈັດຂຶ້ນຢູ່ແຫ່ງນີ້,ພ້ອມກັນນີ້,ຍັງແມ່ນບ່ອນຂຶ້ນໄຫວ້ທາດທີ່ບັນຈຸສົບຂອງພະດາໄລລາມາທຸກອົງ.
1 2 3
|
