|
ໃນຫລາຍປີມານີ້, ແຂວງຢຸນນານທີ່ຢູ່ພາກຕາເວັນຕົກສຽງໃຕ້ຂອງຈີນໄດ້ເສີມຂະຫຍາຍທ່າແຮງດ້ານພູມີພາກ,ນຳໃຊ້ໂອກາດຍຸດທະສາດຄື ການຮ່ວມມືທາງດ້ານເສດຖະກິດຢູ່ອະນຸພາກພື້ນແມ່ນ້ຳລ້ານຊ້າງແມ່ນ້ຳຂອງແລະການກໍ່ສ້າງເຂດການຄ້າເສລີຈີນກັບສະມາຄົມປະຊາຊາດອາຊີຕາເວັນອອກສຽງໃຕ້ຫລືອາຊຽນ, ໄດ້ຕັ້ງຫນ້າຮ່ວມມືແລະແລກປ່ຽນກັບບັນດາປະເທດອາຊຽນ, ສ້າງບຸກຄະລາກອນໃຫ້ມີຄວາມຮູ້ຄວາມສາມາດເພື່ອການຮ່ວມມືຢູ່ອະນຸພາກພື້ນດ້ວຍຫລາຍຮູບການ.
ເມື່ອເດືອນເມສາປີ 2005 ,ໃນກອງປະຊຸມວຽກງານກໍ່ສ້າງຊັບພະຍາ ກອນມະນຸດໃນການຮ່ວມມືເສດຖະກິດຢູ່ອະນຸພາກພື້ນອ່າງແມ່ນ້ຳຂອງຕອນລຸ່ມຫລື GMS ທີ່ຈັດຂຶ້ນຢູ່ໄທ, ຄະນະຜູ່ແທນລັດຖະບານຈີນໄດ້ວາງຂໍ້ສະເຫນີໃຫ້ຝຶກອົບຮົມຜູ່ມີຄວາມຮູ້ຄວາມສາມາດທີ່ອ່ວາຍຫນ້າໄປສູ່ປະເທດຢູ່ອະນຸພາກພື້ນແມ່ນ້ຳຂອງຢູ່ເມືອງຄຸນມິງ ແຂວງຢຸນນານຂອງຈີນ.ຫວ່າງມໍ່ໆນີ້, ນັກຂ່າວ CRI ໄດ້ຊາບຈາກພາກສ່ວນທີ່ກ່ຽວຂ້ອງຂອງແຂວງຢຸນນານວ່າ, ກໍ່ສ້າງຊັບພະຍາກອນມະນຸດ GMS ໄດ້ມີການວາງແຜນໄວ້ແລ້ວ, ແລະຈະເລີ່ມສ້າງຢູ່ເມືອງຄຸນມິງ ເທດສະບານແຂວງຢຸນນານໃນເດືອນກັນຍາປີນີ້.
ສູນກໍ່ສ້າງຊັບພະຍາກອນມະນຸດ GMS ຈີນຈະຕິດປ້າຍຢູ່ມະຫາວິທະ ຍາໄລສັບພະວິຊາຄຸນມິງໃນເດືອນກັນຍາປີນີ້,ເນື້ອໃນອົບຮົມແມ່ນຖືການອົບ ຮົມເຕັກນິກຕ່າງໆເປັນຕົ້ນຕໍ,ລວມທັງວິຊາອຸດສາຫະກຳ ວິຊາກະສິກຳ ວິຊາປ່າໄມ້ແລະວິຊາແພດສາດເປັນຕົ້ນ, ຍັງມີວິຊາບໍລິຫານແລະເສດຖະກິດ,ນອກນີ້ຍັງອາດຈະຈັດໃຫ້ມີການອົບຮົມພາສາຂອງປະເທດອາຊີອາຄະເນທີ່ຕ້ອງການດ່ວນ.
ໃນເວລາໃຫ້ສຳພາດຕໍ່ນັກຂ່າວ CRI, ທ່ານຈ່າງຊາວຫົງ ຮອງຫົວຫນ້າຫ້ອງການການຮ່ວມມືແລະແລກປ່ຽນກັບຕ່າງປະເທດຂອງພະແນກສຶກສາແຂວງຢຸນນານເວົ້າວ່າ:
ຫລັກການຫນຶ່ງທີ່ແຂວງຢຸນນານປະຕິບັດຍຸດທະສາດການສຶກສາ ນັ້ນແມ່ນເສີມຂະຫຍາຍທ່າແຮງດ້ານພູມີສາດແລະດ້ານຄວາມສະຫນິດສະຫນົມກັບບັນດາປະເທດອ້ອມຂ້າງ,ແລ້ວຮ່ວມມືກັບບັນດາປະເທດອາຊຽນ,ພ້ອມກັນອົບຮົມບຸກຄະລາກອນເພື່ອຕອບສະຫນອງໃຫ້ແກ່ເຂດການຄ້າເສລີຈີນອາຊຽນ.ສະນັ້ນ, ພວກຂ້າພະເຈົ້າໄດ້ວາງເປົ້າຫມາຍທີ່ວ່າສ້າງ ແຂວງຢຸນນານເປັນສູນອົບຮົມຜູ່ມີຄວາມຮູ້ຄວາມສາມາດຂອງຈີນທີ່ຈະເຮັດວຽກກັບອາຊຽນແລະອາຊີອາຄະເນ.ສູນກໍ່ສ້າງຊັບພະຍາກອນມະນຸດ GMS ຈີນກໍ່ແມ່ນປ່ອງຢ້ຽມປ່ອງຫນຶ່ງທີ່ພວກຂ້າພະເຈົ້າຮ່ວມມືແລະແລກປ່ຽນກັບບັນດາປະເທດຢູ່ອ້ອມຂ້າງ.
ໃນຫລາຍປີມານີ້, ແຂວງຢຸນນານໄດ້ເສີມຂະຫຍາຍທ່າແຮງດ້ານພູມີສາດທີ່ມີເອກະລັກພິເສດ, ຕັ້ງຫນ້າຊຸກຍູ້ການສຶກສາຊັ້ນສູງເປີດປະຕູສູ່ພາຍນອກ,ແລະຮຽນເອົາບົດຮຽນຂອງຕ່າງປະເທດ, ການແລກປ່ຽນແລະການຮ່ວມມືທາງດ້ານການສຶກສາໄດ້ຮັບຜົນຢ່າງເດັ່ນຊັດ.ທ່ານຈ່າງຊາວຫົງແນະນຳວ່າ:
ເພື່ອອົບຮົມຜູ່ມີຄວາມຮູ້ຄວາມສາມາດທີ່ຮູ້ການຮ່ວມມືລະຫວ່າງຊາດໂດຍສະເພາະແມ່ນຮູ້ການຮ່ວມມືຢູ່ອະນຸພາກພື້ນແມ່ນ້ຳຂອງ,ໂຮງຮຽນຊັ້ນສູງຂອງແຂວງຢຸນນານໄດ້ຕັ້ງຫນ້າຮ່ວມມືກັບປະເທດແລະເຂດແຄວ້ມຢູ່ອ້ອມຂ້າງ, ປັດຈຸບັນ, ແຂວງນີ້ໄດ້ກັບ 8 ປະເທດຢູ່ອ້ອມຂ້າງແລ້ວ, ໄດ້ສ້າງໂຄງການຮ່ວມມື 35 ໂຄງການໃນດ້ານການສອນພາສາຈີນ ການອົບຮົມຜູ່ມີຄວາມຮູ້ຄວາມສາມາດແລະການຮ່ວມກັນຄົ້ນຄວ້າ.
ວັນທີ 16 ທັນວາປີ 2005,ມະຫາວິທະຍາໄລສັບພະວິຊາຄຸນມິງກັບມະ ຫາວິທະຍາໄລແຫ່ງຊາດລາວໄດ້ຈັດພິທີເປີດຮຽນໃນລະດັບປະລິຍາໂທວິຊາການບໍລິຫານການເງິນສາກົນຢູ່ນະຄອນຫລວງວຽງຈັນສ.ປ.ປ. ລາວ,ທ່ານບໍ່ແສງຄຳ.ວົງດາລາ ວ່າການລັດຖະມົນຕີກະຊວງສຶກສາທິການຂອງລາວທີ່ເຂົ້າຮ່ວມພິທີດັ່ງກ່າວໄດ້ຕີລາຄາສູງຕໍ່ຄວາມຫມາຍສຳຄັນຍິ່ງທີ່ມະຫາວິທະ ຍາໄລສັບພະວິຊາຄຸນມິງຊ່ອຍມະຫາວິທະຍາໄລແຫ່ງຊາດລາວອົບຮົມສ້າງຜູ່ມີຄວາມຮູ້ຄວາມສາມາດໃນວົງການການເງິນຂອງລາວ.ນອກຈາກຈັດພິທີເປີດຮຽນແລ້ວ, ມະຫາວິທະຍາໄລສັບພະວິຊາຄຸນມິງຍັງໄດ້ເຊັນສັນຍາກອບກ່ຽວກັບການຮ່ວມມືຍຸດທະສາດການສຶກສາກັບຝ່າຍລາວສອງສະບັບ,ຄືສັນ ຍາກ່ຽວກັບສອງຝ່າຍສ້າງສູນອົບຮົມການພັດທະນາແບບຍືນຍົງລະຫວ່າງ ຈີນລາວກັບມະຫາວິທະຍາໄລແຫ່ງຊາດລາວ,ໄດ້ເຊັນສັນຍາຮ່ວມມືຮອບ ດ້ານກັບມະຫາວິທະຍາໄລສຸພານຸວົງທີ່ຫລວງພະບາງ ເຊິ່ງເປັນມະຫາວິທະ ຍາໄລທີ່ສ້າງໃຫມ່ຂອງລາວທີ່ໃກ້ກັບແຂວງຢຸນນານ.
ປັດຈຸບັນ,ໂຮງຮຽນຊັ້ນສູງຂອງແຂວງຢຸນນານຫລາຍແຫ່ງໄດ້ຈັດໂຄງການຮ່ວມມືການສຶກສາກັບບັນດາປະເທດອາຊຽນ,ມະຫາ ວິທະຍາໄລຢຸນນານໄດ້ຮ່ວມມືກັບມະຫາວິທະຍາໄລສົງຂຣານະຄະລິນຂອງໄທສ້າງສູນວັດທະນະທຳພາສາຈີນ;ສະຖາບັນເສດຖະກິດການຄ້າຢຸນນານຮ໋ວມມືກັບສະຖາບັນເສດຖະກິດຢາງກຸງມຽນມາສ້າງສູນພາສາຈີນການຄ້າ. ນອກນີ້, ໃນ 5 ປີມໍ່ໆມານີ້, ແຕ່ລະປີ,ແຂວງຢຸນນານໄດ້ສົ່ງຄູອາຈານແລະນັກສຶກສາ 300 ກວ່າຄົນໄປແລກປ່ຽນແລະຮຽນຢູ່ບັນດາປະເທດອາຊຽນ,ແຕ່ລະປີ,ມະ ຫາວິທະຍາໄລຊົນເຜົ່າຢຸນນານກໍ່ສົ່ງຄູອາຈານແລະນັກສຶກສາໃນວິຊາພາສາໄທ ພາສາຫວຽດນາມ ພາສາມຽນມາແລະພາສາລາວ 150 ຄົນໄປຮຽນຢູ່ໂຮງຮຽນທີ່ຮ່ວມມືກັນນັ້ນ 1 ປີ;ຕັ້ງແຕ່ສ້າງການພົວພັນຮ່ວມມືລະຫວ່າງສະຖາບັນແພດສາດຈີນຢຸນນານກັບມະຫາວິທະຍາໄລສົງຂຣານະຄະລິນໄທເມື່ອປີ 2001 ເປັນຕົ້ນມາ,ສອງໂຮງຮຽນດັງກ່າວຕ່າງໄດ້ແຕ່ງ 70 ກວ່າຄົນແລກປ່ຽນກັນແລ້ວ.
ໃນຂະນະທີ່ຈັດໂຄງການຮ່ວມມືຢູ່ຕ່າງປະເທດແລ້ວ, ແຂວງຢຸນນານຍັງໄດ້ຕັ້ງຫນ້າໃຫ້ໂຮງຮຽນຕ່າງປະເທດເຂົ້າສູ່ແຂວງຢຸນນານ.ປີ 2004,ແຂວງຢຸນນານໄດ້ໃຫ້ທຶນສຶກສາລະດັບອຳນາດການປົກຄອງແຂວງທີ່ມີມູນຄ່າ 1 ລ້ານ 8 ແສນຢວນໃຫ້ບັນດາປະເທດຢູ່ອ້ອມຂ້າງ, ເພື່ອດຶງດູດຜູ່ມີຄວາມຮູ້ຄວາມສາມາດຂອງປະເທດອາຊຽນມາຮຽນຢູ່ແຂວງຢຸນນານຫລາຍຂຶ້ນ,ແລະຊຸກຍູ້ອະນຸພາກພື້ນຮ່ວມມືກັນອົບຮົມຜູ່ມີຄວາມຮູ້ຄວາມສາມາດ, ນັບມາຮອດປັດຈຸບັນ, ໄດ້ຮັບເອົານັກສຶກສາສອງງວດລວມ 122 ຄົນໃນສອງງວດ.ຍ້ອນໄດ້ຮັບທຶນສຶກສາລະດັບອຳນາດການປົກຄອງແຂວງ,ໂຮງຮຽນຂອງແຂວງຢຸນນານທີ່ຈັດການສິດສອນພາສາຈີນແລະຮັບເອົານັກສຶກສາຕ່າງປະເທດນັ້ນໄດ້ເພີ່ມຂຶ້ນຢ່າງຫລວງຫລາຍ.ປີ 2005, ນັກສຶກສາຕ່າງປະເທດທີ່ມາຮຽນຢູ່ແຂວງຢຸນນານເປັນໄລຍະຍາວແລະໄລຍະສັ້ນທຸກປະເພດໄດ້ບັນລຸເຖິງ 4700 ກວ່າຄົນ,ໃນນັ້ນ, ນັກສຶກສາທີ່ມາຈາກປະເທດອ້ອມຂ້າງມີ 3000 ກວ່າຄົນ, ກວມ 65,7%.ວິຊາສະເພາະທີ່ນັກສຶກສາຕ່າງປະເທດເຫລົ່ານີ້ຮຽນນັ້ນແຕ່ພາສາຈີນແລະແພດສາດຈີນແລະຂະຫຍາຍໄປຮອດວິທະຍາສາດເຕັກນິກ,ຊີວະສາດ,ເສດຖະກິດ,ການທ່ອງທ່ຽວແລະການຄຸ້ມຄອງ.ໂຮງຮຽນຊັ້ນສູງຂອງແຂວງຢຸນນານທີ່ຮັບເອົານັກສຶກສາຕ່າງປະເທດນັ້ນມີ 10 ກວ່າແຫ່ງແລ້ວ.
ທ່ານຈ່າງຊາວຫົງ ຮອງຫົວຫນ້າຫ້ອງການຮ່ວມມືແລະແລກປ່ຽນກັບພາຍນອກຂອງພະແນກການສຶກສາແຂວງຢຸນນານເວົ້າວ່າ, ແຂວງຢຸນນານມີແຜນການຈັດສູນອົບຮົມຂອງອະນຸພາກພື້ນແມ່ນ້ຳຂອງຂະຫຍາຍເປັນສູນ ອົບຮົມບຸກຄະລາກອນທຸກປະເທດອາຊຽນ,ແລະຂະຫຍາຍເປັນມະຫາວິທະ ຍາໄລອາຊີອາຄະເນຈີນໃນໂອກາດທີ່ເຫມາະສົມ.ທ່ານເວົ້າວ່າ:
ເປົ້າຫມາຍຂອງພວກຂ້າພະເຈົ້າໃນບາດກ້າວຕໍ່ໄປແມ່ນຫວັງໃຫ້ຈຳ ນວນນັກສຶກສາທີ່ຮຽນຢູ່ແຂວງຢຸນນານນັ້ນບັນລຸເຖິງ 1 ຫມື່ນ 2 ພັນຄົນ, ແຂວງຢຸນນານສົ່ງ 3000 ຄົນໄປຮຽນຢູ່ປະເທດອ້ອມຂ້າງ.ພວກຂ້າພະເຈົ້າ ຍັງຈະສະຫນັບສະຫນູນແລະສ້າງສູນອົບຮົມຜູ່ມີຄວາມຮູ້ຄວາມສາມາດສາ ກົນປະມານ 10 ແຫ່ງເປັນຈຸດຫນັກ, ສ້າງສະຖາບັນຂົງຈືປະມານ 10 ແຫ່ງແລະສູນວັດທະນະທຳພາສາຈີນງວດຫນຶ່ງຢູ່ປະເທດອາຊີອາຄະເນແລະອາຊີໃຕ້.
|
