|
ຫວ່າງມໍ່ໆມານີ້,ພວກເຮົາໄດ້ຮັບຈົດໝາຍຂອງທ່ານດາຣື ປໍສະເປີຮັນແສງມົວທີ່ເຮັດວຽກຢູ່ບໍລິສັດຫົວພັນປຸງແຕ່ງຢອງແບກຈຳກັດສົ້ນຂົວນ້ຳເປີນ ບ້ານບວມງາມ ເມືອງຫົວເມືອງ ແຂວງຫົວພັນ.ໃນຈົດໝາຍ,ດ້ານໜຶ່ງທ່ານດາຣືໄດ້ຕອບຄຳຖາມໃນການເສັງຄວາມຮູ້ຂອງພວກເຮົາ,ອີກດ້ານໜຶ່ງຍັງໄດ້ຕີລາຄາສູງຕໍ່ລາຍການຂອງພວກເຮົາ.
ໃນຈົດໝາຍ,ທ່ານຂຽນວ່າ, "ການພັດທະນາລາຍການຕ່າງໆຂອງວິທະຍຸ CRI,ນອກຈາກຈະມີການພັດທະນາໄປໃນທາງກວ້າງແລ້ວ,ກໍ່ຍັງມີການພັດທະນາໄປໃນທາງເລິກອີກດ້ວຍ.ຍ້ອນວິທະຍຸແຫ່ງນີ້ເປັນຈຸດສຸມແຫ່ງການເຕົ້າໂຮມຂໍ້ມູນຂ່າວສານຫຼາຍທີ່ສຸດ,ສັງເກດເຫັນວ່າ,ອາດຈະຢູ່ລະດັບແນວໜ້າຄືເໜືອກວ່າວິທະຍຸ CNN ແລະ BBC,ເຊິ່ງເປັນທີ່ຍອມຮັບຂອງແຟນລາຍການໃນທົ່ວໂລກນັບເປັນລ້ານຄົນ,ຈົນບາງຄົນສາມາດສຳເລັດວຽກງານຂອງຕົນຍ້ອນໄດ້ຄວາມຮູ້ຈາກວິທະຍຸ CRI.ສຳລັບນ້ອງເອງ,ມີຄວາມຫວັງວ່າ,ຖ້າເປັນໄປໄດ້ກໍ່ຈະມາທ່ຽວຊົມປະເທດຈີນເທື່ອໜຶ່ງ,ເພື່ອໃຫ້ຕົນເອງໄດ້ຮັບຮູ້ສຳຜັດຕົວຈິງແທ້.ນັບແຕ່ນີ້ເປັນຕົ້ນໄປ,ນ້ອງຈະຂຽນຈົດໝາຍມາຍັງວິທະຍຸ CRI ເລື້ອຍໆ,ຊິບໍ່ລັງກຽດບໍ່?ທ້າຍນີ້,ນ້ອງຂໍຟັງເພງແດ່ເປັນເພງຈີນ,ຊື່ເພງນ້ອງກໍ່ບໍ່ຮູ້,ຮູ້ແຕ່ວ່າເພງນັ້ນມີເດັກນ້ອຍຜູ້ໜຶ່ງຮອງນຳ."
ຂອບໃຈທ່ານດາຣືທີ່ສະແດງຄວາມເຫັນຕໍ່ລາຍການຂອງພວກເຮົາ, ຍິນດີຕ້ອນຮັບທ່ານຂຽນຈົດໝາຍມາຍັງພວກເຮົາເລື້ອຍໆ,ກໍ່ຫວັງວ່າທ່ານຄົງຈະມີໂອກາດມາທ່ຽວເມືອງຈີນ,ໃນຕອນມ້ວນທ້າຍຂອງລາຍການມື້ນີ້,ພວກເຮົາຂໍຈັດເພງມ່ວນໆເພງໜຶ່ງມອບໃຫ້ທ່ານດາຣືແລະຜູ້ຟັງທຸກທ່ານທີ່ພວມຟັງລາຍການຢູ່ໃນຂະນະນີ້,ເພງນີ້ຊື່ວ່າ"ຈົ່ງຮວາມິນຢາວ",ແປວ່າ"ລຳພື້ນເມືອງຈີນ",ຂໍໃຫ້ທ່ານດາຣືຟັງເບິ່ງວ່າ,ແມ່ນເພງທີ່ທ່ານມັກຫຼືບໍ່?.
|
