|
|
 |
| (GMT+08:00)
2006-08-21 19:07:03
|
 |
|
ນາງວາງເຈິ່ງກັບເພງຂອງນາງ
cri
Author: MO
|
ສະບາຍດີທ່ານຜູ້ຟັງທີ່ເຄົາລົບ, ຍິນດີຕ້ອນຮັບທ່ານເຂົ້າສູ່ລາຍການຢ່ອນອາລົມໃນວັນເສົາ. ໃນລາຍການມື້ນີ້, ແສງແກ້ວຜູ້ດຳເນີນລາຍການຂໍແນະນຳນາງວາງເຈິ່ງ ນັກຮ້ອງເຂດໃນຈີນກັບເພງຂອງນາງສູ່ທ່ານຟັງ.
ນາງວາງເຈິ່ງເກີດໃນຄອບຄົວສິລະປິນ, ມັກດົນຕີມາແຕ່ນ້ອຍ, ອາຍຸ 17 ປີ, ນາງໄດ້ເສັງເຂົ້າວິທະຍາໄລສິລະປະກອງທັບປົດປ່ອຍ, ຮຽນວິຊາຮ້ອງເພງອອກສຽງແບບເອີລົບ, ແລະຍັງໄດ້ຮຽນການແຕ່ງນົດແລະເປຍໂນຢ່າງຕັ້ງໃຈ, ແລະເລີ່ມທົດລອງແຕ່ງເພງ.
ປີ 1997, ນາງວາງເຈິ່ງໄດ້ແຕ່ງເພງ"qing ren" ຄົນຮັກ ທີ່ທຳນອງເສົ້າໆໃຫ້ນາງຫານຫົງເປັນຜູ້ຮ້ອງ, ໄດ້ຮັບຄວາມຍ້ອງຍໍຈາກຜູ້ຟັງ. ການແຕ່ງເພງເທື່ອນັ້ນໄດ້ເຮັດໃຫ້ທ່ານສຽວເຄີ ນັກດົນຕີສົນໃຈນຳ. ປີ 2002, ທ່ານສຽວເຄີ່ໄດ້ຕັ້ງບໍລິສັດວັດທະນະທຳທ້າຍອິວ, ແລ້ວໄດ້ເຊັນສັນຍາກັບນາງວາງເຈິ່ງ. ຈາກນັ້ນບໍ່ດົນ, ນາງວາງເຈິ່ງກໍໄດ້ອັດແຜ່ນCDແຜ່ນທີ່ຊື່ວ່າ"chun feng" ລົມລະດູບານໃໝ່. ໃນCDແຜ່ນນີ້, ນາງວາງເຈິ່ງໄດ້ເອົາວິທີຂັບຮ້ອງແບບເອີລົບກັບດົນຕີສະໄໝປະສານເຂົ້າກັນຢ່າງກົມກຽວ, ອັນໄດ້ມ້າງຄວາມເຊື່ອເກົ່າທີ່ວ່າ, ໃຊ້ວິທີອອກສຽງແບບເອີລົບມາຮ້ອງເພງສະໄໝບໍ່ໄດ້, ວິທີຂັບຮ້ອງຂອງນາງດັ່ງກ່າວເຮັດໃຫ້ນາງໄດ້ນາມມະຍົດເປັນ ຊາລາ ໄບຼມານຂອງຈີນ.
ທີ່ທ່ານພວມຟັງຢູ່ນີ້ແມ່ນເພງ"chun feng" ລົມລະດູບານໃໝ່ທີ່ນາງວາງເຈິ່ງເປັນຜູ້ຂັບຮ້ອງ, ເນື້ອຮ້ອງມີຢູ່ວ່າ: "ລົມລະດູບານພັດໂຊຍ, ດອກໄມ້ນອນຫຼັບແລ້ວ, ແມ່ນຫຍັງປິວອອກໄປທາງປ່ອງຢ້ຽມເບົາໆ? ແມ່ນກິ່ນຫອມຂອງກຸຫຼາບສີຟ້າແລະກາເຟ, ໄດ້ຫວ່ານແນວປູກແຫ່ງຄວາມສຸກໄວ້ໃຫ້ຂ້ອຍ, ຢ່າປຸກຂ້ອຍຕື່ນ. ແມ່ນໃຜໄກວໂອ້ນເອ້ນໃນສາຍລົມ? ກີບດອກໄມ້ປິວເປື້ອງ, ໄຂປ່ອງຢ້ຽມ, ຟັງເຈົ້າຮ້ອງເພງ, ຂ້ອຍເບີກບານໃຈ, ຄືດັ່ງຢູ່ໃນຄວາມຝັນ." ສຽງນຸ້ມນວນອົບອູ່ນຂອງນາງວາງເຈິ່ງໄດ້ນຳເອົາຄວາມຮູ້ສຶກອັນດີງາມປານລະດູບານໃໝ່ມາໃຫ້ຜູ້ຟັງ.
ໃນແຜ່ນCDຊຸດ"ລົມລະດູບານໃໝ່"ນີ້, ມີເພງໜຶ່ງແຟນເພງມັກຫຼາຍ, ແລະໄດ້ຮັບການຍ້ອງຍໍຈາກນັກດົນຕີ, ຄືເພງ"ni hai yao shen me" ເຈົ້າຍັງຕ້ອງການຫຍັງ? ນາງວາງເຈິ່ງໃຊ້ສຽງທຸ່ນທ່ຽງຄ່ອຍໆເລົ່າຄວາມຮູ້ສຶກອັນຂົມຂື່ນໃນການສະແຫວງຫາຄວາມຮັກແທ້, ໃນຕອນຂຶ້ນສຽງ, ນາງວາງເຈິ່ງໄດ້ໃຊ້ວິທີຮ້ອງແບບເອີລົບປະສານໃສ່, ເຮັດໃຫ້ສຽງນວນ, ທັງມີພະລັງ, ສະແດງໃຫ້ເຫັນຄວາມສາມາດຂອງນາງໃນເວລາຮ້ອງສຽງສູງ. ຕໍ່ໄປເຊີນຟັງເພງ "ni hai yao shen me" ເຈົ້າຍັງຕ້ອງການຫຍັງ?
"ຂ້ອຍງຶດນຳຄວາມທຸ່ນທ່ຽງຂອງຂ້ອຍ, ໃນເວລາເຮົາຫັນໜ້າໃສ່ກັນຄັ້ງສຸດທ້າຍ, ເຈົ້າເຮັດໜ້າເສີຍໆ, ຄືວ່າເຈົ້າບໍ່ໄດ້ເຮັດຜິດຫຍັງ, ແຕ່ໃນສາຍຕາເຈົ້າ, ຂ້ອຍພັດຄືກັບສັດປະຫຼາດໂຕໜຶ່ງ. ແມ່ນຫຍັງທີ່ເຮັດໃຫ້ຂ້ອຍປ່ຽນຄວາມຄິດແຕ່ເດີມ, ແລ້ວຕັດເສັ້ນທາງແຫ່ງຄວາມຮັກຕອນນີ້ໃຫ້ຂາດໄປ? ແມ່ນຍ້ອນເຈົ້າບໍ່ຢາກມອບຫຍັງໃຫ້ຂ້ອຍເລີຍ, ແມ້ແຕ່ຄວາມອົບອຸ່ນທີ່ແທ້ຈິງຂອງຜູ້ຊາຍ. ສິ່ງໃດທີ່ໃຫ້ເຈົ້າໄດ້, ຂ້ອຍເອົາໃຫ້ເຈົ້າໝົດແລ້ວ, ເຈົ້າຍັງຕ້ອງການຫຍັງ? ຈົນກະທັ້ງສະຫຼະກຽດສັກສີສຸດທ້າຍ, ເພື່ອໃຫ້ເຈົ້າພໍໃຈ. ສິ່ງທີ່ຂ້ອຍຫາບແບກໄດ້ນັ້ນ, ຂ້ອຍໄດ້ຫາບແບກຊູ່ຢ່າງ, ເຈົ້າຍັງຕ້ອງການຫຍັງ? ຈົນດຽວນີ້ກໍຍັງຍິ້ມເວົ້າວ່າ, ຂ້ອຍບໍ່ສົນໃຈ."
ເມື່ອໄດ້ອັດແຜ່ນCDແຜ່ນທຳອິດອອກມາແລ້ວ, ຍ້ອນການໂຄສະນາຂອງບໍລິສັດບໍ່ຄັກປານໃດ, ແຜ່ນCD"ລົມລະດູບານໃໝ່"ຈຶ່ງບໍ່ໄດ້ແຜ່ຜາຍຢ່າງກວ້າງຂວາງ. ປີ 2005, ນາງວາງເຈິ່ງປ່ຽນເຊັນສັນຍາກັບບໍລິສັດວັດທະນະທຳເຢ້ລິນ. ເມື່ອໄດ້ກະກຽມຢ່າງພາກພຽນເກືອບ 1 ປີແລ້ວ, ເດືອນມີນາປີນີ້, ນາງວາງເຈິ່ງໄດ້ອັດຈຳໜ່າຍແຜ່ນCDໃໝ່ທີ່ໃຫ້ຊື່ຊຸດວ່າ: wo men dou shi hao hai zi ພວກເຮົາແມ່ນເດັກດີທຸກຄົນ. ນາງວາງເຈິ່ງໄດ້ເຂົ້າຮ່ວມການແຕ່ງເນື້ອຮ້ອງຫຼືທຳນອງເພງຫຼາຍເພງ, ຍັງເປັນຜູ້ຜະລິດແຜ່ນCDຄັ້ງທຳອິດ, ໄດ້ສະແດງໃຫ້ເຫັນຄວາມສາມາດດ້ານດົນຕີຂອງນາງຢ່າງເຕັມທີ່.
ທີ່ທ່ານພວມຟັງຢູ່ນີ້ແມ່ນເພງຊື່ດຽວກັນກັບຊື່ຊຸດຄືເພງ wo men dou shi hao hai zi ພວກເຮົາແມ່ນເດັກດີທຸກຄົນ. ເນື້ອເພງມີຢູ່ວ່າ, "ໄຂປ່ອງຢ້ຽມ, ເຫັນນົກສີຂາວຢູ່ຂອບຟ້າ, ເລີຍຄິດເຖິງວາດຍິ້ມທີ່ມີກິ່ນຜັກເສີມຂອງເຈົ້າ. ເວລານັ້ນເຈົ້າພວມແລ່ນຢູ່ສະໜາມກິລາ, ຮ້ອງສຽງດັງໆວ່າຂ້ອຍຮັກເຈົ້າ, ເຈົ້າຮູ້ບໍ່? ເວລານັ້ນ, ພວກເຮົາກໍບໍ່ຢ້ານຫຍັງໝົດ, ເຫັນຕາເວັນຈະຕົກດິນ, ເຈົ້າວ່າຈະຮັກກັນຕະຫຼອດຊີວິດ, ບໍ່ແຍກອອກຈາກກັນຊົ່ວນິລັນດອນ. ພວກເຮົາແມ່ນເດັກດີ, ໜ້າຮັກໝົດຊູ່ຄົນ, ມ່ວນນຳກັນ ນ້ຳຕາໄຫຼຍ້ອນມີຄວາມສຸກ." ນີ້ແມ່ນບົດບັນທຶກປະຈຳວັນຂອງເດັກຍິງທີ່ພວມຢູ່ໃນໄວສອນສາວ, ແລະກໍແມ່ນຄວາມຫວນຄືນຄວາມຮັກພໍມຽງໆໃນຄວາມຊົງຈຳອັນດີງາມໃນໄວໜຸ່ມນ້ອຍຂອງຄົນທັງຫຼາຍ.
ໃນCDແຜ່ນໃໝ່, ພວກເຮົາໄດ້ເຫັນການປ່ຽນແປງຂອງນາງວາງເຈິ່ງໃນດ້ານວິທີຮ້ອງເພງ. ແຕ່ກ່ອນ, ໃນທຸກໆເພງຂອງນາງ, ໄດ້ເອົາວິທີອອກສຽງແບບແບບເອີລົບປະສານໃສ່ເປັນສັນຍະລັກຂອງນາງ, ແຕ່ດຽວນີ້, ນາງວາງເຈິ່ງໄດ້ມີຄວາມອ່ອນໂຍນຫຼາຍຂຶ້ນໃນດ້ານດົນຕີ, ນາງບໍ່ອວດອ້າງວິທີຮ້ອງແບບເອີລົບອີກແລ້ວ, ຫາກໃຊ້ສຽງທຳມະຊາດຂອງຕົນສະແດງອາລົມຈິດອັນລະອຽດຂອງເພງ. ຕໍ່ໄປເຊີນຟັງເພງ" yi bei ka fei dao tian liang" ດຶ່ມກາເຟຈອກໜຶ່ງຢູ່ຈົນຊອດແຈ້ງ.
"ເຈົ້າຢູ່ສົ້ນນັ້ນຂອງໂທລະສັບ, ສີໜ້າອຸກອັ່ງ, ຍິນສຽງກັນ, ແຕ່ຢູ່ໄກກັນແສນໂຍດ. ຂ້ອຍບໍ່ຮູ້ເວົ້າຫຍັງ, ແລະກໍບໍ່ຮູ້ຄວນເຮັດແນວໃດ? ຂ້ອຍນອນບໍ່ຫຼັບ. ສະນັ້ນ, ຈຶ່ງກິນກາເຟຈອກໜຶ່ງຢູ່ຈົນຊອດແຈ້ງ, ປະໃຫ້ນ້ຳຕາໄຫຼອາບແກ້ມ. ຄວາມຮັກທີ່ຂົມຂື່ນ, ຄືດັ່ງກາເຟທີ່ເຫງົາໃຈ, ດຶ່ມຈອກໜຶ່ງ, ມີກິ່ນຫອມອ່ອນໆ."
ຕອນທ້າຍລາຍການມື້ນີ້, ເຊີນຟັງເພງ"ai ni" ຮັກເຈົ້າ ເພງທຳນອງແຈັສ. ວິທີຮ້ອງແບບເຍີ້ນໆຂອງນາງວາງເຈິ່ງບວກກັບທຳນອງອ່ອນເບົາ, ເຮັດໃຫ້ຄົນຮູ້ສຶກສະບາຍຫຼາຍ. ເຊີນຟັງໄດ້ເລີຍ.
ທ່ານຜູ້ຟັງທີ່ເຄົາລົບ, ທີ່ຟັງມານັ້ນແມ່ນລາຍການບັນເທີງທີ່ສະເໜີໃຫ້ຮູ້ກັບນາງວາງເຈິ່ງກັບເພງຂອງນາງ. ລາຍການຢ່ອນອາລົມໃນວັນເສົາມື້ນີ້ຂໍຈົບລົງພຽງທໍ່ນີ້, ສະບາຍດີ.
|
|
|
