|
ຄວາມຕ່າງກັນລະຫວ່າງສະຫວັນກັບນາຮົກ
cri
Author: mo
|
ສະບາຍດີທ່ານຜູ້ຟັງທີ່ເຄົາລົບ, ສົມບູນ ຜູ້ດຳເນີນລາຍການຍິນດີຕ້ອນຮັບທ່ານເຂົ້າສູ່ລາຍການຄາລົມຄົມຄາຍ.
ຄ້າຍກັບລາຍການທີ່ຜ່ານມາ, ກ່ອນຈະເລີ່ມຕົ້ນລາຍການມື້ນີ້, ສົມບູນຂໍເລົ່ານິທານເລື່ອງໜຶ່ງສູ່ຟັງ.
ມີຄົນໃຈບຸນຜູ້ໜຶ່ງທີ່ມັກບຳເພັນກຸສົນໃນຍາມຍັງມີຊີວິດຢູ່, ເມື່ອເພິ່ນໝົດບຸນໄປແລ້ວ, ເພິ່ນໄດ້ພົບກັບພະເຈົ້າ, ເພິ່ນຖາມພະເຈົ້າວ່າ, ສະຫວັນກັບນາຮົກແຕກຕ່າງກັນແນວໃດ? ພະເຈົ້າເລີຍໃຫ້ເທວະດາພາເພິ່ນໄປເບິ່ງສະຫວັນແລະນາຮົກ.
ເມື່ອໄປຮອດສະຫວັນ, ເພິ່ນເຫັນຄົນທັງຫຼາຍນັ່ງອ້ອມໂຕະໃຫຍ່ໆໜ່ວຍໜຶ່ງ, ເທິງໂຕະໄດ້ວາງເຕັມໄປດ້ວຍອາຫານອັນໂອຊາ, ຜູ້ນັ່ງກິນເຂົ້າຢູ່ຂ້າງໂຕະ, ມືຊ້າຍຈັບສ້ອມຍາວໆກ້ານໜຶ່ງ, ແລະມືຂວາຈັບມີດຍາວໆດວງໜຶ່ງຄືກັນໝົດຊູ່ຄົນ, ຍ້ອນສ້ອມກັບມີດຍາວຫຼາຍ, ໃຜກໍບໍ່ສາມາດສົ່ງອາຫານເຂົ້າປາກໂຕເອງ.
ແຕ່ສິ່ງທີ່ເປັນໜ້າງຶດງໍ້ນັ້ນກໍແມ່ນ, ຄົນເຫຼົ່ານີ້ຕ່າງປ້ອນອາຫານໃຫ້ຜູ້ນັ່ງຢູ່ຕໍ່ໜ້າຕົນ, ແລະເຫັນໄດ້ວ່າ, ທຸກໆຄົນກິນນົວຫົວມ່ວນ, ເບິ່ງໜ້າຕາຜູ້ໃດກໍປະກົດວ່າຄວາມສຸກຫຼາຍ. ຄົນຜູ້ໄປນຳເທວະດາຜູ້ນີ້ຄິດວ່າ: ນີ້ຫວະ ສະຫວັນ? ມັນຕ່າງກັນກັບສະຫວັນທີ່ເພິ່ນຄຶດໄວ້ກ່ອນ, ຈຶ່ງຮູ້ສຶກຜິດຫວັງໜ້ອຍໜຶ່ງ.
ຕໍ່ຈາກນັ້ນ, ເທວະດາໄດ້ພາເພິ່ນໄປເບິ່ງນາຮົກ. ຫາກໍໄປຮອດ, ເພິ່ນຕົກໃຈຫຼາຍ, ບໍ່ຢາກເຊື່ອສາຍຕາຕົນເອງເລີຍ, ເພາະວ່າ, ນາຮົກບໍ່ເປັນຕາຢ້ານຄືເພິ່ນຄຶດ, ເພິ່ນໄດ້ເຫັນຢູ່ເທິງໂຕະໃຫຍ່ໃນນາຮົກກໍມີອາຫານແຊບໆຫຼາຍຢ່າງ, ເຊັ່ນດຽວກັນກັບຢູ່ເທິງສະຫວັນ. ເພິ່ນຄຶດງຶດໃນໃຈວ່າ, ນາຮົກເປັນຫຍັງຄືກັບສະຫວັນແທ້. ເທວະດາເວົ້າກັບເພິ່ນວ່າ,"ຢ່າຟ້າວ, ຖ້າບຶດດຽວ".
ບໍ່ດົນ, ກໍຮອດເວລາກິນເຂົ້າ, ເຫັນຄົນໝູ່ໜຶ່ງມານັ່ງຂ້າງໂຕະ. ແຕ່ເຫັນພວກເຂົາເຈົ້າບໍ່ມ່ວນໃຈປານໃດ, ທັງຈ່ອຍຜອມປານໄພຫຍ້າ. ພວກເຂົາເຈົ້າກໍຈັບສ້ອມແລະມີດຍາວໆຄືກັນ, ແຕ່ສິ່ງທີ່ຕ່າງກັບຄົນເທິງສະຫວັນນັ້ນແມ່ນ, ພວກເຂົາເຈົ້າບໍ່ສາມາດສົ່ງອາຫານເຂົ້າປາກໂຕເອງ, ແຕ່ກໍບໍ່ຮູ້ປ້ອນກັນກິນ, ສະນັ້ນ, ທຸກໆຄົນມີແຕ່ອຶດຫີວຈ່ອຍໂຊ.
ນິທານເລື່ອງນີ້ແມ່ນຢາກບອກເຮົາວ່າ, ເມື່ອຄົນເຮົາຮຽນຮູ້ຊ່ອຍເຫຼືອເຊິ່ງກັນແລະກັນນັ້ນ, ເມືອງຄົນກໍເຕັມໄປດ້ວຍຄວາມສຸກຄືຢູ່ແດນສະຫວັນ; ເມື່ອພວກເຮົາປະຕິເສດໃຫ້ການຊ່ອຍເຫຼືອແກ່ຜູ້ອື່ນ, ທັງປະຕິເສດຮັບເອົາການຊ່ອຍເຫຼືອຈາກຜູ້ອື່ນ, ໂລກທີ່ພວກເຮົາອາໄສຢູ່ກໍອາດຈະທຸກທໍລະມານດັ່ງຢູ່ນາຮົກ. ຄົນຈີນມັກເວົ້າວ່າ, "ໃຫ້ຄວາມສະດວກແກ່ຜູ້ອື່ນກໍແມ່ນໃຫ້ຄວາມສະດວກແກ່ຕົນເອງ, ຊ່ອຍຜູ້ອື່ນກໍແມ່ນຊ່ອຍຕົນເອງ", ຄວາມເວົ້າຄວາມນີ້ໄດ້ອະທິບາຍເຫດຜົນຂອງນິທານເລື່ອງນີ້ຢ່າງເໝາະສົມ. ຄົນເຮົາຜູ້ໃດກໍມີຈຸດດີແລະຈຸດອ່ອນຂອງຕົນ, ບໍ່ມີຜູ້ໃດທີ່ສົມບູນງົດງາມໝົດທຸກຢ່າງ. ແຕ່ສິ່ງທີ່ເຈົ້າຂາດນັ້ນ, ອາດແມ່ນດ້ານເກ່ງຂອງຜູ້ອື່ນ, ກົງກັນຂ້າມ, ສິ່ງທີ່ຫຍຸ້ງຍາກຫຼາຍສຳລັບຜູ້ອື່ນ, ພັດອາດຈະແມ່ນເລື່ອງງ່າຍດາຍສຳລັບເຈົ້າ, ສະນັ້ນ, ຖ້າຄົນເຮົາໃຜໆກໍມັກຊ່ອຍຜູ້ອື່ນ, ຄວາມຫຍຸ້ງຍາກໃນໂລກນີ້ກໍຈະໜ້ອຍລົງ, ຊີວິດຂອງຄົນເຮົາກໍຈະດີງາມແລະມີຄວາມສຸກກວ່າເກົ່າ.
ທ່ານຜູ້ຟັງ, ໃນເວລາຜູ້ອື່ນປະສົບຄວາມຫຍຸ້ງຍາກນັ້ນ, ຈົ່ງເດ່ມືຊ່ອຍເຫຼືອເຂົາເຈົ້າແດ່, ທຸກຄົນລ້ວນແຕ່ມີຍາມຕ້ອງການການຊ່ອຍເຫຼືອຂອງຜູ້ອື່ນ, ຂໍໃຫ້ພວກເຮົາມີຈິດໃຈໂອບເອື້ອອາລີຊ່ອຍຜູ້ອື່ນ, ເຊື່ອວ່າ, ໂລກນີ້ຍ່ອມຈະອົບອຸ່ນກວ່າເກົ່າຢ່າງແນ່ນອນ.
ເອົາລະ, ທ່ານຜູ້ຟັງ, ລາຍການຄາລົມຄົມຄາຍພາກນີ້ຂໍຈົບລົງພຽງທໍ່ນີ້, ຖ້າທ່ານມີຄວາມຄິດເຫັນແນວໃດຕໍ່ລາຍການຂອງພວກເຮົາ, ຂໍໃຫ້ທ່ານຂຽນຈົດໝາຍມາໂລດເດີ້, ພ້ອມກັນນັ້ນ, ກໍເຊີນທ່ານຂຽນຈົດໝາຍມາເລົ່າຄວາມປະທັບໃຈໃນຊີວິດຂອງທ່ານສູ່ຜູ້ອື່ນຟັງນຳ. ສະບາຍດີ.
|
|
