|
|
 |
| (GMT+08:00)
2006-08-24 10:04:42
|
 |
|
ຈີນພະຍາຍາມປັບປຸງເງື່ອນໄຂປິ່ນປົວພະຍາດຂອງເຂດທຸກຍາກໃຫ້ດີຂຶ້ນ(ສຽງ)
cri
Author: shuo
|
ຈີນແມ່ນປະເທດພວມພັດທະນາ,ແລະມີເນື້ອທີ່ກວ້າງໃຫຍ່ໄພສານ,ລະດັບການພັດທະ ນາຂອງທ້ອງຖິນຕ່າງໆບໍ່ສະໝ່ຳສະເໝີກັນ.ຢູ່ບາງຕົວເມືອງທາງພາກຕາເວັນອອກ,ຊີວິດການເປັນຢູ່ຂອງຄົນທັງຫຼາຍອ່າວຮັ່ງມີແລ້ວ,ແຕ່ຢູ່ບາງທ້ອງຖິ່ນທາງພາກກາງແລະພາກຕາເວັນຕົກ,ເຖິງວ່າຊີວິດການເປັນຢູ່ອັນພື້ນຖານໄດ້ຮັບການຮັບປະກັນແລ້ວກໍຕາມ,ແຕ່ເງື່ອນໄຂປິ່ນປົວພະຍາດຂອງທ້ອງຖິ່ນເຫຼົ່ານີ້ພັດຜິດໂຕນກັນອ່າວຫຼາຍກັບເຂດພາກຕາເວັນອອກ.
ຄຽງຄູ່ກັບເສດຖະກິດແລະສັງຄົມຂອງຈີນມີການພັດທະນາໃນຫຼາຍປີມານີ້,ລັດຖະບານນັບມື້ນັບຮັບຮູ້ເຖິງຄວາມສຳຄັນໃນການລົງທຶນຕໍ່ຂົງເຂດການປິ່ນປົວພະຍາດແລະສາທາລະນະສຸກ,ພ້ອມກັນນັ້ນລັດຖະບານກໍມີກຳລັງຊັບຫຼາຍກວ່າເກົ່າທີ່ເຂົ້າໃສ່ຂົງເຂດການປິ່ນປົວພະຍາດແລະສາທາລະນະສຸກ,ສະນັ້ນຈີນຈຶ່ງພະຍາຍາມປັບປຸງເງື່ອນໄຂ ການປິ່ນປົວພະຍາດແລະສາທາລະນະສຸກຢູ່ເຂດທຸກຍາກໃຫ້ດີຂຶ້ນ.ກ່ອນນີ້ບໍ່ດົນ,ນັກຂ່າວວິທະຍຸພວກເຮົາໄດ້ໄປເອົາຂ່າວຢູ່ເມືອງພັນຊ້ຽນຂອງແຂວງກຸ້ຍໂຈ່ວ ເຂດທຸກຍາກທາງພາກຕາເວັນຕົກສຽງໃຕ້ຂອງຈີນ,ໄດ້ເຫັນສະພາບການປິ່ນປົວພະຍາດແລະສາທາ ລະນະສຸກຈຳນວນໜຶ່ງຂອງທ້ອງຖິ່ນດັ່ງກ່າວ.ໃນລາຍການສວນວິທະຍາສາດແລະການສຶກສາພາກນີ້,ເຊີນຟັງບົດແຈ້ງຂ່າວທີ່ມາຈາກເມືອງພັນຊ້ຽນ.
ເມືອງພັນຊ້ຽນແຂວງກຸ້ຍໂຈ່ວຕັ້ງຢູ່ພາກຕາເວັນຕົກສຽງໃຕ້ຂອງຈີນ,ແມ່ນໜຶ່ງໃນປະມານ600ເມືອງທີ່ເປັນຈຸດສຸມຂອງການຫຼຸດຜ່ອນຄວາມທຸກຍາກລະດັບຊາດທີ່ກຳນົດໂດຍລັດຖະບານຈີນ,ໝາຍຄວາມວ່າ,ບ່ອນນີ້ແມ່ນບ່ອນທີ່ທຸກຍາກກວ່າບ່ອນອື່ນຂອງຈີນ.ລວມຍອດຜະລິດຕະພັນພາຍໃນຫຼືGDPສະເລ່ຍຕໍ່ຫົວຄົນຂອງເມືອງພັນຊ້ຽນມີປະມານ500ໂດລາ,ແມ່ນເຄິ່ງໜຶ່ງຂອງລະດັບສະເລ່ຍຂອງຈີນ.ຍ້ອນຄວາມທຸກຍາກ,ປະຊາຊົນຫຼາຍຄົນບໍ່ມີເງິນໄປກວດພະຍາດ.ເພື່ອແກ້ໄຂບັນຫານີ້,ປີ2005,ເມືອງພັນຊ້ຽນເລີ່ມປະຕິບັດລະບອບການຮ່ວມມືປິ່ນປົວພະຍາດຊົນນະບົດແບບໃໝ່,ທ່ານລໍຊີ່ຊ່ຽງ ຜູ້ວ່າການແທນເຈົ້າເມືອງພັນຊ້ຽນບອກນັກຂ່າວວ່າ:"ເມືອງພັນຊ້ຽນພວກເຮົາແມ່ນເມືອງທົດລອງການຮ່ວມມືປິ່ນປົວພະຍາດຊົນນະບົດແບບໃໝ່ໃນທົ່ວປະເທດ.ນະໂຍບາຍດັ່ງກ່າວຂອງລັດຕົ້ນຕໍແມ່ນເພື່ອແກ້ໄຂບັນຫາທີ່ປະຊາຊົນກັບຄືນໄປທຸກຍາກຍ້ອນເປັນພະຍາດ.ເວົ້າລວມແລ້ວ,ປະຊາຊົນສະໜັບສະໜູນທີ່ສຸດຕໍ່ນະໂຍບາຍນີ້."
ລະບອບການຮ່ວມມືປິ່ນປົວພະຍາດຊົນນະບົດແບບໃໝ່ແມ່ນລະບອບທີ່ລັດຖະບານຈີນວາງອອກເພື່ອປັບປຸງເງື່ອນໄຂປິ່ນປົວພະຍາດຂອງເຂດຊົນນະບົດໃຫ້ດີຂຶ້ນ,ເວົ້າລະອຽດກໍຄື ແຕ່ລະປີ,ການເງິນສູນກາງຂອງລັດໄດ້ໃຫ້ເງິນອຸດໜູນຊາວກະສິກອນທີ່ເຂົ້າຮ່ວມການຮ່ວມມືປິ່ນປົວພະຍາດຄົນລະ20ຢວນ,ການເງິນທ້ອງຖິ່ນໃຫ້ອີກ20ຢວນ,ປະຊາຊົນເອງຈ່າຍ10ຢວນ,ແລະສ້າງເປັນກອງທຶນການຮ່ວມມືປິ່ນປົວພະຍາດ.ເມື່ອເປັນພະຍາດແລ້ວ,ທຶນນີ້ສາມາດຈ່າຍຄ່າປິ່ນປົວແລະຄ່າຢາໃຫ້ຊາວກະສິກອນຕາມອັດຕາທີ່ກຳນົດໄວ້.ລະບອບດັ່ງກ່າວໄດ້ແກ້ໄຂບັນຫາທີ່ຊາວກະສິກອນກວດພະຍາດຍາກນັ້ນໄດ້ໃນລະດັບໃດໜຶ່ງ.ມາຮອດປະຈຸບັນ,ເມືອງພັນຊ້ຽນໄດ້ມີຊາວກະສິກອນ78,5%ໄດ້ເຂົ້າຮ່ວມລະບອບການຮ່ວມມືປິ່ນປົວພະຍາດແລ້ວ.
ຢູ່ໂຮງໝໍຂອງຕາແສງມາຊາງເມືອງພັນຊ້ຽນ,ນັກຂ່າວໄດ້ໂອ້ລົມກັບຊາວກະສິກອນສອງສາມຄົນທີ່ໄປກວດພະຍາດຢູ່ແຫ່ງນັ້ນ.ລຸງຫຼີໄຄ່ຈ່ຽງ ຜູ້ເຖົ້າເຜົ່າອີເປັນພະຍາດກະເພາະອາຫານເປັນບາດ,ຜ່ານມາລຸງໄດ້ຈ່າຍເງິນ2200ກວ່າຢວນແລ້ວ.ທຶນການຮ່ວມມືປິ່ນປົວພະຍາດໄດ້ຈ່າຍໃຫ້1ພັນກວ່າຢວນ,ເຮັດໃຫ້ລຸງຮູ້ສຶກດີໃຈຫຼາຍ,ລຸງເວົ້າວ່າ ໝົດຄອບຄົວຂອງລຸງໄດ້ເຂົ້າຮ່ວມການຮ່ວມມືປິ່ນປົວພະຍາດຊົນນະບົດແບບໃໝ່.ລຸງເຫັນວ່າ ທຶນນີ້ດີຫຼາຍ,ໄດ້ຜ່ອນເບົາການຫາບແບກຂອງລຸງຢ່າງຫຼວງຫຼາຍ.ຊາວບ້ານກໍໄດ້ເຂົ້າຮ່ວມການຮ່ວມມືປິ່ນປົວພະຍາດເກືອບໝົດທຸກຄົນ,ແລະຊົມເຊີຍທຶນນີ້ຫຼາຍ.
ທ່ານຈ່າງເກີ ນາຍໝໍໄວໜຸ່ມຂອງໂຮງໝໍຕາແສງມາຊາງເວົ້າສູ່ຟັງວ່າ,ເມື່ອມີນະໂຍບາຍຮ່ວມມືປິ່ນປົວພະຍາດຊົນນະບົດແບບໃໝ່ແລ້ວ,ຄ່າປິ່ນປົວພະຍາດແລະຄ່າຢາຂອງຊາວກະສິກອນຈະຫຼຸດໜ້ອຍລົງໃນລະດັບໃດໜຶ່ງ,ສະນັ້ນ,ຊາວກະສິກອນຮູ້ສຶກເພິ່ງພໍໃຈຫຼາຍສົມຄວນ,ແຕ່ລະມື້ມີຄົນຢ່າງຫຼວງຫຼາຍມາກວດພະຍາດ.
ບັນຫາທີ່ຊາວກະສິກອນກວດພະຍາດຍາກຂອງເມືອງພັນຊ້ຽນໄດ້ຮັບການແກ້ໄຂໃນລະ ດັບໃດໜຶ່ງແລ້ວ,ແຕ່ບັນຫາອື່ນໆ ເຊັ່ນອຸປະກອນການປິ່ນປົວພະຍາດຫຼ້າຫຼັງເຕັກນິກປິ່ນປົວພະຍາດຂອງນາຍໝໍບໍ່ສູງປານໃດເປັນຕົ້ນຍັງກະທົບກະເທືອນເຖິງສຸຂະພາບຂອງປະຊາຊົນເມືອງພັນຊ້ຽນ.ນາງຈ່າງຢາລີງ ນາງພະຍາບານຂອງໂຮງໝໍຕາແສງມາຊາງເວົ້າວ່າ,ຍ້ອນວ່າດຽວນີ້ມີຄົນຫຼາຍກວ່າເກົ່າມາກວດພະຍາດ,ສະນັ້ນ,ບັນຫາຕ່າງໆ ເຊັ່ນເຕັກນິກຂອງນາຍໝໍຫຼ້າຫຼັງອຸປະກອນເກົ່າແກ່ເປ່ເພແລະແພດໝໍບໍ່ພຽງພໍເປັນບັນຫາທີ່ນັບມື້ນັບພົ້ນເດັ່ນຂຶ້ນ.ນາງເວົ້າວ່າ:"ໂຮງໝໍນ້ອຍພວກເຮົາສາມາດປິ່ນປົວແຕ່ພະຍາດທຳມະດາ,ຄື ເປັນຫວັດ.ແຕ່ຖ້າມີພະຍາດໜັກໜ່ວງ,ພວກເຮົາກໍສະເໜີໃຫ້ໄປປິ່ນປົວຢູ່ໂຮງໝໍຂອງເມືອງ.ດຽວນີ້,ໂຮງໝໍພວກເຮົາມີແຕ່ເຄື່ອງສ່ອງສາຍBເຄື່ອງໜຶ່ງ,ແຕ່ພວກເຮົາບໍ່ຮູ້ວິທີໃຊ້.ພວກເຮົາລ້ວນແຕ່ມີຄວາມປາຖະໜາທີ່ໄປຮຽນເຕັກນິກນຳນາຍໝໍຂອງເມືອງ."
ເພື່ອແກ້ໄຂບັນຫາເຫຼົ່ານີ້ໃຫ້ຕົກໄປຫຼາຍເທົ່າທີ່ຈະຫຼາຍໄດ້,ອົງການປົກຄອງເມືອງພັນຊ້ຽນກໍກຳລັງຕັ້ງໜ້າໃຊ້ມາດຕະການ.ທ່ານລໍຊີ່ຊ່ຽງ ຜູ້ວ່າການແທນເຈົ້າເມືອງພັນຊ້ຽນ ບອກນັກຂ່າວວ່າ,ກ່ອນອື່ນ,ໃນດ້ານແບ່ງປັນຜູ້ມີຄວາມຮູ້ຄວາມສາມາດ,ນະໂຍບາຍຕ້ອງ ສະໜອງຄວາມສະດວກພິເສດຫຼາຍກວ່າໃຫ້ໂຮງໝໍຕາແສງ.ຕົວຢ່າງຄືລະດົມຂົນຂວາຍຜູ້ຮຽນຈົບຈາກມະຫາວິທະຍາໄລໃຫ້ໄປເຮັດວຽກຢູ່ໂຮງໝໍນ້ອຍຂອງຕາແສງ;ຕັ້ງໜ້າປຸກລະດົມໃຫ້ນາຍໝໍຂອງເມືອງໄປເຮັດວຽກເປັນໄລຍະສັ້ນຢູ່ທີ່ນີ້.ຖັດມາ,ກໍຄື ການໃຊ້ນະໂຍບາຍພິເສດແລະທຶນພັນທະບັດຂອງລັດເພື່ອປັບປຸງເງື່ອນໄຂປິ່ນປົວພະຍາດຂອງໂຮງໝໍຕາແສງໃຫ້ດີຂຶ້ນ,ປີນີ້,ອົງການປົກຄອງເມືອງພັນຊ້ຽນກໍໄດ້ລົງທຶນ1ລ້ານຢວນ,ດັດແປງອຸປະກອນຂອງໂຮງໝໍຕາແສງຕາມແຜນການ.ນອກນີ້,ເພີ່ມທະວີການອົບຮົມຖົງຢາປະຈຳບ້ານ,ພະຍາຍາມຍົກຄວາມສາມາດວິຊາສະເພາະຂອງພວກເຂົາເຈົ້າໃຫ້ສູງຂຶ້ນ,ພ້ອມທັງຮັບປະກັນໃຫ້ພວກເຂົາເຈົ້າມີລາຍໄດ້ພື້ນຖານ.
ໃນເວລາໄປເອົາຂ່າວ,ນັກຂ່າວໄດ້ເຫັນວ່າ,ຢູ່ເມືອງພັນຊ້ຽນຍັງມີຄລີນິກເອກະຊົນຂະ ໜາດນ້ອຍຈຳນວນໜຶ່ງ.ຄລີນິກເຫຼົ່ານີ້ໄດ້ຊ່ອຍຄ້ຳຊູຄວາມບໍ່ພຽງພໍຂອງອົງການປິ່ນປົວພະຍາດແຫ່ງລັດໃນລະດັບໃດໜຶ່ງ,ຖ້າຊາວກະສິກອນເປັນພະຍາດທຳມະດາ,ກໍໄປກວດຢູ່ຄລີນິກເອກະຊົນແບບນີ້,ອ່າວສະດວກແລະອ່າວຖືກ.ແຕ່ການດຳເນີນທຸລະກິດຂອງຄລີນິກເອກະຊົນເຫຼົ່ານີ້ໄດ້ປະສົບຄວາມຫຍຸ້ງຍາກຈຳນວນໜຶ່ງ.ທ່ານວາງຈິ່ງໄດ້ທຸກລະກິດຄລີນິກເອກະຊົນສິບກວ່າປີແລ້ວ.ທ່ານເວົ້າສູ່ຟັງວ່າ:"ທ້ອງຖິ່ນພວກເຮົາທຸກຍາກຫຼາຍ,ປະຊາຊົນຈຳນວນຫຼວງຫຼາຍບໍ່ມີເງິນກວດພະຍາດ.ມີບາງຄົນມາກວດພະຍາດໃນຄລີນິກຂອງຂ້ອຍ,ຖືເງິນມາບໍ່ພໍ10ຢວນທໍ່ນັ້ນ,ນາຍໝໍຂອງພວກເຮົາກໍຈຳເປັນຕ້ອງກວດໃຫ້.ນັບມາຮອດປະຈຸບັນນີ້,ຍັງມີຫຼາຍໆຄົນຕິດໜີ້ນຳຂ້ອຍຢູ່."
ທ່ານວາງຈິ່ງຢາກໃຫ້ອົງການປົກຄອງທ້ອງຖິ່ນຮັບຮູ້ບົດບາດການຊ່ອຍຄ້ຳຊູຂອງຄລີນິກເອກະຊົນທີ່ມີຕໍ່ອົງການປິ່ນປົວພະຍາດແຫ່ງລັດ,ແລະສະໜັບສະໜູນວຽກງານຂອງຄລີນິກເອກະຊົນ.
|
|
|
