|
ຕາມຂ່າວ CRI: ຕອນຄ່ຳວັນທີ 20 ສິງຫາ, ງານແຂ່ງຂັນແລ່ນແລະລານຊາວໜຸ່ມໂລກຄັ້ງທີ 11 ທີ່ດຳເນີນເປັນເວລາ 6 ມື້ນັ້ນ ໄດ້ອັດລົງຢູ່ສະໜາມກິລາຊາວຢາງປັກກິ່ງ. ໃນການແຂ່ງຂັນຄັ້ງນີ້, ທີມຈີນຊີງໄດ້ຫຼຽນຄຳເປັນທີສອງແລະເປັນປະເທດທີໜຶ່ງທີ່ໄດ້ຫຼຽນຫຼາຍຄື ຊີງໄດ້ຫຼຽນຄຳ 5 ຫຼຽນ ຫຼຽນເງິນ 5 ຫຼຽນແລະຫຼຽນທອງ 7 ຫຼຽນ. ເຖິງວ່າຊີງໄດ້ຜົນງານດີເດັ່ນກໍ່ຕາມ, ແຕ່ວົງການກິລາແລ່ນແລະລານຈີນກໍ່ເຂົ້າໃຈວ່າອວດອົ່ງທະນົງຕົວບໍ່ໄດ້, ພວກທ່ານຊີ້ອອກຢ່າງໃຈເຢັນວ່າ, ຜົນສຳເລັດໃນການແຂ່ງຂັນແລ່ນແລະລານຊາວໜຸ່ມໂລກແມ່ນດີໃຈແທ້, ແຕ່ກໍ່ບໍ່ໝາຍຄວາມວ່າກິລາແລ່ນແລະລານຈີນຈະສ້າງໄດ້ຜົນງານດີເລີດໃນງານກິລາໂອລິມປິກປັກກິ່ງປີ 2008.
ການແຂ່ງຂັນແລ່ນແລະລານຊາວໜຸ່ມໂລກຈັດຂຶ້ນໃນທຸກໆສອງປີ, ເລີ່ມຈັດຕັ້ງຂຶ້ນເມື່ອປີ 1986, ແຕ່ໃດມາຖືກຖືເປັນບ່ອນສ້າງແຊມປຽນໂລກຫຼືແຊມປຽນໂອລິມປິກໃນອະນາຄົດ. ນາງຫວາງຈິ່ນເຊຍ ນັກກິລາແລ່ນທົນຂອງຈີນ ຜູ່ຊີງໄດ້ແຊມປຽນໂອລິມປິກ ແລະທ້າວລິວສຽງ ນັກກິລາແລ່ນຂ້າມຮົ້ວຂອງຈີນກໍແມ່ນພົ້ນເດັ່ນຂຶ້ນໃນການແຂ່ງຂັນຊາວໜຸ່ມນີ້.
ງານແຂ່ງຂັນແລ່ນແລະລານຊາວໜຸ່ມໂລກຄັ້ງທີ 11 ໄດ້ດຶງດູດນັກກິລາ 1451 ຄົນຂອງ 180 ປະເທດແລະເຂດແຄວ້ນມາເຂົ້າຮ່ວມ, ຫຼາຍກວ່າທຸກຄັ້ງທີ່ຜ່ານມາໃນປະຫວັດສາດ. ເຖິງວ່າການແຂ່ງຂັນໄດ້ດຳເນີນໄປຢ່າງດຸເດືອດ, ແຕ່ນັກກິລາຈີນກໍຊີງໄດ້ຜົນງານທີ່ດີເດັ່ນຄື ຊີງໄດ້ຫຼຽນຄຳ 5 ຫຼຽນ ຫຼຽນເງິນ 5 ຫຼຽນແລະຫຼຽນທອງ 7 ຫຼຽນ. ແຕ່ວ່າ ທ່ານເຝິງສຸຢົງ ຄູຝຶກໃຫຍ່ທີມກິລາແລ່ນແລະລານແຫ່ງຊາດຈີນ ຮອງຫົວໜ້າສູນກິລາແລ່ນແລະລານກົມໃຫຍ່ກິລາແຫ່ງຊາດຈີນເຫັນວ່າ, ນັກກິລາແລ່ນແລະລານຈີນໄດ້ຮັບການຝຶກແອບຢ່າງເປັນລະບົບດ້ານວິຊາເຕັກນິກໃນເວລາຍັງໜຸ່ມ, ສະນັ້ນ ອັນທີ່ວ່າທ່າແຮງນີ້ແມ່ນມີຢູ່ຊົ່ວຄາວເທົ່ານັ້ນ.
ເມື່ອກ່າວເຖິງກິລາແລ່ນແລະລານ, ກໍ່ຈຳເປັນຕ້ອງກ່າວເຖິງອາເມລິກາ. ອາເມລິກາບໍ່ພຽງແຕ່ແມ່ນມະຫາປະເທດກິລາແລ່ນແລະລານເທົ່ານັ້ນ, ກໍ່ແມ່ນອະພິມະຫາປະເທດກິລາແລ່ນແລະລານ ເຊິ່ງມີທ່າແຮງໃນຫຼາຍປີຕິດໆກັນໃນຫຼາຍປະເພດ. ໃນງານແຂ່ງຂັນແລ່ນແລະລານຊາວໜຸ່ມໂລກຄັ້ງນີ້, ທີມອາເມລິກາ "ມິດງຽບ" ຢູ່, ແຕ່ທ່ານເຝິງສຸຢົງເຫັນວ່າ, ເນື່ອງຈາກຮູບແບບຝຶກແອບຕ່າງກັນ, ເຖິງວ່າໃນອາຍຸລຸ້ນນີ້ ນັກກິລາອາເມລິກາຍາກທີ່ຈະຊີງໄດ້ຜົນງານດີເດັ່ນກໍ່ຕາມ, ແຕ່ພວກເຂົາເຈົ້າເປັນຄົນຮູບຮ່າງສູງ, ມີຄວາມໄດ້ປຽບດ້ານຮ່າງກາຍ. ເວລາພວກເຂົາເຈົ້າເຕີບໃຫຍ່ເຕັມກະສຽນອາຍຸແລ້ວ, ຖ້າພວກເຂົາເຈົ້າຕັ້ງອົກຕັ້ງໃຈຝຶກແອບການແຂ່ງຂັນປະເພດໃດໜຶ່ງໂດຍສະເພາະແລ້ວ, ຄຽງຄູ່ກັບເຕັກນິກຂອງພວກເຂົາເຈົ້າຍົກສູງຂຶ້ນ, ຫຼາຍຄົນກໍອາດຈະມີການພັດທະນາແບບກ້າວກະໂດດ.
ຢ່າງໃດກໍ່ຕາມ, ໃນການແຂ່ງຂັນແລ່ນຕໍ່ໄມ້ທີ່ຈັດຂຶ້ນໃນມື້ສຸດທ້າຍ, ທີມອາເມລິກາໄດ້ສະແດງໃຫ້ເຫັນຄວາມເຂັ້ມແຂງຂອງເຂົາເຈົ້າ, ເຮັດໃຫ້ຄົນຮູ້ສຶກຕື່ນຕົກໃຈ. ຈາກນີ້ເຫັນໄດ້ວ່າ, ເຖິງວ່າອາເມລິກາຝຶກແອບນັກກິລາອ່າວຊ້າກໍ່ຕາມ, ແຕ່ເນື່ອງຈາກໃນລາຍການແລ່ນໄວຫຼືໄລຍະອ່າວໄກນັ້ນ ຈະເບິ່ງຂ້າມຄວາມສາມາດຂອງຮ່າງກາຍບໍ່ໄດ້, ສະນັ້ນ ນັກກິລາອາເມລິກາມັກສາມາດລື່ນກາຍຜູ່ອື່ນໄດ້. ສະນັ້ນ, ບັນຫາປັດຈຸບັນ ແມ່ນຈະເຮັດແນວໃດຈຶ່ງຈະສາມາດແກ້ໄຂຄວາມຫຼຸດໂຕນທາງດ້ານຮ່າງກາຍຂອງນັກກິລາຈີນກັບນັກກິລາປະເທດອື່ນທີ່ເກັ່ງໃນກິລາປະເພດນີ້, ມັນເປັນບັນຫາທີ່ຕ້ອງຄົ້ນຄວ້າວິເຄາະໃນວົງການກິລາແລ່ນແລະລານຈີນ. ໃນເວລາໃຫ້ສຳພາດຕໍ່ນັກຂ່າວຂອງຕ່າງປະເທດ, ທ່ານເຝິງສຸຢົງກ່າວຢ່າງເປີດອົກເປີດໃຈວ່າ, ຜົນສຳເລັດໃນການແຂ່ງຂັນແລ່ນແລະລານຊາວໜຸ່ມໂລກບໍ່ໄດ້ໝາຍຄວາມວ່າທີມຈີນຈະຊີງໄດ້ຜົນສຳເລັດທີ່ດີເລີດໃນງານກິລາໂອລິມປິກປັກກິ່ງ. ທ່ານກ່າວວ່າ, ກ່ອນປີ 2008, ນັກກິລາຈີນຕ້ອງການຍົກຄຸນນະພາບການຝຶກແອບຢ່າງຮີບດ່ວນ, ຖອດຖອນແລະສະສົມບົດຮຽນການແຂ່ງຂັນໃຫ້ອຸດົມສົມບູນກວ່າເກົ່າ.
|
