|
|
 |
| (GMT+08:00)
2006-08-28 10:24:42
|
 |
|
ທ່າທີຕັດສິນອະນາຄົດ
cri
Author: min
|
ສະຍາຍດີ, ທ່ານຜູ້ຟັງທີ່ເຄົາລົບ, ສົມບູນ ຜູ້ດຳເນີນລາຍການຍິນດີຕ້ອນຮັບທ່ານເຂົ້າສູ່ລາຍການຄາລົມຄົມຄາຍ.
ກ່ອນອື່ນ, ພວກເຮົາຈະເລົ່າເລື່ອງເລື່ອງໜຶ່ງສູ່ຟັງ.
ມີກຳມະກອນສາມຄົນພວມກໍ່ຝາເຮືອນນຳກັນ, ມີຄົນຍ່າງມາຖາມເຂົາເຈົ້າວ່າ: ພວກເຈົ້າເຮັດຫຍັງຢູ່?
ກຳມະກອນຜູ້ທີໜຶ່ງເວົ້າດ້ວຍຄວາມໃຈຮ້າຍວ່າ: "ເຈົ້າບໍ່ເຫັນຫວະ, ຂົນເອົາກ້ອນຫີນມາກໍ່ຝາເຮືອນ. ກ້ອນຫີນເຫຼົ່ານີ້ໜັກຊິຕາຍ, ເມື່ອຍຊິຕາຍ!"
ກຳມະກອນຜູ້ທີສອງບອກວ່າ: "ພວກເຮົາພວມປຸກຕຶກ, ແຕ່ວ່າຊິປຸກໃຫ້ແລ້ວບໍ່ແມ່ນງ່າຍເດີ້!"
ກຳມະກອນຜູ້ທີສາມຍິ້ມເວົ້າວ່າ: "ພວກຂ້ອຍພວມປຸກຕຶກຫຼັງໜຶ່ງ, ມັນຈະກາຍເປັນສິ່ງກໍ່ສ້າງທີ່ເປັນສັນຍະລັກໃຫ້ແກ່ເມືອງນີ້, ໄດ້ເຂົ້າຮ່ວມກິດຈະການໃຫຍ່ປານນີ້, ຂ້ອຍຮູ້ສຶກຕື່ນເຕັ້ນຫຼາຍ!"
10 ປີຫຼັງ, ກຳມະກອນຜູ້ທີໜຶ່ງຍັງກໍ່ຝາເຮືອນຢູ່ຄືເກົ່າ, ກຳມະກອນຜູ້ທີສອງໄດ້ນັ່ງແຕ້ມຜັງເຮືອນຢູ່ໃນຫ້ອງການ, ກາຍເປັນນັກວິສະວະກອນ, ສ່ວນຜູ້ທີສາມ, ພັດໄດ້ກາຍເປັນເຖົ້າແກ່ຂອງສອງຄົນທີ່ກ່າວມາ.
ກຳມະກອນສາມຄົນທີ່ກໍ່ຝາເຮືອນນຳກັນ, ພັດມີທ່າທີທີ່ຕ່າງກັນໝົດຕໍ່ວຽກງານຂອງຕົນ. ຜູ້ທີໜຶ່ງມີແຕ່ເຮັດດ້ວຍຄວາມຈຳເປັນ, ຈົ່ມວ່າບໍ່ພໍໃຈນຳວຽກທີ່ໂຕເຮັດ, ຜູ້ທີສອງໄດ້ເຫັນຈຸດໝາຍຂອງວຽກງານ, ເຖິງວ່າກໍ່ຈົ່ມຄືກັນ, ແຕ່ໄດ້ຖືການເຮັດສຳເລັດໜ້າທີ່ວຽກງານໄວ້ໃນຖານະທີໜຶ່ງ, ຜູ້ທີສາມສາມາດປະກົດເຫັນຄວາມມ່ວນຊື່ນຂອງວຽກງານ, ແຕ່ບໍ່ແມ່ນໃຊ້ທ່າທີຈົ່ມວ່າມາແກ້ໄຂບັນຫາ. ອາດຄຶດເຫັນໄດ້ວ່າ, ທ່າທີເຮັດວຽກຂອງສາມຄົນນີ້, ພາໃຫ້ເຂົາເຈົ້າມີຖານະຕ່າງກັນໃນພາຍລຸນມາແມ່ນເລື່ອງທີ່ສົມເຫດສົມຜົນທີ່ສຸດ.
ໃນຫຼາຍປີມານີ້, ມີປື້ມເຫຼັ້ມໜຶ່ງທີ່ໄດ້ຮັບຄວາມນິຍົມຊົມຊອບຫຼາຍຢູ່ແຫ່ງຕ່າງໆໃນໂລກ, ຊຶ່ງໃສ່ຊື່ວ່າ: ທ່າທີຊີ້ຂາດທຸກສິ່ງທຸກຢ່າງ. ຫວ່າງມໍ່ໆນີ້, ຄວາມເວົ້າດັ່ງກ່າວໄດ້ມີຄົນນຳມາເວົ້ານັບມື້ນັບຫຼາຍ. ໃນເລື່ອງທີ່ກ່າວມານັ້ນ, ທ່າທີສາມຢ່າງຂອງຄົນສາມຄົນໃນຫົວທີໄດ້ພາໃຫ້ພວກເຂົາເຈົ້າໄດ້ຮັບຜົນທີ່ຕ່າງກັນຫຼາຍ. ໃນຊີວິດຕົວຈິງ, ພວກເຮົາກໍອາດຈະໄດ້ສັງເກດເຫັນວ່າ, ຄົນທີ່ເຮັດວຽກປະເພດດຽວກັນຢູ່ໃນສິ່ງແວດລ້ອມທີ່ຄືກັນ, ພໍເລີ່ມຕົ້ນ, ຄວາມສາມາດຂອງໃຜລາວກໍພໍປານກັນ, ແຕ່ຜົນສຸດທ້າຍ, ພັດໄກກັນຫຼາຍ.
ທ່ານນາໂປລີອົງ ເຄີຍເວົ້າວ່າ, "ຄົນກັບຄົນບໍ່ມີຫຍັງຕ່າງກັນຫຼາຍ, ຕ່າງກັນເລັກນ້ອຍກໍມີແຕ່ຈິດໃຈຕັ້ງໜ້າກັບຈິດໃຈຫຍໍ້ທໍ້ທໍ່ນັ້ນ, ແຕ່ກໍແມ່ນຄວາມຕ່າງກັນໜ້ອຍດຽວດັ່ງກ່າວໄດ້ຊີ້ຂາດຄວາມແຕກໂຕນກັນຫຼາຍດ້າຍຊີວິດຂອງຄົນທີ່ມີຈິດໃຈຕ່າງກັນໃນຫຼາຍປີຫຼັງ." ທ່າທີແມ່ນວິທີທີ່ພວກເຮົາໃຊ້ມາເບິ່ງໂລກແລະເບິ່ງຕົນເອງດ້ວຍມະໂນຄະຕິແລະຄວາມມຸ່ງຫວັງທີ່ຕ່າງກັນ. ຍ້ອນມີທ່າທີຕ່າງກັນ, ເມື່ອພົບພໍ້ເລື່ອງລາວ, ວິທີແກ້ໄຂບັນຫາກໍຈະຕ່າງກັນ, ແລະອັນນີ້ແຫຼະ, ພາໃຫ້ມີຜົນສຸດທ້າຍຕ່າງກັນ. ບໍ່ວ່າເລື່ອງໃດ, ລ້ວນແຕ່ແມ່ນອັດຕະວິໄສກັບພາວະວິໄສສອງດ້ານນີ້ຊີ້ຂາດນຳກັນ, ພວກເຮົາຄວບຄຸມພາວະວິໄສບໍ່ໄດ້, ທຸກຄົນຍ່ອມຈະມີຍາມໂຊກດີແລະຍາມໂຊກບໍ່ດີ, ແຕ່ບໍ່ວ່າໂຊກດີຫຼືຮ້າຍ, ສະພາບຈິດໃຈທີ່ດີມັກຈະພາຄົນໄປສູ່ທິດທີ່ດີ, ສະພາບຈິດໃຈບໍ່ດີພັດກົງກັນຂ້າມ. ສະນັ້ນ, ອາດເວົ້າໄດ້ວ່າ, ທ່າທີສຳຄັນກວ່າສະຕິປັນຍາ.
ໃນຊາດນີ້, ພວກເຮົາຈະໄດ້ພໍ້ຄົນແນວໃດແລະເລື່ອງແບບໃດແມ່ນບໍ່ສາມາດຄາດຄະແນໄດ້, ແຕ່ພວກເຮົາສາມາດປັບປ່ຽນທ່າທີຂອງຕົນເອງ, ສະນັ້ນ, ພວກເຮົາຈົ່ງໃຊ້ທ່າທີອັນຕັ້ງໜ້າກວ່າເກົ່າ, ເພື່ອຮັບມືທຸກສິ່ງທຸກຢ່າງທີ່ຊີວິດດົນບັນດານ, ບໍ່ວ່າດີຫຼືຮ້າຍ, ຖ້າໃຊ້ທ່າທີຕັ້ງໜ້າຈະພາທ່ານໄປສູ່ບ່ອນສະຫວ່າງແຈ້ງແລະສວຍງາມກວ່າເກົ່າ.
ທ່ານຜູ້ຟັງທີ່ຮັກແພງ, ລາຍການຄາລົມຄົມຄາຍພາກນີ້ຂໍຈົບລົງພຽງທໍ່ນີ້, ຂອບໃຈທ່ານທີ່ຮັບຟັງ, ສະບາຍດີ.
|
|
|
