|
ວັນທີ 24 ສິງຫາ, ກອງປະຊຸມໂຄສະນາເຊີນຊວນໃຫ້ນັກທຸລະກິດຈີນທີ່ອາໃສຢູ່ອາຊຽນມາລົງທຶນໂຄງການໃນພາກຕາເວັນຕົກສຽງໃຕ້ຂອງຈີນຄັ້ງທີ 4 ແລະເວທີປາໃສນັກທຸລະກິດຊາວຈີນຢູ່ອາຊີປາຊິກຟິກຄັ້ງປະຖົມມະເລີກໄດ້ອັດລົງຢູ່ເມືອງຄຸນມິງ ແຂວງຢຸນນານຂອງຈີນ.
ຕັ້ງແຕ່ປີ 2003 ເປັນຕົ້ນມາ, ກອງປະຊຸມເຊີນຊວນໃຫ້ນັກທຸລະກິດຈີນທີ່ອາໃສຢູ່ອາຊຽນມາລົງທຶນໂຄງການຢູ່ພາກຕາເວັນຕົກສຽງໃຕ້ຂອງຈີນໄດ້ຈັດຂຶ້ນສາມເທື່ອຢ່າງສຳເລັດຜົນແລ້ວ,ກິດຈະກຳນີ້ແມ່ນມາດຕະການສຳຄັນທີ່ຈີນເສີມຂະຫຍາຍທ່າແຮງຂອງຊາວຈີນຕ່າງດ້າວ,ເພື່ອຮັບໃຊ້ເຂດການຄ້າເສລີຈີນອາຊຽນແລະຍຸດທະສາດພັດທະນາພາກຕາເວັນຕົກຂອງຈີນ,ແລະຊຸກຍູ້ການຮ່ວມມືແລະແລກປ່ຽນລະຫວ່າງເຂດຕາເວັນຕົກສຽງໃຕ້ກັບນັກທຸ ລະກິດຊາວຈີນທີ່ອາໃສຢູ່ອາຊຽນ.ມັນໄດ້ກາຍເປັນສະຖານທີ່ສຳຄັນແຫ່ງການຮ່ວມມືກັນລົງທຶນຢູ່ເຂດພາກຕາເວັນຕົກສຽງໃຕ້ຂອງຈີນເພີ່ມທະວີການຮ່ວມມືແລະການແລກປ່ຽນກັບນັກທຸລະກິດຂອງປະເທດຕ່າງໆໃນອາຊຽນ,ຊຸກຍູ້ການພັດທະນາໄປພ້ອມກັນ.
ຕາມຊາບວ່າ,ບົນພື້ນຖານບົດຮຽນທີ່ຖອດຖອນຈາກກອງປະຊຸມທຸກຄັ້ງທີ່ຜ່ານມາ, ຮູບການກອງປະຊຸມເທື່ອນີ້ໄດ້ມີການປະດິດສ້າງໃຫມ່ຢ່າງຫລວງຫລາຍ,ໄດ້ເພີ່ມເນື້ອໃນຕ່າງໆຄື ເວທີປາໃສນັກທຸລະກິດຊາວຈີນທີ່ຢູ່ອາຊີປາຊິກຟິກຄັ້ງປະຖົມມະເລີກ,ການເຊື່ອມໂຍງໂຄງການແລະການເຈລະຈາໂຄງການຈະມີເປົ້າຫມາຍຈະແຈ້ງກວ່າຄັ້ງກ່ອນ.
ນາງລີຮາຍເຟິງ ຮອງຫົວຫນ້າຫ້ອງການວຽກງານຊາວຈີນຕ່າງດ້າວຂອງຄະນະລັດຖະບານຈີນເວົ້າວ່າ:
ໃນບໍ່ເທົ່າໃດປີມານີ້,ເພື່ອຊຸກຍູ້ການພັດທະນາແລະການໄຂປະຕູສູ່ພາຍນອກຂອງພາກຕາເວັນຕົກສຽງໃຕ້,ລັດຖະບານຈີນໄດ້ວາງນະໂຍບາຍພິເສດຢ່າງເປັນລະບົບ.ອຳນາດການປົກຄອງບັນດາແຂວງ ເຂດປົກຄອງຕົນເອງ ແລະກຳແພງນະຄອນທີ່ຢູ່ພາກຕາເວັນຕົກສຽງໃຕ້ໄດ້ເພີ່ມການລົງທຶນ,ເພີ່ມທະວີການ ກໍ່ສ້າງພື້ນຖານໂຄງລ່າງ,ອອກແຮງປົວແປງສະພາບແວດລ້ອມຂອງການລົງທຶນ.ໂຄງການທີ່ນັກທຸລະກິດຊາວຈີນທີ່ອາໃສຢູ່ອາຊຽນລົງທຶນໃສ່ເຂດ,ແຂວງທີ່ຢູ່ພາກຕາເວັນຕົກສຽງໃຕ້ຂອງຈີນນັ້ນໄດ້ເພີ່ມຂຶ້ນທຸກປີ,ຂະຫນາດການລົງທຶນກໍ່ເພີ່ມຫລາຍຂຶ້ນຢ່າງເດັ່ນຊັດ.ໄດ້ສ້າງພື້ນຖານອັນດີງາມແກ່ວິສາຫະກິດຂອງຈີນແລະອາຊຽນບັນລຸການໄດ້ຜົນປະໂຫຍດ ຮ່ວມກັນ.
ເມື່ອ 15 ປີກ່ອນ, ຈີນອາຊຽນໄດ້ເລີ່ມດຳເນີນການເຈລະຈາຮ່ວມມືກັນ, ອັນໄດ້ເປີດສັງກາດໃຫມ່ໃນການພົວພັນລະຫວ່າງສອງຝ່າຍ.ຈາກນັ້ນມາດ ຈີນກັບອາຊຽນໄດ້ອີງຕາມຈິດໃຈທີ່ຕ່າງຝ່າຍຕ່າງເຄົາລົບເຊິ່ງກັນແລະກັນ, ສະເຫມີພາບແລະຕ່າງໄວ້ເນື້ອເຊື່ອໃຈກັນ,ແລະຮ່ວມມືກັນໄດ້ຮັບຜົນປະໂຫຍດນຳກັນ,ແລ້ວດຳເນີນການແລກປ່ຽນແລະຮ່ວມມືຢ່າງລົງເລິກໃນດ້ານການເມືອງ ເສດຖະກິດການຄ້າ ຄວາມປອດໄພ ວັດທະນະທຳສັງຄົມແລະການໄປມາຫາສູ່ຂອງປະຊາຊົນສອງຝ່າຍເປັນຕົ້ນ.ປີ 2002,ຈີນກັບອາຊຽນໄດ້ເຊັນສັນຍາກອບກ່ຽວກັບການສ້າງຕັງເຂດການຄ້າເສລີ,ສອງຝ່າຍຕ່າງໄດ້ໃຫ້ສິດທິພິເສດແກ່ກັນແລະໄດ້ຮັບຜົນປະໂຫຍດທັງສອງຝ່າຍ,ເຮັດໃຫ້ ການພົວພັນດ້ານເສດຖະກິດແລະການໄປມາຫາສູ່ກັນດ້ານການຄ້າທີ່ແຫນ້ນແຟ້ນນັ້ນໄດ້ຮັບການເພີ່ມທະວີຂຶ້ນຕື່ມ.ເດືອນກໍລະກົດປີ 2005, ແຜນການຫລຸດຜ່ອນພາສີຮອບດ້ານໃນເຂດການຄ້າເສລີຈີນອາຊຽນໄດ້ເລີ່ມປະຕິບັດຢ່າງເປັນທາງການ.
ຕາມຊາບວ່າ,ແຕ່ເດືອນກໍລະກົດປີ 2005 ຫາເດືອນພຶດສະພາປີ 2006,ການນຳເຂົ້າຈາກອາຊຽນຂອງຈີນໄດ້ບັນລຸ 74 ຕື້ 150 ລ້ານໂດລາ,ເພີ່ມຂຶ້ນຫລາຍກວ່າໄລຍະດຽວກັນຂອງປີກາຍ 20,6%,ການສົ່ງອອກຂອງຈີນໄປອາຊຽນບັນລຸ 55 ຕື້ 570 ລ້ານໂດລາ,ເພີ່ມຂຶ້ນ 23,1%.ພາຍໃນບໍ່ເທົ່າໃດປີຂ້າງຫນ້ານີ້, ຈີນກັບອາຊຽນຍັງຈະຫລຸດພາສີໃຫ້ຜະລິດຕະພັນ 7000 ກວ່າຊະນິດ,ແລະເປີດຂະແຫນງການບໍລິການແລະການລົງທຶນ,ເມື່ອຮອດປີ 2010,ຈະສ້າງເຂດການຄ້າເສລີຢ່າງສົມບູນ.
ພາກາຕາເວັນຕົກສຽງໃຕ້ຂອງຈີນຕິດກັບປະເທດຕ່າງໆຂອງອາຊຽນ,ມີວັດທະນະທຳຄ້າຍຄືກັນ, ການຂະຫຍາຍການພົວພັນຮ່ວມມືກັນໃນດ້ານ ເສດຖະກິດການຄ້າມີທ່າແຮງຫລາຍ.ໃນຫລາຍປີມານີ້, ສອງຝ່າຍໄດ້ສ້າງຄວາມໄວ້ເນື້ອເຊື່ອໃຈກັນທາງດ້ານການເມືອງ, ໄດ້ສ້າງພື້ນຖານອັນຫມັ້ນແກ່ນໃຫ້ແກ່ການຂະຫຍາຍການພົວພັນຮ່ວມມືກັນດ້ານເສດຖະກິດການຄ້າ;ໃນດ້ານຊັບພະຍາກອນ, ຜະລິດຕະກຳແລະຜະລິດຕະພັນອຸດສາຫະກຳແລະກະສິກຳມີລັກສະນະຄ້ຳຊູກັນ,ອັນໄດ້ສ້າງໂອກາດອັນໃຫຍ່ຫລວງໃຫ້ແກ່ການຂະຫຍາຍການຮ່ວມມືດ້ານເສດຖະກິດການຄ້າ.
ທ່ານເຈິ້ງມິນຊວນ ປະທານກິຕິມະສັກສະພາການຄ້າຈີນສິງກະໂປໃຫ້ສຳພາດຕໍ່ນັກຂ່າວວ່າ:
ເມື່ອທຽບກັບແຂວງອື່ນໆ,ແຂວງຢຸນນານທີ່ຕັ້ງຢູ່ເຂດຊາຍແດນພາກຕາເວັນຕົກສຽງໃຕ້ຂອງຈີນມີທ່າແຮງດ້ານພູມີສາດ,ໃນຖານະທີ່ເປັນທາງຜ່ານທາງບົກທີ່ໄປສູ່ປະເທດຕ່າງໆຢູ່ອາຊີຕາເວັນອອກສຽງໃຕ້,ແຂວງຢຸນນານມີທ່າແຮງແລະຊ່ອງທາງຂະຫຍາຍຕົວອັນມະຫາສານໃນດ້ານການຄ້າ ຄົມມະນາຄົມ ການບໍລິການແລະການທ່ອງທ່ຽວເປັນຕົ້ນ.
ໃນເວລາກ່າວປະຖະກະຖາໃນເວທີປາໃສເທື່ອນີ້,ທ່ານຊິນກວາງຢົງ ຮອງເຈົ້າແຂວງຢຸນນານເວົ້າວ່າ:
ຂ້າພະເຈົ້າເຊື່ອວ່າ, ຜ່ານການຈັດກອງປະຊຸມເທື່ອນີ້ຢ່າງສຳເລັດຜົນ, ແຂວງຢຸນນານຈະສາມາດປະກອບສ່ວນເຂົ້າໃນການຮ່ວມມືແລະແລກປ່ຽນກັບພາກພື້ນອາຊີປາຊິກຟິກ,ກ່າຍຂົວທີ່ເປັນບ້ານໃກ້ເຮືອນຄຽງທີ່ດີຕໍ່ກັນ,ຕ່າງຝ່າຍຕ່າງມີຜົນປະໂຫຍດແລະນຳເອົາຄວາມຜາສຸກມາຍັງຝ່າຍຕ່າງໆຢູ່ພາກຕາເວັນຕົກສຽງໃຕ້ຂອງຈີນໃນການຮ່ວມມືທີ່ໄປສູ່ປະເທດອາຊຽນ.
ຄຽງຄູ່ກັບເສດຖະກິດໂລກາພິວັດແລະເສດຖະກິດພາກພື້ນເຊື່ອມໂຍງເຂົ້າກັນໄດ້ຂະຫຍາຍຕົວເລື້ອຍໆ,ລະດັບຄວາມອີງອາໃສກັນດ້ານເສດຖະ ກິດລະຫວ່າງປະເທດແລະເຂດແຄວ້ນນັບມື້ນັບລົງສູ່ລວງເລິກ.ໃນຂະບວນ ການເຊື່ອມໂຍງເຂົ້າກັບເສດຖະກິດພາກພື້ນໃນໂລກ, ນັກທຸລະກິດຊາວຈີນຕ່າງດ້າວໄດ້ເສີມຂະຫຍາຍບົດບາດສຳຄັນ.ພວກເຂົາເຈົ້າໄດ້ກາຍເປັນຊັບ ພະຍາກອນສຳຄັນທີ່ຈີນເປີດກວ້າງການໄຂປະຕູສູ່ພາຍນອກເພື່ອພັດທະນາເສດຖະກິດ.
ທ່ານກ່າວຊິນຜິງ ນັກທຸລະກິດຊາວຈີນທີ່ຢູ່ສິງກະໂປເວົ້າວ່າ:
ຂ້າພະເຈົ້າໄດ້ລົງທຶນຢູ່ແຜ່ນດິນໃຫຍ່ຈີນແຕ່ດົນແລ້ວ,ແຕ່ກ່ອນແມ່ນເຮັດທຸລະກິດຢູ່ແຂວງຝູຈ້ຽນ ແຂວງຈ່ຽງຊູ່ແລະນະຄອນຊຽງໄຮ້ທີ່ແຄມທະເລຂອງຈີນ, ເທື່ອນີ້ມີໂອກາດມາພາກຕາເວັນຕົກສຽງໃຕ້.ການພັດທະນາພາກຕາເວັນຕົກຂອງຈີນໄດ້ດຳເນີນມາຫລາຍປີແລ້ວ, ເສດຖະກິດຂອງຈີນກໍ່ໄດ້ພັດ ທະນາຢ່າງໄວພະລັນ.ຂ້າພະເຈົ້າຫວັງລົງທຶນເຂົ້າຮ່ວມການກໍ່ສ້າງປະເທດຊາດ,ແລະກໍ່ຫວັງປະກອບສ່ວນເຂົ້າໃນການຂະຫຍາຍຕົວຂອງເຂດການຄ້າເສລີຈີນອາຊຽນ.
ໃນເວທີປາໃສເທື່ອນີ້,ທ່ານໂລຫາວຊາຍ ຮອງປະທານສະພາປຶກສາການເມືອງແຫ່ງຊາດຈີນໄດ້ຮອງຮັບແລະຍ້ອງຍໍໃນລະດັບສູງຕໍ່ຊາວຈີນທີ່ອາໃສ່ຢູ່ຕ່າງປະເທດທີ່ໄດ້ປະກອບສ່ວນເຂົ້າໃນການພັດທະນາເສດຖະກິດຈີນ. ທ່ານເວົ້າວ່າ,ຊາວຈີນຫລາຍສິບລ້ານຄົນຢູ່ແຫ່ງຕ່າງໆໃນທົ່ວໂລກ, ພວກເຂົາເຈົ້າໄດ້ປະກອບສ່ວນອັນຕັ້ງຫນ້າເຂົາໃນການພັດທະນາເສດຖະ ກິດແລະຄວາມກ້າວຫນ້າດ້ານສັງຄົມຂອງປະເທດທີ່ເຂົ້າເຈົ້າອາໃສຢູ່,ແລະກໍ່ໄດ້ເສີມຂະຫຍາຍບົດບາດສຳຄັນໃນການປະຕິຮູບ ໄຂປະຕູສູ່ພາຍນອກແລະການກໍ່ສ້າງເສດຖະກິດຂອງຈີນ.ທ່ານເຫັນວ່າ, ຊາວຈີນຕ່າງດ້າວອັນໄພສານແລະພີ່ນ້ອງຮ່ວມຊາດຮົງກົງ ມາກາວເຂົ້າຮ່ວມຍຸດທະສາດພັດທະນາພາກຕາເວັນຕົກຂອງຈີນແລະການກໍ່ສ້າງເຂດການຄ້າເສລີຈີນອາຊຽນແມ່ນເປັນຕົວຢ່າງທີ່ຕັ້ງຫນ້າ.
ທ່ານເວົ້າວ່າ:
ຈີນຈະເລັ່ງລັດຮ່ວມມືກັບປະເທດອາຊຽນ,ອອກແຮງສ້າງເຂດການຄ້າເສລີທີ່ປະກອບດ້ວຍປະເທດພວມພັດທະນາທີ່ໃຫຍ່ກວ່າຫມູ່ໃນໂລກແລະມີປະຊາກອນຫລາຍກວ່າຫມູ່ໃນໂລກ.ການພັດທະນາຂອງຈີນ ການພົວພັນມິດຕະພາບລະຫວ່າງຈີນກັບອາຊຽນ,ໂດຍສະເພາະແມ່ນການຂະຫຍາຍຕົວຂອງການພົວພັນເສດຖະກິດການຄ້າໄດ້ແລະຈະສືບຕໍ່ອຳນວຍໂອກາດທີ່ຫາຍາກແກ່ນັກທຸລະກິດຊາວຈີນທີ່ອາໃສຢູ່ອາຊຽນ.
|
