|
ສະບາຍດີທ່ານຜູ້ຟັງທີ່ເຄົາລົບ, ແສງແກ້ວຜູ້ຈັດທຳລາຍການຍິນດີຕ້ອນຮັບທ່ານມາຮ່ວມລາຍການຢ່ອນອາລົມໃນວັນເສົາ. ສຳລັບມື້ນີ້, ພວກເຮົາໄດ້ຈັດເອົາເພງຂອງທ່ານໂຈວຮວາຈ້ຽນມາສູ່ທ່ານຟັງ. ທ່ານໂຈວຮວາຈ້ຽນ ນັກຮ້ອງໄຕ້ຫວັນຂຶ້ນສູ່ເວທີເພງມາໄດ້ 20 ປີແລ້ວ, ຫວ່າງມໍ່ໆນີ້, ທ່ານໄດ້ອັດຈຳໜ່າຍCDແຜ່ນໃໝ່ຄືຊຸດທີ 29 ທີ່ໃຫ້ຊື່ວ່າ: yu ren ທ່າມກາງສາຍຝົນ.
ທີ່ທ່ານພວມຟັງຢູ່ນີ້ແມ່ນເພງ"ai qing lu" ເສັ້ນທາງແຫ່ງຄວາມຮັກ, ຊຶ່ງແມ່ນເພງCDແຜ່ນໃໝ່ຂອງທ່ານໂຈວຮວາຈ້ຽນ. ເນື້ອເພງມີຢູ່ວ່າ: "ເສັ້ນທາງແຫ່ງຄວາມຮັກ, ມີນ້ຳໝອກປົກຄຸມ, ເມື່ອນ້ຳໝອກຫາຍໄປ, ນ້ຳຄ້າງຍັງຢູ່, ນ້ຳຄ້າງເຮັດໃຫ້ດິນຊຸ່ມຊື່ນ. ເສັ້ນທາງແຫ່ງຄວາມຮັກ, ຄົດໆລ້ຽວໆ, ເໝືອນດັ່ງສ້ອຍມຸກ, ມີຄວາມສຳນຶກຮູ້ທຸກບາດກ້າວ. ຕາມເສັ້ນທາງແຫ່ງຄວາມຮັກ, ເມື່ອມີເຈົ້າແລ້ວ, ເລື່ອງຫຍັງຂ້ອຍກໍສູ້ທົນໄດ້, ໃນທີ່ສຸດ, ຄວາມຫຍຸ້ງຍາກທຸກຢ່າງບົນທາງເສັ້ນນີ້, ກໍເປັນເລື່ອງທີ່ໜ້າອວຍພອນ."
ທ່ານໂຈວຮວາຈ້ຽນເກີດຢູ່ຮົງກົງເມື່ອປີ 1960, ເມື່ອຊຸມປີ 1970 ທ່ານໄດ້ເສັງເຂົ້າມະຫາວິທະຍາໄລໄຕ້ຫວັນ. ໃນໄລຍະຮຽນຢູ່ມະຫາວິທະຍາໄລ, ນອກໂມງຮຽນ, ທ່ານໂຈວຮວາຈ້ຽນໄດ້ໄປຮ້ອງເພງເປັນປະຈຳຢູ່ຫ້ອງອາຫານແລະບາເຫຼົ້າ, ໄດ້ເລີ່ມດຳລົງຊີວິດນັກຮ້ອງຕັ້ງແຕ່ນັ້ນມາ, ທັງໄດ້ຝຶກແອບວິຊາຮ້ອງເພງຢ່າງດີເດັ່ນ. ປີ 1984, ທ່ານໂຈວຮວາຈ້ຽນໄດ້ເຊັນສັນຍາກັບບໍລິສັດແຜ່ນສຽງກຸນສືໄຕ້ຫວັນ, ແລ້ວອັດCDແຜ່ນທຳອິດທີ່ຊື່ວ່າ"ເພງຈັງຫວະວ່ອນເພງສຸດທ້າຍ".
ປີ 2006, ທ່ານໂຈວຮວາຈ້ຽນໄດ້ອັດCDຊຸດທີ 29 ທີ່ຊື່ວ່າ: ທ່າມກາງສາຍຝົນ. ໃນCDແຜ່ນນີ້, ທ່ານໄດ້ສະແດງຄວາມຮັກຫອມແລະຄວາມຈົດຈໍ່ຕໍ່ດົນຕີ ຕໍ່ຄວາມຮັກແລະຕໍ່ຄວາມໄຝ່ຝັນຂອງຕົນ. ຕໍ່ໄປເຊີນຟັງເພງyu ren ທ່າມກາງສາຍຝົນ.
ແຜ່ນCDທ່າມກາງສາຍຝົນໄດ້ຮັບຄວາມສົນໃຈຢ່າງສູງຈາກບໍລິສັດແຜ່ນສຽງກຸນສື, ບໍລິສັດໄດ້ລົງທຶນກ້ອນໃຫຍ່ເພື່ອຖ່າຍທຳມິວຊິກວິດີໂອໃຫ້ເພງທ່າມກາງສາຍຝົນຂອງທ່ານໂຈວຮວາຈ້ຽນ. ເພງນີ້ໄດ້ເລົ່າເລື່ອງຍິງຊາຍສອງຄົນທີ່ຮັກກັນມາແຕ່ນ້ອຍ, ເມື່ອເຕີບໃຫຍ່ແລ້ວ, ພະເອກໄດ້ຈັດງານດົນຕີເພື່ອນາງເອກໂດຍສະເພາະ, ເພື່ອບັນລຸຄວາມຝັນໃນຍາມຍັງນ້ອຍ, ສອງຄົນໄດ້ຫວນຄຶດຊີວິດອັນມ່ວນຊື່ນໃນຍາມຍັງນ້ອຍທ່າມກາງສຽງດົນຕີທີ່ອອນຊອນ. ຕໍ່ໄປ, ເຊີນຟັງເພງນີ້ໄດ້ເລີຍ, ທ່າມກາງສາຍຝົນ.
ໃນCDແຜ່ນໃໝ່ນີ້, ໄດ້ມີເພງໂຄສະນາເພງໜຶ່ງຊື່ວ່າ"quan shi jie de ai" ຄວາມຮັກໃນທົ່ວໂລກ. ເພງນີ້ແຕ່ເດີມແມ່ນເພງອັງກິດ"what the world needs now is love". ຈັງຫວະແຈັສ, ທຳນອງທັນສະໄໝ, ບວກກັບການຂັບຮ້ອງອັນປະທັບໃຈແລະສຽງອັນອົບອຸ່ນຂອງທ່ານໂຈວຮວາຈ້ຽນ, ເຮັດໃຫ້ຄົນຮູ້ສຶກເໝືອນດັ່ງມີສາຍລົມເຢັນພັດມາໃສ່. ຕໍ່ໄປເຊີນຟັງເພງ"quan shi jie de ai" ຄວາມຮັກໃນທົ່ວໂລກ.
"ພວກເຮົາຄອງຄອຍຄວາມຮັກແທ້ຈິງ, ຖ້າບໍ່ມີຄວາມຮັກ, ໂລກຈະເປົ່າຫວ່າງ, ສຸດທີ່ຫວງແຫນໃນຕະຫຼອດຊີວິດ, ຄວາມຮັກທີ່ຫວານຊື່ນ, ບໍ່ພຽງແຕ່ເຈົ້າກັບຂ້ອຍ, ໃຜໆກໍແບ່ງປັນກັນໄດ້. ເສັ້ນທາງທີ່ຍາວຢຽດ, ເສັ້ນທາງທີ່ຄົດລ້ຽວ, ຂ້ອຍຊອກເຫັນທາງຂອງຕົນ, ທາງສະແຫວງຫາຄວາມສຸກ,ຢ່າບອກໃຫ້ຂ້ອຍຢຸດ, ຈົ່ງເປີດຫ້ອງຫົວໃຈເຈົ້າໄວ້, ຂ້ອຍຈະນຳເອົາຄວາມຮັກແກ່ເຈົ້າ, ຄວາມຮັກຂອງທົ່ວໂລກ."
ຕົ້ນປີນີ້, ທ່ານໂຈວຮວາຈ້ຽນໄດ້ຮ້ອງເພງປະກອບລະຄອນໂທລະພາບເລື່ອງກົງຟູທີ່ຊື່ວ່າ"shen diao xia lv"ພະຍາຮຸ້ງກັບຄູ່ນັກດາບ, ເພງນີ້ຊື່ວ່າ"jiang hu xiao"ສຽງຫົວຂອງວົງຜູ້ພະເນຈອນ. ເມື່ອລະຄອນໂທລະພາບເລື່ອງນີ້ນຳອອກສາຍແລ້ວ, ເພງນີ້ກໍໄດ້ຮັບຄວາມນິຍົມຊົມຊອບຈາກຜູ້ຊົມແລະແຟນເພງທັງຫຼາຍ. ເພງນີ້ກໍໄດ້ຈັດເຂົ້າໃນCDແຜ່ນໃໝ່ຂອງທ່ານໂຈວຮວາຈ້ຽນ.
"ສຽງຫົວໃນວົງຜູ້ພະເນຈອນດັງຂຶ້ນ, ຄວາມຮັກຄວາມແຄ້ນໄດ້ແລ້ວກັນໄປ, ລອງລິດກັນ, ເຊື່ອມຄວາມອາຄາດໄວ້ໃນໃຈ, ມະນຸດໂລກ, ມີຄວາມຫງ່ວມເຫງົາ. ແສງຈັນສາດສ່ອງ, ທາງເດີນຍາວໄກ, ຄົນຍ່ອມເຖົ້າ, ແຕ່ໃຈຍັງໜຸ່ມ. ຮັກບໍ່ສົມຫວັງ, ແຕ່ບໍ່ລືມຄວາມດີຂອງເຈົ້າ. ວິລະຊົນຜູ້ສະຫງ່າອົງອາດກໍໂດດດ່ຽວປ່ຽວພອຍ." ຈາກເນື້ອເພງນີ້ພວກເຮົາຈະເຫັນໄດ້ວ່າ, ວິລະຊົນຜູ້ພະເນຈອນອົງອາດກ້າຫານໃນລະຄອນກົງຝູ່ກໍມີຄວາມຂົມຂຶ່ນທີ່ຜູ້ອື່ນບໍ່ຮູ້ນຳ, ເຖິງວ່າພວກເຂົາເຈົ້າສະຫງ່າຜ່າເຜີຍໃນວົງຜູ້ພະເນຈອນ, ແຕ່ພັດເຫງົາໃຈຫາອັນປຽບບໍ່ໄດ້.
ເທິງເວທີເພງຈີນທີ່ມີຄົນໃໝ່ເລື້ອຍໆໃນຊູ່ມື້ນີ້, ຜູ້ທີ່ຮ້ອງເພງມາ 20 ປີ, ອັດແຜ່ນCDສ່ວນຕົວເກືອບ 30 ແຜ່ນແລະມີເພງມ່ວນອະມະຕະຫຼາຍຄືທ່ານໂຈວຮວາຈ້ຽນນັ້ນບໍ່ແມ່ນເລື່ອງງ່າຍ. ລັກສະນະດັ້ງເດີມແລະຄວາມດີເລີດ ຄວາມຈິງໃຈໃນເພງຂອງທ່ານໂຈວຮວາຈ້ຽນແມ່ນບໍ່ມີບ່ອນຕິ.
ໃນຫຼາຍປີມານີ້, ຄວາມຮັກຫອມແລະຄວາມຈົດຈໍ່ຕໍ່ດົນຕີຂອງທ່ານຍິ່ງເຮັດໃຫ້ແຟນເພງປະທັບໃຈ.
ມ້ວນທ້າຍລາຍການມື້ນີ້, ເຊີນຟັງເພງ"TIME" ໃນCDແຜ່ນໃໝ່ຂອງທ່ານໂຈວຮວາຈ້ຽນ. ເນື້ອເພງມີຢູ່ວ່າ: "ໜ້າສຸດທ້າຍຂອງປື້ມບັນທຶກຍັງເປົ່າຫວ່າງ, ຂ້ອຍໄດ້ແຕ້ມໜ້າຕາທ່າທາງຂອງເຈົ້າໃສ່ຊ້ຳແລ້ວຊ້ຳອີກ, ຂ້ອຍປັດຂີ້ຝຸ່ນຖິ້ມຢູ່ຜູ້ດຽວ, ແມ່ນໃຜຂຽນຄວາມເວົ້າທີ່ຈັບໃຈຄົນຕອນນີ້? ໃນທັນໃດ, ກິ່ນຫອມຂອງເຈົ້າພັດມາຕາມສາຍລົມ, ແລ້ວລະເຫີຍໄປ, ຂ້ອຍຈຶ່ງຄຶດຊວດວ່າ, ເວລາໄດ້ຜ່ານໄປແລ້ວ, ຂ້ອຍບໍ່ຢາກຈາກໄປ, ຖ້າເວລາຕ່າວຄືນມາໄດ້, ຄວາມຮັກຍັງຈະເບີກບານຄືນໃໝ່ຫຼືບໍ່? ແຕ່ເວລາໄດ້ຜ່ານໄປແລ້ວ".
ທ່ານຜູ້ຟັງທີ່ເຄົາລົບ, ທີ່ຟັງມານັ້ນແມ່ນເພງຂອງທ່ານໂຈວຮວາຈ້ຽນ. ລາຍການຢ່ອນອາລົມໃນວັນເສົາພາກນີ້ຂໍຈົບລົງທໍ່ນີ້. ສະບາຍດີ.
|
