|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການອາລະຍະທຳຈີນ. ໃນປະຫວັດສາດຈີນ, ເມື່ອທຽບກັບຈູ່ຢວນຈ່າງ ປະຖົມກະສັດລາຊະວົງໝິງແລ້ວ ອາດບໍ່ມີປະຖົມກະສັດອົງໃດເກີດໃນຄອບຄົວທີ່ທຸກຍາກກວ່າ ມີຊີວະປະຫວັດຍິ່ງໜ້າສັງເວດກວ່າແລະມີຄວາມອັດສະຈັນກວ່າ. ຈູ່ຢວນຈ່າງຮູ້ຍຸດທະວິທີສູ້ລົບ, ຄຶດເລິກຄຶດໄກ, ຂະຫຍັນຂັນແຂງນຳວຽກບ້ານການເມືອງໃນຕະຫຼອດຊີວິດ, ແມ່ນຮ້ອງເຕ້ອົງໜຶ່ງທີ່ມີຄຸນງາມຄວາມດີທີ່ມີໜ້ອຍໃນປະຫວັດສາດຈີນ. ໃນລາຍການພາກນີ້, ຂ້າພະເຈົ້າຈະສະເໜີຈູ່ຢວນຈ່າງ ປະຖົມກະສັດລາຊະວົງໝິງສູ່ທ່ານຟັງ.
ພາບຈູ່ຢວນຈ່າງ-ປະຖົມກະສັດລາຊະວົງໝິງ
ຈູ່ຢວນຈ່າງເກີດຢູ່ເມືອງເຟິ້ງຢາງແຂວງອ່ານຮຸຍເມື່ອ ຄສ ປີ 1328, ພໍ່ແມ່ຕາຍໃນເວລາເພິ່ນຍັງເປັນເດັກນ້ອຍ, ຄອບຄົວທຸກຍາກ. ໃນເວລາຍັງເປັນເດັກນ້ອຍ ເພິ່ນເຂົ້າໂຮງຮຽນພຽງແຕ່ບໍ່ເທົ່າໃດເດືອນກໍ່ເຊົາຮຽນຍ້ອນບໍ່ສາມາດເສຍຄ່າຮຽນ, ແລະດຳລົງຊີວິດດ້ວຍການຮັບຈ້າງລ້ຽງງົວໃຫ້ຜູ່ອື່ນ. ປີ 1344, ບ້ານເກີດຂອງຈູ່ຢວນຈ່າງເກີດໄພຕັກແຕນທີ່ບໍ່ເຄີຍເຫັນມາກ່ອນ, ພືດພັນທັນຍາຫານໃນໄຮ່ນາຖືກຕັກແຕນກິນໝົດ, ຊາວນາທັງຫຼາຍບໍ່ມີຜົນເກັບກ່ຽວ, ຄົນຈຳນວນຫຼວງຫຼາຍໄດ້ຕາຍຍ້ອນຄວາມອຶດຢາກ. ຈູ່ຢວນຈ່າງທີ່ອາຍຸ 16 ປີຈຳເປັນຕ້ອງໄປບວດເປັນສາມະເນນ, ດຳລົງຄົງຕົວໂດຍອາໄສການຂໍທານ. ຕໍ່ມາຫຼາຍປີ, ຈູ່ຢວນຈ່າງໄດ້ຊັດເຊພະເນຈອນໄປທົ່ວທີບ. ປະສົບການນີ້ໄດ້ເຮັດໃຫ້ຈູ່ຢວນຈ່າງມີວິໄສທັດກວ້າງໄກ, ແລະກໍ່ເຮັດໃຫ້ຈູ່ຢວນຈ່າງກາຍເປັນຄົນມີນິດໄສກ້າແກ່ນໜຽວແໜ້ນ.
ໃນຍຸກສະໄໝທີ່ຈູ່ຢວນຈ່າງດຳລົງຊີວິດຢູ່ນັ້ນ ແມ່ນທ້າຍລາຊະວົງຢວນ. ເນື່ອງຈາກຜູ່ປົກຄອງປະຕິບັດນະໂຍບາຍຈຳແນກຊົນເຜົ່າແລະປົກຄອງຢ່າງທາລຸນ, ການລຸກຮືຂຶ້ນຂອງຊາວນາໄດ້ເກີດຂຶ້ນຢ່າງເປັນຂະບວນຟົດຟື້ນ. ຈູ່ຢວນຈ່າງໄດ້ເຂົ້າຮ່ວມກອງທະຫານລຸກຮືຂຶ້ນຂອງຊາວນາໃນເວລາອາຍຸ 24 ປີ. ຍ້ອນເພິ່ນໃຈກ້າພິກໄຫວ, ອົງອາດກ້າຫານໃນການສູ້ລົບ, ຈູ່ຢວນຈ່າງໄດ້ໂປໂລຂຶ້ນຢ່າງວ່ອງໄວໃນກອງທະຫານຊາວນາ, ແລະເລື່ອນຊັ້ນເປັນກ້າວໆ. ຄຽງຄູ່ກັບອິດທິກຳລັງຂອງຕົນໄດ້ຂະຫຍາຍກວ້າງອອກ, ຈູ່ຢວນຈ່າງໄດ້ສ້າງຕັ້ງກອງປະກອບອາວຸດຂອງຕົນທີ່ເປັນອິດສະຫຼະ.
ຈູ່ຢວນຈ່າງມີນິດໄສເປີດອົກເປີດໃຈ, ມັກຄົບຄ້າໝູ່ເພື່ອນທີ່ສຸດ, ຜູ່ມີຄວາມຮູ້ຄວາມສາມາດຢ່າງຫຼວງຫຼາຍໄດ້ໄປເຂົ້າຮ່ວມກອງທະຫາຂອງເພິ່ນ. ເມື່ອອາຍຸ 39 ປີ, ອິດທິກຳລັງຂອງຈູ່ຢວນຈ່າງໄດ້ຍຶດຄອງຈີນກວ່າເຄິ່ງໜຶ່ງ. ປີ 1368, ຈູ່ຢວນຈ່າງຕັ້ງຕົນຂຶ້ນເປັນຮ້ອງເຕ້ຢູ່ເມືອງຈິ່ນຫຼິງ ຄືໜານກິ່ງໃນທຸກວັນນີ້, ສ້າງຕັ້ງລາຊະວົງໝິງຂຶ້ນ. ໃນປີດຽວກັນ, ກອງທະຫານຂອງຈູ່ຢວນຈ່າງບຸກເຂົ້ານະຄອນຕ້າຕູ່ ຄືປັກກິ່ງໃນທຸກວັນນີ້ ເມືອງຫຼວງຂອງລາຊະວົງຢວນໃນຄາວນັ້ນ, ການປົກຄອງຂອງລາຊະວົງຢວນໄດ້ສິ້ນສຸດລົງ.
ຈູ່ຢວນຈ່າງຈາກສາມັນຊົນຜູ່ໜຶ່ງກ້າວຂຶ້ນເປັນຮ້ອງເຕ້ຜູ່ກໍ່ຕັ້ງລາຊະວົງໝິງ, ໃນໄລຍະຕົ້ນຂອງການປົກຄອງ ພະອົງກໍ່ສຸດທີ່ເອົາໃຈໃສ່ນຳການຖອດຖອນເອົາບົດຮຽນທາງລົບຈາກການພັງທະລາຍຂອງລາຊະວົງຢວນ. ກ່ອນອື່ນ ພະອົງໄດ້ປະຕິຮູບໂຄງປະກອບດ້ານການເມືອງຢ່າງຂະໜາດໃຫຍ່, ຍຸບລະບອບອັກຄະມະຫາເສນາບໍດີທີ່ໄດ້ນຳໃຊ້ມາເປັນເວລາຫຼາຍຮ້ອຍປີ, ໂຮມສູນອຳນາດແຫ່ງລັດຢູ່ໃນກຳມືຂອງຮ້ອງເຕ້ຜູ່ດຽວ. ນີ້ມີຄວາມຈຳເປັນທີ່ສຸດຕໍ່ການໝູນເດີນຢ່າງມີປະສິດທິພາບສູງຂອງລາຊະວົງໝິງທີ່ຫາກໍ່ສ້າງຕັ້ງຂຶ້ນ, ແຕ່ຮ້ອງເຕ້ກໍຈຳເປັນຕ້ອງຊຳລະວຽກງານການປົກຄອງດ້ວຍພະອົງເອງຍິ່ງຫຼາຍກວ່າເກົ່າ. ພ້ອມກັນນັ້ນ, ອຳນາດຮ້ອງເຕ້ທີ່ໂຮມສູນໃນລະດັບສູງຍ້ອນບໍ່ມີກົນໄກຜູກມັດທີ່ສົມຄູ່ກັນ, ເຮັດໃຫ້ຮ້ອງເຕ້ທີ່ກຳອຳນາດການປົກຄອງໃນທ້າຍສະໄໝລາຊະວົງໝິງເຮັດຕາມລຳພັງພະໄທ, ເປື່ອຍເນົ່າທີ່ສຸດ, ພາໃຫ້ເກີດມີບັນຫາສັງຄົມອັນໜັກໜ່ວງ.
ຈູ່ຢວນຈ່າງເກີດໃນຄອບຄົວທີ່ມີຖານະຕ່ຳໃນສັງຄົມ, ພະອົງຈຶ່ງຮູ້ຄວາມທຸກສຸກຂອງສັງຄົມ. ພາຍຫຼັງຂຶ້ນເປັນຮ້ອງເຕ້ແລະກຳອຳນາດແລ້ວ, ພະອົງລິເລີ່ມການປະຢັດໃນຊີວິດປະຈຳວັນ. ຕາມບັນທຶກໄວ້ວ່າ, ມີເຈົ້າໜ້າທີ່ທ້ອງຖິ່ນຜູ່ໜຶ່ງຢາກເອົາໃຈຮ້ອງເຕ້, ໄດ້ເຮັດຕຽງທີ່ປະດັບປະດາດ້ວຍຄຳຕຽງໜຶ່ງຖະຫວາຍໃຫ້ຮ້ອງເຕ້, ບໍ່ນຶກວ່າຈູ່ຢວນຈ່າງຊົງໂມໂຫທີ່ສຸດ, ຕັດສັ່ງໃຫ້ທຳລາຍຕຽງຄຳຖິ້ມເສຍ. ພະອົງບໍ່ພຽງແຕ່ຕົນເອງປະຢັດ, ຍັງຊົງທວງໃຫ້ຜູ່ອື່ນກໍ່ປະຢັດອີກດ້ວຍ. ມີມື້ໜຶ່ງ, ພະອົງໄດ້ເຫັນທະຫານອົງຄະລັກຜູ່ໜຶ່ງໃສ່ເກີບໃໝ່ຍ່າງແຂ່ງຝົນ, ກໍຊົງເອີ້ນມາດ່າ. ໃຕ້ການລິເລີ່ມຂອງພະອົງ, ເຈົ້າໜ້າທີ່ທົ່ວປະເທດກໍອ່າວປະຢັດມັດທະຍັດ. ພ້ອມກັນນັ້ນ, ພະອົງຍັງປະຕິບັດນະໂຍບາຍເສດຖະກິດກະສິກຳທີ່ເໝາະແກ່ຊາວໄຮ່ຊາວນາເຊົາເມື່ອຍເອົາແຮງ, ລາຊະວົງໝິງເລີ່ມປະກົດມີສະພາບສະຫງົບສຸກແລະພັດທະນາ.
ຈູ່ຢວນຈ່າງຮ້ອງເຕ້ໄດ້ສະຫວັນລະຄົດເມື່ອພະຊົນມາຍຸໄດ້ 71 ພັນສາ, ຄອງລາຊະບັນລັງ 31 ພັນສາ. ລາຊະວົງໝິງທີ່ພະອົງສະຖາປະນານັ້ນໄດ້ຄົງຕົວຢູ່ 270 ກວ່າປີ. ລາຊະວົງໝິງແມ່ນຍຸກສະໄໝໜຶ່ງທີ່ພັດທະນາໄວກວ່າໝູ່ໃນປະຫວັດສັກດິນາຈີນ. ການພັດທະນາດ້ານເສດຖະກິດແລະວັດທະນະທຳຂອງລາຊະວົງໝິງໄດ້ບັນລຸເຖິງລະດັບສູງສົມຄວນ. ເຈິ້ງເຫີ ນັກເດີນເຮືອທີ່ມີຊື່ສຽງດົ່ງດັງໄດ້ເດີນເຮືອ 7 ເທື່ອ, ໄປຮອດຫຼາຍປະເທດໃນອາຊີ ອາຟຼິກກາແລະເອີລົບ; ນະວະນິຍາຍຄຼາສິກທີ່ຊື່ດັງຂອງຈີນ ຄື "ເລື່ອງສາມກົ໊ກ" "ໄຊອິ໋ວ" ແລະ "ຊົ້ງກັ່ງ" ເປັນຕົ້ນລ້ວນແຕ່ແຕ່ງໃນລາຊະວົງໝິງ; ກຳແພງເມືອງຈີນທີ່ເປັນມໍລະດົກໂລກ ສ່ວນຫຼາຍແມ່ນສ້ອມແປງເອົາໃໝ່ໃນລາຊະວົງໝິງ; ວັງກູ້ກົ່ງທີ່ປັກກິ່ງກໍແມ່ນມໍລະດົກໂລກຄືກັນ, ກໍແມ່ນສ້າງຂຶ້ນໃນລາຊະວົງໝິງ ແລະອື່ນໆ.
|
