|
ໃນລະບົບສຸລິຍະມີດາວພະເຄາະຈັກໜ່ວຍແທ້?ແລະມາດຖານທີ່ເປັນດາວພະເຄາະແມ່ນຫຍັງ?ບັນຫາດັ່ງກ່າວໄດ້ຮັບຄຳຕອບຢ່າງຊັດເຈນກວ່າເກົ່າໃນວັນທີ24ສິງຫາແລ້ວ.ໃນມື້ນັ້ນ,ກອງປະຊຸມໃຫຍ່ຄັ້ງທີ26ຂອງສະຫະພັນດາລາສາດສາກົນໄດ້ຜ່ານມະຕິກ່ຽວກັບມາດຖານທີ່ເປັນດາວພະເຄາະໃນລະບົບສຸລິຍະ.ອີງຕາມມະຕິດັ່ງກ່າວ,ແຕ່ນີ້ເປັນຕົ້ນໄປ,ດາວພຼູໂຕຫຼືດາວພະຍົມຈະລຽງໃນຖັນແຖວ"ດາວພະເຄາະ9ໜ່ວຍ"ໃນລະບົບສຸລິຍະອີກບໍ່ໄດ້,ໃນລະບົບສຸລິຍະເຫຼືອແຕ່ດາວພະເຄາະ8ໜ່ວຍ.ໃນລາຍການສວນວິທະຍາສາດແລະການສຶກສາພາກນີ້,ເຊີນຟັງບົດແຈ້ງຂ່າວຂອງນັກຂ່າວວິທະຍຸພວກເຮົາ.
ວັນທີ24ສິງຫາ,ຢູ່ທີ່ປຼາກ ນະຄອນຫຼວງຂອງສາທາລະນະລັດເຊັກ,ກອງປະຊຸມໃຫຍ່ຄັ້ງທີ 26ຂອງສະຫະພັນດາລາສາດສາກົນດ້ອັດລົງ,ທ່ານໂຣນາດ ເອເຄີສ໌ ປະທານສະຫະພັນດາລາສາດສາກົນໄດ້ເປັນປະທານຈັດກອງປະຊຸມ.ທ່ານເວົ້າວ່າ:"ຂໍຂອບໃຈຄະນະກຳມະການປະຕິບັດງານຂອງກອງປະຊຸມໃຫຍ່ໄດ້ອຳນວຍໂອກາດໃຫ້ພວກຂ້າພະເຈົ້າເພື່ອຫາລືນິຍາມຂອງດາວພະເຄາະ."
ໃນກອງປະຊຸມເທື່ອນີ້,ນັກດາລາສາດທັງຫຼາຍໄດ້ກຳນົດມາດຖານໃນການເປັນດາວພະເຄາະໃນລະບົບສຸລິຍະຢ່າງຊັດເຈນເປັນຄັ້ງທຳອິດ.ໃນກອງປະຊຸມຄົບຄະນະຄັ້ງທີສອງກ່ອນກອງປະຊຸມໃຫຍ່ອັດລົງ,ຜູ້ຮ່ວມປະຊຸມໄດ້ຜ່ານມະຕິສອງສະບັບ,ໃນນັ້ນມະຕິສຳຄັນກວ່າໝູ່ແມ່ນໄດ້ຂີດແບ່ງປະເພດດາວໃນລະບົບສຸລິຍະ.ດາວໃນລະບົບສຸລິຍະຖືກແບ່ງ ອອກເປັນສາມປະເພດ ຄື ດາວພະເຄາະ,ດາວພະເຄາະດະວາດແລະດາວນ້ອຍ,ຜູ້ຮ່ວມປະຊຸມຍັງໄດ້ກຳນົດຂອບເຂດຂອງດາວສາມປະເພດນີ້.ກ່ຽວກັບນິຍາມຂອງດາວພະເຄາະໃນລະບົບສຸລິຍະທີ່ຄົນທັງຫຼາຍສົນໃຈນຳທີ່ສຸດ,ດອກເຕີຈູ່ຈີ້ນ ຜູ້ຊ່ຽວຊານດ້ານດາວພະເຄາະຂອງຈີນທີ່ໄດ້ຮ່ວມປະຊຸມໄດ້ເວົ້າສູ່ຟັງຢ່າງລະອຽດ:"ເວົ້າຈາກຂໍ້ລະອຽດ,ດາວພະເຄາະໃນລະບົບສຸລິຍະຕົ້ນຕໍຕ້ອງຕອບສະໜອງເງື່ອນໄຂສາມຂໍ້,ຄື ໜຶ່ງ,ວົງໂຄຈອນຂອງດາວນີ້ຕ້ອງຖືສຸລິຍະເປັນໃຈກາງ;ສອງ,ດາວນີ້ຕ້ອງມີມວນສານທີ່ພຽງພໍ;ສາມ,ຢູ່ມໍ່ໂຄຈອນຂອງດາວນີ້ບໍ່ມີກຸ່ມດາວນ້ອຍທີ່ເປັນບໍລິວານ.ດາວພຼູໂຕບໍ່ຖືກຕາມມາດຖານຂໍ້ທີສາມ,ເພາະວ່າຢູ່ຕາມວົງໂຄຈອນຂອງດາວພຼູໂຕຍັງມີກຸ່ມດາວນ້ອຍບໍລິວານຢ່າງຫຼວງຫຼາຍກຳລັງໝູນວຽນເຊິ່ງຖືສຸລິຍະເປັນໃຈກາງ."
ແຕ່ໃດມາ,ຄົນທັງຫຼາຍເຫັນໂດຍທົ່ວໄປວ່າ,"ໃນລະບົບສຸລິຍະມີດາວພະເຄາະ9ໜ່ວຍ", ຄຳນີ້ເຄີຍຖືກຂຽນເຂົ້າໃນປື້ມແບບຮຽນຂອງປະເທດຕ່າງໆ.ແຕ່ໃນວົງການດາລາສາດ,ນັກ ວິທະຍາສາດພັດມີຄວາມເຫັນແຕກຕ່າງກັນໂດຍຕະຫຼອດກ່ຽວກັບດາວພຼູໂຕມີຄຸນວຸດທິທີ່ເປັນດາວພະເຄາະໄດ້ຫຼືບໍ່.ເພາະວ່າແຕ່ດາວພຼູໂຕຖືກຕັ້ງຊື່ແລ້ວບໍ່ດົນ,ນັກວິທະຍາສາດກໍຄົ້ນພົບວ່າ,ດາວພຼູດາວຜິດໂຕນກັນຫຼາຍກັບດາວພະເຄາະອີກ8ໜ່ວຍໃນດ້ານມວນສານແລະບໍລິມາດ.ດອກເຕີຈູ່ຈີ້ນຊີ້ອອກວ່າ,ຈົນຮອດຊູ່ມື້ນີ້ຈຶ່ງກຳນົດດາວພະເຄາະໃນລະບົບສຸ ລິຍະ,ທັງນີ້ມີການພົວພັນໂດຍກົງກັບການຂະຫຍາຍຕົວຢ່າງບໍ່ຢຸດຢັ້ງຂອງວິທະຍາສາດເຕັກນິກ.ທ່ານເວົ້າວ່າ:"ນິຍາມໃໝ່ມີການພົວພັນກັບລະດັບຄວາມຮັບຮູ້ຕໍ່ລະບົບສຸລິຍະຂອງມວນມະນຸດເຮົາ.ເພາະວ່າ,ໃນເວລາທີ່ຫາກໍ່ຄົ້ນພົບດາວພຼູໂຕ,ຄົນເຮົາເຫັນວ່າ,ດາວພຼູໂຕແມ່ນດາວພະເຄາະທີ່ໂດດດ່ຽວໜ່ວຍໜຶ່ງເຊິ່ງໝູນວຽນໃນວົງໂຄຈອນທີ່ຖືສຸລິຍະເປັນໃຈກາງ.ແຕ່ທີ່ຈິງແລ້ວ,ເລີ່ມແຕ່ປີ1992,ຄົນເຮົາໄດ້ຄົ້ນພົບວ່າ,ໃນວົງໂຄຈອນຂອງດາວພຼູໂຕມີດາວນ້ອຍຢ່າງຫຼວງຫຼາຍພວມໝູນອ້ອມສຸລິຍະ,ແລະໃນວົງໂຄຈອນທີ່ຄ້າຍຄືກັນກັບວົງໂຄຈອນຂອງດາວພຼູໂຕ,ດຽວນີ້ໄດ້ຄົ້ນພົບດາວທີ່ໃຫຍ່ກວ່າດາວພຼູໂຕແລ້ວ.ສັງເກດຈາກຄວາມຮັບຮູ້ຕໍ່ລະບົບສຸລິຍະຂອງມະນຸດເຮົາໃນປະຈຸບັນນີ້,ເອີ້ນດາວພຼູໂຕເປັນດາວພະເຄາະໃຫຍ່ແມ່ນບໍ່ເໝາະສົມ."
ອີງຕາມນິຍາມທີ່ກອງປະຊຸມໃຫຍ່ຄັ້ງທີ26ຂອງສະຫະພັນດາລາສາດສາກົນຜ່ານໃນວັນທີ 24ສິງຫາ,ດາວພຼູໂຕຖອນອອກຈາກຖັນແຖວຂອງດາວພະເຄາະໃນລະບົບສຸລິຍະ.ໃນຕໍ່ໄປພາຍໜ້າ,ດາວພະເຄາະໃນລະບົບສຸລິຍະມີແຕ່ດາວພະພຸດ ດາວພະສຸກ ໜ່ວຍໂລກ ດາວພະອັງຄານ ດາວພະຫັດ ດາວພະເສົາ ດາວມະລຶດຕະຍູແລະດາວພະເກດເປັນຕົ້ນ.ເວົ້າສຳລັບການຄົ້ນຄວ້າດາລາສາດ,ນິຍາມທີ່ຊັດເຈນຈະຊ່ອຍໃຫ້ວຽກງານຄົ້ນຄວ້າໃນ ພາຍໜ້າແຈ່ມແຈ້ງກວ່າເກົ່າ.ເວົ້າສຳລັບສາມັນຊົນ,ການປ່ຽນແປງດັ່ງກ່າວມີຄວາມໝາຍຫຍັງແດ່?ຄົນທຽວທາງຜູ້ໜຶ່ງບອກນັກຂ່າວວ່າ:"ເວົ້າສຳລັບຂ້ອຍ,ຈຳນວນດາວພະເຄາະໃນລະບົບສຸລິຍະແມ່ນ8ໜ່ວຍຫຼື9ໜ່ວຍບໍ່ສຳຄັນດອກ.ແຕ່ວ່າ,ມັນໄດ້ຢືນຢັນຄວາມກ້າວໜ້າຂອງວິທະຍາສາດແລະສັງຄົມ,ທັງແມ່ນການສະແດງວ່າ ມະນຸດເຮົາໄດ້ກ້າວໄປໜ້າຢ່າງບໍ່ຢຸດຢັ້ງ.ເພາະວ່າວິທະຍາສາດຄວນຕິດຕາມບາດກ້າວທີ່ກ້າວໄປໜ້າຂອງມວນມະນຸດ,ແລະໃຫ້ຄວາມຮູ້ໃໝ່ແກ່ສາທາລະນະຊົນ."
ທ່ານຜູ້ຟັງທີ່ໂຄລົບ,ຕໍ່ໄປ,ສັງຂານຂໍແນະນຳຜະລິດຕະພັນຈຳນວນໜຶ່ງທີ່ສະໜອງຄວາມສະດວກແກ່ຜູ້ເຖົ້າຜູ້ແກ່.ປະຈຸບັນນີ້,ຢູ່ປະເທດຕ່າງໆໃນໂລກ,ເຄື່ອງບໍລິໂພກສະເພາະຕ່າງໆທີ່ຖືການເອົາໃຈໃສ່ຊີວິດປະຈຳວັນຂອງຜູ້ເຖົ້າເປັນຈຸດປະສົງນັ້ນພວມຈຳໜ່າຍໃນຕະຫຼາດຢ່າງບໍ່ຢຸດຢັ້ງ,ໄດ້ຮັບຄວາມນິຍົມຊົມຊອບຈາກຜູ້ເຖົ້າທັງຫຼາຍ.
ຢູ່ສ.ເກົາຫຼີ,ນັກວິທະຍາສາດໄດ້ອອກແບບ"ໂທລະສັບມືຖືທີ່ກຳນົດທີ່ຕັ້ງ"ໃຫ້ຜູ້ເຖົ້າໂດຍສະເພາະແມ່ນຜູ້ເຖົ້າທີ່ເປັນພະຍາດຈິດເສື່ອມ.ໂທລະສັບມືຖືຊະນິດນີ້ນອກຈາກມີຄຸນປະ ໂຫຍດທີ່ຄືກັນກັບໂທລະສັບມືຖືທຳມະດາແລ້ວ,ຍັງມີຄຸນປະໂຫຍດທີ່ກຳນົດທີ່ຕັ້ງໄດ້.ທະແນມແຕ່ຜູ້ເຖົ້າຖືໂທລະສັບມືຖືຊະນິດນີ້ກັບໂຕ,ຄົນໃນຄອບຄົວກໍສາມາດຮູ້ທີ່ຕັ້ງຂອງຜູ້ເຖົ້າຜູ້ນີ້ດ້ວຍລະບົບດາວທຽມ.
ສ່ວນເຢຍລະມັນໄດ້ອອກແບບໂທລະສັບປັບສຽງໃຫ້ຜູ້ເຖົ້າ,ໂທລະສັບຊະນິດນີ້ສາມາດປັບ ຄວາມແຮງຂອງສຽງຢ່າງເສລີ,ເໝາະສຳລັບຜູ້ເຖົ້າທີ່ຄວາມສາມາດການໄດ້ຍິນສຽງຊຸດໂຊມລົງໃນລະດັບທີ່ຕ່າງກັນ.
ຍີ່ປຸ່ນໄດ້ຜະລິດເຄື່ອງສົ່ງສັນຍານແບບໃໝ່ທີ່ໃຊ້ສຳບັບຜູ້ເຖົ້າທີ່ຕິດພະຍາດຫົວໃຈຫຼືພະ ຍາດເລືອດດັນສູງໃນກໍລະນີສຸກເສີນ.ເຄື່ອງນີ້ຍາວແຕ່10ຊັງຕີແມັດ, ກວ້າງປະມານ5ຊັງຕີແມັດ,ໜັກແຕ່10ກຼາມ.ຜູ້ເຖົ້າຖືເຄື່ອງນີ້ກັບໂຕ,ໃນເວລາຮູ້ສຶກບໍ່ສະບາຍ,ກໍ່ກົດປຸ່ມໜຶ່ງຢູ່ເທິງເຄື່ອງ,ເຄື່ອງນີ້ກໍສົ່ງສັນຍານໃນທັນທີ,ແຈ້ງໃຫ້ໂຮງໝໍທີ່ຢູ່ມໍ່ໃກ້ມາກອບກູ້ດ່ວນ.
ໃນຕະຫຼາດຂອງສວິສມີແຫວນເລືອດດັນທີ່ຜູ້ເຖົ້າຜູ້ແກ່ມັກຫຼາຍ.ສີຂອງແຫວນຊະນິດນີ້ສາມາດປ່ຽນຕາມອຸນຫະພູມຂອງນິ້ວມື,ຜູ້ເຖົ້າທີ່ເປັນພະຍາດເລືອດດັນສູງສາມາດສັງເກດເບິ່ງການປ່ຽນແປງຂອງສີແຫວນຢູ່ທຸກເວລາໄດ້,ແລ້ວກໍຈະຮັບຮູ້ການປ່ຽນແປງຂອງອຸນຫະພູມຮ່າງກາຍຂອງຕົນແລະລະດັບຄວາມເມື່ອຍຂອງຮ່າງກາຍ,ແລ້ວພັກຜ່ອນຢ່າງທັນການ,ຈຶ່ງສາມາດຫຼີກເວັ້ນເກີດພະຍາດ.
ຢູ່ຊູແອັດ,ມີໝາກປິ່ງປ່ອງຊະນິດໜຶ່ງ,ມັນໃຫຍ່ກວ່າໝາກປິ່ງປ່ອງທຳມະດາເກືອບໜຶ່ງເທົ່າ,ແມ່ນອອກແບບຜະລິດສຳລັບຜູ້ເຖົ້າທີ່ຢາກຫັດກາຍ.ໝາກປິ່ງປ່ອງຊະນິດນີ້ມີບໍລິມາດໃຫຍ່,ຈັງຫວະເຕັ້ນໄປມາອ່າວຊ້າ,ເຮັດໃຫ້ຜູ້ເຖົ້າຕີຖືກຢ່າງງ່າຍດາຍໄດ້,ແລ້ວບັນລຸຈຸດປະສົງເພື່ອຫັດຮ່າງກາຍໃຫ້ເຂັ້ມແຂງ.
ທ່ານຜູ້ຟັງທີ່ໂຄລົບ,ຜະລິດຕະພັນດັ່ງກ່າວໄດ້ສະແດງໃຫ້ເຫັນຄວາມເອົາໃຈໃສ່ຂອງທົ່ວສັງຄົມທີ່ມີຕໍ່ຜູ້ເຖົ້າຜູ້ແກ່ຢ່າງເຕັມທີ່,ເຊື່ອວ່າ,ຄຽງຄູ່ກັບຜະລິດຕະພັນແບບນີ້ນັບມື້ນັບຫຼາຍ,ຊີວິດການເປັນຢູ່ຂອງຜູ້ເຖົ້າຜູ້ແກ່ຈະນັບມື້ນັບສະດວກສະບາຍກວ່າເກົ່າ.ເອົາລະ,ລາຍການສວນວິທະຍາສາດແລະການສຶກສາພາກນີ້ຂໍຈົບລົງພຽງທໍ່ນີ້,ຈັນສຸກ ຜູ້ຮຽບຮຽງບົດແລະສັງຂານ ຜູ້ສະເໜີຂໍຂອບໃຈທ່ານທີ່ຮັບຟັງ,ສະບາຍດີ.
|
