|
ຫວ່າງກ່ອນນີ້ບໍ່ດົນ,ງານດົນຕີອິນເຕີເນັດຄັ້ງທຳອິດທີ່ຈັດຂຶ້ນຢູ່ຕູ່ຈ່ຽງອ້ຽນ ເມືອງນ້ອຍພາກຕາເວັນຕົກສຽງໃຕ້ຂອງຈີນໄດ້ອັດລົງແລ້ວ,ຜູ້ຊ່ຽວຊານແລະນັກວິຊາການດ້ານດົນຕີອິນເຕີເນັດຂອງເວັບໄຊສຳຄັນ,ສຳນັກພິມສຽງແລະພາບ,ບໍລິສັດຜະລິດເຄື່ອງສຽງແລະພາບ ໂຮງຮຽນແລະວິທະຍາຄານດົນຕີຕ່າງໆຂອງຈີນໄດ້ເຂົ້າຮ່ວມງານດົນຕີຄັ້ງນີ້,ຜູ້ຮ່ວມປະຊຸມໄດ້ຫາລືກັນກ່ຽວກັບການຂະຫຍາຍຕົວຂອງດົນຕີອິນເຕີເນັດຍຸກສະໄໝດີຈີຕອນ,ໃນເວລາຫາລືກັນ,ຄົນທັງຫຼາຍໄດ້ເຫັນໄປໃນແງ່ດີຕໍ່ອະນາຄົດແຫ່ງການຂະຫຍາຍຕົວຂອງດົນຕີອິນເຕີເນັດເຊິ່ງເປັນເຫດການໃໝ່,ແຕ່ພ້ອມກັນນັ້ນກໍເປັນຫ່ວງນຳຜົນກະທົບທີ່ດົນຕີອິນເຕີເນັດຈະນຳມາສູ່ຂະແໜງການແຜ່ນສຽງຕົ້ນສະບັບ,ແລະບັນຫາລິຂະສິດຂອງດົນຕີອິນເຕີເນັດເປັນຕົ້ນ.
ອັນທີ່ວ່າດົນຕີອິນເຕີເນັດ,ຕາມທຳມະດາແມ່ນໝາຍເຖິງດົນຕີທີ່ແຕ່ງໂດຍນັກແຕ່ງສະໝັກຫຼິ້ນ,ແລະຂັບຮ້ອງໂດຍນັກຮ້ອງສະໝັກຫຼິ້ນແລ້ວປະກາດແລະເຜີຍແຜ່ຢູ່ອິນເຕີເນັດແລະເຄືອຂ່າຍໂທລະສັບມືຖື.ດົນຕີຊະນິດນີ້ມີຈຸດພິເສດທີ່ຈື່ງ່າຍຮ້ອງງ່າຍ,ທຳນອງແລະເນື້ອຮ້ອງຕະຫຼົກເຮຮາມ່ວນຊື່ນ.ຕົ້ນສະຕະວັດນີ້,ນັກຮ້ອງອິນເຕີເນັດກຸ່ມໜຶ່ງໄດ້ປະກົດຕົວຢູ່ຈີນ,ດົນຕີອິນເຕີເນັດກໍເລີ່ມກາຍເປັນຈຸດສົນໃຈຂອງຄົນທັງຫຼາຍ.
ເພງນີ້ຊື່ວ່າໜູມັກເຂົ້າສານ,ຖືເປັນຕົວແທນໜຶ່ງຂອງດົນຕີອິນເຕີເນັດຂອງຈີນ,ເມື່ອປີ2005ເຄີຍສ້າງສະຖິຕິທີ່ໄດ້ມີຜູ້ໂຫຼດເພງນີ້ເຮັດເປັນດົນຕີໂທລະສັບມືຖືຕັ້ງ6ລ້ານເທື່ອໃນເດືອນດຽວ,ລາຍໄດ້6ລ້ານຢວນໃນເດືອນດຽວເທົ່າກັບລາຍໄດ້ຈຳໜ່າຍແຜ່ນສຽງຕົ້ນສະບັບ7ແສນແຜ່ນ.ຕົວຢ່າງນີ້ໄດ້ເຮັດໃຫ້ຜູ້ມັກດົນຕີນັບມື້ນັບຫຼາຍເລີ່ມແຕ່ງເພງອິນເຕີເນັດ.ໃນສອງປີທີ່ຜ່ານມາ,ນັກຮ້ອງເພງອິນເຕີເນັດກຸ່ມໜຶ່ງໄດ້ມີຊື່ສຽງດົ່ງດັງໃນທົ່ວປະເທດຕາມໆກັນມາ,ລວມທັງທ້າວຢາງເຊີນກ່າງແລະນາງຊ່ຽງໆທີ່ຮ້ອງເພງ ໜູມັກເຂົ້າສານ.ສະມາຄົມແຜ່ນສຽງສາກົນ(IFPI)ໄດ້ປະກາດຕົວເລກທີ່ສະແດງໃຫ້ເຫັນວ່າ,ໃນປີ2005,ມູນຄ່າຈຳໜ່າຍຂອງດົນຕີອິນເຕີເນັດແລະດົນຕີໂຫຼດທາງໂທລະສັບມືຖືໄດ້ມີເຖິງ660ລ້ານໂດລາ.
ເວັບໄຊSOHUແມ່ນເວັບໄຊຂະໜາດໃຫຍ່ຂອງຈີນ,ໃນເວັບໄຊດັ່ງກ່າວມີເພງອິນເຕີເນັດຈຳນວນຫຼວງຫຼາຍທີ່ເອົາໄດ້.ທ່ານກົງອີ ຮອງປະທານບໍລິຫານງານຂອງເວັບໄຊດັ່ງກ່າວເຫັນວ່າ,ຍ້ອນຕະຫຼາດແຜ່ນສຽງແລະບໍລິສັດແຜ່ນສຽງຂາຍບໍ່ດີ,ດົນຕີທີ່ແຕ່ງສະໝັກຫຼິ້ນນອກອາຊີບແລະເປັນແບບລື້ນເລີງກວ່າເກົ່າໄດ້ ຄ່ອຍໆຈະເລີນຂຶ້ນຢູ່ອິນເຕີເນັດ.ດົນຕີອິນເຕີເນັດຈຶ່ງໄດ້ກຳເນີດເກີດຂຶ້ນຕາມຄວາມຕ້ອງການ.ທ່ານເວົ້າວ່າ,
ມັນແມ່ນວັດທະນະທຳມະຫາຊົນ,ທະແນມແຕ່ປະຊາກອນອິນເຕີເນັດຜູ້ໃດມີຄວາມສາມາດ,ຄືເຂົາອັດສຽງເປັນຮ້ອງເປັນສະແດງເປັນຫຼືສາມາດຈັດທຳເອົາເອງ,ເຂົາກໍມີສິດໃນສິ່ງທີ່ເຂົາແຕ່ງເຂົ້າໄວ້ໃນອິນເຕີເນັດ.ບາງເທື່ອສິ່ງທີ່ແຕ່ງນັ້ນມີຜູ້ເບິ່ງແຕ່ຄົນໜຶ່ງສອງຄົນເທົ່ານັ້ນ,ແຕ່ເຂົາກໍດີໃຈ,ເພາະວ່າເຂົາຮູ້ສຶກພໍໃຈຕໍ່ຕົນເອງ.ເພາະວ່າເຕັກນິກທາງດ້ານນີ້ຮຽນງ່າຍ,ເຂົ້າຕະຫຼາດກໍງ່າຍ,ເຂົາຈຶ່ງສົ່ງບົດແຕ່ງຂອງຕົນອອກໄປໄດ້,ໃຜໆສະແຫວງຫາຄວາມພໍອົກພໍໃຈແນວນີ້,ໄດ້ນີ້ກໍແມ່ນຈຸດພິເສດຂອງວັດທະນະທຳມະຫາຊົນ.
ຕົວເລກສະຖິຕີຂອງສະມາຄົມແຜ່ນສຽງສາກົນສະແດງໃຫ້ເຫັນວ່າ,ພຽງແຕ່ປີ2005ເທົ່ານັ້ນກໍໄດ້ໂຫຼດເພງປະມານ420ລ້ານເພງ,ຕົວເລກເຫຼົ່ານີ້ຫຼາຍກວ່າ2ປີກ່ອນ20ກວ່າເທົ່າ.ຕົວເລກນີ້ໄດ້ສະແດງໃຫ້ເຫັນວ່າ,ມັນມີໂອກາດການຄ້າແລະຜົນກຳໄລອັນໃຫຍ່ຫຼວງເຊື່ອງຊ້ອນຢູ່,ການໂຫຼດດົນຕີທາງໂທລະສັບມືຖືແລະການ ໂຫຼດດົນຕີອິນເຕີເນັດ,ເຮັດໃຫ້ຂະແໜງການແຜ່ນສຽງທີ່ໄດ້ຕົກໃນສະພາບຫຍຸ້ງ ຍາກນັ້ນຟື້ນຟູຄືນໃໝ່.ສະນັ້ນ,ນັກຮ້ອງທາງອິນເຕີເນັດນັບມື້ນັບຫຼາຍໄດ້ເຊັນຂໍ້ຜູກພັນກັບບໍລິສັດແຜ່ນສຽງຢ່າງຕໍ່ເນື່ອງ.ແຕ່ເດືອນທັນວາປີ2004,ທ້າວຢາງເຊີນກ່າງແລະນາງຊ່ຽງໆ ນັກຮ້ອງທາງອິນເຕີເນັດໄດ້ເຊັນຂໍ້ຜູກພັນກັບບໍລິສັດແຜ່ນສຽງເຟິ່ຍເຢ້,ພຽງແຕ່ເດືອນດຽວ,ແຜ່ນCD ຂອງທ້າວຢາງເຊີນກ່າງກໍໄດ້ຂາຍ8ແສນກວ່າແຜ່ນ,ເພງຂອງນາງຊ່ຽງໆກໍຂາຍໄດ້3ແສນແຜ່ນ.ທັງນີ້ເຮັດໃຫ້ນັກທຸລະກິດຜະລິດແຜ່ນສຽງໄດ້ເບິ່ງເຫັນຕະຫຼາດໃນອະນາຄົດ,ແລະໄດ້ແກ້ໄຂສະພາບຫຍຸ້ງຍາກຂອງບໍລິສັດແຜ່ນສຽງ.
ນາງຈ່າງລ່າໆແມ່ນນັກຮ້ອງອິນເຕີເນັດທີ່ພົ້ນເດັ່ນ.ນາງມີແຜນຈະອາໄສບໍລິສັດແຜ່ນສຽງທີ່ເປັນສື່ແບບດັ້ງເດີມເພື່ອເຜີຍແຜ່ເພງຂອງຕົນ.ນາງເຫັນວ່າ,ນັກຮ້ອງອິນເຕີເນັດມີຄວາມຫຍຸ້ງຍາກຫຼາຍກວ່າໝູ່ກໍແມ່ນດ້ານເງິນທຶນ,ບໍ່ມີຜູ້ໂຄສະນາໃຫ້,ມີແຕ່ແຕ່ງເພງເອງອັດສຽງເອງ.ຖ້າອາໄສບໍລິສັດແຜ່ນສຽງ,ກໍຈະມີເວລາແຕ່ງເພງຫຼາຍກວ່າເກົ່າ,ລະດັບມາດຖານຂອງດົນຕີຈະຍົກສູງຂຶ້ນໄດ້ຢ່າງແນ່ນອນ.ນາງຈ່າງລ່າໆເວົ້າວ່າ,
ຂ້ອຍເຫັນວ່າຢາກເປັນນັກຮ້ອງຫຼາຍດ້ານ,ແນວໃດກໍຍັງຕ້ອງອາໄສສື່ແບບເກົ່າ,ທຳອິດແມ່ນອາໄສອິນເຕີເນັດມາເຜີຍແຜ່ເພງຂອງຕົນ,ເພື່ອໃຫ້ໄດ້ຮັບຄວາມນິຍົມຊົມຊອບແລະຄວາມສົນໃຈຈາກຄົນທັງຫຼາຍ,ແລະໃນທີ່ສຸດກໍຍັງຫວັງໃຫ້ມີຄົນຫຼາຍກວ່າເກົ່າຮູ້ຈັກ.ສະນັ້ນສື່ແບບດັ້ງເດີມກໍສຳຄັນຫຼາຍ.
ຄວາມຮີບຮ້ອນທີ່ຢາກໃຫ້ບໍລິສັດແຜ່ນສຽງສະໜັບສະໜູນຄືນາງຈ່າງລ່າໆນັ້ນເປັນຕົວແທນໃຫ້ແກ່ຄວາມຄຶດຂອງນັກຮ້ອງອິນເຕີເນັດຫຼວງຫຼາຍ,ແລະກໍສ່ອງແສງໃຫ້ເຫັນສະພາບຫຍຸ້ງຍາກສອງດ້ານຂອງເພງອິນເຕີເນັດ,ຄືຄວາມສາມາດປະດິດສ້າງແລະກຳລັງຊີວິດອັນໝັ້ນແກ່ນທີ່ມາຈາກພື້ນເມືອງແມ່ນຝັງຮາກຢູ່ໃຫ້ໝູ່ປະຊາຊົນ;ພ້ອມກັນນັ້ນ,ນັກຮ້ອງອິນເຕີເນັດກໍຫວັງຢາກໄດ້ຮັບການສະໜັບສະໜູນຂອງບໍລິສັດແຜ່ນສຽງ,ສ້າງໂອກາດໃຫ້ແກ່ການຂະຫຍາຍຕົວກວ້າງກວ່າເກົ່າໃຫ້ແກ່ເຂົາເຈົ້າ.
ແນ່ນອນແລ້ວ,ດົນຕີອິນເຕີເນັດກໍຄືກັນກັບດົນຕີດັ້ງເດີມ,ຢາກໄດ້ຮັບຜົນສຳເລັດ,ຍັງຕ້ອງອາໄສຄຸນນະພາບອັນດີເດັ່ນ.ດົນຕີອິນເຕີເນັດໃກ້ຊິດກັບສາມັນຊົນ,ຕິດແທດກັບຊີວິດຕົວຈິງ,ມີທ່າແຮງທີ່ມີນັກແຕ່ງນັກຮ້ອງຈຳນວນຫຼວງຫຼາຍ.ແຕ່ພ້ອມກັນນັ້ນ,ສະພາບທີ່ດົນຕີອິນເຕີເນັດອັດແລະຈັດທຳແບບງ່າຍໆ,ດ້ອຍຄຸນນະພາບກໍໜັກໜ່ວງຫຼາຍ,ເຮັດໃຫ້ຄົນຮູ້ສຶກບໍ່ໄດ້ມາດຕະຖານ.ນອກນັ້ນ,ບັນຫາລິຂະສິດກໍກາຍເປັນບັນຫາຄໍຫອຍທີ່ກົດໜ່ວງການຂະຫຍາຍຕົວຂອງດົນຕີອິນເຕີເນັດ.ຍ້ອນວ່າການເຜີຍແຜ່ທາງອິນເຕີເນັດໄວກວ່າການໝູນເດີນຂອງສື່ແບບດັ້ງເດີມຫຼາຍ,ຊອຟແວໃດໜຶ່ງ,ຖ້າວາງໄວ້ຢູ່ອິນເຕີເນັດ,ບໍ່ຮອດເຄິ່ງມື້ກໍຈະມີເວັບໄຊນັບເປັນພັນພິມເອົາຕໍ່.ເວົ້າສຳລັບດົນຕີທີ່ມີລິຂະສິດເຫຼົ່ານັ້ນແລ້ວ,ອິນເຕີເນັດຍິ່ງມີຄວາມອັນຕະລາຍຫຼາຍກວ່າການລັກລອກແບບ.ທ່ານມາເວີ້ຍກົ່ງ ຜູ້ຮັບຜິດຊອບຂອງເວັບໄຊCRI ONLINEຂອງວິທະຍຸພວກເຮົາສະເໜີໃຫ້ລັດຖະບານປົກປ້ອງສິດຊັບສິນທາງປັນຍາຂອງດົນຕີອີນເຕີເນັດໃຫ້ແຂງແຮງກວ່າເກົ່າ.ທ່ານເວົ້າວ່າ,
ການໂຕ້ຖຽງກັບທາງລິຂະສິດຈຳນວນໜຶ່ງໃນອິນເຕີເນັດດຽວນີ້ຈະໃຊ້ກົດໝາຍໄປຕັດສິນຍັງຍາກຢູ່,ຫຼາຍປະເທດໄດ້ສ້າງກົດໝາຍແລະກົດບັນຍັດບໍ່ໜ້ອຍກ່ຽວກັບບັນຫາທາງອິນເຕີເນັດ,ຈີນກໍຄືກັນ,ໃນຫຼາຍປີມານີ້,ຈີນໄດ້ປະກາດກົດໝາຍກົດບັນຍັດຫຼາຍສະບັບ,ຕາມຈິງແລ້ວໄດ້ໃຊ້ມາດຕະການຕ່າງໆເພື່ອປົກປ້ອງລິຂະສິດຂອງດົນຕີ,ແຕ່ໃນການເຜີຍແຜ່ດົນຕີທາງອິນເຕີເນັດນັ້ນ,ຍັງຕ້ອງເພີ່ມຄວາມແຮງໃນການປົກປ້ອງສິດຊັບສິນທາງປັນຍາ.
|
