|
ຕາມຂ່າວສານຊິນຮວາ: ວັນທີ 31 ສິງຫາຢູ່ທີ່ປັກກິ່ງ, ທ່ານລີສາງຊຸນ ກຳມະການປະຈຳກົມການເມືອງສູນກາງພັກກອມມູນິດຈີນກ່າວວ່າ, ຈີນຍິນດີພ້ອມກັບອາຊຽນຖືການຮ່ວມມືດ້ານເສດຖະກິດການຄ້າເປັນສິ່ງນຳທາງ, ຊຸກຍູ້ການຮ່ວມມືດ້ານວັດທະນະທຳສັງຄົມແລະຄວາມປອດໄພທາງການເມືອງຕື່ມອີກ, ດຳເນີນການຮ່ວມມືທີ່ຕ່າງຝ່າຍຕ່າງມີຜົນປະໂຫຍດຮອບດ້ານແລະເລິກເຊິ່ງກວ່າເກົ່າ.
ທ່ານລີສາງຊຸນໄດ້ໃຫ້ທັດສະນະດັ່ງກ່າວໃນເວລາພົບປະທ່ານອອງແຄງຢົງ ເລຂາທິການໃຫຍ່ອາຊຽນທີ່ມາເຂົ້າຮ່ວມງານມະຫະກຳສິລະປະອາຊີຄັ້ງທີ 8.
ທ່ານລີສາງຊຸນກ່າວວ່າ, ຈີນກັບອາຊຽນເປັນບ້ານໃກ້ເຮືອນຄຽງທີ່ດີ ເປັນຄູ່ຮ່ວມມືທີ່ດີແລະເພື່ອນມິດທີ່ດີ. ປີນີ້ແມ່ນຈີນອາຊຽນສ້າງການພົວພັນປະເທດຄູ່ເຈລະຈາຄົບຮອບ 15 ປີ, ຝ່າຍຈີນຍິນດີພ້ອມກັບອາຊຽນຂະຫຍາຍການພົວພັນຄູ່ຮ່ວມມືຍຸດທະສາດທີ່ມຸ່ງໜ້າໄປສູ່ສັນຕິພາບແລະຈະເລີນຮຸ່ງເຮືອງບົນພື້ນຖານຫຼັກ 5 ປະການຢູ່ຮ່ວມກັນໂດຍສັນຕິແລະ "ສົນທິສັນຍາໄມຕີຈິດແລະຮ່ວມມືອາຊີຕາເວັນອອກສຽງໃຕ້".
ທ່ານອອງແຄງຢົງຂອບໃຈນຳລັດຖະບານຈີນທີ່ໄດ້ຈັດ "ສັບປະດາວັດທະນະທຳອາຊຽນ" ໃນໄລຍະງານມະຫະກຳສິລະປະອາຊີຄັ້ງທີ 8. ທ່ານກ່າວວ່າ, ນີ້ຈະໄດ້ສ້າງພື້ນຖານອັນໝັ້ນແກ່ນໃຫ້ແກ່ການເປີດກວ້າງການຮ່ວມມືດ້ານວັດທະນະທຳລະຫວ່າງອາຊຽນກັບຈີນ.
|
