|
|
 |
| (GMT+08:00)
2006-09-07 11:03:34
|
 |
|
ອາຫານໝໍ້ດິນ(ສຽງ)
cri
Author: da
|
ນະຄອນປັກກິ່ງແມ່ນເມືອງທ່ອງທ່ຽວທີ່ມີສະເໜ່ຂອງພາກຕາເວັນອອກ.ນອກຈາກກຳແພງຍັກ ຫໍຟ້າທຽນຖານແລະພະລາຊະວັງກູ້ກົ່ງທີ່ມີຊື່ສຽງແລ້ວ,ຍັງມີອາຫານໂອຊາປະເພດຕ່າງໆທີ່ເຮັດໃຫ້ນັກທ່ອງທ່ຽວຕິດໃຈຈົນລືມບໍ່ລົງ.ໃນລາຍການມື້ນີ້,ດາລາວັນຈະແນະນຳອາຫານໝໍ້ດິນ ເຊິ່ງເປັນອາຫານລາຊະວັງທີ່ລືຊື່ສູ່ທ່ານຟັງ.
ຮ້ານອາຫານຊ່າໂກ່ຈູ່ມີຊື່ລືນາມໃນນະຄອນປັກກິ່ງຍ້ອນອາຫານໝໍ້ດິນ.ໝໍ້ດິນແມ່ນພາຊະນະທີ່ເຜົາດ້ວຍດິນໜຽວ,ຈຸດພິເສດຂອງມັນແມ່ນຮັກສາຄວາມຮ້ອນໄດ້ດົນນານ.ວິທີແຕ່ງອາຫານໝໍ້ດິນແມ່ນເອົາຜັກ ເຄື່ອງປຸງແລະຊີ້ນຊະນິດຕ່າງໆໃສ່ໃນໝໍ້ດິນ,ແລ້ວຕົ້ມ.ເມື່ອຕົ້ມຈົນສຸກຈົນເປື່ອຍແລ້ວ,ກໍກາຍເປັນອາຫານທີ່ມີລົດຊາດທີ່ແຊບພິເສດ."ຊ່າໂກ່ປາຍໂຢ້ວ" ແປວ່າ"ຊີ້ນມັນໝໍ້ດິນ"ໃນຮ້ານຊ່າໂກ່ຈູ່ ເຊິ່ງແມ່ນອາຫານທີ່ມີຊື່ສຽງເຍື່ອງໜຶ່ງ ກໍແມ່ນປຸງແຕ່ງຕາມວິທີນີ້ເອງ,ແຂກຜູ້ມາອຸດໜູນ ຜູ້ໃດກໍຍ້ອງຫຼາຍ.ນາງວັງລີ້ ພະນັກງານເສີບໃນຮ້ານອາຫານຊ່າໂກ່ຈູ່ເວົ້າວ່າ:
"ຊີ້ນມັນໝໍ້ດິນ ແມ່ນອາຫານລາຊະວັງທີ່ມີມາແຕ່ສະໄໝລາຊະວົງມິງເມື່ອ 700 ກວ່າປີກ່ອນ.ມັນແມ່ນອາຫານອັນຍອດຍິ່ງໃນພະກະຍາຫານຂອງເຈົ້າຊີວິດຊຽນຫຼົງໃນລາຊະວົງຊິ່ງເມື່ອ 200 ກວ່າປີກ່ອນ,ເຈົ້າຊີວິດຊຽນຫຼົງຍັງໄດ້ຂຽນຄຳຍ້ອງຍໍວ່າເປັນ"ອາຫານຍອດຍິ່ງ ເຍື່ອງດຽວໃນໂລກ",ແຕ່ນັ້ນມາຈຶ່ງມີຊື່ສຽງດົງດັ່ງຂຶ້ນ."
ຢູ່ໃກ້ກັບສະໜາມຫຼວງທ່ຽນອ່ານເມີນປັກກິ່ງ,ມີຄຸ້ມການຄ້າສີ່ຕ່ານທີ່ສິວິໄລ,ຢູ່ແຫ່ງນັ້ນມີຮ້ານອາຫານຮ້ານໜຶ່ງຊື່ວ່າ"ຊ່າໂກ່ຈູ່"ທີ່ມີປະຫວັດ 200 ກວ່າປີແລ້ວ.ໃນ 200 ກວ່າປີທີ່ຜ່ານມາ,ຮ້ານຊ່າໂກ່ຈູ່ໄດ້ສ້ອມແປງແລະປະດັບຕົບແຕ່ງຫຼາຍເທື່ອແລ້ວ.ຮ້ານຊ່າໂກ່ຈູ່ໃນຊູ່ມື້ນີ້ມີຕັ່ງໄມ້ຈັນ ໄມ້ແດງ ໂຕະ4ຫຼ່ຽມຍາວ ຖ້ວຍຊາມດິນເຄືອບສີແດງສີເຫຼືອງ,ສິ່ງປະດັບປະດາເຮັດໃຫ້ຄົນຮູ້ສຶກເຖິງວັດທະນະທຳເມືອງຫຼວງຂອງແທ້.
ຮ້ານຊ່າໂກ່ຈູ່ແຕ່ກ່ອນແມ່ນຫ້ອງພັກເຊົາຂອງຄົນຍາມບອກເວລາຢູ່ນອກລາຊະວັງຂອງລາຊະວົງຊິງເມື່ອ200ກວ່າປີກ່ອນ.ໃນຄາວນັ້ນ,ພະລາຊະວັງມັກຈັດພິທີບູຊາບັນພະບຸລຸດຫຼືພິທີອະພິເສກສົມລົດຊູ່ປີ,ຫຼັງຈາກພິທີແລ້ວຕ້ອງເອົາຕົ້ມຊີ້ນໝູທັງໂຕໃສ່ນ້ຳລ້າ ເພື່ອລ້ຽງຮັບຮອງເຊື້ອເຈົ້າທັງຫຼາຍ.ຫຼັງຈາກງານລ້ຽງແລ້ວ,ເຈົ້າຊີວິດກໍ່ສັ່ງໃຫ້ເອົາຊີ້ນໝູທີ່ເຫຼືອນັ້ນແຈກຢາຍໃຫ້ຄົນທັງຫຼາຍ,ຈົນກະທັ້ງຄົນຍາມບອກເວລາໃນພະລາຊະວັງກໍມີໂຊກປາກໄດ້ຊີມນຳ.ມີເທື່ອໜຶ່ງ,ເມື່ອຄົນຍາມຜູ້ໜຶ່ງໄດ້ຮັບຊີ້ນໝູທີ່ປັນໃຫ້ແລ້ວ,ກໍ່ຄຶດວ່າ:ຖ້າວ່າໄປຕົ້ມຊີ້ນໝູປະເພດນີ້ຂາຍໃຫ້ສາມັນຊົນ,ມັນຈະບໍ່ໄດ້ກຳໄລດີກວ່າຫວະ? ສະນັ້ນ,ລາວເລີຍໄປຊອກເຊົ່າເຮືອນນ້ອຍຫຼາຍຫ້ອງຢູ່ນອກພະລາຊະວັງ,ນັດກັບພໍ່ຄົວຜູ້ໜຶ່ງໃນພະລາຊະວັງຢ່າງລັບໆ,ຕອນຄ່ຳເຮັດວຽກບອກເວລາ,ກາງເວັນຕົ້ມຊີ້ນໝູຂາຍ,ນີ້ກໍແມ່ນຮ້ານອາຫານຊ່າໂກ່ຈູ່ໃນເບື້ອງຕົ້ນ.
ຮ້ານອາຫານຊ່າໂກ່ຈູ່ຕົ້ນຕໍຂາຍອາຫານຕົ້ມຊີ້ນໝູ,ນີ້ແມ່ນອາຫານດັ້ງເດີມທີ່ເຜົ່າມັງຊູມັກກິນ.ພໍ່ຄົວຂອງຮ້ານອາຫານຊ່າໂກ່ຈູ່ບອກວ່າ,ຮ້ານອາຫານຊ່າໂກ່ຈູ່ແຕ່ງອາຫານຊີ້ນໝູແຊບປານນີ້,ເຄັດລັບອັນໜຶ່ງແມ່ນ ຊີ້ນໝູທີ່ໃຊ້ນັ້ນອ່ອນນຸ້ມ; ສອງແມ່ນວິທີຕົ້ມກໍພິຖີພິຖັນ.ໃນເວລາກິນຊີ້ນ ຍັງຕ້ອງຈ້ຳແຈ່ວທີ່ເຮັດດ້ວຍດອກຜັກແປ້ນ ເຕົ້າຮູ້ຍີ້ແລະນ້ຳມັນໝາກເຜັດ.ທ່ານວັງຢົງແມ່ນຄົນປັກກິ່ງແທ້ໆ,ປູ່ຂອງເພິ່ນແມ່ນຂາປະຈຳຂອງຮ້ານອາຫານຊ່າໂກ່ຈູ່. ດຽວນີ້,ທ່ານວັງກໍມັກອາຫານຂອງຮ້ານຊ່າໂກ່ຈູ່ຫຼາຍເໝືອນກັບຮຸ້ນປູ່.ເຖິງວ່າດຽວນີ້ ບ່ອນຢູ່ຂອງເພິ່ນຫ່າງຈາກຮ້ານຊ່າໂກ່ຈູ່ອ່າວໄກ,ແຕ່ເມື່ອມີເວລາ ເພິ່ນກໍຕັ້ງໃຈຂັບລົດປະມານ 40 ນາທີເພື່ອໄປກິນເຂົ້າຢູ່ຮ້ານຊ່າໂກ່ຈູ່.ທ່ານເວົ້າວ່າ:
"ຮ້ານນີ້ແມ່ນຮ້ານເກົ່າແກ່,ການບໍລິການແລະອາຫານກໍດີຫຼາຍ.ໃນລະດູໜາວ ຂ້ອຍມັກກິນຕົ້ມໄສ້ໝູໝໍ້ດິນ,ລະດູຮ້ອນມັກກິນຊີ້ນລວກນ້ຳມັນ,ແຊບຫຼາຍ."
ແຕ່ຊຸມປີ1950,ຮ້ານອາຫານຊ່າໂກ່ຈູ່ກໍເລີ່ມດັດແປງອາຫານບາງເຍື່ອງ,ແລະແຕ່ງອາຫານເຍື່ອງໃໝ່ເຊັ່ນ: ຊີ້ນໝູຫຼືເຄື່ອງໃນໝູໝໍ້ນ້ອຍ,ແລະໄດ້ເພີ່ມເຄື່ອງປຸງທີ່ຖືກປາກບາງຢ່າງ,ເຊັ່ນຜັກດອງ ເສັ້ນລ້ອນ ກຸ້ງແຫ້ງແລະເຫັດເປັນຕົ້ນ.ໂດຍສະເພາະແມ່ນເມື່ອດັດແປງວິທີປຸງແຕ່ງແລ້ວ,ຊີ້ນມັນໝໍ້ດິນມີລົດຊາດແຊບນົວກວ່າເກົ່າ,ຊີ້ນກໍອ່ອນນຸ້ມກວ່າເກົ່າ,ຊີ້ນມັນແຕ່ບໍ່ອືດທ້ອງ,ຊີ້ນບ່ອນບໍ່ມັນ ກໍບໍ່ຫຍາບ.ຕາມການກວດກາຂອງພາກສ່ວນອາຫານນະຄອນປັກກິ່ງ,ຊີ້ນໝູຕົ້ມຂອງຮ້ານອາຫານຊ່າໂກ່ຈູ່ ບໍ່ພຽງແຕ່ໄຂມັນຈະຫຼຸດລົງ 40% ເທົ່ານັ້ນ, ປະລິມານໂຄເລັສເຕລອນກໍໜ້ອຍລົງຢ່າງຫຼວງຫຼາຍ.ຖ້າກິນເປັນປະຈຳຍັງສາມາດເພີ່ມກົດໄຂມັນທີ່ບໍ່ອີ່ມຕົວທີ່ມີຜົນດີຕໍ່ຮ່າງກາຍຄົນເຮົາ.ປະຈຸບັນ,ນອກຈາກຄົນຈີນແລ້ວ,ຄົນຕ່າງປະເທດນັບມື້ນັບຫຼາຍກໍເລີ່ມມັກກິນອາຫານໝໍ້ດິນຂອງຮ້ານຊ່າໂກ່ຈູ່.ທ່ານມາຈູຊູ ໂທຊີອາກິ ຄົນຍີ່ປຸ່ນເວົ້າວ່າ:
"ອາຫານໝໍ້ດິນບໍ່ແພງ,ຄົນທຳມະດາກໍກິນໄດ້,ຂ້ອຍກໍມັກຄືກັນ,ມັນມີລົດຊາດທີ່ເຂັ້ມຂຸ້ນຂອງນະຄອນປັກກິ່ງ.ທຳມະດາແລ້ວ ຄົນຍີ່ປຸ່ນເຫັນວ່າ ການກິນອາຫານຮ້ອນໃນລະດູຮ້ອນບໍ່ດີ,ແຕ່ຂ້ອຍມັກກິນອາຫານໝໍ້ດິນ,ຂ້ອຍເປັນຂາປະຈຳຂອງຮ້ານຊ່າໂກ່ຈູ."
ເມື່ອໄດ້ພັດທະນາມາເປັນເວລາ 200 ກວ່າປີ,ຮ້ານຊ່າໂກ່ຈູ່ກໍມີອາຫານຫຼາຍປະເພດອຸດົມສົມບູນຂຶ້ນ.ນອກຈາກຂົ້ວແລະຕົ້ມຊີ້ນໝູແລ້ວ,ຊີ້ນໄກ່ ປາ ກຸ້ງ ປູ ປີງທະເລ ຫອຍ ກໍລ້ວນແຕ່ໄດ້ແຕ່ງໃສ່ໝໍ້ດິນໄດ້,ເຊັ່ນໄສ້ໝູແກ່ ລູກຊີ້ນໝູແລະເຕົ້າຮູ້ລ້ວນແຕ່ປຸງແຕ່ງແບບມີສີສັນ ກິ່ນຫອມແລະລົດຊາດດີ.ທ່ານຢາງຊູ້ຊົ່ງ ເຈົ້າຂອງຮ້ານຊ່າໂກ່ຈູ່ເວົ້າວ່າ,ອາຫານທີ່ມີຊື່ສຽງຂອງຮ້ານຊ່າໂກ່ຈູ່ບໍ່ພຽງແຕ່ຊີ້ນມັນໝໍ້ດິນເທົ່ານັ້ນ.ປະຈຸບັນ ອາຫານປະເພດຕ່າງໆມີຈຸດພິເສດທີ່ເບິ່ງແລ້ວງາມໜ້າກິນແລະອ່ອນນຸ້ມຄືຢູ່ໃນພະລາຊະວັງ,ພ້ອມກັນນັ້ນຍັງມີເອກະລັກແບບພື້ນເມືອງຂອງປັກກິ່ງອີກ.
"ຜ່ານຈາກການດັດແປງມາ 200 ກວ່າປີ,ເມື່ອພໍ່ຄົວທຸກເຊັ່ນຄົນປະດິດສ້າງຢ່າງບໍ່ຢຸດຢັ້ງ,ຮ້ານຊ່າໂກ່ຈູ່ໄດ້ມີອາຫານໝໍ້ດິນຫຼາຍສິບເຍື່ອງແລ້ວ,ມີລູກຊີ້ນໝູໝໍ້ດິນ ດູກຂ້າງໝໍ້ດິນ ເຄື່ອງໃນໝໍ້ດິນແລະໄສ້ແກ່ໝໍ້ດິນເປັນຕົ້ນ,ການປຸງແຕ່ງບາງຢ່າງລະອຽດຄືອາຫານພະລາຊະວັງ,ບາງຢ່າງປຸງແຕ່ງທຳມະຊາດຄືອາຫານພາກເໜືອ."
|
|
|
